Hlaing Info

ရှမ်းပြည်ရဲချုပ် ရဲမှူးချုပ် ကျော်ကျော်ဟန် ဂါရဝကြေး၊ လစဉ်ကြေး အတောင်းကြမ်းသည့်အပြင် လက်မှတ်ထိုးခိုင်းကာ ပြသနာရှာသည့်အတွက် လက်အောက်ငယ်သားများ စိတ်ညစ်နေ ဇူလိုင်လ ၂၆ ရက် ရှမ်းပြည်ရဲတပ်ဖွဲ့မှူး ရဲမှူးချုပ်ကျော်ကျော်ဟန်မှာ ရှမ်းပြည်အတွင်း စခန်းမှူး၊ နယ်ထိန်းခေါင်းဆောင်စသည့် နေရာများအတွက် ဂါရဝကြေး အတောင်းကြမ်းသည့်အပြင် လက်အောက်ငယ်သားများကို ပြသနာရှာသည့်အတွက် စိတ်ညစ်နေရကြောင်း ရှမ်းပြည်ရဲတပ်ဖွဲ့ အသိုင်းအဝိုင်းမှ သိရသည်။ ရဲမှူးချုပ်ကျော်ကျော်ဟန်မှာ စခန်းမှူး၊ နယ်ထိန်း နေရာရလိုသူများအတွက် ကျပ်သိန်း ရာနှင့်ချီ ဂါရဝကြေးပေးရပြီး နေရာကောင်းများအတွက် ကျပ်သိန်း ၂၀၀ ကျော်အထိ ပေးရကြောင်း၊ ကျိုင်းတုံ၊ တောင်ကြီး၊ တာချီလိတ်၊ မူဆယ်ကဲ့သို့ နေရာကောင်းများကို ငွေမပေးနိုင်ပါက မရကြောင်း ရဲတပ်ဖွဲ့နှင့် နီးစပ်သူတစ်ဦးက ပြောသည်။ “နေရာကောင်းရချင်ရင် ဂါကြေးကောင်းကောင်းပေးမှ ရတယ်။ သူက အရင် ရဲချုပ်ထက် ပိုတောင်းတယ်ဗျာ။ ပြီးရင်လစဉ်ကြေးကလည်း နေရာကောင်းဆို လစဉ် သိန်း ၁၀၀ လောက်အထိပေးရတယ်။ မကောင်းတဲ့နေရာတောင် ၅သိန်း၊ ၁၀ သိန်းပေးရတယ်” ဟု ၎င်းကပြောသည်။ ထို့ပြင် ရှမ်းပြည်ရဲတပ်ဖွဲ့မှူး ရဲမှူးချုပ် ကျော်ကျော်ဟန်မှာ ၎င်းနှင့် အဆင်မပြေသူများကို ပြသနာရှာကာ တောင်ကြီးမြို့သို့ခေါ်ပြီး သတိပေးလိုက်မှတ်ထိုးခိုင်းကြောင်း၊ ၎င်းနှင့် အဆင်ပြေသူများကိုမူ လစ်လျှူရှူ့ထားကြောင်း ရဲတပ်ဖွဲ့နှင့် နီးစပ်သူများက ပြောသည်။ ယင်းသို့ တောင်ကြီးသို့ခေါ်ကာ လက်မှတ်ထိုးရသူများမှာ လမ်းစရိတ်၊ ဂါကြေး၊ ဘော်ဒါကြေးစသည်တို့ကြောင့် အနည်းဆုံး ကျပ်သိန်း ၁၀၀ ခန့်ကုန်ကျသည့်အတွက် စိတ်ညစ်ကြရကြောင်း နီးစပ်သူတစ်ဦးက ပြောသည်။ “အဲဒီလိုတွေကုန်နေတော့ ဘယ်သူက ကိုယ့်အလုပ်ကိုယ်နိုင်မှာလဲ။ ပိုက်ဆံပဲဖိရှာရတော့မှာပေါ့။ အဲဒီတော့ မကောင်းနိုင်တော့ဘူးလေ။ သံသရာတွေလည်နေတော့တာပါပဲ” ဟု၎င်းကပြောသည်။ ၎င်း၏ အမျိုးသမီးမှာလည်း ယောက်ျားဖြစ်သူ၏ အာဏာကို အလွဲသုံးစားလုပ်ကာ ငွေရှာလေ့ရှိသူဖြစ်ကြောင်း နီးစပ်သူများက ပြောသည် ရှမ်းပြည် ပြည်နယ်ရဲတပ်ဖွဲ့မှူး ယာယီရဲမှူးချုပ် ကျော်ကျော်ဟန်မှာ ၂၀၂၅ ခုနှစ်၊ မတ်လအတွင်းက ရှမ်းပြည်သို့ ပြည်နယ်ရဲမင်းကြီးအနေဖြင့် ပြောင်းရွှေ့လာသူဖြစ်ပြီး နေပြည်တော်သို့ ပြောင်းသွားသည့် ရဲမှူးချုပ် ဝင်းမင်းသိန်းနေရာတွင် ဝင်ရောက်လာသူဖြစ်သည်။ လုပ်ပိုင်ခွင့်ကို အလွဲသုံးစားပြုကာ လက်အောက်ငယ်သားများထံမှ ငွေညစ်ခြင်းနှင့် အဂတိလိုက်စားခြင်းများ ပြောင်ပြောင်တင်းတင်း ကျူးလွန်နေခြင်းကြောင့် ရှမ်းပြည်တပ်ဖွဲ့အတွင်း အောက်ခြေရဲဝန်ထမ်းများနှင့် မိသားစုဝင်များမှာ စီးပွားရေးအရ ပိုမိုကျပ်တည်းလာပြီး တပ်တွင်းမကျေနပ်မှုများ ပြင်းထန်လျက်ရှိသည်။ လက်ရှိတွင် ရှမ်းပြည်အတွင်းရှိ ရဲတပ်ဖွဲ့၏ တရားစီရင်ရေးနှင့် အုပ်ချုပ်ရေးမဏ္ဍိုင်မှာ အထက်မှအောက်ခြေအထိ လာဘ်ပေးလာဘ်ယူမှုများဖြင့် အမြစ်တွယ် ပျက်စီးနေပြီး၊ ပြည်သူလူထုကို ကာကွယ်ရမည့်အစား ရာထူးအရှိန်အဝါဖြင့် ငွေညစ်ကိုယ်ကျိုးရှာသည့် ဒုစရိုက်ဂိုဏ်းသဖွယ် ဖြစ်လာနေသည့်အပေါ် ရဲတပ်ဖွဲ့ဝင်အချို့နှင့် ဒေသခံများက ပြင်းထန်စွာ ဝေဖန်နေကြသည်။ #MKN #HlaingInfo