RN.05 - Channel

~ ፍረጃው ቢቀር!! ~ ፖለቲካ ወይስ ኢጎ? | ሰይጣንን ማን አሳሳተው? ~~~~~~~~~~~ #የቢላል_ትዝብት . በአማፅያኑ መካከል እንደተፈጠረ በሚነገረው ህብረት ዙሪያ ያለው ክርክር እየተጧጧፈ እንደሆነ እየተመለከትን ነው። በእውነቱ በጉዳዩ ዙርያ ውይይቱና ክርክሩ መጧጧፉ ሰናይ ነው ባይ ነኝ። በተለይ መፈራረጁ ቢቀርና ሁሉም ሃሳቡን ያለመሸማቀቅ እንዲገልጽ እድሉ ቢመቻች ውይይቱና ክርክሩን ፍሬያማ ውጤት ላይ ያደርስ ነበር የሚል እምነት አለኝ። መፈራረጁ ግን አፍራሽና ውይይቱን ፍሬ አልባ የሚያደርግ ነው። የመፈራረጅ ነገር ሲነሳ በተለይ ጅዋር መሃመድ ላይ እየተደረገ ያለው የተለየ ነው። በመሠረቱ ጥምረቱን አስመልክቶ ጀዋር መሃመድ ያለው በርካቶች፣ ለምሳሌ ኤፍሬም ማዴቦ ካለው የተለየ አይደለም፣ ነገር ግን የ”ፋኖ” ሚዲያዎችና ፖለቲከኞች ሁለቱን ግለሠቦች የፈረጁባቸው መንገዶች ፈጽሞ ለእየቅል ናቸው። በጣም አስገራሚው ደግሞ የልደቱ አያሌው ነገር ነው። ርዕዮት ሚዲያ ላይ ቀርቦ ባደረገው ውይይት ላይ “ጀዋር ከአሁን በኋላ አብቅቶለታል፣ በተቃውሞ ፖለቲካ ውስጥ ቦታ የለውም!” በማለት ብያኔ ሲሰጥ ሳዳምጥ በጣም ነው የተገረምኩት። ልደቱ አያሌው፤ ከጥቂት አመታት በፊት “ልደቱ – ክህደቱ” እየተባለ ማንም የተቃውሞ ፖለቲከኛ ተወግዞ በማያውቅበት ደረጃ ተወግዞ የተተፋ ገጸ ባህሪይ አሁን ደርሶ የተቃውሞ ፖለቲከኝነትን ማእረግ ሰጪና ነሺ አድርጎ ራሱን ሲሾም መመልከት አጃዒብ የሚያሰኝ ነው። ልደቱ ጎበዝና ደፋር ለአላማው በጽናት የቆመ ፖለቲከኛ ነው። ላመነበት የፖለቲካ አቋም ሽንጡን ገትሮ የሚከራከርና በዚህም ብዙ ሂሳብ የከፈለ ሰው ነው። ነገር ግን የልደቱ የፖለቲካ ስብዕና የተገነባውና የፖለቲካ ትርክቱ የተቃኘው ኢትዮጵያን ላለፉት መቶ አመታት ከአንዱ ግጭት ወደ ሌላው ግጭት እያንከባለለ አሁን ለገባንበት ውጥንቅጥ የፖለቲካ ቅርቃር ምንጭ በሆነው የአማራ የበላይነት ፖለቲካዊ እምነት ነው። አዎን ልደቱ ፊትለፊት ወጥቶ የአማራን የበላይነት አያቀነቅንም። እንዲያውም የአማራ የበላይነት አቀንቃኝ መሆኑ ከእርሱም ከራሱ የተደበቀበት ሊሆን ይችላል፤ ነገር ግን የፖለቲካ ትንታኔው ፖለቲካውን ከምን አውድ እንደሚቀርበው ያሳብቅበታል። ይህም ነው ጀዋርን “ተቃውሞ ፖለቲካ ውስጥ ቦታ የለውም!” ሲል ብያኔ እንዲሰጥ ምክንያት የሆነው። ለልደቱና መሰሎቹ በአማራው ኤሊት የማይመራና የአማራውን ኤሊት ይሁንታ ያላገኘ የተቃውሞ እንቅስቃሴ በኢትዮጵያ እውቅና የለውም።ልደቱ በተለይ በአብይ ዘመነ መንግሥት ተሰዶ የዲያስፖራውን ማህበረሰብ ከተቀላቀለ በኋላ ብልጽግናና መሪው ላይ በሚሰነዝራቸው የሰሉ ትችቶች ሳቢያ ቀድሞ “አይንህ ላፈር!” ብሎት ከነበረው ማህበረሰብ ጋር ከመታረቅ አልፎ እንደ ጠንካራ መሪ እየተገለጸ መምጣቱ አደጋ ላይ እየጣለው የመጣ ይመስለኛል። እንዲያውም ነገሩ የአዛዚልን ታሪክ ነው ያስታወሰኝ። ታሪኩ እንዲህ ነው፡ አዛዚል የሰይጣን የቀድሞ ስሙ ነው። አዛዚል በጣም ለፈጣሪው የተገዛ፣ ለፈጣሪው የቀረበ ፍጡር ነበር። አዛዚል በጣም አማኝ ብቻ ሳይሆን በጣም አዋቂም ነበር። በእውቀቱ የተነሳ መላዒካዎች(መላክቶች) ሳይቀሩ አንዳንድ ነገሮችን እንዲያብራራላቸው፣ በአንዳንድ ጉዳዮች ላይ ፈትዋ (ብያኔ) እንዲሰጣቸው ይጠይቁት ነበር አሉ። ታድያ አንድ ጊዜ መላዒካዎች አላህ ዘንድ ያለው መጽሃፍ ላይ “አንድ ለእኔ ቅርብ የሆነ አገልጋይ” ያምፃል የሚል ነገር ያነቡና በጣም ይደናገጣሉ። ከዚያ አዛዚል ዘንድ ሄደው “እንዲህ የሚል ነገር አነበብንና ይህ በአላህ ላይ የሚያምጽ ባሪያ ከእኛ መካከል እንዳይሆን ሰጋን” ሲሉ ያማክሩታል። አዛዚልም “እሱን ነገር እኔም አንብቤዋለሁ፣ አብሽሩ እናንተን የሚያሳስባችሁ ጉዳይ አይደለም” ይላቸዋል።መላዒካዎቹ ግን “ጉዳዩ አስጨንቆናልና ይህ አመጸኛ ፍጡር ከእኛ መካከል እንዳይሆን ዱዓ አድርግልን” ይሉታል። አዛዚልም እጁን ከፍ አድርጎ “አላህ ሆይ ይህ አመጸኛ ፍጡር ከመላዒካዎቹ መካከል እንዳይሆን ፈቃድህ ይሁን” ሲል ዱዓ ያደርግላቸዋል። አዛዚል፣ ምንም እንኳን አዋቂ መሆኑ በመላዒካዎች ሳይቀር የተመሰከረለት ፍጡር ቢሆንም ለመላዒካዎቹ ዱዓ ሲያደርግ ያ ፈጣሪው ላይ እንደሚያምጽ የተተነበየለት ፍጡር እርሱ ራሱ ሊሆን እንደሚችል ማሰብ አልቻለም ነበር። ምክንያቱም ፈጣሪውን በማምለክ፣ በኢባዳው፣ በእውቀቱ የተመሰከረለት ፍጡር ነዋ! እንዴት በዚህ ይጠረጠራል! በኋላ ላይ የሆነውን ሁላችሁም ታውቁታላችሁ፤ፈተናውን ወደቀ፣ ፈጣሪውም ላይ አመጸ። ታዲያ ይሄንን የአዛዚልን ቂሳ (ትረካ) ሳዳምጥ አዕምሮዬ ውስጥ የመጣ አንድ ጥያቄ ነበር፤ ስዎች ብዙ ጊዜ ጥፋት ስናጠፋ ሰይጣን አሳሳተን እንላለን፣ እሺ ታድያ ሰይጣንንስ ማን አሳሳተው? ያገኘሁት መልስ ነፍስያው ወይንም በፈረንጆቹ ቋንቋ ኢጎው የሚል ነው። ኢጎ ወይንም ነፍስያ ከሰይጣን የከፋ ሃይል ነው። ሰይጣን ሲያሳስተን ከምንም በላይ ኢጎዋችንን ስለሚጠቀምበት ነው፣ ሰይጣንና ኢጎን መለየት በማንችልበት ደረጃ ተዛምደው ወደ ጥፋት እየወሰዱን ያሉት። ስለዚህ ጥንቃቄ ማድረግ ይመከራል። አንድ ሰው ፖለቲከኛ ሲሆን የፖለቲካ ትንታኔው የሚነሳው ከሚወግነው ሃይል አሰላለፍ ነው። ኢትዮጵያውያን በዜግነት አንድ ብንሆንም በብሄር በሃይማኖት የተለያየንና ለዘመናትም በመለዩዎቻችን ተቧድነን ስንቧቀስና ስነጨቋቆን ነው የኖርነው። ኢትዮጵያውያን እንደ ተጨማሪ መለዩዎቻችን አቅማችንም ለእየቅል ነው። ስለዚህም ኢትዮጵያ ውስጥ የሚከሰት ነገር በሙሉ የሚያስከትለው መዘዝ ሁሉም ላይ ተመሳሳይ ላይሆን ይችላል። አንድ ብቁ ፖለቲከኛ አላማውን ለማሳካት እይታውን ሰፋ በማድረግ በርካታ አውዶችን ከግምት ውስጥ ማስገባት ይኖርበታል። ይህንን ማድረግ ከተቻለ ትኩረቱ ከመፈራረጅ ይልቅ ሁሉንም ሊያስማማ የሚችል ቀመር ወደመፈለጉ ላይ ይሆናል። የሚበጀውም ይሄ ነው። . የእናንተስ ሃሳብ ምን ይመስላል?? ? የእናንተን እይታ በኮመንት መስጫው ላይ አጋሩን! ============= . ለተጨማሪ መረጃ ቴሌግራማችንን ተቀላቀሉ https://t.me/RNZeroFive