Harari Regional Health Bureau የሐረሪ ክልል ጤና ቢሮ

በ2018 በጀት ዓመት የተመዘገቡ ተቋማዊ ስኬቶችን በማስቀጠል፣ የምግብ ጥራትና ደህንነትን ለማረጋገጥ በትኩረት እየተሰራ መሆኑ ተገለፀ። (ሐረር፤ ነሐሴ 13ቀን 2018 ) — የሐረሪ ሕዝብ ክልላዊ መንግሥት ጤና ቢሮ የጤናና ጤና ነክ አገልግሎትና ግብዓት ጥራት ቁጥጥር ዳይሬክቶሬት፤ ከወረዳ የምግብና ጤና ነክ ተቋማት ተቆጣጣሪ አካላት ጋር በመሆን “ዛሬን በመቆጣጠር፤ ነገን እንጠብቅ!” በሚል መሪ ቃል ያካሄደውን የ2018 በጀት ዓመት የቁጥጥር ዘርፍ የዕቅድ አፈጻጸም ግምገማ መድረክ  አጠናቋል። መድረኩ በበጀት ዓመቱ የተከናወኑ ዋና ዋና ተግባራትን፣ ያጋጠሙ ስትራቴጂካዊ ማነቆዎችን እና በቀጣይ ትኩረት የሚሹ አቅጣጫዎችን በጥልቀት በመገምገም ረገድ ሚናው ከፍተኛ ነው። የጤናና ጤና ነክ አገልግሎትና ግብዓት ጥራት ቁጥጥር ዳይሬክቶሬት ዳይሬክተር አቶ አህመድ ሱሌይማን እንደገለጹት፤ የግምገማ መድረኩ ዋና ዓላማ የላቀ አፈጻጸም በታየባቸው ስራዎች እውቅና በመስጠት ለቀጣይ የ2019 በጀት ዓመት ዕቅድ አፈፃፃም የተሻለ ውጤት ለማስመዝገብ የሚሰራበት ነው ብለዋል። አቶ አህመድ አክለውም፤ የጤናና ምግብ ጥራት ቁጥጥር ሥራ ተቋማዊ ጥረትን ብቻ ሳይሆን ሁለንተናዊ የባለድርሻ አካላት ቅንጅትን የሚጠይቅ በመሆኑ ከማህበረሰቡ  ጋር ጠንካራ ቅንጅት መፍጠር እንደሚገባ አሳስበዋል። የእቅድ ክትትልና ግምገማ ዳይሬክቶሬት ከፍተኛ አማካሪ የሆኑት ወ/ሪት ራኒያ መሐመድ በበኩላቸው፤ በክልል ደረጃ በምግብ፣ በጤና ግብዓቶችና ቁጥጥር በሚደረግባቸው ምርቶች ዙሪያ የታዩ ውጤቶች የሚበረታታ ነው ብለዋል። ውስንነቶችን ለመሙላት ጠንካራ ተቋማዊ የቁጥጥር ሥርዓት በመዘርጋት ሊሰራ እንደሚገባ አሳስበዋል። በቀጣይም ቢሮው አፈጻጸሞችን የመከታታል ስራዎችን አጠናክረው እንደሚሰራ  ተናግሯል።