Playmaker Journal

အယ်ချီ vs ဆိုစီဒက် အင်္ဂါ (မနက် ၂း၀၀ နာရီ) တနင်္လာညအတွက် တစ်ကွက်ကောင်းကို လာလီဂါက စဉ်းစားထားပြီး အယ်ချီနဲ့ ဆိုစီဒက်တို့ရဲ့ပွဲကို သုံးသပ်ကြည့်ချင်ပါတယ်။ ပြီးခဲ့တဲ့ရာသီတုန်းက တန်းဆင်းဇုန်တိုက်ပွဲဝင်ခဲ့ရတဲ့ အယ်ချီဟာ ဒီရာသီအစမှာလည်း ၃ ပွဲကန်ပြီးချိန် အဆင့် ၁၉ နေရာရောက်နေတာပါ။ ၃ ပွဲမှာ စုစုပေါင်း ၉ ဂိုးပေးခဲ့ရတဲ့ အယ်ချီခံစစ်ကလည်း ဆိုးနေပါတယ်။ ၄ ပွဲမှာ ၁ ပွဲသာ နိုင်သေးတဲ့ ဆိုစီဒက်ရဲ့ရာသီအစ ရလဒ်ပိုင်းကလည်း အားရစရာ မရှိဘူး။ ဒါပေမဲ့ ဆိုစီဒက်ဟာ ရီးရဲလ်၊ ဘက်တစ်တို့လို အသင်းတွေနဲ့ အဝေးကွင်းကန်ခဲ့ရတာပါ။ ဒါ့အပြင် မကြာသေးခင်နှစ်တွေအတွင်းတွေ့ဆုံမှုအရလည်း အယ်ချီဟာ ဆိုစီဒက်ရဲ့ငယ်နိုင်ဖြစ်နေပါတယ်။ နောက်ဆုံးတွေ့ဆုံမှု ၈ ပွဲစလုံးမှာ ဆိုစီဒက် မရှုံးခဲ့ဘဲ ၇ ပွဲတောင်နိုင်ထားပါတယ်။ တာထွက်ဆိုးနေတဲ့ အိမ်ရှင်ကြောင့် ဒီတစ်ကြိမ်တွေ့ဆုံမှုမှာလည်း ဆိုစီဒက်ပဲ အမှတ်ပြည့်ယူနိုင်ဦးမှာပါ။ ရွေးချယ်မှု - ဆိုစီဒက်

===================== ဖီဖာဥက္ကဌဂျီယန်နီအင်ဖန်တီနိုဟာ မတ်လတွင် ကျင်းပမယ့် ဖီဖာဥက္ကဌရွေးကောက်ပွဲတွင် ထပ်မံ ယှဉ်ပြိုင်လာဦးမည်ဖြစ်ကြောင်း ဖီဖာက အတည်ပြုလာပါတယ်။ ၂၀၁၆ ခုနှစ်ကတည်းက ဖီဖာဥက္ကဌအဖြစ် တာတန်ထမ်းဆောင်လာခဲ့တဲ့ အင်ဖန်တီနိုဟာ ဖီဖာက ကြီးမှူးကျင်းပတဲ့ ကမ္ဘာ့ဖလားအပါအဝင် ပြိုင်ပွဲများအား ကုမ္ပဏီတစ်ခု လက်အောက်တွင် ထားပြီး ယင်းကုမ္ပဏီရဲ့ ရှယ်ယာများကို ပုဂ္ဂလိက ရင်းနှီးမြှပ်နှံသူများထံ ရောင်းချရန် စီစဉ်မှုများကြောင့် ဝေဖန်မှုများနှင့် ကြုံခဲ့ရပါတယ်။ အင်ဖန်တီနိုရဲ့ ယင်းအကြံအစည်ကြောင့် ယူအီးအက်ဖ်အေက ကမ္ဘာ့ဖလားအပါအဝင် ဖီဖာက ကျင်းပတဲ့ ပြိုင်ပွဲများကို မယှဉ်ပြိုင်ဘဲ သပိတ်မှောက်ရန် စီစဉ်ခဲ့ပါတယ်။ အင်ဖန်တီနိုဟာ စနေနေ့တုန်းက ပိုလန်တွင် ကျင်းပတဲ့ အမျိုးသမီးယူ-၂၀ ကမ္ဘာ့ဖလားပြိုင်ပွဲသို့ တက်ရောက်လာချိန်တွင် သတင်းထောက်များက အနာဂတ်နှင့်ပတ်သက်ပြီး‌ မေးမြန်းလာချိန်မှာ ဖြေကြားရန် ငြင်းဆိုခဲ့ပါတယ်။ ဒါပေမယ့် ဖီဖာကတော့ အင်ဖန်တီနိုမှာ စတုတ္ထသက်တမ်းအတွက် ယှဉ်ပြိုင်လာမည်ဖြစ်ကြောင်း အတည်ပြုလာပါတယ်။ ဖီဖာက ကမ္ယာ့ဖလားပြိုင်ပွဲနောက်ပိုင်းတွင် ပထမဆုံးအကြိမ်အဖြစ် အင်ဖန်တီနိုမှာ ဥက္ကဌရာထူးအတွက် ယှဉ်ပြိုင်မယ်လို့ ကြေညာလာတာပါ။ အသက် ၅၆ နှစ်ရှိ ဆွစ်ဇာလန်နိုင်ငံသားသာ ထပ်မံ ရွေးချယ်ခြင်းခံလာရပါက ၂၀၃၁ ခုနှစ်အထိ တာဝန်ထမ်းဆောင်ခွင့် ရရှိလာပါမယ်။ အင်ဖန်တီနိုဟာ လာမယ့်မတ်လ ရွေးကောက်ပွဲတွင် ဖီဖာအဖွဲ့ဝင် ၂၁၁ နိုင်ငံမှ ၁၁၆ မဲ ထောက်ခံမှု ရရှိလာပါက ထပ်မံ တာဝန်ထမ်းဆောင်လာရဦးမှာလည်း ဖြစ်ပါတယ်။ လက်ရှိအချိန်အထိ အင်ဖန်တီနိုရဲ့ ဥက္ကဌရာထူးအား ယှဉ်ပြိုင်မယ့်သူအဖြစ် ကြေညာလာသူ မရှိသေးပါဘူး။

ဖီဖာဥက္ကဌရာထူးအတွက် ဆက်လက်ယှဉ်ပြိုင်လာဦးမယ့် အင်ဖန်တီနို

===================== လက်စတာနှင့် အင်္ဂလန်တိုက်စစ်မှူးဟောင်းဂျေမီဗာဒီဟာ ဘန်လေသို့ ရာသီအကုန်အထိ စာချုပ်ဖြင့် ပြောင်းရွှေ့လာပါတယ်။ အသက် ၃၉ နှစ်ရှိ ဗာဒီဟာ ၁၄၅ ဂိုးဖြင့် လက်စတာသမိုင်းတွင် ပရီးမီးယားလိဂ်ဂိုးအများဆုံးသွင်းယူထားသူ ဖြစ်ပြီး ၂၀၂၅ ခုနှစ်တွင် စီးရီးအေကလပ် ခရီမိုနက်စ်သို့ ပြောင်းခဲ့သူ ဖြစ်ပါတယ်။ ဗာဒီဟာ နွေရာသီမှာ အီတလီကလပ်မှ ထွက်ခွာလာပြီးနောက် ချန်ပီယံရှစ်တွင် နိုင်ပွဲပျောက်ကာ ဇယားအောက်ဆုံးမှာ ရပ်တည်နေတဲ့ ဘန်လေသို့ ပြောင်းရွှေ့လာပါတယ်။ ဗာဒီဟာ အင်္ဂလန်အသင်းအတွက် ၂၆ ပွဲ ကစားခဲ့ရာမှာ ၁၃ ဂိုးသွင်းပေးထားနိုင်ခဲ့သူ ဖြစ်ပြီး ၂၀၁၂ ခုနှစ်တွင် အပျော်တမ်းကလပ်ဖလက်ဝုဒ်တောင်းမှ ပြောင်းလာပြီးနောက် လက်စတာတွင် ၁၃ နှစ်ကြာ ကစားခဲ့သူ ဖြစ်ပါတယ်။ သူဟာ လက်စတာအတွက် ပွဲ ၅၀၀ ကစားခဲ့ရာမှာ ဂိုး ၂၀၀ သွင်းယူခဲ့သူ ဖြစ်ပါတယ်။ ပြီးခဲ့တဲ့ရာသီတွင် ပရီးမီးယားလိဂ်မှ တန်းဆင်းလာတဲ့ ဘန်လေဟာ ဒုတိယတန်း ရာသီအစ ၅ ပွဲတွင် နည်းပြသစ်နစ်ကီဟာယန်လက်ထက် အဖွင့်ပွဲ ၅ ပွဲဆက် နိုင်ပွဲ ပျောက်နေပါတယ်။ ၎င်းတို့ဟာ စနေနေ့တုန်းက နောက်ဆုံး ၁၀ မိနစ်တွင် ၂ ဂိုးပေးခဲ့ရကာ ဘရစ္စတိုးစီးတီးအား အိမ်ကွင်းမှာ ၂-၁ ဖြင့် အရေးနိမ့်ခဲ့ရပါတယ်။

ဘန်လေသို့ ပြောင်းရွှေ့လာတဲ့ လက်စတာနှင့် အင်္ဂလန်တိုက်စစ်မှူးဟောင်းဗာဒီ

အူဒီးနီးစ်-လာဇီယို တနင်္လာနေ့ (ည ၁း၁၅ နာရီ) Diamond Seven ​တနင်္လာနေ့အကြိုက်ဆုံးအပိုင်တစ်ကွက်ကို အီတလီ စီးရီးအေ ပွဲစဉ်ဖြစ်တဲ့ အူဒီးနီးစ်-လာဇီယို ပွဲကနေ ရွေးချယ်ပေးချင်ပါတယ်။ ​တိုက်စစ်မှာ တိုဗင်နဲ့ လူကာတို့ ခြေစွမ်းပြနေတဲ့ အူဒီးနီးစ်က အဖွင့် ၂ပွဲမှာ ၁ပွဲနိုင်၊ ၁ပွဲသရေနဲ့ ရလဒ်ကောင်းရယူထားနိုင်ပါတယ်။ နောက်ဆုံးကစားခဲ့တဲ့ အိမ်ကွင်းပွဲစဉ်တွေမှာလည်း တိုက်စစ်ကစားပုံ တည်ငြိမ်ပြီး သွင်းဂိုးတွေ ပုံမှန်ရယူပြထားတာမို့ လာဇီယိုခံစစ်ကို ဖိအားပေးကစားနိုင်ဦးမှာ သေချာပါတယ်။ ​လာဇီယိုကလည်း ဇက်ကာဂနီနဲ့ ဒီယာတို့ ဦးဆောင်တဲ့ တိုက်စစ်က အဝေးကွင်းမှာ အကောင်းဆုံးတုံ့ပြန်ကစားနိုင်တာမို့ အကြိတ်အနယ်ရှိမှာ သေချာပါတယ်။ အဓိက ကစားသမားတွေ အစုံအလင်နဲ့ ပွဲထွက်လာနိုင်တာကြောင့် အဝေးကွင်းမှာပါ ဂိုးရဖို့ ရုန်းအားကောင်းနေဦးမှာပါ။ ​နှစ်သင်းစလုံးရဲ့ တိုက်စစ်ပိုင်း ဂိုးသွင်းအားကောင်းနေStar အပြန်အလှန်သွင်းဂိုးတွေမြင်ရနိုင်လို့ ဂိုးအပေါ် ကို ရွေးချယ်လိုက်ပါတယ်။ ရွေးချယ်မှု (အူဒီးနီးစ် ဂိုးပေါ်)

=================== လူစားဝင်လာတဲ့ ဖီဒီရီကိုဂတ်တီရဲ့ အချိန်ပိုဂိုးကြောင့် ဂျူဗင်တပ်ဟာ အေစီမီလန်နှင့်ပွဲမှာ အဖိုးတန်ရမှတ် ၁ မှတ်ရရှိခဲ့ပြီး စီးရီးအေရာသီအစ ရှုံးပွဲမရှိမှတ်တမ်းအား ဆက်လက် ရယူလာပါတယ်။ ဂျူဗင်တပ်ဟာ ပထမပိုင်းမှာ ပွဲကို လွှမ်းမိုးကစားနိုင်ခဲ့ပြီး အပိုင်ကန်ချက် ၃ ကြိမ် ရရှိခဲ့ပေမယ့် မီလန်ဂိုးသမားမိုက်မိုင်နန် လက်စွမ်းပြကာကွယ်သွားလို့ ဂိုးမရခဲ့တာပါ။ ဒုတိယပိုင်း ၆၈ မိနစ်မှာတော့ အယ်ဖက်ဂျိုဆစ်စီက အေစီမီလန်အတွက် အမှတ်မထင်ကန်ချက်ဖြင့် ဦးဆောင်ဂိုးစတင်သွင်းယူနိုင်ခဲ့ပါတယ်။ ဒီဂိုးက ဂျူဗင်တပ်တို့ ယခုရာသီမှာ ပထမဆုံးပေးခဲ့ရတဲ့ဂိုးလည်း ဖြစ်ပါတယ်။ ဒါပေမယ့် အချိန်ပိုမှာ နောက်ခံလူဂတ်တီက တီအန်ကောပ်မိုင်နာရဲ့ ဖြတ်တင်ဘောကနေ ခေါင်းတိုက်ပြီး ဂျူဗင်တပ်အတွက် ချေပဂိုးအား သွင်းယူခဲ့ပါတယ်။ ဂျူဗင်တပ်နှင့် သရေကျသာ ကျခဲ့တာကြောင့် ရူဘင်အမိုရမ်ဟာ ၁၉၅၈ ခုနှစ်နောက်ပိုင်း အေစီမီလန်ကို ကိုင်တွယ်တဲ့ ပထမဆုံးလိဂ် ၃ပွဲဆက် နိုင်ပွဲ ရရှိတဲ့ ပထမနည်းပြအဖြစ် မှတ်တမ်းရေးထိုးနိုင်မယ့် အခွင့်အရေး ဆုံးရှုံးခဲ့ရပါတယ်။

နာကျင်အချိန်ပိုဂိုးကြောင့် နိုင်ပွဲဆက်မှု ရပ်တန့်သွားတဲ့ အမိုရမ်ရဲ့ အေစီမီလန်

=================== နယ်သာလန်နောက်ခံလူဟောင်းရော်နယ်ကိုးမန်းရဲ့သား ဂိုးသမားရော်နယ်ကိုးမန်းဂျူနီယာဟာ Cambuur နှင့် ၂ ဂိုးစီသရေကျတဲ့ ဒတ်ချ်အဆင့်မြင့်တန်းလိဂ်ပွဲစဉ်တွင် ဒတ်ချ်ကလပ် Telstar အတွက် ၂ ဂိုးသွင်းလာပါတယ်။ ကိုးမန်းဂျူနီယာဟာ ၂ ဂိုးစီသရေကျတဲ့ ယင်းပွဲစဉ်တွင် ဒုတိယပိုင်းမှာ ရရှိတဲ့ ပင်နယ်တီ ၂ ကြိမ်မှတဆင့် ပင်နယ်တီဂိုး၂ ဂိုးအား သွင်းယူခဲ့တာလည်း ဖြစ်ပါတယ်။ အသက် ၃၁ နှစ်ရှိ ဂိုးသမားဟာ မေလတုန်းက FC Volendam နှင့်ပွဲတွင်လည်း ပင်နယ်တီမှ တဆင့် အနိုင်ဂိုးသွင်းကာ Telstar ကို ဒတ်ချ်အဆင့်မြင့်တန်းလိဂ်တွင် ဆက်လက် ရှင်သန်အောင် ကူညီပေးခဲ့ဖူးသူလည်း ဖြစ်ပါတယ်။ Telstar ဟာ မနေ့ညကပွဲစဉ်တွင် ပွဲချိန် ၂၂ မိနစ်မှာ ပိုရစ်ဆင် အနီကတ်ပြထုတ်ပယ်ခြင်းခံရလို့ တစ်ယောက်အလျှော့ဖြင့် ကစားခဲ့ရကာ ဒုတိယပိုင်းအစမှာ ၂ ဂိုးပေးခဲ့ရပြီး နောက်ကလိုက်ကစားခဲ့ရပါတယ်။ ဒါပေမယ့် ကိုးမန်းဟာ ၆၃ မိနစ်နဲ့ အချိန်ပို ၁၀၁ မိနစ်မှာ ပင်နယ်တီကနေ တဆင့် ချေပဂိုးများ သွင်းယူခဲ့ပါတယ်။ ဒီသွင်းဂိုး ၂ ဂိုးကြောင့် ကိုးမန်းဟာ ဒတ်ချ်အဆင့်မြင့်တန်းလိဂ်ပွဲ တစ်ပွဲတည်းတွင် ၂ ဂိုးသွင်းနိုင်တဲ့ ပထမဆုံးဂိုးသမားဖြစ်လာပါတယ်။ ကိုးမန်းရဲ့ဖခင်ရော်နယ်ကိုးမန်းဟာ ၂၀၂၆ ကမ္ဘာ့ဖလားပြိုင်ပွဲမှာ နယ်သာလန်အသင်းကို ဦးဆောင်ခဲ့တဲ့ နည်းပြကိုးမန်း ဖြစ်ပါတယ်။

ဒတ်ချ်အဆင့်မြင့်တန်းလိဂ်ပွဲတွင် ၂ ဂိုးသွင်းလာတဲ့ ဂိုးသမားကိုးမန်းဂျူနီယာ

================== ဘွန်ဒက်စ်လီဂါချန်ပီယံ ဘိုင်ယန်မြူးနစ်ဟာ စနေနေ့ညတုန်းက ဂျယ်လ်ဆန်ကာချန်တွင် တန်းတက် ရှော်လ်ကေးနှင့် ဂိုးမရှိသရေကျကာ ပြိုင်ပွဲ ၅၉ ပွဲတွင် ပထမဆုံးအကြိမ်အဖြစ် ဂိုးမသွင်းနိုင်တဲ့ပွဲ ကြုံတွေ့ခဲ့ရပါတယ်။ ယခုပွဲစဉ်တွင် ဘိုင်ယန်မြူးနစ်ဟာ ဘောလုံးပိုင်ဆိုင်မှုအသာစီးဖြင့် ပွဲကို လွှမ်းမိုးကစားနိုင်ခဲ့ပြီး ပထမပိုင်းမှာရော ဒုတိယပိုင်းမှာပါ လူးဝစ်ဒီယာ့ဇ် ဂိုးသမားနဲ့ တစ်ဦးချင်း အပိုင်ကန်ခွင့်ရခဲ့ပေမယ့် အသုံးမချနိုင်ခဲ့ပါဘူး။ လီဗာပူးစတားဟောင်းဟာ ပထမပိုင်းမှာ ရတဲ့အခွင့်အရေးကို ဘေးကန်ခဲ့သလို ဒုတိယပိုင်းမှာ ဂိုးသမားအား ကျော်သွင်းချိန်မှာလည်း ရှင်းထုတ်ခြင်းခံခဲ့ရပါတယ်။ ဗင်းဆင့်ကွန်ပနီဟာ ယခုပွဲစဉ်မှာ ဟယ်ရီကိန်းနှင့် မိုက်ကယ်အိုလီဆီတို့ကို အရန်စာရင်းမှာသာ ထည့်သွင်းပြီး အနားပေးခဲ့ပါတယ်။ ဒုတိယပိုင်းမှာ အင်္ဂလန်အသင်းခေါင်းဆောင်ဟယ်ရီကိန်း လူစားဝင်ရောက်ကစားခဲ့သလို အိုလီဆီနှင့် မူစီယာလာတို့လည်း လူစားဝင်ရောက် ကစားခဲ့ပါတယ်။ ဂျာမနီစတားမူစီယာလာဟာ ရာသီကြိုခြေစမ်းပွဲ ၂ ပွဲတွင် မူးလဲမှု ဖြစ်ပြီးနောက် ပထမဆုံးအကြိမ်အဖြစ် ဘိုင်ယန်မြူးနစ်အတွက် ပါဝင်ကစားလာခဲ့တာလည်း ဖြစ်ပါတယ်။ ဟယ်ရီကိန်းဟာ ဘွန်ဒက်စ်လီဂါ ၉၆ ပွဲမြောက် ကစားလာခဲ့တာ ဖြစ်ပြီး ဒီပြိုင်ပွဲမှာ ဂိုး ၁၀၀ ပြည့်ဖို့ ၂ ဂိုးတည်းသာ လိုတော့သူလည်း ဖြစ်ပါတယ်။ ဟယ်ရီကိန်းအနေဖြင့် ပွဲအနည်းဆုံးကစားပြီး ဘွန်ဒက်စ်လီဂါဂိုးရာပြည့်သွင်းနိုင်တဲ့စံချိန်ရေးထိုးဖို့ ကြိုးစားနေတာလည်း ဖြစ်ပါတယ်။ ဒါ့အပြင် ဟယ်ရီကိန်းဟာ ရှော်လ်ကေးအား ဂိုးမသွင်းနိုင်မှုနှင့်အတူ ဘွန်ဒက်စ်လီဂါတွင် ဂိုးမသွင်းနိုင်တဲ့ ပြိုင်ဘက်အသင်းအဖြစ် ရှော်လ်ကေး ထွက်ပေါ်လာပြီ ဖြစ်ပါတယ်။ စပါးစ်တိုက်စစ်မှူးဟောင်းဟာ ဘွန်ဒက်စ်လီဂါပြိုင်ဘက် ၂၁ သင်းနဲ့ ရင်ဆိုင်ရာမှာ အသင်း ၂၀ ကို ဂိုးသွင်းထားနိုင်တဲ့မှတ်တမ်းပိုင်ဆိုင်ထားသူပါ။ ဘိုင်ယန်မြူးနစ်ဟာ ကြာသပတေးနေ့မှာ ချန်ပီယံလိဂ်အဖွင့်ပွဲစဉ်အဖြစ် ဘိုဒို/ဂလမ့်နှင့် ရင်ဆိုင်ကစားရမှာ ဖြစ်ပြီး စက်တင်ဘာလ ၁၃ ရက်နေ့မှာ တန်းတက်အယ်ဗာဘတ်နှင့် ရင်ဆိုင်ကစားရပါမယ်။

၅၉ ပွဲတွင် ပထမဆုံးအကြိမ်အဖြစ် ဂိုးမသွင်းနိုင်ခဲ့တဲ့ပွဲအဖြစ် တန်းတက်နှင့်ပွဲမှာ ကြုံလာရတဲ့ ဘိုင်ယန်မြူးနစ်

==================== ဒေးဗစ်မိုယက်စ်က ၂၀၂၅ ခုနှစ် ဇန်နဝါရီလတွင် အဲဗာတန်သို့ ပြန်လည် ရောက်ရှိလာပြီးနောက် အသင်းပိုင်ရှင်ဒန်ဘရိုင်းကင်နှင့် စကားပြောခဲ့ဖူးခြင်း မရှိသလို တွေ့ဆုံဖူးခြင်းလည်း မရှိကြောင်း ဆိုသွားပါတယ်။ ဖရိုင်းကင်ဦးဆောင်တဲ့ The Friedkin Group ကို ဟူစတန်တွင် အခြေစိုက်တာ ဖြစ်ပြီး ၂၀၂၄ ခုနှစ် ဒီဇင်ဘာလတွင် အဲဗာတန်ကို ဝယ်ယူပြီးနောက် တစ်ကြိမ်မျှ လာရောက်ခဲ့ဖူးခြင်း မရှိဘဲ အဝေးမှပင် စီမံခန့်ခွဲနေတာပါ။ အဲဗာတန်ပိုင်ရှင်တို့ဟာ ပြီးခဲ့တဲ့ နွေရာသီ အပြောင်းအရွှေ့ဈေးကွက်အတွင်းတွင် အသင်းအတွက် အရေးပါတဲ့ ခေါ်ယူမှုများ မပြုလုပ်နိုင်ခဲ့မှုနှင့်အတူ ပရိသတ်များရဲ့ ဒေါသထွက်ခြင်းခံနေရပါတယ်။ အဲဗာတန်ကို ပြန်လည်ကိုင်တွယ်တဲ့ လ ၂၀ အတွင်းတွင် အသင်းပိုင်ရှင်နှင့် ဆုံဖူးသလားလို့ မေးမြန်းလာချိန်တွင် မိုယက်စ်က "နိုး"လို့ ပြတ်သားစွာ ဆိုသွားပါတယ်။ ဖရိုင်းကင်ဟာ ကလပ်အား ဦးစီး ဦးဆောင်ပြုလုပ်ရန် သားမက်ဖြစ်သူ ရီရှီမာတီယာနှင့် စီအီးအိုအန်ဂပ်စ်ကန်နီယာတို့အား လွဲပေးထားပါတယ်။ ဆက်လက်ပြီး မိုယက်စ်က "တကယ်တမ်း ဆက်သွယ်လုပ်ရတာ အန်ဂပ်စ်နဲ့ပါ။ အန်ဂပ်စ်ကိုပဲ သွားတွေ့ဖြစ်တယ်။ ရီရှီက နောက်တစ်ဆင့်ပေါ့။ ပြီးတော့မှ အမေရိကက ဖရိုင်းကင်မိသားစုပေါ့။၊ သူတို့တတွေနဲ့ တိုက်ရိုက်စကားမပြောဖူးပါဘူး။ ဒါပေမယ့် ရီရှီနဲ့တော့ တွေ့တယ်။ သူကလည်း ကျွန်တော်စကားပြောဖြစ်တဲ့တစ်ယောက်ပါ"လို့ ပြောကြားသွားပါတယ်။

အဲဗာတန်ပိုင်ရှင်ဒန်ဖရိုင်းကင်နှင့် စကားပြောဖူးခြင်း မရှိကြောင်း နည်းပြမိုယက်စ်ဖွင့်ဟလာ

====================== ခရစ္စတီယာနိုရော်နယ်ဒိုနှင့် လီယွန်နယ်မက်ဆီတို့ဟာ ပထမဆုံးအကြိမ်အဖြစ် တစ်သင်းတည်းတွင် အတူတကွ ကစားလာဖို့ ရှိနေပါတယ်။ ဂန္ထဝင်နှစ်ဦးတို့ဟာ ပြီးခဲ့တဲ့ဆယ်စုနှစ်နှစ်ခုကျော်ကြာ အကောင်းဆုံးဆုများအတွက် ယှဉ်ပြိုင်လာခဲ့ကြသူများဖြစ်ပြီး ၎င်းတို့ရဲ့ မျိုးဆက်တွင် အကောင်းဆုံးကစားသမားအဖြစ် သတ်မှတ်ခံထားရသူများလည်း ဖြစ်ပါတယ်။ ၎င်းတို့ဟာ ကလပ်နှင့် နိုင်ငံအသင်းတို့နှင့်အတူ ထိပ်တိုက်တွေ့ဆုံမှု ၃၇ ကြိမ်အထိ ရှိထားပါတယ်။ ဒါပေမယ့် ယနေ့တွင် အာဂျင်တီးနားမီဒီယာများရဲ့ဖော်ပြလာမှုအရ ခရစ္စတီယာနိုရော်နယ်ဒိုနှင့် လီယွန်နယ်မက်ဆီတို့ဟာ အံ့ဩသင့်ဖို့ကောင်းစွာပင် တစ်သင်းတည်းတွင် အတူတကွ ကစားလာနိုင်ခြေ ရှိနေကြောင်း သိရပါတယ်။ ၎င်းတို့နှစ်ဦးတို့ဟာ ကစားဖော်ဟောင်းကားလို့စ်တီဗက်ဇ်ရဲ့ နှုတ်ဆက်ပွဲတွင် တစ်သင်းတည်းမှာ အတူကစားလာနိုင်တာ ဖြစ်ပါတယ်။ အသက် ၄၂ နှစ်ရှိ တီဗက်ဇ်ဟာ ၂၀၂၁ ခုနှစ်တုန်းက ကစားသမားဘဝမှ အနားယူခဲ့သူ ဖြစ်ပါတယ်။ တီဗက်ဇ်ဟာ နှုတ်ဆက်ပွဲ ကျင်းပရန်အတွက် ပရိသတ် ၅၇၀၀၀ ဆန့် ဘိုကာဂျူနီယာရဲ့ La Bombonera ကို ငှားရမ်းထားကြောင်း သိရပါတယ်။ သူဟာ ဒီဇင်ဘာလအတွင်းတွင် နှုတ်ဆက်ပွဲ ကစားရန် စီစဉ်ထားတာ ဖြစ်ပြီး သူ့နှုတ်ဆက်ပွဲတွင် အတူတွဲကစားခဲ့တဲ့ ကမ္ဘာ့ထိပ်တန်းကစားသမားအချို့ ပါဝင်နိုင်ရေး ကြိုးပမ်းနေပါတယ်။ တီဗက်ဇ်ဟာ ပရော်ဖက်ရှင်နယ်ကစားသမားဘဝ သူငယ်ချင်းများ၊ ပုဂ္ဂိုလ်ရေးခင်မင်သူများအား သူ့ရဲ့ ပွဲထွက်လူစာရင်းတွင် ထည့်သွင်းနိုင်ရေး ကြိုးပမ်းနေပါတယ်။ ပြိုင်ဘက်အသင်းတွင် ကစားသမားဘဝအတွင်း တွဲကစားခဲ့တဲ့ ကစားဖော်ဟောင်းများ ပါဝင်လာကြပါမယ်။ ကားလို့စ်တီဗက်ဇ်ဟာ အာဂျင်တီးနားအသင်းတွင် မက်ဆီနှင့် တွဲကစားခဲ့သလို ခရစ္စတီယာနိုရော်နယ်ဒိုနှင့်အတူ ယူနိုက်တက်မှာ ၂ ရာသီကြာ ကစားခဲ့ဖူးပါတယ်။ သူဟာ ကိုရင်သီယန်၊ မန်စီးတီး၊ ဂျူဗင်တပ်တို့မှာလည်း ကစားခဲ့ပါတယ်။ လက်ရှိအချိန်တွင် မက်ဆီဘက်က တီဗက်ဇ်ရဲ့ နှုတ်ဆက်ပွဲမှာ ပါဝင်ကစားဖို့ သဘောတူညီမှုပေးထားပြီလားဆိုတာ မသိရသေးသလို ပွဲဖြစ်မြောက်ရေး စီစဉ်မှုကလည်း အစောပိုင်းအဆင့်တွင်သာ ရှိပါသေးတယ်။ ဘာပဲဖြစ်ဖြစ် တီဗက်ဇ် နှုတ်ဆက်ပွဲက ခရစ္စတီယာနိရော်နယ်ဒိုနှင့် မက်ဆီတို့ကို တစ်သင်းတည်းမှာ အတူကစားတာ မြင်ရဖို့ ပထမဆုံးအခွင့်အရေး ဖြစ်နေတာကတော့ သေချာနေပါတယ်။

ကားလို့စ်တီဗက်ဇ်နှုတ်ဆက်ပွဲတွင် မက်ဆီနှင့် ခရစ္စတီယာနိုရော်နယ်ဒိုတို့ ပထမဆုံးအကြိမ် အတူတွဲကစားလာဖို့ ရှိနေ