Sputnik Аԥсны

Ашьапылампылтә клубқәа "Аԥсни" "10-еи" еиԥылоит нанҳәа 30 рзы, Москва. Аматч мҩаԥгахоит асааҭ 13: 00 рзы Cosmos Arena аҿы. Ахәаԥшцәа астадион ахь инашьҭхоит асиақәа рыла, ахәмарра иаҭаарц зҭаху зегьы азхьарԥш ала рыҽҭарҩыроуп. Амедиалига ахраҿа хацыркхоит нанҳәа 29 рзы. АК "Аԥсны" агәыԥ А аҿы ихәмарраны иҟоуп. Агәыԥтә етап аҿы аԥснытәи акоманда иацлабуеит FC Vibe," СиндЕкат", ФК 10, СКА Ростов.

Аҟәатәи ахәбатәи абжьаратә школ шьаҭанкыла аиҭашьақәргыларазы шықәсык ҳәа иаркуп, аҵаҩцәа еихшоуп — аиҵбыратәи ашкол аҵаҩцәа цоит 15-тәи ашкол ахь, аиҳабыратәи — латәарадатәи ашкол ахь. Абри атәы арадио Sputnik аҟны еиҭалҳәеит Аҟәа ақалақь ахадара аҵараусбарҭа аиҳабы Асҭанда Ҭаркьылԥҳа. Аҳабла ҿыц аҟынтәи ашколхәыҷқәа раагареи ргареи рзы автобус бжьаҵахоит ҳәа азгәалҭеит лара. Ҭаркьылԥҳа лажәақәа рыла, аҵарашықәс ҿыц алагамҭазы ашколқәеи ахәыҷбаҳчақәеи рҟны хәҭа-хәҭала акосметикатә усурақәа мҩаԥган. Инеиҵыху аиҿцәажәара шәазыӡырҩыр ҟалоит Sputnik асаит аҟны. #social

Аԥснытәи аделегациа Дамаск иԥылеит Лыԥха змоу Антиохиатәии Мрагылара зегьи Рпатриарх Иоанн X. "Аиԥылараан ҷыдала ахшыҩзышьҭра рыҭан адоуҳатә еицәажәарақәа рыҿиареи, аилибакаареи, апатуқәҵареи рзы акрызҵазкуа шьаҭаны иҟоу шәышықәсалатәи ақьырсиантә еимадарақәа", — аанацҳауеит Адәныҟатәи аусқәа рминистрра. АдәА рминистр Олег Барцыци апатриархи иазгәарҭеит аҭынчреи, аҳәоуеиқәшәареи, аилибакаареи рырӷәӷәареи, атрадициатә беиарақәа реиқәырхареи рҿы ауахәама аҵакы шамоу.

Аҵаратә усхк аҟны аусеицура иалацәажәеит Аԥсны аделегациа ахаҭарнакцәеи новосибирсктәи аҵараиурҭақәа рнапхгареи. Новосибирсктәи аҳәынҭқарратә техникатә университет аректор инапынҵақәа назыгӡо Игор Марчук далацәажәеит аспециалистцәа рзанааҭтә дырра аизырҳаразы апроект ахьынарыгӡо ААУ-и "Амшынеиқәафымцамчи" аус рыцура шышьақәыргылоу атәы. Аԥыза-министр ихаҭыԥуаҩ Џьансыхә Нанба Аԥсны НАТУ аус ацура ацҵара ишазҿлымҳау шьақәирӷәӷәеит, иазгәеиҭеит атәыла анапхгара еицырзеиԥшу аԥшьгарақәа ацхыраара шрырҭало. Иара убасгьы ареспублика аделегациа дырԥылеит Новосибирсктәи аекономикеи анапхгараҭареи рҳәынҭқарратә университет аректор Павел Новгородов. Уи аԥснытәи аҵаратәи аҭҵаарадырратәи усҳәарҭақәа аус рыцура ашьақәыргылараз алшара ахәаԥшра дшазыхиоу иҳәеит.

1 500 цыра инеиҳаны афымцамчԥхьаӡагақәа ықәыргылоуп Гәдоуҭа араион аҟны. Абри атәы арадио Sputnik аҟны иҳәеит "Амшынеиқәафымцамч" Гәдоуҭа араионтә ҟәша анџьныр хада Денис Ажьиба. Аҩнеихагылақәа рҟны мызкы-ҩымз ирылагӡаны аусурақәа хыркәшахоит ҳәа азгәеиҭеит иара. "Араион аҟны афымцамчԥхьаӡагақәа рықәыргылара ҳшаҿыц ҳаҿуп. Амаругақәа ахьықәҳаргылаз инхо ауааԥсыра афымцамч еиҳагьы еиҷаҳауа иалагеит", — иҳәеит Ажьиба. 🖇 2026 шықәса иалагӡаны Аԥсны 60 нызқь цыра афымцамчԥхьаӡагақәа ықәыргылахоит. Урҭ раахәаразы 700 млн мааҭ азоужьхоит. Инеиҵыху аиҿцәажәара шәазыӡырҩыр ҟалоит Sputnik асаит аҟны. #social

Акциа "Акино аҵх" Аԥсны имҩаԥгахоит нанҳәа 29 рзы Урыстәыла Акультура аминистрреи Адәныҟатәи аусқәа рминистрреи рыдгыларала. Ауснагӡатә мҩаԥгахоит есышықәса нанҳәа 27 рзы иазгәарҭо урыстәылатәи акино амш инадҳәаланы ҳәа аанацҳауеит Аԥсны иҟоу Урыстәыла ацҳаражәҳәарҭаҟны. Акинофильмқәа "Ангелы Ладоги", "Буратино", "Чебурашка 2", аибашьратә драма "Малыш" абри аихшанҵа инақәыршәаны идырбахоит.   Аԥснытәи аҳәынҭфилармониа: ▫️10:00 - "Буратино", ▫️12:00 - "Чебурашка 2" ▫️14:00 - "Малыш" ▫️16:00 - "Ангелы Ладоги"   Маҷара, Гәлиа ихьӡ зху акультура аҩны: ▫️13:00 - "Буратино" ▫️15:00 - "Малыш" ▫️17:10 - "Чебурашка 2" ▫️19:10 - "Ангелы Ладоги"   Гәдоуҭа акультура аҩны: ▫️14:00 - "Чебурашка 2" ▫️15:50 - "Малыш" ▫️17:50 - "Буратино" ▫️19:40 - "Ангелы Ладоги"   Гагра акультура аҩны: ▫️13:00 - "Буратино" ▫️14:50 - "Чебурашка 2" ▫️6:40 - "Ангелы Ладоги" ▫️18:40 - "Малыш". Аҩналара хәыда-ԥсадоуп.

️ ️☕️ Иарбан каҳуоу еиҳа еиӷьашәшьо? Иахьа Аҟәа имҩаԥысуа Жәларбжьаратәи акаҳуа-фест "Акаҳуа цәқәырԥа" иаҭааит Бадра Гәынбеи Сергеи Кириенкои. Аԥсны ахада бзиа ибоит ашьақар змам аклассикатә каҳуа. Урыстәыла ахада Иусбарҭа анапхгаҩы актәи ихаҭыԥуаҩ иакәзар — еснагь акаҳуа хаа еиҳа иеиӷьеишьоит. #social

Аԥсни Новосибирски рыбжьара атуризм аҿиареи атуристтә лшарақәеи ирылацәажәеит ареспублика аделегациеи новосибирсктәи атуристтә еилахәырақәа рхаҭарнакцәеи. Иара убас аиԥылара иалахәын арегион аекономикатә ҿиара аминистр Светлана Шарпф ҳәа аанацҳауеит Аминистрцәа реилазаара апресс-маҵзура. Лара дазааҭгылеит аобласт иамоу аԥыжәарақәа —аидарақәа раагаразы иҿиоу асистемеи, иреиҳау аҵараиурҭақәеи аколлеџьқәеи, IT-комплекси. Шарпф иажәақәа рыла, Новосибирсктәи аобласт азҿлымҳауп Аԥсни иареи русеицура аҿиара, атуризм аусхкгьы уахь иналаҵаны. Аԥснытәи аделегациа ахада, аԥыза-министр ихаҭыԥуаҩ Џьансыхә Нанба аиԥылара алахәылацәа ирзеиҭеиҳәеит ареспублика алшареи асасцәа рыдкылара ишазыхиоуи ртәы. Аганқәа ирылацәажәеит Новосибирск Аԥсны акультура амшқәа рымҩаԥгареи атуристтә еилахәырақәа рхаҭарнакцәа рзы ареспубликахь аӡыргаратә тур алыршареи.

Гәдоуҭа араион Хыԥсҭа ақыҭан ԥшь-трансформаторк ықәыргылоуп. Абри атәы арадио Sputnik аҟны иҳәеит "Амшынеиқәафымцамч" Гәдоуҭа араионтә ҟәша анџьныр хада Денис Ажьиба. Аусурақәа рынагӡаразы иахәҭаз амаругақәа рыла "Амшынеиқәафымцамч" еиқәнаршәеит ҳәа азгәеиҭеит иара. "Хыԥсҭа ақыҭан афымцацәаҳәақәа ирықәыз аидара даара ирацәан. Уажәы ацәаҳәа ҿыц аргылара ҳаҿуп, уаҟа 63 трансформатор ыҟоуп, убарҭ еихшахоит", — иҳәеит Ажьиба. #social

Жәларбжьаратәи акаҳуа-фест "Акаҳуа цәқәырԥа" аатит Аҟәа. Асасцәа ирзыԥшуп Аԥснытәи акаҳуажәырҭақәа жәаҩа. Урҭ зегьы рхатәы ҭоурыхи рфирматә рыжәтәқәеи ӡырыргоит. Иара убраҟа иаатуеит 16 нхамҩа злахәу аџьармыкьагьы. Аҭааҩцәа ирыдыргалоит ашәқәа, ацха, ахшлыҵ, аҳамҭаҷқәа. Амш иалагӡаны агьамабарақәа мҩаԥыслоит. Аиҿкааҩцәа иаздырхиеит арккаратә программагьы. Алекториаҿы имҩаԥгахоит алекциақәа ԥшьба, аҭырқәа акаҳуа аршразы аҟаза-икласс, адрип-каҳуа агьамабара. Иара убасгьы афестиваль иалахәуп асас-зонаҿы ицәыргоу Урыстәыла, Венесуела, Никарагуа рделегациақәа. Аус рулоит амилаҭтә стендқәа, имҩаԥгахоит агьамабарақәа, аҟаза-иклассқәа, бжьыцқьала имҩаԥысуа ақәгыларақәа. Аиҿкааҩцәа ахәыҷқәа рзгьы апрограмма азгәарҭеит — аус аулоит ахәыҷтәы зона. Иара убас аусмҩаԥгатә аҿы апроект "Аԥсны амедиа ҿыцқәа" аҟынтәи амедиазона еиҿкаахоит. Асасцәа ирылшоит абаннер аҿаԥхьа рфотсахьақәа рҭыхра, авидеонҵамҭа кьаҿқәеи, мамзаргьы 20 секунд рҟынӡа аинтервиу маҷқәеи ранҵара. 🖇 Афестиваль "Акаҳуа цәқәырԥа" аиҿкааҩцәа: ИЕА "Аԥсны акоманда", ИЕА "Аинтеграциа".

Аԥсны имҩаԥысуаз "Музыка Гордых" 35 000-ҩык ахәаԥшцәа еиднакылеит. Афестиваль атәыла аҭоурых аҿы зегь реиҳа зымҽхак ҭбаау амузыкатә хҭысқәа ируакхеит. Иара мҩаԥысуан хә-сааҭк инарзынаԥшуа, Аԥсны ауааԥсыреи аконцерт ахь иааз урыстәылауааи рҿаԥхьа иқәгылеит артистцәа рацәаҩны. Аусмҩаԥгатә иаҭааит ҳаҭыр зқәу асасцәа — Урыстәылеи Аахыҵ Уаԥстәылеи рҟынтәи аофициалтә делегациақәа, Аԥсны иҟоу Никарагуеи Венесуелеи рыцҳаражәҳәаҩцәа. Аконцерт ахыркәшамҭаз инагӡан ашәа "Конь". Уи еицырҳәеит Николаи Расторгуеви Сулҭан Лагучеви, зықьҩыла еизаз ажәларгьы зымҩа игыламызт — еицырдыруа ашәа рыцнарыгӡон. "Конь"— ари ахақәиҭреи, агәаҳәареи, агәамчи иргимнуп, урыстәылатәии аԥснытәии азыӡырҩы еиԥшны ирзааигәоуп. Ас еиԥш арҿиаратә еиҩызара Урыстәылеи Аԥсни ркультурақәа еидызкыло, рзеиԥш ҭоурыхтә шьаҭақәеи рдоуҳатә акзаареи инаҵшьны иазгәазҭо афестиваль акәхеит", — азгәанаҭеит афестиваль апресс-маҵзура. Афестиваль аҿы аицлабра аихшьаалақәа ҟарҵеит. Аицлабрахь Урыстәылеи Аԥсни ррегионқәа зегьы рҟынтәи 2 048 зыҳәа нашьҭын, ажиури иалырхит 21-ҩык афиналистцәа рҟынтәи иреиӷьӡақәаз быжьҩык. Урҭ рашәақәа арадиостанциа "Гордость" афедералтә еиҭныԥсахлара иалагалоуп. "Музыка Гордых" ҿыц аҩра иалагаз амузыкантцәа рырҿиаратә мҩа арҿиараҿы маруганы иҟалеит. Дара ирбоит ҳара ҳҿы ус баша ухы аарԥшра акәымкәа, ииашаҵәҟьаны афедералтә радиостанциахь унеины аестрада аеҵәақәа ҳәа ззырҳәо ауааи уареи сценак ахь шәеиццәырҵыр шалшо", — иҳәеит Николаи Расторгуев ифонд адиректор Дмитри Лукашин. 🖇 "Музыка Гордых" афестивали аицлабреи еиҿнакааит Николаи Расторгуев ифонд, акультуратә аԥшьгарақәа рзы ахада Ифонд ацхыраарала.

Гәдоуҭа араион Џьырхәа ақыҭан афымцалашара амчхара аиӷьтәразы 50 шьаҟа ргылоуп иҳәеит "Амшынеиқәафымцамч" Гәдоуҭа араионтә ҟәша анџьныр хада Денис Ажьиба. "Иара убас атрансформаторқәа хԥа ықәыргылахоит: акы шьақәыргылоуп, аҩбатәи иахьатәи амш иалагӡаны иқәыргылахоит, ахԥатәи — хара имгакәа. Афымцашьаҟақәа 60-70-тәи ашықәсқәа рзы иргылаз роуп. Зынӡа 50 ҭӡы инареиҳаны иҟан, урҭ еихшаны атрансформаторқәа ирҿакхоит", — иҳәеит Ажьиба. #social

Бадра Гәынбеи Сергеи Кириенкои иалахәын Башкортосҭан еиҭашьақәнаргыло Диоскураа рыԥшаҳәа ахәҭаҿы арт-обиект "Аиҩызара аҵла" аартра. Арт-обиект агәҭа еиҭаҳауп Аԥсни Урыстәылеи рыжәларқәа рыбжьара шықәсырацәалатәи аиашьаратә еимадарақәа ирсимволу аиҩызаратә ҵла. Арт-обиект Свердловсктәи аобласт аҿы иҵху агранит иалхуп. Арымӡ ақәҟьаҿы ишьақәырӷәӷәоуп зыԥсҭазаара Аԥсны иадызҳәалаз, ареспублика акультуреи, аҭҵаарадырреи, аҵаралашареи рырҿиараҿы злагала дуу аԥснытәии урыстәылатәии аусзуҩцәа дуқәа рыхьӡқәа зну агәалашәаратә хьӡынҵақәа 15. Арт-обиект аартра — урыстәылатәи арегионқәеи егьырҭ апартниорцәеи рыцхыраарала Диоскураа рыԥшаҳәа арԥшӡаразы мҽхакыҭбаала аусурақәа рыцҵара ауп.

Ҭырқәтәылеи Аԥсни рҟынтәи артистцәа Дамаск имҩаԥысуаз 63-тәи Жәларбжьаратәи ацәыргақәҵаҿы аԥсуа кәашара еицыкәашеит. Арҿиаратә қәгылара азгәаҭамызт ҳәа адырра ҟанаҵоит АдәАР. "Ари арҿиаратә қәгылара акультура ажәларқәа реилибакаара ишацхраауа узырбо ҿырԥштәуп. Амузыкеи акәашареи аҭырџьман дырҭахӡам, аполитикатә мшхәаԥштә анҭыҵ аинырратә лшарақәа рыԥшаара алдыршоит", — аҳәоит атекст аҿы. 🖇 Ацәыргақәҵа мҩаԥысуеит цәыббра 4 рҟынӡа, уи иалахәуп 60 инареиҳаны адунеи атәылақәа рҟынтәи зықьҩык инарзынаԥшуа аилахәырақәа, аиҿкаарақәа, аҳәынҭқарратә усбарҭақәа.

Америкатәи аԥарԥалыкь 250 рҟынӡа аҵиаа хкқәа аԥхасҭа рырҭар алшоит иҳәеит Аекологиеи аԥсабара ахархәареи рзы аилак ахантәаҩы Савели Ҷыҭанаа. "Ашәырқәа рыдагьы абасҟак аҵиаа хкқәа аԥхасҭа рынаҭоит. Анхаҩы аԥарԥалыкь ахьибаз амахәқәа ааԥҟаны ибылтәуп. Иахьатәи аҭагылазаашьа шыҟоу ала, техникала еибыҭоу агәыԥ аԥҵатәуп, избанзар, ас ишцо ала шықәсык-ҩышықәса рыла иахыҵәар ҟалоит", — иҳәеит аеколог. Аԥсны есышықәса еиҳамхозар еиҵахаӡом апальмақәеи ашыци зфо ахәаҷақәа рхыԥхьаӡара ҳәа азгәеиҭеит иара. Инеиҵыху аиҿцәажәара шәазыӡырҩыр ҟалоит арадио Sputnik аҟны. #social

Баграт Шьынқәба ихьӡ зху Аҟәатәи абжьаратә школ №1 амедицинатә класс ахь ашәҟәқәа рыдкылара иалагеит. Арзаҳалқәа рыдыркылоит Аҵара аминистрраҟны, урҭ нарышьҭыр рылшоит зԥеиԥш амедицина адҳәалара згәы иҭоу Аԥсны еиуеиԥшым ашколқәа, 10-тәи аклассқәа рҵаҩцәа. Акандидатцәа ахыԥхьаӡалахоит аиҿцәажәара алҵшәақәа рыла. Апрофильтә 10-11-тәи аклассқәа рҿы аҵара аҵаҩцәа апрофильтә дисциплинақәа инарҵауланы рыҭҵаареи ԥхьаҟатәи азанааҭтә ҵара заанаҵы аҽазыҟаҵареи алдыршоит. Апроект нарыгӡоит Аҵара аминистрра ацхыраарала. 🖇 Амедицинатә класс раԥхьаӡакәны иаадыртит Баграт Шьынқәба ихьӡ зху Аҟәатәи абжьаратә школ №1 аҟны цәыббра 1 2025 шықәсазы. Уаҟа аҵара рҵоит аиҿцәажәара алҵшәақәа рыла ирыдыркылаз Аԥсны еиуеиԥшым ашколқәа рҟынтәи 10-ҩык аҵаҩцәа. Аҵара апрограмма ҵаулоуп, ихадоу амаҭәарқәа — ахимиеи абиологиеи амчыбжь аҩнуҵҟа ԥшьба- ԥшьба сааҭ рзалхуп.

Жәларбжьаратәи ацәыргақәҵа аадыртит Дамаск. Ауснагӡатә иалахәын Шьамтәыла ахада Аҳмад аш-Шараа, иԥшәмаԥҳәыс Латифа ад-Друби, Шьамтәылатәи аиҳабыра рхаҭарнакцәа, иара убас ацәыргақәҵа иалахәу аҳәынҭқаррақәа рделегациақәа рхадацәа. Аусмҩаԥгатә далахәуп аԥснытәи аделегациа напхгара азҭо Адәныҟатәи аусқәа рминистр Олег Барцыц. "Шьамтәылатәи аԥыза иқәгылараҿы иазгәеиҭеит аџьармыкьа ароль ду шамоу ахәаахәҭра-економикатә еимадарақәа реиҭашьақәыргылараҿы, аинвестициақәа радыԥхьалараҿы, Шьамтәыла арегионалтәи жәларбжьаратәии аекономикатә ҵакырахь архынҳәраҿы", — рҳәеит Адәныҟатәи аусқәа рминистрраҟны. 🖇 Ацәыргақәҵа мҩаԥысуеит цәыббра 4 рҟынӡа, уи иалахәуп 60 инареиҳаны адунеи атәылақәа рҟынтәи зықьҩык инарзынаԥшуа аилахәырақәа, аиҿкаарақәа, аҳәынҭқарратә усбарҭақәа.

Гагра араион лашарада иаанхеит АҲ "Бзыԥ" аҿы иҟалаз авариа иахҟьаны. Арҽеиратә усурақәа цоит ҳәа аанацҳауеит "Амшынеиқәафымцамч".

Новосибирск иҟоу Аԥсны аделегациа Аџьынџьтәылатә еибашьра Ду аҟны иҭахаз ргәаладыршәеит. Ареспублика ахаҭарнакцәа Амемориалтә ансамбль "Ахьӡ-аԥша Амонумент" аҿы Ҿыцәаара зқәым амца аҿаԥхьа ашәҭқәа шьҭарҵеит ҳәа аанацҳауеит Аминистрцәа реилазаара. Аделегациа ахада, аԥыза-министр ихаҭыԥуаҩ Џьансыхә Нанба иазгәеиҭеит аԥсуа жәлар асовет солдаҭцәа рфырхаҵара ҳаҭыр ду шақәырҵо, ԥхьаҟатәи абиԥарақәа рзы аҭоурыхтә гәалашәара аиқәырхара аҵак ду шамоу азгәеиҭеит. 🖇 Аԥсны ахаҭарнакцәа Новосибирск имҩаԥысуа афорум "Технопром‑2026" иалахәуп. Афорум хымш имҩаԥыслоит, атема — "Урыстәылатәи аҭҵаарадырра атехнологиатә ԥхьагылара шьаҭас иамоуп". Иара еиднакылеит 70 инареиҳаны Урыстәыла арегионқәа рхаҭарнакцәеи, Аԥсни, Беларуссиеи, Китаии, Ҟазахсҭани, Африкатәи атәылақәеи рҟынтәи асасцәеи.