ERA ኢትዮጵያ መንገዶች አስተዳደር

የጊንጪ - ካቺሴ - ጩሉጤ   የመንገድ  ሥራ ፕሮጀክት ምዕራፍ 1፡ ጊንጭ - ሽኩቴ (ኪ.ሜ 59)   የአስፋልት   ኮንክሪት   መንገድ  ግንባታ    72  በመቶ   ደረሰ አዲስ አበባ፣ መጋቢት  18  ቀን  2017   ዓ.ም (ኢ መ አ) በምዕራብ   ሸዋ   ዞን   ውስጥ   የሚገኙትን   የወረዳና   የቀበሌ  ከተሞችን   የሚያስተሳስረው  የጊንጪ - ካቺሴ - ጩሉጤ  የመንገድ ሥራ ፕሮጀክት  ምዕራፍ 1፡ ጊንጭ - ሽኩቴ (ኪ.ሜ 59)   የአስፋልት ኮንክሪት   መንገድ  ግንባታ  72   በመቶ   ደርሷል፡፡ በአሁናዊው  የፕሮጀክቱ   የግንባታ  እንቅስቃሴም  የአፈር ቆረጣ እና ሙሌት ስራ፣ የሰብቤዝ፣ ቤዝ ኮርስ ፣የስትራክቸር ስራ  እንዲሁም   48 ከ.ሜ  የሚሆን   የአስፋልት   ንጣፍ   ሥራ   እየተከናወነ   ይገኛል፡፡ 62.2  ኪሎ ሜትር   ርዝማኔ   የሚሸፍነው   ይኸው   መንገድ  በወረዳ 19  ሜትር ፣በከተማ  19  ሜትር፣በቀበሌ 14.2 ሜትር ፣ በገጠር  10 ሜትር  የጎን   ስፋት   እንዲኖረው   ተደርጎ   በመገንባት   ላይ   ነው፡፡ በመንገዱ    የግንባታ    ሂደት   የፀጥታ  እና  ያለመረጋጋት  ችግሮች አጋጥመው የነበረ ቢሆንም ኢመአ ከሚመለከታቸው ባለድርሻ  አካላት  ጋር  ባደረገው ጥረቶች አሁን ላይ የመንገዱ  ግንባታ በእቅዱ መሰረት በመከናወን ላይ ነው። ይህንን  ግንባታ   እያካሄደ    የሚገኘው  ሀገር  በቀሉ የሥራ ተቋራጭ  ገምሹ  በየነ  ጠቅላላ  የሥራ  ተቋራጭ ሲሆን ፎርትረስ ኢንጂነሪንግ ኮንሰልታንትስና አሶሼትስ ሀ.የተ.የግ.ማህበር  የማማከርና  የቁጥጥሩን  ስራ  እያከናወነው  ይገኛል፡፡ ለፕሮጀክቱ   የሚውለው (898,273,177 ) ስምንት  መቶ  ዘጠና  ስምንት  ሚሊዮን  ሁለት  መቶ  ሰባ ሦስት  ሺህ  አንድ  መቶ  ሰባ  ሰባት  ብር   በኢትዮጵያ  መንግስት  የሚሸፈን ነው፡፡ መንገዱ  ቀድሞ  በጣም የተበላሸ  እና  ለትራንስፖርት  አመቺ ያልነበረ  መንገድ   ሲሆን   በአስፋልት  ኮንክሪት  ደረጃ  መገንባቱ  የአካባቢው  ህብረተሰብ  ምቹ የመንገድ   መሰረተ  ልማት  ተጠቃሚ  እንዲሆኑ  የሚያደርግ  ነው፡፡ የጊንጪ - ካቺሴ - ጩሉጤ  መንገድ  በስሩ   የሚገኙትን  ወረዳዎችን፣ ከተሞችን እና ቀበሌዎችን  በቅርበት   ከማገናኘት  ጎን  ለጎን  በአካባቢው  የሚመረቱ   የተለያዩ  የግብርና  ውጤቶች እና የቁም እንስሳት  ለገበያ  ለማውጣት የሚያግዝ ይሆናል ፡፡ በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የአዲስ - ጊቤ ከባድ ጥገና ፕሮጀክት በተሻለ እንቅስቃሴ ላይ ይገኛል አዲስ አበባ፣ መጋቢት 16፣ 2017 (ኢ መ አ):- የአዲስ አበባ - ጅማ ዋና መንገድ አካል የኾነው የአዲስ-ጊቤ አስፋልት መንገድ ከባድ ጥገና ፕሮጀክት በተሻለ እንቅስቃሴ ላይ ይገኛል። መንገዱ ከፍተኛ የትራፊክ ፍሰት የሚያስተናግድ በመሆኑና በአገልግሎት ብዛት በመጎዳቱ ምክንያት ነው ከባድ ጥገና እየተደረገለት የሚገኘው። ከዚህም ባሻገር የወጪ ንግድም መተላለፊያ በመኾኑ የመስመሩን ከፍተኛ የትራፊክ ፍሰት በሚመጥን መልኩ መልሶ ግንባታ እየተደረገለት ነው። የከባድ ጥገና ፕሮጀክቱ ለግንባታ አመቺነት ሲባል በሁለት ክፍሎች ተከፋፍሎ እየተከናወነ ይገኛል። ለጥገናው በድምሩ 3 ቢሊዮን ብር የተመደበ ሲኾን፥ ሙሉ ወጪው በፌደራል መንግስት ይሸፈናል። በክፍል - 2 የአዲስ -ጊቤ ወንዝ የመልሶ ግንባታ ፕሮጀክት 64 ኪሎሜትር የሚሸፍን ኾኖ፥ መነሻውን ሰበታ ከተማ ዲማ ላይ በማድረግ ቆራ ከተማ ድረስ ይዘልቃል። ከባድ ጥገናውን የሚያከናውነው ሀገር-በቀሉ ቤአኤካ ጠቅላላ ንግድ ሥራ አሁን ላይ ከአጠቃላይ ሥራው 46 በመቶውን ማጠናቀቁ ተመልክቷል። በ2018 ዓመት አጋማሽም ሥራውን ሙሉ በሙለ  ለማጠናቀቅ ግብ አስቀምጦ እየሠራ ይገኛል። የፕሮጀክቱ ክፍል - 3 መነሻውን ከቆራ ከተማ በማድረግ እስከ ጊቤ ወንዝ ድረስ እየተከናወነ የሚገኘ ሲኾን፥ 93 ኪሎሜትር ይሸፍናል። ሀገር-በቀሎቹ ቲክስ ኮንስትራክሽን እና ከኤም.ሲ.ጂ ኮንስትራክሽን በጋራ ይሠራሉ። የ9 ኪሎሜትር መልሶ ግንባታ እና የ15 ኪሎሜትር የአስፋልት ኦቨርሌይ ሥራዎች ተሠርቷል። በሁለቱም ፕሮጀክቶች በአሁኑ ወቅት በተጨማሪም የሰብቤዝ፣ ቤዝኮርስ፣ የፍሳሽ ማስወገጃ ቱቦ እንዲሁም የተበላሹ ቦታዎችን ለይቶ የመቁረጥና በአስፋልት መልሶ የመጠገን ሥራዎች እንዲሁም የአስፋልት ድረባ ሥራ (Asphalt Overlay) በመከናወን ላይ ናቸው፡፡ በሥራ ተቋራጮቹ የአቅም እና የግብዓት ውስንነቶች እንዲሁም አልፎ አልፎ የሚከሰቱ የፀጥታና ተያያዥ ችግሮች ለመቅረፍ የሚደረገው ጥረት በኢ መ አ በኩል ጥብቅ ክትትሉ ተጠናክሮ ይቀጥላል። በአጠቃላይ ከባድ ጥገናው ሲጠናቀቅ በአዲስ አበባ-ወልቂጤ-ጅማ ኮሪደር ይስተዋል የነበረውን የትራፊክ እንቅስቃሴ መስተጓጎልና እንግልት ከመቅረፍም ባሻገር ከዚህ ቀደም ለትሽከርካሪ ዕቃ መለዋወጫ የሚወጣውን አላግባብ ወጪ እና የነዳጅ ብክነት ከማስቅረቱም ባለፈ የወጪ ንግዱን በከፍተኛ ኹኔታ ያሳልጣል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የሀሚድ ድልድይ ለትራፊክ አገልግሎት ክፍት ተደረገ አዲስ አበባ፣ መጋቢት 13፣ 2017 (ኢ መ አ):- የወልዲያ - ሮቢት መንገድ ክፍል የኾነው የሀሚድ ወንዝ የብረት ድልድይ ጥገናው መጠናቀቁን ተከትሎ ለትራፊክ አገልግሎት ክፍት ተደርጓል። ድልድዩ ከተፈቀደው ክብደት በላይ በጫነ ከባድ ተሽከርካሪ ጉዳት ደርሶበት እንደነበር ይታወቃል። በወቅቱ ተለዋጭ መንገድ በማዘጋጀት ተሽከርካሪዎች እንዲገለገሉ ማድረግ ተችሏል። የብረት ድልድዩን መልሶ ለመገንባትም በኢትዮጵያ መንገዶች አስተዳደር የኮምቦልቻ መንገድ ጥገና ዲስትሪክት እንዲሁም የድልድይ እና ስትራክቸር ዳይሬክቶሬት ባደረጉት ከፍተኛ ርብርብ ድልድዩን በአጭር ጊዜ ውስጥ በመጠገን ለትራንስፖርት እንቅስቃሴ ክፍት ማድረግ ተችሏል። 45 ነጥብ 7 ሜትር ርዝመት ያለው ይኸው ድልድዩ አሁን ላይ ሙሉ በሙሉ ክፍት ተደርጎ አገልግሎት እየሰጠ ይገኛል። ድልድዩን በዘላቂነት በኮንክሪት ለመገንባት አስፈላጊው ቅድመ ዝግጅት እየተደረገ ሲኾን፣ በዚህ ዓመት መጨረሻ ግንባታው እንደሚጀመር ይጠበቃል። አሽከርካሪዎች በሕግ በተፈቀደው የጭነት ልክ በመጫን በባለቤትነት ስሜት እንዲገለገሉ የኢትዮጵያ መንገዶች አስተዳደር ያሳስባል።

የባቱ - አርሲነገሌ የፍጥነት መንገድ ግንባታ 84 ነጥብ 50 በመቶ ደረሰ የአዲስ አበባ-ሞያሌ-ናይሮቢ-ሞምባሳ የመንገድ ኮሪደር አካል የሆነው የሞጆ-ሐዋሳ ኮንትራት 3 ፡ ባቱ - አርሲነገሌ የፍጥነት መንገድ ግንባታ 84 ነጥብ 50 በመቶ ደርሷል፡፡ 57 ኪሎ ሜትር በሚረዝመው የመንገዱ ግንባታ የእስካሁን ሂደትም የአፈር ቆረጣ እና ሙሌት ፣ የውሃ መፋሰሻ ቦዮች (Side Ditches) ፣ የሰብ ቤዝ እና ቤዝ ኮርስ ፣ ሚዛን ጣቢያዎች እና ዞሮ መመለሻ መንገዶች ፣ የስትራክቸር ፣ የመኪና መሸጋገሪያ ፣ የእግረኛ/የእንስሳት መሸጋገሪያ ፣ የወንዝ ድልድዮች ፣ የመንገድ ዳር አጥር ፖሎች የማምረት ፣ የ Intelligent Transport System (ITS) ቱቦ ቀበራ ፣ የአስፋልት ማንጠፍ እንዲሁም በዋናው መንገድ እና አገናኝ መንገዶች ላይ ሌሎች የተለያዩ ስራዎች እየተከናወኑ ይገኛሉ። የመንገዱ የአስፋልት ንጣፍ ሥራ በሦስት ደረጃ እየተከናወነ የሚገኝ ሲሆን በእስካሁኑም የመጀመሪያው Dense Bituminous Macadam (DBM) ንጣፍ ስራ 53 ኪሎ ሜትር ፣ የሁለተኛው 52 ኪሎሜትር እንዲሁም የመጨረሻው ደግሞ 35 ኪሎሜትር የሚሆነው ስራ ተገባድዷል። የዚህ ፕሮጀክት ግንባታ ሙሉ በሙሉ ከከተማ ውጪ የሚያልፍ ሲሆን ከከተማዎች ጋር የሚያስተሳስሩ አገናኝ መንገዶች የሚሰሩለት ይሆናል። የፍጥነት መንገዱ በ90 ሜትር የመንገድ ወሰን ውስጥ የሚገኝ ሆኖ ያለው አጠቃላይ የጎን ስፋት 31.6 ሜትር ሲሆን የአገናኝ መንገዶቹ ደግሞ በገጠር 10 ሜትር እና በከተማ ደግሞ 22.5 ሜትር ስፋት ያላቸው ናቸው። መንገዱን ለመገንባት የሚውለው 4.689 (አራት ነጥብ ስድስት ቢሊዮን ብር ) የተሸፈነው በአለም ባንክ የገንዘብ ድጋፍ ነው፡፡ ግንባታውን እያከናወነ የሚገኘው ዓለም አቀፉ የስራ ተቋራጭ ቻይና ኮሙኒኬሽን ኮንስትራክሽን ካምፓኒ ነው፡፡ ኩንሃ ኢንጂነሪንግ እና ኮንሰልቲንግ ከኮሪያ ኤክስፕረስዌይ ኮርፖሬሽን ጋር በትብብር እንዲሁም ሀገር በቀሉ ንዑስ አማካሪ ኢትዮ ኢንፍራ ኢንጂነሪንግ ሃ.የተ.የግ.ኩባንያ የማማከሩንና የቁጥጥሩን ሥራ ያከናውናሉ፡፡ የአዲስ አበባ - ሞጆ - ሞያሌ - ላሙ - ሞምባሳ ትራንስ ኢንተርናሽናል ሀይዌይ አንድ አካል የሆነው ይኸው የመንገድ ኮሪደር -የባቱ ከተማ ፣ የአዳሚ ቱሉ እና አርሲ ነገሌ ወረዳዎች ብሎም ከ17 በላይ ቀበሌዎችን የሚያስተሳስር ነው:: በተጨማሪም በመስመሩ ላይ የሚገኙትን የእርሻና የኢንዱስትሪ እንዲሁም የቱሪስት መስህብ የሆኑ ቦታዎችን ለማገናኘት ያስችላል፡፡ ከዚህም ባሻገር የሞጆ-ሐዋሳ መንገድ 10,000 ኪሎ ሜትር የሚሸፍነው የታላቁ የምስራቅ አፍሪካ ኮሪደር የደቡብ አፍሪካ ኬፕታውን ትራንስ አፍሪካን ሃይዌይ አካል በመሆኑ የአህጉራችንን ኢኮኖሚያዊና ማህበራዊ ትስስር በማጠናከር ረገድ ከፍተኛ ጠቀሜታ ያለው መንገድ ነው፡፡ በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የሙስሊ - ኮሪ - ቴሩ ምዕራፍ አንድ የመንገድ ፕሮጀክት የአስፋልት ንጣፍ እየተከናወነለት ነው ሰመራ፣ መጋቢት 10፣ 2017 (ኢ መ አ):- በአፋር ክልል የሙስሊ - ኮሪ - ቴሩ መንገድ ፕሮጀክት የመጀመሪያው ምዕራፍ ከኪሎሜትር 00 እስከ ኪሎሜትር 84 ያለው የአስፋልት ንጣፍ እየተከናወነለት ነው። የመንገድ ግንባታው 84 ነጥብ 2 ኪሎሜትር የሚሸፍን ሲኾን፥ በአፋር ክልል አውሲረሱ እና ፋንቲረሱ ዞኖች ውስጥ የሚገኙ ሁለት ወረዳዎችን እና በርካታ ቀበሌዎችን ያስተሳስራል። አሁን ላይ የ20 በመቶ የውኃ መፋሰሻ ቱቦ፣ የ21 በመቶ የስትራክቸር፣ የ98 በመቶ የአፈር ቆረጣ እና ሙሌት፣ የ34 በመቶ ሰብቤዝ እንዲሁም የ10 በመቶ የአስፋልት ንጣፍ ሥራዎች ተከናውነዋል። የሰባት ድልድዮች ግንባታም በፕሮጀክቱ ተካትቷል። በአሁኑ ወቅት የፕሮጀክቱ አጠቃላይ አፈጻጸም 56 በመቶ ደርሷል። የተመዘገበውን አበረታች አፈጻጸም አጠናክሮ ለማስቀጠል በትኩረት እየተሠራ ይገኛል። የመንገድ ግንባታው የአካባቢውን የአርብቶ አደር ማኅበረሰብ ባማከለ መልኩ፣ የቁም እንስሳት በተለይ ግመሎች መንገዱን በሚያቋርጡበት ጊዜ ጉዳት እንዳይገጥማቸው ተገቢው የጥንቃቄ ሥራ እየተሠራ ይገኛል። ግንባታውን ዓለም-አቀፋ ቻይና ስቴት ኮንስትራክሽን ኢንጅነሪንግ ከፌደራል መንግስት በተመደበ 1 ነጥብ 5 ቢሊዮን ብር ወጪ ያከናውናል። ኢንስራድ ሲቪል ሲስተም ኢንጅነሪንግ ፕሮጀክቱን በማማከር እና በመቆጣጠር በኩል ይሳተፋል። የመንገድ ፕሮጀክቱ ሲጠናቀቅ የኮሪ እና መባይ ወረዳዎችን ጨምሮ በመስመሩ የሚገኙ በርካታ ቀበሌዎችን ደረጃውን በጠበቀ መንገድ ያስተሳስራል። የጤና፣ የትምሕርት እና መሰል የማኅበራዊ ተቋማት ተደራሽነትን በማስፋት ከፍተኛ አስተዋጽዖ ያበረክታል። የዚሁ መንገድ ትስስር ቀጣይ ክፍል የኾነው ከኪሎሜትር 84 እስከ ኪሎሜትር 156 ድረስ ያለው የፕሮጀክቱ ምዕራፍ ሁለት በግንባታ ሂደት ላይ ይገኛል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የመንገድ ዘርፍ አፈጻጸም ላይ የሚታዩ ተግዳሮቶች እና ቀጣይ አካሄዶች ላይ ውይይት ተካሄደ የከተማ እና መሠረተ ልማት ሚንስትር ወ/ሮ ጫልቱ ሳኒ የኢ መ አ መንገድ ምርምር ማዕከልን ጎብኝተዋል አዲስአበባ፣ መጋቢት 09፣ 2017 (ኢ መ አ):- የመንገድ ዘርፍ አፈጻጸም ላይ የሚታዩ ተግዳሮቶች እና ቀጣይ አካሄዶች ላይ በኢ መ አ የመንገድ ምርምር ማዕከል ውይይት ተካሂዷል። በውይይቱ ላይ በመንገድ ዘርፍ ባለፉት ዓመታት የተመዘገቡ ስኬቶች፣ ዘርፉን የገጠሙት ተግዳሮቶች እና ቀጣይ የመፍትሄ አቅጣጫዎች ላይ ገለጻ ተደርጓል። በተጨማሪም ከሚንስቴር መ/ቤቱ ድጋፍ ሊደረግባቸው የሚችሉ ጉዳዮችም ተለይተው ቀርበዋል።  በዚህም ረገድ የሀገሪቷን የመንገድ ሽፍን የመንገድ ዘርፍ ልማት ፕሮግራሙ በ1989 ከነበረበት 23 ሺህ ኪሎሜትር አሁን ላይ ወደ 171 ሺህ ማድረስ እንደተቻለ ገላጻው ላይ ተጠቁሟል። ሆኖም ባለፉት ጊዜያት የገጠሙ የበጀት እጥረት፣ የግንባታ ግብዓት ዋጋ መናር፣ የወሰን ማስከበር፣ የጸጥታ ስጋት፣ የመንገድ ጥገና ላይ ያሉ ክፍተቶች(የማሽነሪ እና የባለሞያ እጥረት)፣ ደካማ የፕሮጀክት አመራር እና የሀገር በቀል የሥራ ተቋራጮች ተወዳዳሪነት ማነስ ዘርፉን እንደፈተኑት ተነስቷል። ይህም ፕሮጀክቶች በተያዘላቸው ዋጋ እና በቀመጠላቸው ጊዜ እንዳይጠናቀቁ እንዲሁም ብቁ እና ተወዳዳሪ ተቋራጮች ገበያ ላይ እንዲቀንሱ ተጽዕኖ አሳድሯል ተብሏል። የፖሊሲ ማሻሻያዎችን ማድረግ፣ መጠናቀቅ በሚችሉ ፕሮጀክቶች ላይ ቅድሚያ ትኩረት መስጠት እንዲሁም የግብዓት አቅርቦት ላይ ያሉ ችግሮችን መቅረፍ እንደሚገባ በገለጻው ላይ ተጠቁሟል። የኢትዮጵያ መንገዶች አስተዳደር ዋና ዳይሬክተር መሐመድ አብዱራህማን (ኢ/ር)፤ ዘርፉ ላይ የሠው ኃይል እጥረት መኖሩን ጠቁመው፣ አሁን ካለው በተሻለ ዘርፉ ብቁ እና ሥልጡን በኾኑ ባለሞያዎች በሳይንሳዊ መንገድ መመራት ይኖርበታል ብለዋል። የከተማ እና መሠረተ ልማት ሚንስትር ወ/ሮ ጫልቱ ሳኒ፤ መንገድ በሀገሪቱ ዕድገት ላይ የማይተካ ሚና እንዳለው አንስተው፣ የዘርፉ ተግዳሮቶች ውስብስብ በመኾናቸው ለመሠረታዊ ችግሮች ቅድሚያ መስጠት ይገባል ብለዋል።  ካለው የሥራ ስፋት እና ውስብስብነት አንጻር ከባለድርሻ አካላት ጋር ተቀራርቦ በመፍትሄዎቹ ላይ መምከር እንደሚገባም ገልጸዋል። ቀሪ የወሰን ማስከበር ሥራዎችን ማጠናቀቅ እና ከአዋጁ ጋር በተገናኘ ያሉ ክፍተቶች ላይ የግንዛቤ ማስጨበጫ ሥራ መሥራት፣ የመንገድ ጥገና ዘርፉን ለግል ተቋራጮች ሳቢ ማድረግ እንዲሁም ተቋማዊ ባሕልን ዳግም ማጤን እንደሚገባ ክብርት ሚንስትሯ አሳስበዋል። በቀጣይም በሚንስቴር መ/ቤቱ በኩል ድጋፍ ሊደረግባቸው የሚቻልባቸውን ጉዳዮች በመለየት አስፈላጊው ድጋፍ እንደሚደረግም አረጋግጠዋል። በሌላ በኩል የኢ መ አ የመንገድ ምርምር ማዕከል አጠቃላይ የሥራ እንቅስቃሴ ላይ ገለጻ እና ጉብኝት ተደርጓል። ማዕከሉ አዳዲስ ሐሳቦችን የሚያመነጭ እና ዘመኑን የዋጀ መኾን እንደሚገባው እንዲሁም ከምርምር በዘለለ የመንገድ ዘርፉን በማዘመን ረገድ ከፍተኛ ሚና እንደሚኖረው ተጠቁሟል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የላሊበላ - ኩልመስክ - ሙጃ መንገድ ፕሮጀክት እየተከናወነ ይገኛል አዲስ አበባ፣ መጋቢት 4 ፣ 2017 (ኢ መ አ) 48 ነጥብ 78 ኪሎሜትር የሚረዝመው የላሊበላ - ኩልመስክ - ሙጃ የአስፋልት ኮንክሪት የመንገድ ፕሮጀክት በግንባታ ሂደት ላይ ይገኛል፡፡ በፕሮጀክቱ ግንባታ ላይ የዲዛይን ፣ የአፈር ጠረጋ ፣ የቆረጣ ፣ የሙሌት ፣ የውሃ ማፋሰሻ ቱቦ ቀበራ፣ የሰብ ቤዝ ሥራዎች እንዲሁም የድልድይ ግንባታ ጨምሮ እየተከናወነ ነው፡፡ ግንባታውን እያከናወነ የሚገኘው ዓለም አቀፉ ቻይና ሲቪል ኢንጂነሪነግ ኮንስትራክሽን ኮርፖሬሽን ሲሆን የማማከሩንና የቁጥጥሩን ሥራ ቤዛ ኢንጅነሪንግ ኬኒያ ሊሚትድ እየሰራው ነው፡፡ የመንገዱ አጠቃላይ የጎን ስፋት በገጠር ከ8-10 ሜትር ፣ በቀበሌ 16 ሜትር እንዲሁም በወረዳ 20.5ሜትር ስፋት ያለው ነው፡፡ ለግንባታ የሚውለው 1,888,292,297 (አንድ ቢሊየን ስምንት መቶ ሰማንያ ስምንት ሚሊዮን ሁለት መቶ ዘጠና ሁለት ሺህ ሁለት መቶ ዘጠና ሰባት ብር ) ብር በኢትዮጵያ መንግስት ወጪ የተደረገ ነው፡፡ በአካባቢው በሚስተዋለው ወቅታዊው የፀጥታ ችግር ምክንያት አስፈላጊ የሆኑ የግንባታ ግብዓቶችን እና ማሽሪዎችን በበቂ ሁኔታ ለማማጓጓዝ የስራ ተቋራጩ መቸገሩ ፣ የኮንስትራክሽ ፈንጂ እና የፈንጂ ተቀፅላዎች ማስገባት አለመቻል እንዲሁም በመንገዱ ክልል ውስጥ የተካተቱ ንብረቶች በወቅቱ አለመነሳት በግንባታው የሥራ ሂደት ላይ ተጽዕኖ አሳድረው ቆይተዋል፡፡ እነዚህን ችግሮች ለመቅረፍ የአትዮጵያ መንገዶች አስተዳደር ከአካባቢው አስተዳደር እና ከማህበረሰቡ ጋር በመተባበር አስፈላጊውን ክትትልና ድጋፍ በማድረጉ አሁን ላይ የተሻለ የፕሮጀክት አፈፃፀም የተመዘገበ ሲሆን ይህም ተጠናክሮ እንደሚቀጥል ይጠበቃል፡፡ መንገዱ ሲጠናቀቅ በዋናነት የላሊበላ ፣ የኩልመስክ እና የሙጃ ከተሞችን በቅርበት የሚያስተሳስር ሲሆን ወደ ላሊበላ ፍልፍል አብያተ-ክርስቲያናት መዳረሻ በመሆን ለቱሪስቶች ምቹ ሁኔታን ለመፍጠር የሚያግዝ ይሆናል፡፡ በተጨማሪም በአካባቢው የሚመረቱትን የዘንጋዳ ፣ የገብስ እና ባቄላ ውጤቶች ወደ ማዕከላዊ ገበያ በቀላሉ ለማድረስ ምቹ ሁኔታን በመፍጠር የአካባቢውን ማህበረሰብ የኢኮኖሚ እንቀስቃሴ ያፋጥናል፡፡ በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads