Allaev Uz

Ellikta kitobdan iborat to'plamni obunachilar orasida ko'pchiligi xarid qilgan bo'lsa kerak. Lekin, to'plam tarixi qanday boshlanganini bilasizmi? Bir haftaga deb qilingan aksiya qanday qilib yillar davomida yashab qolganini va muvaffaqiyatli mahsulotga aylangani tarixini videoda gapirib berdim. Youtubeda ko'rish: https://youtu.be/z_BqIn6VeH8?si=skIotntGO0hwpGRe Hozirda to'plamga 0x0x6 aksiya ketmoqda, ya'ni ustamasiz nasiyaga olish va olti oy davomida bo'lib to'lash mumkin. Xarid qilish: asaxiy.uz/u/6a2920e8c1195 PS: Xalq banki bilan muhim hamkorliksiz, ularning sezilarli ko'magisiz bu kabi aksiyalar ancha kam bo'lardi. Bu uchun bank jamoasiga alohida rahmat.

Putinning Rossiya iqtisodiyoti har doimgidanda yuksalayotganligi haqida gapini oʻqib qolib, propaganda haqida mashhur hazil esimga tushdi: Venesuelada bir avlod alishmasdan maoshlar 120 bolivardan 7 million bolivarga yetdi.

Kreativ reklama kanalida Profi Universitetini mana bu reklamasini ko'rib qoldim. Reklama kreativligidan tashqari undagi xabar aniqligi, zamonga mos tarzda oliy ta'limdan kutuvlar o'zgarayotgani ham manga yoqdi. G'oya egasiga ofarin!

2022-yil Twitterda Sam Altman ChatGPT degan xizmat paydo boʻlganini eʼlon qiladi va dunyo oʻzgaradi. Sam Altman yozgan tvit: “Bugun biz ChatGPT’ni ishga tushirdik. U bilan shu yerda gaplashib ko‘ring: chat.openai.com” Qanaqadir Raj: “Ambitsiya va g‘oya menga yoqdi, lekin hozirgi texnologiyani hisobga olsak, menimcha, bu sizlarning hozirgacha bo‘lgan eng yomon mahsulot konseptingiz.” Esingizdan chiqarmang, hayotda siz butun umr mana shunaqa Rajlarga duch kelasiz. Va yomoni ular koʻpincha begonalar emas, atrofingizdagilar yoki yaqinlaringiz boʻlib chiqishi mumkin.

Koʻp guvoh boʻlaman, bizneslar oʻzining asosiy ishi qolib ketib, mijozga kerak boʻlib qoladi deb boshqa narsalar va funksiyalar qoʻshish bilan ovora boʻlib ketadi. Tajribada xizmat ilovasiga kalkulyator qoʻshib qoʻyganini koʻrganman hatto. Biznes nima uchun yaratilgani eng muhimi boʻlishi zarur. Bu haqida Adizes juda sodda tilda yaxshi yozgan edi: Tashkiliy natijadorlik — bu tashkilotning o'zi qaysi maqsad yo'lida yaratilgan bo'lsa, o'sha maqsadga erishishini anglatadi. Sharikli ruchka yozsagina natijador hisoblanadi. Ammo ruchka yozmasa-yu, u bilan qulog'ingiz orqasini qashlay olsangiz-chi? Agar u aynan shu maqsad uchun yaratilgan bo'lsa, unda uni ruchka emas, qashlagich deb atash kerak. Stul haqida nima deyish mumkin? Ustida o'tira olsangizgina, stul haqiqiy stul bo'la oladi. Lekin nega uni sigir deb atash mumkin emas? Bemalol, faqat u sut bersagina shunday atashingiz mumkin. — Agar men sigirning ustida o'tira olsam, nega uni stul deb atamasligim kerak? — deb so'radi mendan bir talaba. — Chunki sigir ustida o'tirish uchun yaratilmagan, — deb javob berdim men. Shuni yana bir bor ta'kidlaymanki, bu dunyodagi hamma narsa, mutlaqo barcha narsa ma'lum bir maqsad bilan yaratilgan. Lampa yorug'lik beradi, pechka issiqlik ta'minlaydi va hokazo.

Жекилл ва Ҳайд фожиаси’ни ўқидим. “Яхши” инсон бўлиб яшаш “ёмон” инсон бўлиб яшашдан қийинроқ. Жамият биздан яхши бўлишни талаб қилади. Бу — босим. Натижада ёмон иллатлар ва босиб турадиган ахлоқсизликлар эгаси бўлган иккинчи “мен”имиз ўз дақиқаларини кутиб яшайди. Бизнинг иродамиз кучли бўлса имкон қадар иккинчи “мен”имизга танамиз ихтиёрини топширмаймиз. Доктор Жекилл эса бу хатони қилди. У ўзини иккига бўлди. Жамият кўриб турган намунали — Жекилл ва унинг ичида яшаб келган чиркин — Ҳайд. Доктор Ҳайдга ҳам яшаш имконини берди. Бу ҳам яшаб кўрсин, исталган пайтим барибир уни назорат қила оламан-ку, деб ўйлади. Лекин буни эплай олмади. Ҳамма инсоннинг ичида иккита шахс бор. Ҳамма “Жекилл” образида кўрингиси келади, лекин жойи келганда “Ҳайд”га ҳам назоратни бериб қўяди. Уни назорат қила оламан дейди, аслида эса унинг назорати — иллюзия. Тушунарли мисол: ҳозирги ижтимоий тармоқлар даврида ҳаммамиз ҳам ҳеч бўлмаганда бир марта бўлса ҳам аноним тарзда Ҳайдга айланганмиз. Кўринмас аккаунтларимизда, номаълум образларимизда ҳушимизга келганини қилиб кўрамиз. Доктор Жекилл ҳам аслида шу ишни қилганди. Шунчаки ўзининг иккинчи, зулматга бурканган аноним аккаунтини яратган эди. Афсуски унинг тажрибаси муваффақиятсиз чиқди. Ва якунда у ўқувчини савол билан қолдиради: ўзингни иккига бўлсанг, қайси ярминг ҳақиқий сен? Мен эса саволни даврга адаптация қилиб бераман: иккита аккаунтинг бўлса, қайси образинг, қайси аккаунтинг аслида ҳақиқий сен? P.S. Китоб таржимаси ўта сифатли чиққан. #ўқишга_нимадир

- Oka, Yunusobod nechpul? - Pasportiz bormi? Cola zero olgani kirgandim. Birorta oligarx kirib qolibdimi, joyida savdolashishdi shekilli desam, Yunusobod degan pivo borligini bilmas ekanman.

Biznesda kimdir 3-5 yoki hatto bir yilga nimadir maqsad aytsa, manga bu xuddi hech qachon boʻlmaydigan tuyilmoqda. Reja va strategiya qilish bitta narsa, lekin unga uzoq muddat sodiq qolish boshqa narsa. Mana buncha vaqtda mana bunaqa boʻlamiz, mana bunga erishamiz, mana bunaqa kompaniyaga (xohlagan insonlar birligi) aylanamiz deyish boshqa, real maydonda bunga sodiq qolib oxirigacha olib borish butunlay boshqa narsa. Real maydonda tashqi kutilmagan faktorlar boʻladi, qarshiliklar boʻladi, resurs yetishmaydi, bilim yetishmaydi, muammolar charchatadi, nimaga man qilishim kerak degan savollar boʻladi va yakunda hammasi oʻz oʻziga qaytadi. Ruschasiga "хотели как лучше получилось как всегда" boʻladi. Tarjimasi: Niyatimiz yaxshi edi, lekin natija odatdagidek boʻldi. Koʻpincha mana buncha vaqtda qilamiz deb kattaroq muddat aytilganda, bu muammo borligini tan olish va uni yechimini hozir boshlamasdan, ortga tashlash boʻlib qoladi. Muammo bor, mana bu yili yechamiz... Muhimi, haqiqatdan uzoq muddat strategiya qilib, unga uzoq muddat sodiq qolib bilganlar, qaysidir yil emas, oyma-oy, haftama-hafta unga qarab yurganlar haqiqatdan buyuk ishlar qilishadi.

Мисес айтмоқчи бўлган энг муҳим хулоса шундай: жамият тараққиёти ўз-ўзидан пайдо бўлмайди. Уни капитал яратган жамғарувчи, янгилик қилган техник ва риск олган тадбиркор яратади. Шунинг учун жамият тараққиётни хоҳласа, бу уч куч эркин бўлиши, ҳуқуқлари ҳимояланиши зарур. Жамғаришни жазоламаслик, тадбиркорликни душман кўрмаслик, Техник, муҳандис ва инноваторларга фойдали инфратузилма яратиш керак. Чунки бугунги қулай ҳаётимиз — кечаги кимнингдир жамғармаси, кимнингдир изланиши ва кимнингдир таваккали натижасидир. Тараққиётнинг сири ҳам шунда: уни озчилик яратади, лекин ундан кўпчилик фойдаланади.

Австрия иқтисодиёт мактабини ўрганиб бошладим. Ўқишни Ҳаекдан эмас, Людвиг Вон Мисесдан бошладим. Австрия мактабининг қизиқлиги, у иқтисодиётда бозорнинг мутлақ ўрнини қўллаб-қувватлайди ва унга аралашувни қисқартириш тарафдори. Бу мактабни ўрганишга ният қилганим, бугун Сингапур, Шветсария, Ҳон Конг, Ирландия иқтисодиёти шу мактаб тамойилларига энг яқин деб қаралади. Манга Мисеснинг тараққиётни тоза капиталистик қараш билан уч гуруҳга боғлиқ деб асослагани қизиқ туюлди. Кўпинча биз иқтисодий тараққиёт ҳақида гапирганда, унинг натижасини кўрамиз: сунъий интеллект, янги технология, тезроқ етказиб бериш, қулай хизматлар, арзонроқ маҳсулотлар, сифатлироқ технологиялар. Лекин бир савол камроқ берилади: бу тараққиётни аслида ким яратади? Людвиг вон Мисес бу саволга жуда аниқ жавоб беради. Унинг фикрича, иқтисодий тараққиётнинг асосий кучи уч гуруҳ инсонлар орқали пайдо бўлади: тадбиркорлар, техниклар (инженерлар) ва жамғарувчилар. Мамлакатда шу уччаласи эркин ва етарли бўлсагина, у ерда ривожланиш бўлади. Биринчи гуруҳ — тадбиркорлар. Улар энг қийин ишни қилади: бозорни тушунади, риск қилади, капитални қаерга йўналтиришни ҳал қилади. Тадбиркор одамларнинг ҳали тўлиқ қондирилмаган эҳтиёжларини кўради ва унга ечим таклиф қилади. Кимдир тезроқ етказиб беришни ташкил қилади, кимдир касалликка даво топади, кимдир сифатли китоб чиқаради, кимдир яхши телефонни ишончли кафолат билан сотади, кимдир янги хизмат яратади. Иккинчи гуруҳ — техниклар, муҳандислар ва мутахассислар (илм-фан ҳам). Улар тадбиркор айтган ғояни амалда жорий қилинишини таъминлайди ва ишлаб чиқаришни яхшилайди, янги усуллар топади, технологияларни ривожлантиради. Масалан, бир маҳсулотни аввал 10 кунда ишлаб чиқаришган бўлса, улар уни 5 кунда ишлаб чиқариш йўлини топади. Ёки маҳсулотни арзонроқ, сифатлироқ, қулайроқ қилишга ёрдам беради. Биринчи гуруҳ хавфни ўзига олиб, таваккалчилик эвазига ғояни олиб чиқса, уни реалликка айлантириш техниклар иши. Учинчи гуруҳ — жамғарувчилар. Улар топган пулини дарҳол истеъмол қилиб юбормайди. Пулининг бир қисмини сақлайди, инвестиция қилади ёки бошқаларга капитал сифатида тақдим этади. Оддий қилиб айтганда, келажакдаги катта натижа учун бугунги истеъмолдан воз кечади. Жамғарма бўлмаса, завод қурилмайди, янги маҳсулот ишлаб чиқарилмайди, катта лойиҳалар бошланмайди. Мисеснинг асосий ғояси шуки: тараққиётни ҳамма яратмайди, лекин унинг фойдасидан деярли ҳамма фойдаланади. Масалан, бугун оддий одам 200–300 долларга жуда кучли смартфон сотиб олиши мумкин. Бу смартфон орқали у суратга олади, видео кўради, бизнес юритади, пул ўтказади, фарзанди билан гаплашади, китоб ўқийди. Лекин шу даражага келиш учун йиллар давомида инвесторлар пул тиккан, муҳандислар технология яратган, тадбиркорлар ишлаб чиқариш ва савдо тизимини қурган. Оддий истеъмолчи бу жараённи яратмаган бўлиши мумкин, лекин унинг натижасидан фойдаланади. Бозор иқтисодиётининг кучли томони ҳам шунда. У тараққиёт яратган инсонларга фойда олиш имконини беради. Лекин вақт ўтиши билан бу тараққиётнинг катта қисми жамиятга тарқалади. Кеча фақат бойлар олиши мумкин бўлган нарса бугун оддий одам учун ҳам қулай бўлиб қолади. Бир вақтлар автомобиль ҳашамат эди. Бугун у миллионлаб оилалар учун оддий транспорт воситаси. Бир вақтлар интернет фақат айрим ташкилотларда бор эди. Бугун у ҳар бир телефонда бор. Буларнинг орқасида доим уч куч туради: кимдир эҳтиёжларни кўриб таваккал қилган,кимдир технологияни яхшилаган, кимдир пулини жамғарган ва буларни билвосита молиялаштирган. Бу фикр бизга тадбиркорликка бошқача қарашни ўргатади. Агар бозор соғлом ишласа, тадбиркорнинг фойда ортидан қилган ҳаракати жамият учун ҳам фойдага айланади. Чунки у мижозга керакли маҳсулотни топади, нархни туширишга ҳаракат қилади, хизматни яхшилайди, рақобатда қолиш учун янгилик қилади. Албатта, ҳар бир тадбиркор ҳам фойдали иш қилмайди. Ҳар бир бизнес ҳам жамиятга қиймат яратмайди. Лекин бозорнинг табиий синови бор: агар маҳсулот ёки хизмат одамга керак бўлмаса, одам унга пул бермайди. Демак, ҳақиқий тадбиркор доим мижоз эҳтиёжини тушунишга мажбур.

Ижтимоий тармоқда ўқитувчи ўқувчини урганлиги баҳс мавзусига айланибди. Кўриб чиқдим, одамлар иккига бўлинган. Катта қисм ўқитувчи томон, кичикроқ қисм ўқувчи томон бўлибди. Ҳар ҳолда манда шу тасаввур пайдо бўлди. Манимча, бу мавзуда ўқитувчи ҳақми ёки ўқувчими деган тор доирадаги баҳсни тўхтатиш керак. Бу ерда иккаласи ҳам хато қилмоқда: ўқувчи таълим тартибини бузгани учун, ўқитувчи бўлса қонунни бузиб куч ишлатгани учун. Ўзбекистонда қонун бошқага нисбатан куч ишлатишни яъни зўравонликни тақиқлайди. Қонунан, ўқитувчи ноҳақ. Биз эски замонда эмасмиз, таёқ билан тарбия қолоқлик эканлиги баҳслашадиган мавзу эмас. Лекин, тепада айтганимдек, ким ҳақлиги тор доирадаги баҳс ва муаммога ҳеч қанақа ечим олиб келмайди. Аслида, асосий савол таълим тизими бошида турган шахсларга бўлиши керак. Улар куч ишлатмасдан болаларни тартибга соладиган, қонунан жазолаб назоратни ушлаб қоладиган стандартни шакллантиришлари зарур. Аслида, муаммоли ўқувчига нисбатан жазо тизими шунақа бўлиши керакки, бола ва ота-она унинг натижаларидан қўрқиши керак, оғир вазиятда ўқитувчи болани уруши эмас, тизимдаги инструментга мурожаат қилиши зарур. Бу кейс ўқитувчи ёки ўқувчи эмас, таълим тепасидагилар (камида вазир даражаси) учун масъулият ва челленж. Бу кейсда асосий муаммо — мактабларда жисмоний жазонинг ўрнини босадиган, цивилизатсиялашган ҚОНУНИЙ жазо механизмининг етарлича ишламаслигидадир. Ўқувчи интизомни бузса, ўқитувчи жиноятчига айланиб қолмаслиги учун унга қўл кўтармаслиги керак. Бунинг ўрнига қатъий тизим ишлаши зарур. Улар нималар бўлиши мумкин? Ота-онага йирик жарима: Дарсни бузган ва ўқитувчини масхара қилган ўқувчи билан ўқитувчи уришиб ўтирмайди. Далолатнома тузилади ва боланинг ота-онасига дарҳол маъмурий жарима солинади. Чўнтагига жиддий зарар етган ота-она боласини ўзи тартибга чақиради. Мактабдан четлатиш ёки кейинги йилга қолдириш: Муаммоли ўқувчини вақтинча дарсдан четлатиш ёки умуман мактабдан ҳайдаш амалиёти осонлашиши керак. Ўқишни хоҳламайдиган 1 та ўқувчини деб, синфдаги қолган 30 нафар боланинг билим олиш ҳуқуқи бузилмаслиги лозим. Мактаб қамоқхона эмаски, безорини мажбуран ўқитса. Ҳуқуқ-тартибот органлари аралашуви: Бола (одатда 10-11-синф) ўқитувчига тажовуз қилса ёшига доир безорилик моддаси билан мактабдаги профилактика инспектори (Миллий Гвардия) аралашиб, болага маъмурий чора кўриши керак. Бироз ўтириб ишласа, яна маданий ва қонуний жазони ўнлаб хиллари келиб чиқса керак. Ёки ллмдан халқаро тажрибани яхшилаб сўраса ҳам бўлади. Муҳими, бирор ҳолатда далолатнома билан қилинган жазолар мактаб ёки ўқитувчининг рейтинги, бонуси ёки маошига таъсир қилмаслик керак. Тўғри тушунган бўлсам, ҳозирги тизимда бола баҳоси паст бўлса ёки мактабда қонунбузарлик қайд этилса, бу рейтингга таъсир қилади. Бундан қўрққан ўқитувчи ҳам, директор ҳам қонуний жазога бормасликка ҳаракат қилади. Хуллас, ўқитувчиларни ҳимоя қилиш — болаларни уришга яширинча рухсат бериш дегани эмас. Ўқитувчини мушт кўтаришга мажбур қилмайдиган, қоидабузар ўқувчи ва унинг ота-онасини қонуний жавобгарликка тортадиган механизм яратиш — масаланинг ягона тўғри ечимидир. Шундагина устоз жиноятчига айланмайди ёки зўравон устоз сабаб руҳий травмалар билан ўсган янги авлод чиқиб келмайди. Ҳозирги кейсда кимнидир расман ҳақ ёки ноҳақ деб эълон қилган билан, бунақа вазиятларни тўғри бошқарадиган тизим яратмасак, бу шунчаки муаммони кейинги кейсгача ёпиш бўлади. Тизимни яратиш бўлса, ўқитувчиларнинг эмас, таълим тепасидаги мансабдорларнинг масъулияти.

2026 йил 1 июндан кичик бизнес учун умумий солиқ режимига ўтишдаги чегаравий миқдорни 1 миллиард сўмдан 5 миллиард сўмга ошириш кутилмоқда. Умумий овқатланиш, савдо ва хизмат кўрсатиш соҳалари учун қўшилган қиймат солиғини тўлашнинг соддалаштирилган тартиби жорий этилади. Унга кўра, тадбиркорлар ихтиёрий равишда 6 фоиз ставкада ҚҚС тўлаб, фойда солиғидан озод этилиши ёки амалдаги умумий тартибда ишлашни давом эттириши мумкин бўлади.

Маскнинг суньий йўлдош орқали Starlink интернети Қирғизистонда ҳам ишга тушибди. Шунақа қилиб, Starlink Қозоғистон, Тоджикистон ва Қирғизистонда ишламоқда. Бир нечта телеграм каналлар Ўзбекистонда ҳам жараён бошланганини ёзишган эди.

Таиландга 60 кунлик визасиз кириш тартиби бекор қилинди Таиланд ҳукумати мамлакатга визасиз кириш ҳамда чегарада виза бериш (Visa on Arrival) тизимига ўзгартириш киритиш таклифини маъқуллади. “Дунё” ахборот агентлиги хабар беришича, ҳужжатга мувофиқ, 2026 йил 15 июлдан бошлаб 93 давлат, шу жумладан, Ўзбекистон фуқаролари учун Таиландга кириш учун жорий этилган 60 кунлик визасиз тартиб бекор қилинади. Янги тартибларга кўра, Ўзбекистон фуқаролари ҳам Таиландга визасиз кира олмайди. Виза олиш учун thaievisa.go.th сайти орқали онлайн мурожаат қилинади.

🇺🇿Prezident Shavkat Mirziyoyev Xalqaro kongress markazida Milliy kitobxonlik harakatiga start berish marosimida ishtirok etdi. Davlatimiz rahbari uchrashuvda “Milliy kitobxonlik harakati” dasturini davlat miqyosida faol qo‘llab-quvvatlash bo‘yicha alohida farmoyish imzolaganini qayd etdi. ⚡️Endilikda har yili mazkur tadbirning final bosqichi Prezident darajasida o‘tkaziladi. Dasturning umumiy yillik mukofot fondi 240 ming dollarni tashkil etadi. Bosh sovrin sohibi 50 ming dollar bilan taqdirlanadi. Bu yurtimiz tarixida kitobxonlik bo‘yicha eng salmoqli mukofot bo‘ladi. Mazkur harakat mamlakatimizning barcha hududlarini qamrab oladi. Unda umumta’lim maktablarining 1-sinfdan 11-sinfgacha bo‘lgan o‘quvchilari ishtirok etishi mumkin. Shuningdek, uchrashuvda Davlatimiz rahbari 2017-yildan buyon o‘tkazib kelinayotgan “Yosh kitobxon” tanlovining yoshlar qalbida ilmga mehr uyg‘otishdagi muhim o‘rnini alohida e’tirof etib, kuni kecha mazkur nufuzli bellashuvda ishtirok etgan barcha bilimdon yigit-qizlarimizni samimiy muborakbod etdi. #Mirziyoyev #kitobxonlik #harakat @alisher_sadullaev

Asaxiy Toshkent City do'konida sizni kutamiz😊!

Qurbon hayitiga katta yarmarka boshladik. Kitoblar narxi har qanday odamni hayron qoldiradi. Bu kichik aksiya emas, bir necha o'n mingta kitob tayyorlangan katta yarmarka. Yarmarkaning eng katta qismi 23-24-25-may kunlari Asaxiyning eng katta Toshkent City filialida bo'ladi. Undan tashqari online hozirdan buyurtma berib borsa bo'ladi: https://asaxiy.uz/product/product-list=mega-sale Kitoblar ro'yxati yangilanib bormoqda, jamoa qo'shishda davom etmoqda. Bu yilgi yarmarkada bu narxlarda kitob do'konlari ham xarid qilsa bo'ladi. Bir xil kitobdan 20tadan ortiq yoki chegaraga tushgan sondan ortiq sotilmaydi. Bayramdan oldin Toshkent City filialida kutamiz. Filial manzili: Furqat ko'chasi, 1A. Toshkent City Boulevardning Xalqlar do'stligi metrosiga qaragan tomoni.

"Jekill va Hayd fojiasi" sotuvga chiqdi. Bir marta o'qiladigan, keyin butun umr miyada qoladigan, dunyoqarashni o'zgartirib yuboradigan yana bitta kitobni o'zbek tilida chiqarish bizga nasib qildi. Bu jihatdan "Jekill va Hayd fojiasi" "1984", "Molxona", "Farangeyt bo'yicha 451 daraja", "Eljernonga atalgan gullar", "Dyuna" kabi kitoblarimiz bilan bir xil darajada turadi. O'tgan yili kitobni o'zbek tiliga tarjima qilinmaganligini bilganda, hayron bo'lib xazina topgandek xursand bo'lganimni jamoada yaxshi eslaydiganlar bor. Yaxshilik va yomonlik klassik tema. Lekin, uni kamdan-kam muallif Stivensonday o'ziga xos qilib ochib bergan. Stivensoncha qarashdan keyin, odam o'zini baholay boshlaydi. Kitobdan keyin har bir qadam, harakat odamni o'ylashga majbur qiladi, man bu harakatim bilan Haydni quvvatlamayapmanmi? Haydni qanday jilovlasam bo'ladi? Psixologik o'tkir asar bo'lishiga qaramasdan, kitob juda sodda tilda yozilgan. Uni o'zingiz o'qishingi, 14 yosh va undan katta farzandlarga ham o'qitishingiz zarur. Ulg'ayish davrida bolalar ichida turli xil salbiy hislar — jahl, hasad, e'tiroz va isyon uyg'onadi. Ular ko'pincha bu hislari uchun o'zlarini yomon inson deb hisoblab, qo'rqishadi yoki o'z-o'zidan nafratlana boshlashadi. Bu asar orqali ularga juda muhim va obyektiv haqiqatni tushuntirish mumkin: bunday qorong'u hislar istisnosiz hammada bor. Muhimi — ulardan qochish, yashirish yoki ulardan uyalish emas, balki ularni tan olish va jilovlashdir. Asardagi Jekillning eng katta fojiasi o'zining yomon tomonini tarbiyalash va nazorat qilish o'rniga, uni o'zidan ajratib, unga mutlaq erkinlik berganida edi. Zero, yomonlik, yomon hislatlar hammada bor. Uni jilovlash bizni yomon yoki yaxshi insonligimizni hal qiladi. Kitobni o'qib ko'rganlar, man nima demoqchi ekanligimni tushunib olishadi. Jamoamizni ajoyib kitob bilan samimiy tabriklayman.