Sami Automotive technology

የማይታየው የስለላ መረብ፦ በቤቶ ውስጥ የሚገኘው ዋይፋይ ያለ ስልክዎ ማንነትዎን 99.5% በሆነ ትክክለኛነት መለየት እንደሚችል ተደረሰበት! አንድም የኤሌክትሮኒክስ መሣሪያ ሳይይዙ፣ ከምንም ዓይነት ኔትወርክ ጋር ሳይገናኙ ወደ ሳሎንዎ ወይም ወደ አንድ ካፌ ሲገቡ፣ በክፍሉ ውስጥ ያለው የማይታይ የሬዲዮ ሞገድ ማንነትዎን መዝግቦ የሚያውቅበትን ሁኔታ አስበውት ያውቃሉ? የሳይበር ደህንነት ተመራማሪዎች ይፋ ባደረጉት አዲስ አስደናቂ ጥናት መሰረት፣ በየቤታችን እና በየቢሮአችን የምንጠቀምባቸው ተራ የዋይፋይ ራውተሮች እኛ መሆናችንን ለይተው የማወቅ ከፍተኛ አቅም አላቸው። "ዋይፋይ 5" ከተዋወቀበት ጊዜ ጀምሮ፣ የዋይፋይ ሞገድ እንደ አምፖል በየአቅጣጫው ዝም ብሎ ከመበተን ይልቅ ሲግናሉን እንደ ፍላሽ መብራት በቀጥታ ወደ ስልካችን ወይም ኮምፒውተራችን እንዲያነጣጥር የሚያስችል ቢምፎርሚንግ የተባለ ቴክኖሎጂ ጥቅም ላይ መዋል ጀምሯል። ይህ ሲግናል በትክክል እንዲደርስ ደግሞ መሣሪያዎቻችን ቢኤፍአይ የተባለ ምንም ዓይነት ምስጠራ የሌለው መረጃ ወደ ራውተሩ በየሴኮንዱ ይመልሳሉ። በጀርመን ካርልስሩሄ የቴክኖሎጂ ኢንስቲትዩት ተመራማሪዎች ባደረጉት ጥናት፣ ማንኛውም ሰው ርካሽ የሆነ የዋይፋይ መቀበያ መሣሪያ ብቻ በመያዝ ይህንን በባዶ አየር ላይ የሚበተነውን ያልተመዘበረ መረጃ በምስጢር መቅዳት እንደሚችል አረጋግጠዋል። አንድ ሰው በዋይፋይ ሞገዶች መሃል ሲያልፍ፣ በሰውነቱ ቅርፅ እና በአረማመዱ ምክንያት ሞገዶቹ ላይ የተለየ መስተጓጎልና ነጸብራቅ ይፈጥራል። ተመራማሪዎቹ ይህንን የተዛባ ሞገድ አርቴፊሻል ኢንተለጀንስ በመጠቀም ሲመረምሩት፣ እያንዳንዱ ሰው የራሱ የሆነ የማይታይ የሰውነት አየር ላይ አሻራ እንዳለው ደርሰውበታል። በዚህም ምክንያት ጥናቱ የተደረገባቸውን ሰዎች 99.5% በሚሆን ሙሉ ትክክለኛነት ማንነታቸውን መለየት ተችሏል። ለዚህ ደግሞ እርስዎ ስልክ መያዝዎ በጭራሽ አያስፈልግም፣ ዋናው ሁኔታ ራውተሩ በክፍሉ ውስጥ ካለ ሌላ መሣሪያ ለምሳሌ ከስማርት ቲቪ ወይም ከሌላ ሰው ላፕቶፕ ጋር እየተገናኘ ሞገድ መልቀቁ ብቻ ነው ተብሏል። ይህ ቴክኖሎጂ እጅግ የሚያስደንቀው ሰዎች ሆን ብለው የአረማመድ ስልታቸውን ቢቀይሩ፣ ወፍራም ጃኬት ቢለብሱ ወይም ትላልቅ ካርቶኖችን ተሸክመው ቢያልፉ እንኳ ሲስተሙ ከ50% እስከ 60% በሚሆን አቅም ማንነታቸውን መለየቱን አለማቆሙ ነው ተብሏል። ይህ ግኝት ካሜራዎችን ሳይጠቀሙ ሰዎችን በየሄዱበት ቦታ በምስጢር ለመሰለል በር ሊከፍት ስለሚችል የሳይበር ደህንነት ባለሙያዎችን በእጅጉ አስግቷል። በአሁኑ ወቅት ይህንን ክፍተት ለመድፈን እና መረጃው በምስጢር እንዲተላለፍ ለማድረግ ዓለም አቀፍ የዋይፋይ ስታንዳርዶችን መቀየር እንዲሁም የቆዩ መሣሪያዎችን አሰራር ማስተካከል ትልቅ ፈተና ሆኗል ነው የተባለው። የቴክኖሎጂው ዓለም ይህንን የማይታይ የስለላ አደጋ በሰፊው ሳይሰራጭ በፊት በአስቸኳይ መፍትሄ እንዲያገኝ ጥሪ እያቀረበ ይገኛል።