Ormilitarism

İsrail 190-cı Apache helikopter eskadrilyasını Negev səhrasındakı Ramon aviabazasından Hayfa yaxınlığındakı Ramat David aviabazasına köçürüb. Köçürülmə çərçivəsində təxminən 15 ədəd AH-64A Apache döyüş helikopteri şimala yerləşdirilib.

Suriya Əsəd rejimindən qalan nüvə materiallarına sahib olduğunu rəsmən təsdiqləyib. MAQATE-nin baş direktoru Rafael Qrossi bildirib ki, pis məqsədlərlə istifadə oluna biləcək tonlarla nüvə materialı aşkarlanıb. Suriya iyul ayında könüllü şəkildə MAQATE-ni bu barədə məlumatlandırıb və müfəttişlərin obyektə girişinə icazə verib. Xarici işlər naziri Əsəd əl-Şeybani bildirib ki, material MAQATE-nin təminat tədbirləri çərçivəsində Suriya nəzarətində qalacaq. Materialın 2007-ci ildə İsrail tərəfindən məhv edilən Əl-Kibar reaktoru ilə əlaqəli olduğu bildirilir. Reaktorun Şimali Koreyanın köməyi ilə inşa edildiyi güman edilirdi.

Bolqarıstanın ikinci partiya üzrə sifariş etdiyi 8 ədəd F-16 Block 70 qırıcısının tədarükü yenidən gecikdirilib. Tədarük 2030-cu ilin ikinci rübünə təxirə salınıb. Lockheed Martin gecikmənin Greenville zavodunda istehsal çətinlikləri ilə bağlı olduğunu bildirib. İlk 8 ədəd F-16 2025-ci ilin dekabrına qədər Bolqarıstana təhvil verilib və onların 2027-ci ildə döyüş növbəsinə çıxması gözlənilir.

Rusiya ABŞ və İsrailin zərbələri nəticəsində zədələnmiş ehtiyatları bərpa etməyə kömək etmək üçün Xəzər dənizi vasitəsilə İrana PUA komponentləri, sursat və TNT göndərir.

Rusiya ABŞ-ın səhiyyə naziri Robert F. Kennedi Jr.-ın oğlu və Con Kennedinin nəvəsi Conor Kennedini axtarışa verib. O, 2022-ci ildə Ukraynanın Beynəlxalq Legionunun tərkibində Rusiya qüvvələrinə qarşı döyüşüb. Rusiya qanunvericiliyinə əsasən, onu 7–10 ilədək həbs cəzası gözləyir. Kennedi Ukraynada xidmət etdiyini açıq şəkildə açıqlamış və belə yazmışdı: “Mən orada ölməyə hazır idim.” O, həmçinin müharibəni “bu əsrdə demokratiyanın taleyini müəyyən edəcək” müharibə kimi qiymətləndirib. Onun əvvəllər hərbi təcrübəsi olmayıb. Moskva onu muzdlu döyüşçü kimi fəaliyyət göstərməkdə ittiham edib.

Ukrayna cəbhədəki PUA qruplarına Rusiya mövqeləri barədə dəqiq məlumat vermək kommersiya peyk görüntülərindən getdikcə daha çox istifadə edir. Əvvəllər əsgərlərə çatması günlər çəkən peyk görüntüləri indi 15 dəqiqədən bir neçə saata qədər müddətdə əldə edilə bilir. Bu isə PUA qruplarına Rusiya hərbçilərini, texnikasını, təchizat marşrutlarını və gizli mövqelərini daha sürətli müəyyənləşdirməyə imkan verir. Bu imkan zərbələrin daha dəqiq həyata keçirilməsinə gətirib və Rusiyanın mövqelərini gizlətməsini çətinləşdirib. Həmçinin Ukraynaya hava hücumundan müdafiə sistemlərini, radioelektron mübarizə vasitələrini, logistika obyektlərini, Krımdakı və işğal olunmuş ərazilərdəki mövqeləri hədəfə almaqda kömək edib. Peyk kəşfiyyatı yalnız yüksək səviyyəli komandirlər üçün məlumat mənbəyi olmaqdan çıxaraq birbaşa cəbhədə istifadə olunan əməliyyat vasitəsinə çevrilib.

Ukraynanın 3-cü Xüsusi Əməliyyatlar Alayı Donetsk vilayətindəki Andriivka-Klevtsove yaşayış məntəqəsini azad edib və təxminən 30 rusiyalı hərbçini əsir götürüb. Müqaviməti davam etdirən rusiyalı hərbçilərin isə öldürüldüyü bildirilir.

CNN ilk dəfə Ukraynadakı Patriot buraxılış qurğusuna giriş əldə edib. Kiyev yaxınlığındakı qarğıdalı tarlasında yerləşən qurğunun16 raket buraxılış yuvasının hamısı boşdur. Qurğu təxminən 10 həftədir atəş açmayıb.

Cənubi Koreya qüvvələri ötən həftə Şərqi Demilitarizasiya Zonasında (DMZ) bir neçə Şimali Koreya əsgərinin Hərbi Demarkasiya Xəttini (MDL) keçməsindən sonra xəbərdarlıq atəşi açıb. Şimali Koreya hərbçiləri dərhal geri çəkiliblər. Hadisə zamanı ölən və ya yaralanan olmayıb, tərəflər arasında qarşılıqlı atəş açılmayıb. Bu, 2026-cı ildə qeydə alınan ilk MDL pozuntusudur. Şimali Koreya hərbçiləri 2025-ci ildə 17 dəfə demarkasiya xəttini keçiblər. Bu hallar əsasən istehkam işləri aparılarkən baş verir. Hadisənin qəsdən törədilmiş təxribatdan daha çox, rutin patrul zamanı baş vermiş təsadüfi insident olduğu qiymətləndirilir.

İdarəolunan raketlərlə təchiz edilmiş USS Benfold esminesi iyulun 24-də generatorun sıradan çıxmasından sonra Cənubi Çin dənizində dörd gün ərzində tamamilə enerjisiz qalıb. Təxminən 300 nəfərlik ekipaj ekstremal isti şəraitdə işlək tualet, kondisioner, mətbəx və su sistemləri olmadan yaşayıb. Gəmi enerjisiz vəziyyətdə sürüklənib və daha sonra yedək gəmiləri tərəfindən Filippindəki Subic Bay limanına aparılıb. Enerji yalnız altı gün sonra bərpa edilib. Təyyarədaşıyan gəmi qrupundakı digər döyüş gəmilərindən biri ekipaj üçün hazır yeməklər təmin etməli olub. Bu, ABŞ-ın Hind-Sakit okean regionunda bu il enerji təchizatında nasazlıq yaşayan ikinci esminesidir.

Rusiya NATO ərazisinin dərinliklərindəki hədəfləri vurmaq qabiliyyətinə malik qabaqcıl uzunmənzilli zərbə PUA-ları ilə təchiz edilmiş 10 gizli buraxılış bazasından ibarət şəbəkə yaradıb.

RTX şirkətinin Raytheon bölməsi ABŞ Hərbi Dəniz Qüvvələri ilə Tomahawk qanadlı raketlərinin istehsalı üçün 22,9 milyard dollar dəyərində müqavilə imzalayıb. Müqavilə çərçivəsində illik 1000-dən çox Tomahawk raketinin istehsalı hədəflənir.

Hindistan Hərbi Dəniz Qüvvələri üçün iki MQ-9B SeaGuardian PUA-sının 30 aylıq icarəsi ilə bağlı 203 milyon dollarlıq müqavilə imzalayıb. Bu müqavilə Hindistanın 31 ədəd MQ-9B PUA-sının alınması üzrə 3–4 milyard dollarlıq layihəsi həyata keçirilənədək keçid mərhələsi rolunu oynayır. Böyük müqavilə çərçivəsində tədarüklərin 2028–2029-cu illərdə həyata keçirilməsi gözlənilir.

Ukraynanın yerli istehsalı olan ilk idarəolunan aviasiya bombası Vyrivniuvach (Equalizer) sınaqları başa vurub. Bu dəst standart 250 kq-lıq bombanı 130 km-ə qədər məsafəyə uça bilən dəqiq idarə olunan sursata çevirir. Onun qiyməti ABŞ istehsalı JDAM-ER-in təxminən üçdə biri qədərdir. Bombanın ilk döyüş istifadəsinin iyunun sonunda MiQ-29 qırıcısından həyata keçirildiyi təsdiqlənib. Ukraynada buna bənzər təxminən 10 sistem hazırlanma mərhələsindədir və onların hamısının Qərb analoqlarından əhəmiyyətli dərəcədə ucuz olduğu bildirilir.

Sudan ordusunun Akıncı PUA-sı BƏƏ tərəfindən dəstəklənən RSF terror qruplaşmasının idarə etdiyi Çin istehsalı olan CH-95 PUA-sını vuraraq məhv edib.

BƏƏ-nin kölgə şəbəkəsi kolumbiyalı muzdluları Sudandakı Çevik Dəstək Qüvvələrinə (RSF) yönləndirir

Avqustun 12-nə keçən gecə Novorossiysk körfəzində “Admiral Essen” və “Admiral Makarov” freqatlarına Ukrayna PUA-larının hücum etdiyini göstərən daha aydın peyk görüntüsü yayımlanıb. Görüntülərdə “Admiral Essen” gəmisində “Kalibr” qanadlı raketlərinin buraxıldığı 3S14 UKSK qurğularının ətrafında zərbədən sonra yaranan yanğın izləri görünür. “Admiral Makarov”da isə gəminin ön hissəsində, “Kalibr” raketlərinin yerləşdiyi bölmənin sol tərəfində göyərtədə böyük dəlik müşahidə olunur. Gəminin arxa hissəsində yerləşən “Centavr-NM1” peyk rabitə sistemi və “Pozitiv-M1.2” radarı da zədələnmiş ola bilər. Əgər zədələrin ciddi olduğu təsdiqlənərsə, hər iki freqatın uzunmüddətli təmirə göndərilməsi lazım gələ bilər. Bu halda Rusiya Qara Dəniz Donanması eyni anda iki müasir freqatını və onların ümumilikdə 16 “Kalibr” raketi ilə zərbə endirmək imkanını itirə bilər.

ABŞ-ın Texas ştatının Fort-Uort şəhərindəki zavodunda Almaniya Hərbi Hava Qüvvələri üçün nəzərdə tutulan ilk F-35A Lightning II (MG-01) 5-ci nəsil çoxməqsədli qırıcı təyyarə istehsal olunub. Təyyarənin sınaqlara başlamazdan əvvəl üzərinə boya və xüsusi qoruyucu örtük çəkilməsi qalıb. Bunun ardınca isə təqdimat mərasimi keçiriləcək. Almaniya Hərbi Hava Qüvvələri üçün 35 ədəd F-35A qırıcısının alınmasına dair müqavilə 2022-ci ilin dekabrında imzalanıb. Müqavilənin ümumi dəyəri 8,3 milyard avro təşkil edir.

Şərq sahilində iri və müasir döyüş gəmiləri üçün yeni hərbi-dəniz bazasının inşasına əlavə olaraq, KXDR ölkənin qərb sahilində də analoji obyektin tikintisinə başlayıb. Yayımlanmış peyk görüntülərinə əsasən, Sok adasında tikinti işlərinə başlanılıb. Burada inşaatçılar üçün düşərgənin qurulması və həmçinin nəqliyyat infrastrukturunun hazırlanması həyata keçirilir. Beləliklə, KXDR yaxın vaxtlarda ölkənin hər iki sahilində böyük su tutumlu gəmilər üçün nəzərdə tutulmuş iki tammiqyaslı hərbi-dəniz bazasına sahib olacaq.