Harari Regional Health Bureau የሐረሪ ክልል ጤና ቢሮ

የሀረሪ ክልል ጤና ቢሮ የሴቶችና ማሕበራዊ ጉዳይ አካቶ ትግበራ ዳይሬክቶሬት የላቀ አፈጻጸም እውቅናና ሽልማት ተበረከተለት የሀረሪ ክልል ጤና ቢሮ የሴቶችና ማሕበራዊ ጉዳይ አካቶ ትግበራ ዳይሬክቶሬት በስራው ላሳየው የላቀ አፈጻጸም ከፍተኛ እውቅና ተሰጠው። በጤናው ሴክተር የሴቶችና ማህበራዊ ጉዳዮች አካቶ ትግበራ ስራ አስፈፃሚ 16ኛው ዓመታዊ ጉባኤ ላይ በተካሄደው የሽልማት ስነ-ስርዓት፣ የቢሮው ዴይሬክቶሬት ላስመዘገበው የላቀ ውጤት የእዉቅና ምስክር ወረቀትና የዋንጫ ተሸላሚ መሆን ችሏል። የዳይሬክቶቱ ዳሬክተር ወ/ሮ ሙና አሊ ሽልማቱን አስመልክተው በሰጡት አስተያየት፤ ለዚህ ስኬት መገኘት ዋነኛው ምክንያት በተቋሙ ውስጥ የሴቶችና ማህበራዊ ጉዳዮች አካቶ ትግበራ ስራ የሁሉም የስራ ክፍሎች እይታና የጋራ አጀንዳ ሆኖ እንዲሰራ መደረጉ እንደሆነ ገልጸዋል። የተገኘው እውቅና እጅግ የሚያበረታታ መሆኑን የጠቀሱት ወ/ሮ ሙና፣ በቀጣይም ስራውን ይበልጥ በማጠናከር ለሁሉም ተደራሽ ለማድረግ በትጋት እንደሚሰራ አረጋግጠዋል። ዳሬክተሮ አክለውም፣ ይህ ውጤታማ ስኬት እንዲመጣ ከጎናቸው በመሆን አስፈላጊውን ድጋፍና አስተዋጽኦ ላደረጉት ለተቋሙ አመራሮችና መላው ሰራተኞች ያላቸውን ላቅ ያለ ምስጋና አቅርበዋል።