Sputnik Аԥсны

Гагра араион ахәҭак лашарада иаахеит афымцацәаҳәа аԥҵәара иахҟьаны. "Лашарада иҟоуп астанциа маҷқәа "Баӷрыԥсҭа", "Гьечрыԥшь", "Цандрыԥшь-ахага". Ажәытә Гагра инаркны Ԥсоунӡа алашара ыҟаӡам", — ҳәа аанацҳауеит Аенергетика аминистрра. 310 метра зоуроу ацәаҳәа агәаҩара иҭысуеит, убри аҟнытә атехника уахь инеиуам, аԥхасҭа уаха аиҭашьақәыргылара залыршахом.

Аибашьра ашықәсқәа раан ҳаидызкылоз акык-ҩбак ашәақәа аконцерт "Сара сымҩа" апрограмма иагәылоуп ҳәа арадио Sputnik иазеиҭеиҳәеит Одиссеи Аџьынџьал. "Аибашьра (Аԥсны аџьынџьтәылатә еибашьра —аред.) иналагаз аҽны Ҭырқәтәыла аконцерт ҳаман. Иҟалаз анҳаҳа 40-45 ҳџьынџьуаа ҳацны Аԥсныҟа ҳааит. Исгәалашәоит, аибашьраҿ ҳаикәшаны ҳаштәаз, сҩызеи сареи аԥсуашәа аацәыраҳгеит. Уи зегьы архәыцит, ргәы шьҭнахит. Урҭ ашәақәа акык-ҩбак аконцерт апрограмма иагәылалоит" , — иҳәеит иара. Инеиҵыху аиҿцәажәара шәахәаԥшыр ҟалоит абра. 🖇 Одиссеи Аџьынџьал — Аԥсны зҽаԥсазтәыз артист. Хаҭалатәи иконцерт "Сара сымҩа" мҩаԥысуеит ԥхынгәы 10 асааҭ 19:00 рзы Ражьден Гәынба ихьӡ зху Аҳәынҭқарратә филармониаҿы. Аконцерттә программа ишагәылоу аԥсуа, аурыс, англыз, аиталиан шәақәа рыла. #social

Анапхгарабжьаратә комиссиа ацхантәаҩцәа реиԥылара мҩаԥысит Аԥсны Аминистрцәа реилазаараҿы. Аԥыза-министр Владимир Делба акомиссиа алахәылацәа 2026–2030 шықәсақәа рзы Аԥсны асоциал-економикатә ҿиара ацхыраара азы Аинвестициатә программа анагӡара, зегь раԥхьаӡа иргыланы амҩақәеи аенергетикеи ирыдҳәалоу аинфраструктуратә проектқәа уҳәа убас егьырҭ азҵаарақәа ишрылацәажәо еиҭеиҳәеит. Урыстәылатәи аделегациа напхгара аиҭоит аекономикатә ҿиара аминистр ихаҭыԥуаҩ Сергеи Назаров. Иара иазгәеиҭеит, Аԥсны ахада Бадра Гәынбеи иареи реиԥылараҿы амҩақәа реҭашьақәыргыларатә усурақәа, анаплак маҷқәа рзы льготлатәи акредитқәа рыҭара, анаплак маҷи абжьаратәи анаплакқәа рыцхыраара, иара убасгьы, Урыстәылеи Аԥсни АҩАР аинформациатә центр аргылара азҵаарақәа ишрылацәажәаз.

Бадра Гәынбеи Урыстәыла аекономикатә ҿиара аминистр ихаҭыԥуаҩ Сергеи Назарови аекономикатә усеицура азҵаарақәа ирылацәажәеит. Аҩ-ганк азааҭгылеит ихадоу аинфраструктуратә проектқәеи ахәыҷтәы хәышәтәырҭа аргылареи ҳәа аанацҳауеит аҳәынҭқарра ахада ипресс-маҵзура. Гәынба иазгәеиҭеит, АЖәАФ-2026 азы аекономикатә ҿиареи льготла акредитқәа рыҭаратә программа анагӡареи рзы "амҩатә хсаала" шазԥхьагәаҭаз. Ари апрограмма аҳәаақәа ирҭагӡаны азҵаарақәа жәпакы ирылацәажәатәуп. Сергеи Назаров иазгәеиҭеит аекономикатә рбагақәа рдинамика бзиа, атәыла аҩнуҵҟатәи азеиԥшхашәалахәы (ВВП), абиуџьет ахашәалахәқәеи уахь иналаҵаны. Иара игәаанагарала, апроект ҿыцқәа рынагӡара Аԥсны аринахыстәи аҿиара иацхраауеит.

Дарбанзаал артист ирепертуар аҿы иҟазароуп иара ицәаныррақәа цәырызго ашәа ҳәа азиԥхьаӡоит Аԥсны зҽаԥсазтәыз артист Одиссеи Аџьынџьал. "Ашәа ус баша ииӡом, уара гәаҭала уеимыздо ацәанырра ауп изхылҵуа. Ус иҟоу ашәа апрограммаҿгьы иаанужьуеит. Ашәа зҳәо ҳаамҭа кьаҿуп, аҭоурыхаҿ иаанхо ахаҭа ашәа ауп", — ҳәа арадио Sputnik аинтервиу аҭо иҳәеит Аџьынџьал. Аԥсны зҽаԥсазтәыз артист Одиссеи иазгәеиҭеит, аконцерттә программа ишагәылоу аԥсуа, аурыс, англыз, аиталиан шәақәа. 🖇 Одиссеи Аџьынџьал хаҭалатәи иконцерт "Сара сымҩа" мҩаԥысуеит ԥхынгәы 10 асааҭ 19:00 рзы Ражьден Гәынба ихьӡ зху Аҳәынҭқарратә филармониаҿы.

Аԥсны аҩнуҵҟатәи аусқәа рминистрра Аҳәынҭавтоинспекциа ашьақәгылара 90 шықәса ахыҵра иазкны аныҳәатә еилатәара мҩаԥысит АҩАР аҟны. Аԥыза-министр ихаҭыԥуаҩ, аҩныҵҟатәи аусқәа рминистр Роберт Кьиут Аҳәынҭавтоинспекциа аусбарҭа ауаажәларраҿ инанагӡо ароль ҷыда азгәеиҭеит. Уи игәалаиршәеит амаҵзура аҿиараҿы злагала ду ҟазҵаз, Аԥсны жәлар Рџьынџьтәылатә еибашьраҿы иҭахаз азинхьчаратә усзуҩцәа. Еизаз урҭ минуҭктәи ҿымҭрала иргәаладыршәеит. "Арҭ ашықәсқәа ирылагӡан Аҳәынҭавтоинспекциа амҩа ду ианысит. Еӷьнатәуан ахылаԥшратә усмҩаԥгатәқәа, ирҿыцын ахархәара ззыруа амашьынақәа, ҳаамҭазтәи атехнологиа алагалан, апрофилактикатә усмҩаԥгатәқәа рӷәӷәан. Арҭқәа зегьы иалкаау аихьӡарқәа рныԥшит амҩатә шәарҭадара аиӷьтәра, амашәырқәа раԥырҟәаара аус аҿы", — иҳәеит иара. Кьиут иазгәеиҭеит, ауадаҩрақәеи аԥышәарақәеи еснагь ишыҟоу, аха анапхагара урҭ азҵаарақәа рыӡбара хәҭа-хәҭала ишазнеиуа.

Апарламент политикатә мчы ӷәӷәазароуп ҳәа иԥхьаӡоит Жәлар Реизара I ааԥхьара адепутат Давид Ԥлиа. "Уи иааиуа ашықәсқәа, жәашықәса, иҟалап еиҳазаргьы – ҳшынхаша аԥҟарақәа шьақәнаргылоит. Уи азакәанқәа, азакәанԥҵаратә актқәа аднакылоит", — иҳәеит иара. Ԥлиа игәаанагарала, хәажәкырамзазы Апарламент ахь иҟалараны иҟоу алхрақәа ҭакԥхықәрала рҽырзыҟарҵалароуп. Ауаажәларра ирдыруазароуп акандидатцәа, урҭ русуратә ԥышәа, иззалырхуа рхықәкқәа.

Одиссеи Аџьынџьал хаҭалатәи иконцерт "Сара сымҩа" мҩаԥысуеит ԥхынгәы 10 рзы Ражьден Гәынба ихьӡ зху Аҳәынҭқарратә филармониаҿы. Аԥсны зҽаԥсазтәыз артист акыр шықәса ҵуеит иԥсадгьыл аҿы дықәымгылеижьҭеи. Аџьынџьал арадио Sputnik иазеиҭеиҳәеит аконцерттә программа шышьақгылоу. "Апрограмма ҷыдала ишьақәыргылоуп, избанзар арахь иааиуа сыуаажәлар аԥсуаа роуп, исҭахуп дара ирзааигәоу, ҳкультура иазааигәоу ашәақәа насыгӡарц", — азгәеиҭеит иара. Аџьынџьал иҳәеит, апрограмма ишагәылоу ҩба-хԥа ашәа ҿыцқәа. Урҭ ажәақәеи амузеики равторгьы иара иоуп. #social

Аԥсны дронла ажәыларазы ашәарҭара ыҟам ҳәа аанахауеит Атәылахьчара аминистрра. Уаанӡа аусбарҭаҿы Аҳаирхыхьчаратә мчқәа русура, мамзаргьы аԥырҩы дызҭам ахархәагақәа Аԥсны иахьаҵанакуа рхылара иазку афото-авидеоҭыхымҭақәа асоциалтә ҳақәа рҭагалара азин шыҟам азгәарҭеит. Аҧырҩы дызҭам ахархәага ма уи ахәҭақәа ԥшаахар, хымҧада адырра ҟаҵатәуп: +7 (840) 274-40-10; +7 (940) 951-10-76.

Апарламент ахь инеироуп аԥсадгьыл агәыбылра злоу, аҵара змоу ауаа ҳәа агәра ганы дыҟоуп ауаажәларра-политикатә усзуҩ Сергеи Шамба. Апартиа "Иаку Аԥсны" еиҿнакааз астол гьежь аҟны иара иазгәеиҭеит, адунеи аҿы аҭагылазаашьа шҭынчым, жәларбжьаратәи асистема аиҭеиҿкаара. Ас еиԥш иҟоу аамҭақәа, иҳәеит иара, лассы-лассы зымҽхак ҭбаау аибашьрақәа ирыдҳәалоуп. "Ҳара даара иҭынчым аамҭаз ҳанхоит. Ҳара хымԥада иаҳҭахуп аҳәынҭқарратә усзуҩцәа, Апарламент аҿы атәыла алахьынҵа ҳәаақәызҵо, ҳауаажәларра реиқәырхаразы, ҳхьыԥшымра аиқәырхаразы, ҳтәыла аҿиаразы аҭагылазаашьа аҳәаақәҵара зылшо ауаа рҟәыӷара ҷыда", — иҳәеит иара.

Аԥсны Адәныҟатәи аусқәа рминистрра Дамаск иҟалаз атеракт иақәыӡбеит. Шьамтәылатәи аҳҭнықалақь агәҭа аԥжәара ҟалеит ԥхынгәы 7 рзы. Ааха роуит ианеиҵаха 18-ҩык, ԥшьҩык аполициауаагьы налаҵаны. Убри аамҭазы Шьамтәыла аҳәынҭқарратә ныҟәарала даҭаан дыҟан Франциа ахада Еммануель Макрон. Атеракт ҟалеит иара дахьаангылаз асасааирҭа азааигәара. Макрон ихаҭа убри аамҭазы ахыбраҿы дыҟамызт, Шьамтәыла ахадеи иареи аиҿцәажәарақәа мҩаԥыргон. "Еиҳарак ацәанырра хьанҭақәа узцәырнагоит акгьы зхарамыз ауаа ааха рызҭаз ари уаҩра злам ацәгьоура асас дахь иаара аилашымҭаз иахьымҩаԥгаз, уи лымкаала иазгәанаҭоит апровокациатәи ацәгьацәыԥхамшьаратәи ҟазшьа", — ҳәа аҳәоит Шьамтәыла Адәныҟатәи аусқәеи аҳәаанырцә аекспатриантцәа русқәеи Рминистрра Аԥсны АдәАР иазынанашьҭыз анотаҿы. Аԥсны адәныҟаполитикатә усбарҭаҿы агәрагара ааыдрԥшит аиҳабыреи адунеитә еилазаареи рымчала атеракт зхароу ахьырхәра ишақәшәо.

"Ҳара Апарламент аҿы иаҳбар ҳҭахуп аԥышәа беиа, адырра ҵаулақәа, алшамҭа дуқәа, аихьӡарақәа змоу иреиӷьу ауаа". Апартиа "Иаку Аԥсны" еиҿнакааз, иалырхраны иҟоу апарламентари ихаҿсахьа атемала астол гьежь мҩаԥысуеит Аҟәа. "Иаку Аԥсны" ахантәаҩы Алхас Барзаниа иазгәеиҭеит, адепутаттә корпус ауаажәларра рхаҿра аанарԥшуазароуп, уаҟа иҟазароуп еиуеиԥшым азанааҭқәа змоу ауаа ҳәа. Иахьатәи Апарламент аилазаараҿы иҟаӡам арҵаҩцәа, аҳақьымцәа, аҵарауаа, акультура аусзуҩцәа, ақыҭанхамҩа аусзуҩцәа. "Уи азакәанԥҵаратә мчреи атәылауаа рҭахрақәаҵәҟьеи реимадара иаԥырхагоуп. Избанзар, ззанааҭ нызмыжьыз адепутат зегьы иреиӷьны еиликаауеит ирыдыркыло азакәанқәа апрактикаҿы аус шыруа, урҭ ирыгу-ирыбзоу, аҭагылазаашьа арҽеиразы ажәалагала аҟаҵара уҳәа",— ҳәа азгәеиҭеит иара. Астол гьежь аусура иалахәуп амчратә усбарҭақәа рхаҭарнакцәеи аус зуа адепутатцәеи, Апарламент "Ахьтәы ааԥхьара" алахәылацәа, Ауаажәларратә палата алахәылацәа, аекспертцәа, АИХқәа рхаҭарнакцәа.

"Гәдоуҭа аиллиуминатор аҟынтә". Асоциалтә ҳақәа рҿы аорбита аҟынтәи аҭыхымҭа ҳацеиҩишеит урыстәылатәи акосмонавт Антон Шкаплеров. Иара иажәақәа рыла, Адгьыл акәша-мыкәша ахагьежьрақәа аартра ҿыцқәа уырҭоит. "МКС аиллиуминатор аҟынтә снаԥшыцыԥхьаӡа агәра згоит: ҳапланета Адунеи аҿы зегь реиҳа иссиру ҭыԥуп", — иҩуеит иара.

Тәамба ҟазҵо тәамба ихьуеит (Аԥсуа жәаԥҟа). Ҷалы иаб дыԥсгәышьахьан. Зегьы ирдыруан. Зны ргәылара Хьрыԥс ҳәа аҳ инхоз цасҳәа, Ҷалы уабгьы уаргьы шәысзааироуп, шәысҭахуп ҳәа ацҳаражәҳәаҩ дизааишьҭит. Ҷалы игәы иалсит, иаб иԥсхьаз изы ас ахьизааицҳаз аҳ. Аха Ҷалы рацәак дымԥшыкәа абӷьааҳәа иҽеилаҳәан Хьрыԥс иҿы дынкылсит: "Ҳаҭыр зқәу аҳ, узыԥхьаз рыҟнытә сара сааит!" "Ҷалы, уаб Гагәыла дзымаазеи?" – дыҽхырҵааит аҳ. Ҷалы дҳәцымыцны даацәажәеит: "Саҳ, ухаҵкы, Гагәыла маҷк иҭыҳәрыкьқәа бааԥсуп, сара сихәом, убри аҟнытә дахьыҟоу уцаны уара дааугароуп!" ✍🏻 Анатоли Аџьынџьал иажәабжь кьаҿқәа рахьтә 📖 Аҭыҳәры́қь, а́аҭырҟьа, аса́нӡӷә - нрав, характер 🧡 Ахьыуардын шәақәтәа

Аԥснытәи абитуриентцәа Москва, Шьукин ихьӡ зху атеатртә институт иҭалеит. Дара абиуџьет аҿы хықәкылатәи аҿаҵала аҵара рҵалоит Ельдар Трамов икурс аҟны ҳәа азгәеиҭеит РУСДРАМ адиректор хада Иракли Хынҭәба. Иара иҳәеит, аҭалараан аӡәгьы дшалрымкаауаз. Аԥсуа драматә театри РУСДРАМи рзы "иаанкылан" 24 ҭыԥ, алԥшаара ахысыра зылшаз зегь реиҳа абаҩхатәра змаз жәаҩык роуп. "Рыцҳарас иҟалаз, аҭыԥқәа рыбжеиҳарак хархәарада иаанхеит, аха ари — иреиҳау аҵараиурҭа алԥшаара аганахь ала иаанарԥшуа апроцедура ахаҭабзиара ҳараки аиҿкаара шьахәи арҵабыргуеит — хаҭала акурс асахьаркыратә напхгаҩы Ельдар Трамови адоцент Валери Маркини рганахь ала. Иҭало ирдыруазароуп актиортә занааҭ — занааҭ ҳаракуп, Шьукин ихьӡ зху Атеатртә институт еиԥш иҟоу иреиҳау аҵараиурҭаҿы, аҵараҵаразы алԥшааратә ԥышәарақәа иахәҭоу аҽазыҟаҵареи иалыркааз амҩа гәык-ԥсыкала ишазыҟоуи рдырра аҭахуп", — ҳәа иҩуеит иара.

Аԥсны дронла ажәыларазы агәҽанҵара рылаҳәоуп. Аҳаирхыхьчаратә мчқәеи Арбџьармчқәа аҷаҧшьаратә рҟәшақәеи аҭагылазаашьа хылаԥшра арҭоит ҳәа аанацҳауеит Атәылахьчара аминистрра. Атәылауаа ирыҳәоит иаарту аҭыԥқәа аанрыжьырц, ашәарҭара шыҟоу рааигәа иҟоу ргәырҽанырҵарц, рхала адронқәа раҧдырҟәҟәаара рҽазырымшәарц. Аҧырҩы дызҭам ахархәага ма уи ахәҭақәа ԥшаахар, хымҧада адырра ҟаҵатәуп: +7 (840) 274-40-10; +7 (940) 951-10-76.

"Сара шьҭа сазхәыцуеит аусбарҭа анапхгара еиҳа иқәыԥшу аспециалистцәа рыла рыԥсахра аамҭа харам ҳәа", — иҳәеит Sputnik аҿы имҩаԥысыз апресс-конференциаан Аԥсны АҶА ахада Лев Кәыҵниа. АҶА аструктураҿы иара аус иуеижьҭеи 20 шықәса ҵуеит. Аҭагылазаашьа ҷыдақәа рзы fусбарҭаҿы аусура далагеит, уи аминистрра ҳәа ианеиҭарк, напхгараҭара далгеит. Кәыҵниа иҳәеит, абриаҟара шықәса рышьҭахь аусура ааныжьра шыхьанҭо, аха иара дазыхиоуп имоу алшарақәа зегьы рыла ацхраара ԥхьаҟагьы ацҵара. "20 шықәса рыҩнуҵҟа аусбарҭа са сзы иҩн гәакьахеит. Аха убри аан аҿар арҭ атрадициақәа ирыцырҵар шакәу еилкаалатәуп", — иҳәеит иара, иагьазхгәеиҭеит аусбарҭаҿы аԥышәа ду змоу зус бзиаӡангьы издыруа ҿарацәа шырацәоу. Лев Кәыҵниа иҳәеит, ас еиԥш аструктура анапхгаҩыс аҟазаара шымариам. Ари аус рнапы алакуп атәым ԥсҭазаарақәа реиқәырхаразы зхы ақәҵара иазхиоу ауаа.

Аԥснынтәи ф-ҭаацәарак, Аҭаацәеи, абзиабареи, аизыҟазаареи рымш аҽны "Абзиабареи гәык ала аизыҟазаареи рзы" амедал ранашьоуп. Аҳамҭақәа ранашьара мҩаԥысит Аԥсны иҟоу Урыстәыла ацҳаражәҳәарҭаҿы. Амш Аԥсны иазгәарҭоит 2010 шықәса аахыс, уи аамҭа иалагӡаны 68 ҭаацәара аҳамҭа ранашьан. Сынтәа амедал ранашьоуп: Евгении Раисеи Абраменковаа, Виачеслави Лиудмилеи Хороших, Заур Ҭырқьбеи Екатерина Бебиаԥҳаи, Анатоли Марколиеи Кама Џьопуаԥҳаи, Андраник Иумуклиани Гарине Чепниани, Џьамбул Жорданиеи Анна Гиурегиани. Аҳамҭақәа занашьоу 29 шықәса инаркны 56 шықәса рҟынӡа аҭаацәара иалоуп. Урыстәыла аусқәа рзы Аԥсны аамҭалатәи агәрага Максим Литвинов иазгәеиҭеит, аҭаацәа — ачҳара, аидгылара, апатуеиқәҵара, есыҽны аизыҟазаашьақәа аус рыдулара шакәу иаанаго. "Аҿар рзы шәара зыԥсы ҭоу ршаҳаҭгоуп аӡәи-аӡәи реизыҟазаашьеи реиҷаҳареи аамҭа цацыԥхьаӡа аҵакы шырцәымӡуаз. Шәара ишәыхәаԥшуа аҿар ирҵоит аҭаацәа шҭакԥхықәроу, иара убри аан зегь реиҳа узықәгәыӷша акәны ишыҟоу. Уи аҿы шәара шәылшамҭа дуӡӡоуп, уаҵәтәи амш аԥеиԥш аҿы хәы змаӡам шәлагалоуп", — иҳәеит иара. Аԥсны аԥыза-министр ихаҭыԥуаҩ Маиа Цыбулевскаиа иазгәалҭеит, иӷәӷәоу, бзиа еибабо, ииашоу аҭаацәара аиқәырхара аҵак ду шамоу. "Даара ишьахәуп аҭаацәара уманы, милаҭк аҳасабала, шьаҭак аҳасабала ԥхьаҟатәи аамҭа алахәхараз алшара ахьҳамоу", — лҳәеит лара. Аҭаацәеи, абзиабареи, гәыкала аизыҟазаареи рымш официалла иаԥҵан Владимир Путин идҵала 2022 шықәсазы. Аҳамҭақәа роуеит 25 шықәса иреиҵамкәа аҭаацәара иалоу, зҭаацәаратә беиарақәа рыла еицырдыруа, ахәыҷқәа иаԥсоу ауаажәларра ирлахәылацәаны изааӡаз хаҵеи-ԥҳәыси.

Ҳусураҿы ауаҩы иԥсҭазаара аиқәырхара инаваргыланы, ихадоуп аусбарҭа кадрла аиқәыршәара иҳәеит Аԥсны аҭагылазаашьа ҷыдақәа рминистр Лев Кәыҵниа АҶА ашьақәгылара 20 шықәса ахыҵра иазкыз Sputnik апресс-конфиренциа аҟны. "Аусбарҭа анаԥҵаз актәи амш инаркны аусзуҩцәа рыла аиқәыршәара ихымԥадатәу зҵааран. Урҭ аҵара дырҵатәын, иреилыркаатәын ихадоу, ихымԥадатәиу", — иҳәеит аминистр. Кәыҵниа иазгәеиҭеит, иахьа Аԥснынтәи Урыстәылатәи академиақәа рахь аҿар шырышьҭуа, сынтәа урҭ рхыԥхьаӡараҿ ааҩык лимитла аҵара рҵоит Аԥсни Урыстәылеи АҶА ирыбжьоу аиқәышаҳаҭра инақәыршәаны. "Иахьатәи аамҭаз аусбарҭаҿ ихадоу ахырхарҭақәа рацәоуп — амедицинатә зҵааара, акинологиатә маҵзура ҳәа изышьҭоу, уҳәа ирацәаны. Иахьагьы иаҳзасуеит аибашьра аан ишьҭаҵаз артҟәацгақәа, аминақәа ҳбеит ҳәа, урҭгьы хылаԥшра рыҭалатәуп", — иҳәеит Кәыҵниа.

Аиқәырхаҩыс аҟазаара даара иуадаҩуп, иагьхьаауп иҳәеит Аԥсны АҶА 20 шықәса ахыҵра иазкны Sputnik аҿы имҩаԥысыз апресс-конференциаан аусбарҭа ахада Лев Кәыҵниа. "Ирҳәоит, ауаа ас еиԥш иҟоу аҭагылазаашьақәа ирышьцылоит ҳәа, аха зегь акоуп, уи даара ихьаауп. Зегьы угәы иҵугоит. Аиаша шәасҳәап, арҭ 20 шықәса ирылагӡаны ҭынч џьара ацара, аҟазаара ҳалымшеит", — иҳәеит иара. Кәыҵниа иазгәеиҭеит, амаҵзура иааиԥмырҟьаӡакәа азыхиазаара, аинформациа ашьклаԥшра, аҭагылазаашьақәа иаарласны рызхьаԥшра хыдҵас ишрыднаҵо. Зегь реиҳа ихьанҭоуп ахәыҷқәа злахәу атрагедиақәа. Еиҳараӡак уи мзызс иаиуеит ауаҩытәыҩса иҟаиҵо аҭакԥықәрадара. Аҭагылазаашьа ҷыдақәа рминистр атәылауаа рахь ааԥхьара ҟаиҵеит еиҳа агәҽанызаареи агәцаракреи аадрыԥшларц.