Татарча вәгазьләр ТАТИСЛАМ

Икенче мөһим мәсьәлә дә бар: хакыйкый өшкерүче хатын-кызны үзе белән генә калырга чакырмый. Ул: «Ирегез белән килегез, балагыз белән килегез, яныгызда мәхрәмегез булсын», – дип әйтәчәк. Әгәр берәр өшкерүче: «Үзең генә кил», – дип шарт куйса, андый кешедән сакланырга кирәк. Чөнки Пәйгамбәребез ﷺ: «Бер ир кеше чит хатын белән бергә генә калмасын. Чөнки аларның өченчесе — шайтан», – дигән. 📚 (Тирмизи риваяте, 2165). Өченче мәсьәлә, өшкерүче чит хатын-кызга кагылырга тиеш түгел. Башына, кулына, карынына яки күкрәгенә кагылу –  шәригатьтә рөхсәт ителми. Хатын-кызга аның ире яки мәхрәме ярдәм итә ала. Шуңа күрә өшкерүчегә барыр алдыннан: «Ул ничек өшкерә? Нинди аятьләрне һәм нинди догаларны укый?» – дип сорарга кирәк. Шәригатьтә өшкерүнең шартлары бар. Ул Коръән аятьләре һәм Пәйгамбәребез ﷺ өйрәткән догалар белән башкарылырга, ә укыла торган сүзләрнең мәгънәсе аңлаешлы булырга тиеш. Кайвакыт кешеләр: «Фәлән урында бер өшкерүче бар икән, аңа баргач, файдасы тия икән», – дип сөйлиләр. Ләкин шуны онытмыйк: шифаны бирүче – бары тик Аллаһы тәгалә. Кайвакыт Аллаһы безнең иманыбызны сынау өчен төрле сәбәпләр аша шифа бирергә мөмкин. Шуңа күрә шарлатаннарга ышанып алданудан сак булу зарур. Коръән белән үз-үзебезне өшкерергә өйрәнергә тиеш. Өшкерүчеләргә генә таянып калмыйк. Пәйгамбәребез ﷺ үзен өшкерә торган булган һәм өммәтен дә шуңа өйрәткән. Бигрәк тә өйдә тынычлык булсын өчен Коръән укуның әһәмияте зур. Пәйгамбәребез ﷺ: «Өйләрегезне зиратка әйләндермәгез. Чөнки намаз,  «Бәкара» сүрәсе укылган өйдән шайтан кача», – дигән 📚 (Мөслим риваяте, 780). Шуңа күрә һәр көн бер бит, ике бит булса да Коръән укырга тырышыйк. Коръән укылган йортта Аллаһыны искә алу була һәм бу – мөэминнең өе өчен зур хәерлелек. Өйдә тынычлык бетүнең бер сәбәбе – Аллаһыны зикер итүдән ераклашу. Пәйгамбәребез ﷺ «Бохари» һәм «Мөслим» җыентыкларында килгән хәдистә: «Фәрештәләр эт һәм җанлы сурәтләр булган өйгә кермиләр», – дигән. Шуңа күрә мөселман кеше үз йортындагы нәрсәләргә дә игътибар итәргә тиеш. Намаз укыганда да мөмкин кадәр сурәтләр булмаган чиста урында намаз уку хәерле. Шуңа күрә күңелдәге борчу-мәшәкатьне чын мәгънәсендә бетерергә ярдәм итә торган иң бөек гамәлләрнең берсе — Аллаһыга якынаю, Аны искә алу һәм Коръән белән бәйләнешне ныгыту. Мөэмин кеше йөрәгенең тынычлыгын кешеләрдән түгел, ә иң беренче чиратта Аллаһыдан эзләргә тиеш. Аллаһы тәгалә Коръәндә әйтә: «Һичшиксез, күңелләр Аллаһны искә алу белән тынычлана» 📚 («Рагыд» сүрәсе, 28нче аять). Шуңа күрә, иманыбызга тугры булып, Коръәнне укып, аның хөкемнәре белән яшәргә тырышсак, Аллаһы тәгалә безгә Үзенең рәхмәтен һәм шифасын бирер, ин шәә Аллаһ. Әгәр Аллаһыны зикер итүдән ерагая башласак, күңелебез дә бушап калыр. Шайтан кешене гел борчуда, гел куркуда һәм өметсезлектә яшәтергә тели. Аллаһ сакласын! Әгәр без Аллаһыны еш искә алсак, күңелебезне Аның белән бәйләсәк, телебездә: «Әлхәмдүлилләһ», «Ин шәә Аллаһ», «Бисмилләһ» кебек зикерләр булса, Аллаһының рәхмәте белән, күңелебездә тынычлык һәм иминлек сизә башларбыз. Коръән – иман китерүчеләр өчен шифа һәм рәхмәт. ✏️ Раил Фәйзрахманов 📍 Язылырга 👇 Вконтакте: vk.ru/id16784711 Макс: max.ru/join/W0hU3... Телеграм:t.me/tatislam РуТуб: rutube.ru/channel/38...

🤲  Иман китерүчеләргә шифадыр   Аллаһ тәгалә адәм балаларын төрле сынаулар белән сынап тора. Шул сынауларның берсе – төрле чирләр, авыртулар.   Пәйгамбәребез ﷺ әйткән: «Аллаһ тәгалә нинди генә чир иңдермәсен, аның белән бергә шифасын да иңдерә». 📚(Бохари риваяте). Димәк, шифаны эзләп табарга гына кирәк. Бүгенге көндә төрледән-төрле чирләр артканнан-арта бара: җан чирләре дә, тән чирләре дә күбәя. Һәм менә шушы барча чирләргә каршы бер көчле дәва бар. Ни кызганыч, иманыбыз зәгыйфь булу, гыйлемебез җитмәү сәбәпле, без ул дәваны бик аз кулланабыз, хәтта әле аны куллана да белмибез. Ул дәва – Коръән, Коръән белән дәвалану, аның аша шифа алу. Аллаһы тәгалә Коръәннең берничә урынында безгә шифаның Үз Китабында барлыгын бәян кылды. Аллаһы тәгалә «Исра» сүрәсенең 82нче аятендә әйтә: «Без Коръәнне иман китерүчеләр өчен шифа һәм рәхмәт итеп иңдерәбез. Ә залимнәрнең ул бары тик зыяннарын гына арттыра». Галимнәр бу аятьне тәфсир кылып, Коръәндә төрле чирләргә карата шифа барлыгын аңлаталар. Әмма Аллаһы тәгалә биредә бер искәрмә ясый «иман китерүчеләр өчен». Чөнки мөэминнең дәрәҗәсе югарырак. Мөселманнар арасында монафикъ кеше дә булырга мөмкин. Ә мөэминнең күңелендә, йөрәгендә, бернинди шиксез, бары тик Аллаһыга, Кыямәт көненә, фәрештәләргә, тәкъдиргә һәм иманның башка нигезләренә ышаныч була. Шуңа күрә Аллаһы тәгалә: «...иман китерүчеләр өчен шифа», – дип әйтә. Ягъни, дингә ихлас күңелдән кергән, иманны тулысынча кабул иткән мөэминнәр өчен Коръәндә шифа бар. Аллаһы тәгалә шул ук аятьтә дәвам итеп: «Ә залимнәрнең ул бары тик зыяннарын гына арттыра», – ди. Шуңа күрә Ул Коръәннең хакыйкый шифасын, иң элек, иман әһелләренә бирә. Аллаһы тәгалә башка аятьләрендә дә Коръәннең файдасы турында бәян кыла. Галимнәр Коръән аятьләренә нигезләнеп, аның шифасын берничә төргә бүлеп аңлаталар. Беренче төре, шик-шөбһәләрдән шифа. Коръән кешене төрле шик-шөбһәләрдән дәвалый. Кеше кайвакы: «Кыямәт көне чыннан да булырмы икән? Бу галәм белән кем идарә итә икән? Мин дөрес юлдан бараммы икән? Дөрес яшимме икән?» – дип шикләнә. Аллаһы тәгалә Коръәндә дәлилләр китереп, кайсы юлның дөрес икәнен аңлата. Аллаһы тәгалә кешене тынычландыра. Кеше: «Күпме генә изгелек кылсам да, миңа рәхмәт әйтмиләр, игелегемне күрмиләр», – дип борчылырга мөмкин. Аллаһы тәгалә аны тынычландырып, хәтта тузан бөртеге кадәр генә изгелек кылса да, Кыямәт көнендә аның әҗерен алачагын хәбәр итә. «Дөрес эшлимме? Дөрес юлдан бараммы?» – дип шикләнүчеләргә Аллаһы тәгалә «Исра» сүрәсенең 9нчы аятендә әйтә: «Хакыйкатьтә, бу Коръән иң туры юлга күндерә». Ягъни, туры юлдан барырга теләсәк, Коръәннең хөкемнәренә иярергә тиешбез. Икенче төре, Коръәндә тән авыруларыннан да шифа бар. Аллаһы тәгалә «Фуссиләт» сүрәсенең 44нче аятендә Коръән турында болай ди: «Ул –  иман китергәннәр өчен һидаять һәм шифадыр». Коръәннең тән авыруларына да шифа булуына тормыштан берничә мисал китерик. Беренчесе – Ибн Габбас (Аллаһы аннан риза булсын) белән бәйле риваять. Бу хәдис «Мөстәдрак әл-Хәким» җыентыгында килә. Бер кеше Ибн Габбас (Аллаһы аннан риза булсын) янына килеп, борыныннан кан китүдән зарлана. Ул төрле табибларга мөрәҗәгать иткән, әмма дәва таба алмаган. Ибн Габбас (Аллаһы аннан риза булсын) аңа Коръән укып дәва кыла. Берникадәр вакыттан соң бу кешенең хәле яхшыра һәм борыныннан кан агу туктый. Икенче дәлил – «Сәхих әл-Бохари» җыентыгында килгән мәшһүр хәдис. Бервакыт Пәйгамбәребез ﷺ сәхабәләрен сәфәргә җибәрә. Ул вакытта хәзерге кебек кунакханәләр булмаган. Мосафирлар юлда, кайда кич җитсә, шунда тукталып ял иткәннәр. Сәхабәләр бер авыл янына килеп җитәләр һәм шул авылда төн үткәрергә телиләр. Алар авыл халкына: «Без – мосафирлар», – дип әйтәләр Ул заманнарда мосафирларга хөрмәт күрсәтү, аларны кунак итү гадәте булган. Әмма бу авыл халкы сәхабәләрне кунак итү түгел, хәтта авылда калырга да рөхсәт бирми. Сәхабәләр авыл читенә чыгып, шунда төн уздырырга калалар. Шул төнне авыл башлыгын чаян чага. Аның хәле начарлана башлый. Авылдагы кешеләр аны дәваларга тырышалар, әмма файдасы тимәгәч, аларның берсе:«Бүген авылга мосафирлар килгән иде. Без аларны кунак итмәдек. Бәлки, аларда берәр дәва бардыр?» – ди. Шунда бер кешене сәхабәләр янына җибәрәләр. Ул: «Башлыгыбызны чаян чакты. Сездә аңа ярдәм итә алырлык берәр дәва бармы?» – дип сорый. Сәхабәләрнең берсе: «Әйе, бар. Әмма безнең бер шартыбыз бар. Сез безне кунак итмәдегез. Шуңа күрә без моны сезгә билгеле күләмдә сарык биргән очракта эшләрбез», – ди. Авл халкы ризалаша. Шунда сәхабәләрнең берсе барып, чаян чаккан кешене «Фатиха» сүрәсен укып өшкерә. Риваятьләрдә аның «Фатиха» сүрәсен укыганы да, гомумән, Коръән укыганы да әйтелә. Ничек кенә булмасын, ул кешене Коръән аятьләре белән өшкерә. Өшкергәннән соң авыру кешенең хәле яхшыра һәм ул аякка баса. Галимнәр бу хәдискә нигезләнеп, өшкерүнең файдасын аңлаталар. Әгәр өшкерүче иманлы булса, Аллаһыга ихлас күңелдән ялварса һәм Коръән белән дөрес итеп өшкерсә, Аллаһы аның аша шифа бирергә мөмкин. Бүгенге көндә күп кенә кешеләр, бигрәк тә олы яшьтәгеләр, тез авыртуыннан интегә. Бер танышым үзе белән булган гаҗәп хәлне сөйләде. Ул табибка барып, тезе авыртудан зарланган. Табиб моны тикшергән дә: «Могҗиза булалмый. Моны операциясез берничек тә дәвалап булмас», – дигән. «Миңа аның «могҗиза була алмый» дигән сүзе җитте. Кайттым да, Коръәнне алып, андагы аятьләрне укып, үземне өшкерә башладым», – дип үзенә ничек шифа табуы турында сөйләде ул. Коръәндә дә, Пәйгамбәребез ﷺ сөннәтендә дә Аллаһы тәгаләдән шифа сорап укый торган күп догалар бар. Шушы кеше дә берникадәр вакыт дәвамында Коръән укып һәм Пәйгамбәребез ﷺ сөннәтендә килгән догалар белән өшкереп йөри. Соңыннан табибка баргач, табиб аның хәлен күреп шакката. Коръән – Аллаһы биргән шифа чараларының берсе. Өченче төре – җан һәм рухи авырулардан шифа. Коръән, шулай ук, күңелдә җыелган төрле авырулардан, борчу-мәшәкатьләрдән, рухи авырлыклардан шифа булырга мөмкин. Шулай ук, күз тию, сихер һәм бозым кебек нәрсәләрдән саклану һәм алардан дәвалану өчен дә өшкерүнең шәригатьтә үз урыны бар. Пәйгамбәребез ﷺ бервакыт өенә кайткач, хезмәтчесенең йөзендә үзгәрешләр күргән һәм: «Аңа күз тигән. Аны өшкерегез», – дигән 📚(Бохари риваяте, 5739). Димәк, Коръән һәм, шулай ук, Пәйгамбәребез ﷺ өйрәткән догалар белән өшкереп дәвалану – шәригатьтә билгеле булган ысул. Пәйгамбәребез ﷺ «Сахих Мөслим»дә килгән хәдистә: «Кем кардәшенә ярдәм итә ала икән, ярдәм итсен», – дигән. Әгәр кешенең гыйлеме бар, ул дин хөкемнәрен белә һәм өшкерә ала икән, кардәшенә ярдәм итәргә тиеш. Әмма, шул ук ваакытта, өшкерүгә бәйле кайбер мәсьәләләрне ачыклап китәргә кирәк. Галимнәр Коръән һәм Пәйгамбәребез ﷺ өйрәткән догалар белән өшкерүчеләрне берничә төргә бүлеп аңлаталар. Беренче төр – дөрес итеп өшкерүчеләр. Алар Коръәнне дөрес укыйлар, тәҗвид кагыйдәләрен беләләр һәм Пәйгамбәребез ﷺ өйрәткән догаларны кулланалар. Мәсәлән, кайсы җирегез – башыгызмы, карыныгызмы яки башка урыныгызмы авырта , шул урынга уң кулны куеп, «Бисмилләһ» дип әйтү һәм Пәйгамбәребез ﷺ өйрәткән догаларны уку турында сөннәттә күрсәтмәләр бар. Әлеге гамәлне башкарган кешеләргә мөрәҗәгать итәргә мөмкин. Икенче төр – нияте яхшы, әмма гыйлеме җитмәгән кешеләр. Аларның кешеләргә булышасы килә, әмма Коръәнне һәм догаларны дөрес укый белмиләр. Мәсәлән, гарәпчә укый белмәскә мөмкиннәр яки догаларны кириллица белән генә өйрәнеп, сүзләрне дөрес әйтмәскә мөмкиннәр. Мондый очракта сак булырга кирәк. Өченче төр – шарлатаннар, ягъни ялганчылар. Кызганычка, алар арта бара. Мондый кешеләр түбәтәй кияргә, яулык бәйләргә, өстәлләренә Коръән куярга, намазлык җәеп куярга мөмкиннәр. Әмма аларны кайбер билгеләргә карап аерырга мөмкин. Мәсәлән, син килеп керүгә, ул кеше: «Син фәлән нәрсә эшләгәнсең, шуңа күрә авырыйсың», – дип яшерен нәрсәләрне сөйли башласа, мондый кешедән сак булырга кирәк. Чөнки киләчәкне һәм яшеренне Аллаһыдан башка беркем дә белми. Кайбер кешеләр: «Бу – аның карәмәте», – дип әйтергә мөмкиннәр. Ләкин чын мәгънәсендә карәмәт бирелгән кеше аны күрсәтеп, мактанып йөрми. Чөнки ихлас кеше үзенең изгелеген Аллаһы белән ике арада саклый.

Бурычлардан

БУРЫЧТАН КОТЫЛУ ДОГАСЫ

Язылырга +79393647149

Тулырак 👇 https://rutube.ru/video/fc4b8305859c819f6b58108642ac00b6/ 📍 Язылырга 👇 Вконтакте: https://vk.ru/id16784711 Макс: https://max.ru/join/W0hU3jNSKOSnonFW_0xP6bJFcQELziY2xUoiinU8pcI Телеграм:https://t.me/tatislam РуТуб: https://rutube.ru/channel/38324482

МӘЧЕТ ТӨЗЕЛЕШЕНДӘ КАТНАШЫРГА ЧАКЫРАБЫЗ Аллаһның рәхмәте белән, Арча районында «Арчабаш» мәчетен төзү өчен рөхсәт алынды! Әлхәмдү лиЛләһ, мәчет төзелешенә кагылышлы барлык документ эшләре тәмамланды. Инде, Аллаһ насыйп итсә, мәчетебезнең төзелешен башлыйбыз. Бу — бер генә кешенең түгел, бөтен мөселман өммәтенең уртак изге эше. Мәчет — намаз укый торган урын гына түгел. Ул Коръән өйрәнү, гыйлем алу, балаларга тәрбия бирү һәм кешеләрне берләштерү урыны. 🤲 Сез дә бу изге эштә үз өлешегезне кертә аласыз. Кем мәчет төзелешенә матди ярдәм күрсәтергә тели — түбәндәге реквизитлар буенча ярдәм җибәрә ала: 💳 Реквизитлар: Номер счёта: 40703810829930000125 Название: МЕСТ МУС РО - ПРИХОД МЕЧЕТИ "АРЧАБАШ" С.НИЖ МЕТ АРС МУХТ ЦЕНТР РЕЛ ОРГ - ДУХ УПР МУС РЕСП ТАТАРСТАН ИНН: 1685019192 КПП: 168501001 Банк: ФИЛИАЛ "НИЖЕГОРОДСКИЙ" АО "АЛЬФА-БАНК" БИК: 042202824 Кор. счёт : 30101810200000000824 Яки сылтамага басып күчерә аласыз: Денежный перевод СБП https://qr.nspk.ru/AS1A000FM3JIEH898Q883CS4LFUM9COV?type=01&bank=100000000008&crc=8F7D Аллаһ Тәгалә биргән садакаларыгызны кабул итсен, малыгызга бәрәкәт бирсен һәм бу изге эштә катнашкан һәрбер кешегә әҗер-саваплар насыйп итсен! «Кем дә кем Аллаһ ризалыгы өчен мәчет төзесә, Аллаһ аңа Җәннәттә йорт төзер». (Имам Әхмәд, 2157).

Тулырак 👇 https://rutube.ru/video/fc4b8305859c819f6b58108642ac00b6/ 📍 Язылырга 👇 Вконтакте: https://vk.ru/id16784711 Макс: https://max.ru/join/W0hU3jNSKOSnonFW_0xP6bJFcQELziY2xUoiinU8pcI Телеграм:https://t.me/tatislam РуТуб: https://rutube.ru/channel/38324482

Тулырак 👇 https://rutube.ru/video/767b51439d7e0901de0f50ec24d72f42/ 📍 Язылырга 👇 Вконтакте: https://vk.ru/id16784711 Макс: https://max.ru/join/W0hU3jNSKOSnonFW_0xP6bJFcQELziY2xUoiinU8pcI Телеграм:https://t.me/tatislam РуТуб: https://rutube.ru/channel/38324482

📚 Гыйлем – наданлык караңгылыгында юл күрсәткеч нур Гыйлемгә омтылу, аңа ия булу – файдалы гамәл. Гыйлем һәм тәҗрибә ярдәмендә генә үзебез өчен файдалы һәм файдасыз булган нәрсәләрне аера алабыз. Дини гыйлем алсак, нәрсәнең – хәләл, нәрсәнең – хәрәм, нәрсәнең – саваплы, ә нәрсәнең гөнаһлы икәнен беләчәкбез. Аллаһының рәхмәтенә ничек ирешергә икәнен дә аңлаячакбыз, күңел тынычлыгы да табачакбыз. Чөнки Аллаһы без адәм балаларын бар итте һәм бары Ул гына безнең өчен нәрсәнең файдалы, ә нәрсәнең зарарлы икәнен төгәл белә. Мөселман кешесе бигрәк тә дини гыйлемгә омтылырга тиеш. Әйе, без тормыш итәр өчен дөньяви белем алабыз, һөнәр үзләштерәбез. Әмма шул ук вакытта дини гыйлемнең зарурлыгын онытмаска тиешбез. Бары тик Аллаһ тәгалә рөхсәт иткән гамәлләр генә саваплы гамәлләр санала. Саваплы дип уйлап, гөнаһлы эш кылсак, Аллаһының ачуына, Аның газабына дучар булуыбыз бар. Шуңа күрә безгә дини гыйлем кирәк. Коръәнне һәм Пәйгамбәребез ﷺ сөннәтен өйрәнү – безне туры юлга алып баручы маяклар. Ә туры юл – иң бәхетле юл. Бүгенге көндә адәм балалары җилкәсенә төшкән күптөрле сынауларга еш кына туры юлдан ерагаюлары, төрле гөнаһлары сәбәп була. Гыйлем юлына басу, үзеңне камилләштерергә тырышу, дини мәгърифәтле булу – пәйгамбәрләр юлы. Чөнки пәйгамбәрләр үзләреннән соң акча да, мал да, байлык та түгел, ә гыйлем калдырганнар. Әгәр адәм баласы дин белән кызыксына башласа, намазга баса, Коръән укырга өйрәнә, хәләл белән хәрәмне аерырга тырыша, «Бу ярыймы? Ярамыймы? Моңа савап буламы? Бу гөнаһ түгелме?» – дигән сорауларга җавап эзли. Бу нәрсәне аңлатамы? Аллаһы тәгаләнең аңа хәерлелек теләвен... Моңа дәлил булып Пәйгамбәребезнең ﷺ«Бохари» һәм «Мөслим» җыентыкларында килгән хәдисе тора: «Аллаһ кемгә хәерлелек тели, шуңа диндә аңлау бирә». Әйе, динне аңлау өчен гыйлем кирәк. Күңелең гыйлемгә омтылса, хәзрәтләрдән сорыйсың, китаплар укыйсың, мәдрәсәгә йөрисең, мәчеттәге вәгазьләргә һәм дәресләргә барасың, динне аңларга омтыласың. Бу үзеннән-үзе генә барлыкка килми, димәк, Аллаһы сиңа хәерлелек тели. Иң зур хәерлелекләрнең берсе – Җәннәт. Җәннәткә керү өчен, аңа алып бара торган гамәлләрне кылырга кирәк. Кайсы гамәлләрнең җәннәткә алып баруын ничек белә алабыз? Һичшиксез, гыйлем алып кына. Гыйлем булмаса, кеше яхшы гамәл дип уйлап, гөнаһ кылырга, хәтта авыр гөнаһны да савап дип кабул итәргә мөмкин. Мәсәлән, чит ир белән чит хатын-кызның никахсыз җенси мөнәсәбәткә керүе – зур гөнаһ, зина. Бу – фәхеш гөнаһларның берсе.Кем дә булса: «Тол хатынның күңелен күрү савалы изге гамәл була бит. Ничек инде бу гөнаһ булсын?!» – дип әйтергә мөмкин. Андыйлар, дини гыйлемгә ия булмаганлыктан, бозык, фәхеш гамәлне савап дип уйлыйлар. Үзләренчә дәлилләмәкче дә булалар. Ә бит савапны Аллаһы бирә. Без түгел. Дәлилсез, нигезсез рәвештә, бер генә адәм баласының да: «Бу – савап, ә монысы – гөнаһ», – дип әйтергә хакы юк. Без бары тик Коръәндә һәм Пәйгамбәребез ﷺ хәдисләрендә, сөннәтендә килгән дәлилләргә таянып кына кайсы да булса гамәлнең саваплы яки гөнаһлы булуы турында әйтә алабыз. Аллаһы рөхсәт иткән һәм Пәйгамбәребез ﷺ күрсәткән гамәлләр өчен генә әҗер вәгъдә ителгән. Кайвакытта урлашуны да «савап» дип атаучылар бар. Янәсе, зур оешмадан урлап, шул акча белән фәкыйрь-мескеннәргә булышуны «бу бит изгелеккә», дип акланалар. Адашучан адәм баласы шулай уйларга мөмкин. Әмма Аллаһы моны рөхсәт итми. Аллаһы каршында изгелегең кабул булсын өчен, аның хәләл юл белән эшләнүе мөһим. Урлашмыйча, гадел хезмәт белән тапкан малыңны садака итеп бирсәң, менә шул изге гамәл була да инде. Нәрсә генә эшләсәң дә, гыйлем кирәк шел. Аллаһы тәгалә әйтә: «Аллаһ сездән иман китергәннәрнең һәм гыйлем бирелгәннәрнең дәрәҗәләрен күтәрер» 📚 («Мүҗадәлә» сүрәсе, 11нче аять). Чынлап та, гыйлем әһеле дәрәҗәсен Аллаһы Үзе күтәрә. Гыйлем алган кешенең, беренчедән, фикере үзгәрә, гакыйдәсе төзәлә, күңеле пакьләнә. Файдалы гыйлем алган саен аның калебе чистара. Ул көнләшүдән, тәкәбберлектән, мин-минлектән арына башлый. Аның әдәп-әхлагы үзгәрә. Чөнки кеше гыйлем алган саен Аллаһының күркәм сыйфатларын, Пәйгамбәребезнең ﷺ күркәм холкын өйрәнә һәм шул күркәм холыкны үзендә булдырырга тырыша. Гыйлем алган кеше игелекле гамәлләрен дә арттыра. Чөнки диннең һәм гыйлемнең асылы – яхшылык, изгелек һәм игелек. Хәтта бер хәдистә гыйлем юлында йөрүченең дәрәҗәсе турында зур хәерләр әйтелә. «Тирмизи» һәм «Әбү Давыд» җыентыкларында килгән хәдистә Пәйгамбәребез ﷺ: «Кем гыйлем эзләп бер юлга баса, Аллаһ аңа Җәннәткә бара торган юлны җиңеләйтә», – дигән. Чөнки ул Җәннәткә ничек барырга икәнен белә. Гыйлем алмасаң, син Җәннәткә алып бара торган юлны ничек белерсең? Хәдистә, шулай ук, гыйлем эзләүченең дәрәҗәсе шулкадәр зур булуы әйтелә, фәрештәләр аның өчен канатларын җәяләр, күкләрдә һәм җирдә булган мәхлукат, хәтта судагы балыклар да гыйлем әһеле өчен истигъфар кыла. Пәйгамбәребез ﷺ гыйлем әһелен гади гыйбадәт кылучы белән чагыштырып, галимнең өстенлеген айның башка йолдызлардан өстенлеге белән аңлата. Күккә баксак, җемелдәп торган матур йолдызлар күрәбез. Аллаһыга буйсынучы, Аллаһыга гыйбадәт кылучы кеше дә шул йолдызлар кебек. Ләкин алар арасында ай аерылып тора. Төнге күктә ай яктыртып тора. Галим дә шуның кебек. Гади генә гыйбадәт кылучы кеше Аллаһы белән үз арасын төзәтә. Ә гыйлем әһеле башка кешеләргә дә файда китерә: үгет-нәсыйхәт бирә, ялгышканнарын төзәтә, туры юлны күрсәтә, кешеләрне укыта, намаз укырга, Коръән хәрефләрен танырга өйрәтә. Ул гыйлем нурын башкаларга да тарата. Шуның белән, ул җәмгыятькә күбрәк файда китерә. Пәйгамбәребез ﷺ әйткән: «Галимнәр – пәйгамбәрләрнең варислары» 📚(Әбү Давыд риваяте, 3641). Пәйгамбәрләр үзләреннән соң динар да, дирһәм дә түгел, ә гыйлем калдырганнар. Чынлап та, гыйлем – иң яхшы һәм хәерле инвестицияләрнең берсе. Файдалы гыйлем алып, бүгенге көндә күп нәрсәләрнең ни өчен шулай булганын аңлый аласың. Нәрсәнең дөрес, нәрсәнең ялгыш икәнен аерасың. Хәләл белән хәрәмне беләсең. Иң мөһиме, тормышта дөрес юлдан барырга өйрәнәсең. Бүгенге көндә күпме мәдрәсәләр, күпме китаплар, күпме гыйлем әһелләре бар! Хәтта иң ялкау кешенең дә интернет аша гыйлем алу мөмкинлеге бар. Әмма иң хәерлесе һәм бәрәкәтлесе – мәчеткә, мәдрәсәгә барып, гыйлемне остазлардан өйрәнү. Шуңа күрә гыйлемгә омтылыйк. Коръәнне өйрәник. Сөннәтне өйрәник. Хәләлне хәрәмнән аерырга өйрәник. Гыйлем – наданлык караңгылыгында юл күрсәткеч нур. Шул нур сәбәпле генә кеше туры юлдан атлый ала. ✏ Раил Фәйзрахманов 📍 Язылырга 👇 Вконтакте: vk.ru/id16784711 Макс: max.ru/join/W0hU3... Бип: bip.ai/join/tatislam Телеграм:t.me/tatislam РуТуб: rutube.ru/channel/38...

Яки сылтамага басып күчерә аласыз 👇 https://qr.nspk.ru/AS1A000FM3JIEH898Q883CS4LFUM9COV?type=01&bank=100000000008&crc=8F7D

Тулырак 👇 https://rutube.ru/video/767b51439d7e0901de0f50ec24d72f42/ 📍 Язылырга 👇 Вконтакте: https://vk.ru/id16784711 Макс: https://max.ru/join/W0hU3jNSKOSnonFW_0xP6bJFcQELziY2xUoiinU8pcI Бип: https://bip.ai/join/tatislam Телеграм:https://t.me/tatislam РуТуб: https://rutube.ru/channel/38324482