Harari Regional Health Bureau የሐረሪ ክልል ጤና ቢሮ

በሐረሪ ክልል የተቀናጀ የመጀመርያ ደረጃ ጤና እንክብካቤ እና የጤና ኤክስቴንሽን ፕሮግራምን ሞዴል ለማድረግ የሚያስችል የጋራ ውይይት ተካሄደ በሐረሪ ክልል የተቀናጀ የመጀመርያ ደረጃ ጤና እንክብካቤ አሃድ እና የጤና ኤክስቴንሽን ፕሮግራምን ሞዴል ለማድረግ ያለመ የጋራ ውይይት መድረክ ተካሂዷል። በውይይቱ ወቅት የጤና አገልግሎት አሰጣጡን ይበልጥ ለማሻሻልና ተስፋፊ ተመክሮዎችን ወደ ሌሎች አካባቢዎች ለማስፋፋት የሚያስችሉ ሀሳቦች ቀርበው ምክክር ተደርጎባቸዋል። የሐረሪ ክልል ጤና ቢሮ ኃላፊ ዶክተር አብዲ አሚን በመድረኩ ላይ እንደገለጹት፣ በመጀመርያ ደረጃ ጤና እንክብካቤ አሃድ የላቀ አፈፃፀም ያሳየውን የሀሰን ጌይ ጤና ተቋም በማጠናከር ተሞክሮውን ወደ ሌሎች ወረዳዎች የማስፋት ስራ እየተከናወነ ይገኛል። ቢሮው የመጀመርያ ደረጃ ጤና እንክብካቤ አሃድ እና የጤና ኤክስቴንሽን ፕሮግራምን በክልል ደረጃ ሞዴል ለማድረግ በትኩረት እየሰራ መሆኑን የጠቀሱት ኃላፊው፣ በተለይም የእናቶችና ህፃናት አገልግሎትን በማሳለጥና ጥራቱን በማሳደግ ረገድ ሰፊ እንቅስቃሴዎች እየተደረጉ እንደሚገኙ አስረድተዋል። አክለውም የጤና አገልግሎቱን ለማዘመን ወረቀት አልባ የመረጃ ስርዓትን የመተግበር ስራ ትኩረት ከተሰጣቸው መስኮች አንዱ መሆኑን ገልጸዋል። ከዚህ በተጨማሪም በጽዱ ኢትዮጵያ ንቅናቄ ስር ንጹህ አካባቢን በመፍጠር ጤናማ ማህበረሰብን ለማፍራት በቅንጅት እየተሰራ እንደሚገኝ አስታውቀዋል። በሌላ በኩል በክልሉ ጤና ቢሮ የእናቶችና ህፃናት እንዲሁም የጤና ኤክስቴንሽን ቡድን አስተባባሪ አቶ ያሚናስ አብዲ በበኩላቸው፣ ለሚከናወኑ የጤና ስራዎች ውጤታማነት የባለሙያዎችን አቅም የማብቃት እና አስፈላጊውን የግብዓት ድጋፍ የማቅረብ ስራዎች እየተከናወኑ መሆኑን ገልጸዋል። በተጨማሪም በወረዳ ደረጃ የሚሰሩ የጤና ስራዎችን የመደገፍና የቅርብ ክትትል የማድረግ ተግባር ተጠናክሮ መቀጠሉን አመልክተዋል። ወረዳውን በሁሉም ዘርፎች በማደራጀትና በማብቃት በአገልግሎት አሰጣጥ ረገድ ሙሉ በሙሉ ሞዴል ለማድረግ የተቀናጀ ጥረት እየተደረገ እንደሚገኝም አብራርተዋል።