Вясна: Палітвязні Беларусі

❗️У наваполацкай калоніі палітвязняў катуюць холадам Цяпер у наваполацкай калоніі ўтрымліваюцца мінімум 100 палітзняволеных. Па інфармацыі "Вясны", адміністрацыя ўстановы працягвае ціск на палітвязняў — некаторых на доўгі тэрмін змяшчаюць у ШІЗА і ПКТ, пазбаўляюць спатканняў, перадач і званкоў, а таксама блакуюць ліставанне. Акрамя гэтага, у калоніі вельмі холадна, у тым ліку праз тое, што адміністрацыя стварае пэўныя ўмовы, каб у памяшканнях былі скразнякі. У штрафных ізалятарах вязняў таксама катуюць холадам. Ім забароненыя цёплыя рэчы, фізічныя практыкаванні выконваць нельга. Праз гэта ў людзей пачынаюцца праблемы са здароўем. У такіх умовах іх могуць утрымліваць па некалькі месяцаў запар. Сведчанні былых вязняў пра ўмовы ўтрымання ў ПК-1: 🔹"Што зламалі ў карцары, зарастае само": былы палітвязень — пра ўмовы ў ПК-1 🔹"Начальнік калоніі асабіста ставіў на расцяжку асуджаных", — былы вязень ПК-1 🔹"Ключыца не так зраслася і костка ўпіраецца ў горла". Новыя сведчанні здзекаў са зняволеных у ПК-1

✊Падтрымайце палітзняволеную Вольгу Патрусаеву, асуджаную за пратэсты да калоніі 25-гадовую Вольгу затрымалі 15 лістапада 2023 года. 1 лютага суддзя Таццяна Мотыль прызнала дзяўчыну вінаватай ва ўдзеле ў акцыях пратэсту ў 2020 годзе (арт. 342 КК) і прызначыла 1,5 года калоніі ва ўмовах агульнага рэжыма.  2 красавіка 2024 года ў Вольгі адбыўся разгляд апеляцыйнай скаргі. Старшыня судовай камісіі — суддзя Вера Галаўкова. Вынік апеляцыі невядомы. 💌Падтрымайце палітзняволеную: ПК № 4. 246035, г. Гомель, вул. Антошкіна, 3, Патрусаева Вольга Аляксандраўна 💻Напісаць анлайн

❤️Бязмежная салідарнасць: гайд па падтрымцы палітвязняў з-за мяжы З кожным годам падтрымліваць палітычных вязняў становіцца ўсё складаней. Улады намагаюцца любым спосабам знішчыць салідарнасць беларусаў і блакуюць магчымасці па падтрымцы тых, каго ўтрымліваюць за кратамі. Але, спіс тых, каму трэба нагадаць, што яны не пакінутыя сам-насам з рэпрэсіўнай сістэмай, папаўняецца штотыднёва. Цяпер, калі тысячы беларусаў раскіданы па ўсім свеце, "Вясна" сабрала магчымыя спосабы, як падтрымаць і парадаваць палітзняволеных з-за мяжы. Чытаць матэрыял па спасылцы. ✊Не забывайце, што наша сіла — ў салідарнасці. Поўны і актуальны спіс палітвязняў — prisoners.spring96.org. 💳Падтрымаць «Вясну» на Patreon | Аднаразовым данатам

✊Падтрымайце берасцейца Віталя Чопіка, якога збівалі пры затрыманні Віталь — жыхар Брэста, які хадзіў на палітычна матываваныя суды. Паводле прапагандыстаў, мужчына "разам з саўдзельнікамі сістэматычна наведваў суды па крымінальных справах экстрэмісцкай накіраванасці. Ён фіксаваў ход і вынікі пасяджэнняў, інфармацыю аб сведках і прадстаўніках праваахоўных органаў”.  Берасцейца затрымалі напачатку сакавіка 2024 года. Паводле звестак “Брэсцкай вясны”, пасля затрымання мужчыну дастаўлялі ў шпіталь на хуткай са слядамі моцнага збіцця, а колер твару Чопіка быў жоўтым (што можа казаць аб пашкоджанні печані праз збіццё). 12 сакавіка яго асудзілі паводле арт. 24.3 КаАП нібыта за "непадпарадкаванне міліцыянту". Пазней палітвязню прад'явілі абвінавачанне паводле арт. 361-4 КК (садзейнічанне экстрэмісцкай дзейнасці) і перавялі ў СІЗА. 💌Падтрымайце Віталя грашовымі пераводамі і пасылкамі: СІЗА-7. 224030, г. Брэст, вул. Савецкіх памежнікаў, 37, Віталь Віктаравіч Чопік 💻Напісаць анлайн

💜Палітзняволенай Марыі Калеснікавай споўнілася 42 гады Кіраўніца выбарчага штаба Віктара Бабарыкі знаходзіцца за кратамі ўжо больш за 3 гады і 7 месяцаў. Апошні ліст ад Марыі Калеснікавай родныя атрымалі 14 месяцаў таму, 15 лютага 2023 года. У 2021 годзе суддзя Сяргей Епіхаў прызначыў ёй 11 гадоў зняволення. Пазней КДБ дадаў Марыю ў спіс асоб, "датычных да тэрарыстычнай дзейнасці". У лістападзе 2022 года палітзняволеную змясцілі ў ШІЗА гомельскай жаночай калоніі, адкуль яе даставілі ў хірургічнае аддзяленне гомельскай бальніцы хуткай дапамогі і прааперавалі з прычыны прабадной язвы і перытаніту. Вядома, што шпіталізацыі папярэднічала непрапарцыйна жорсткае абыходжанне ў ШІЗА. Праз некалькі месяцаў палітзняволеную змясцілі ў ПКТ. 24 красавіка Марыя адзначае ў калоніі 42-годдзе. 💌Павіншуйце Марыю лістамі і тэлеграмамі: ПК №4. 246035, Гомель, Антошкіна, 3, Калеснікавай Марыі Аляксандраўне 💻Напісаць анлайн

🔗Палітзняволенага журналіста Дзяніса Івашына пазбавілі перадач Пра гэта напісала ягоная жонка Вольга. Таксама яна адзначыла, што цяпер, каб даслаць вітаміны ў турму ці калонію, неабходна атрымаць спецыяльны дазвол ад лекара медычнай часткі ўстановы. Раней такое правіла распаўсюджвалася толькі на неабходныя лекі. «Ранейшы сьпіс дазволеных для перасыланьня вітамінаў скасаваны. Цяпер нават вітамін С нельга даслаць вязьню без "рэкамэндацыі мэдыка"», — піша Вольга Івашына. Нагдаем, у верасні 2022 года Гродзенскі абласны суд прызнаў Івашына вінаватым паводле арт. 365 КК (умяшанне ў дзейнасць супрацоўніка ўнутраных спраў) і ч. 1 арт. 356 КК (здрада дзяржаве) і асудзіў яго да 13 гадоў і 1 месяца калоніі ва ўмовах узмоцненага рэжыму. Летась Дзянісу ўзмацнілі пакаранне і перавялі на турэмны рэжым у Жодзіна. 💌Падтрымайце палітвязня: Следчая турма № 8. 222163, г. Жодзіна, вул. Савецкая, 22А, Дзянісу Яўгенавічу Івашыну 💻Напісаць анлайн

🎉Павіншуйце палітвязняў з Днём народзінаў! 🔺Павел Вінаградаў 🔺Анастасія Ганчарэвіч 🔺Сяргей Дзюба 🔺Марыя Калеснікава 🔺Наталля Лашч 🔺Святлана Лупач 🔺Ігар Хартановіч 🔺Віталь Барысевіч 🔺Яўген Буйніцкі 🔺Дзяніс Дзейкун 🔺Ірына Злобіна 🔺Дзмітрый Падрэз 🔺Павел Шпетны 🔺Раман Язерскі 🔺Арцём Янкоўскі 🔺Зміцер Казлоў 🔺Таццяна Кузіна 🔺Уладзімір Цыгановіч 🔺Якаў Шафарэнка 🔺Мікіта Старажэнка 🔺Андрэй Мацук 🔺Сяргей Пацукевіч 🔺Тарас Мачынскі 🔺Аляксандр Якімовіч 💌Самы просты спосаб павіншаваць палітзняволеных — адправіць паштоўку. Гэта можна зрабіць праз Майстэрню паштовак салідарнасці і письмо.бел. 📲Таксама прапануем дасылаць палітвязням тэлеграмы. Гэта можна зрабіць на пошце або па нумару тэлефона 166 (толькі з гарадскога) і надыктаваць тэкст. Не забывайце падпісвацца, каб яны ведалі ад каго дайшла вестка.

📍Палітзняволеную Галіну Краснянскую перавялі ў гомельскі СІЗА 67-гадовую жанчыну абвінавацілі ў ахвяраванні беларускім вайсковым фармаванням, якія ваююць на баку Украіны супраць расейскай агрэсіі (ч. 2 арт. 361-3 КК). Паведамляецца, што Галіна Андрэеўна доўгі час жыла ў Швецыі, была адной з заснавальніц афіцыйнай суполкі беларускай дыяспары, актыўна ўдзельнічала ў яе жыцці. Пры гэтым перыядычна вярталася ў Беларусь да сваякоў. У адзін з такіх прыездаў, імаверна вясной 2023 года яе затрымалі ў Мінску. 12 студзеня Галіне прызначылі 5 гадоў пазбаўлення волі. Па інфармацыі "Гомельскай Вясны", жанчыну перавялі ў СІЗА-3 да разгляду апеляцыйнай скаргі. 💌Падтрымайце жанчыну грашовымі пераводамі, пасылкамі і тэлеграмамі: СІЗА-3. 246003, г. Гомель, вул. Кніжная, 1А, Галіна Андрэеўна Краснянская  💻Напісаць анлайн

✊Падтрымайце жыхара Жлобіна, асуджанага да 2 гадоў калоніі 29-гадовага Арцёма Насановіча асудзілі за ўдзел у паслявыбарчых акцыях пратэсту ў 2020-м годзе паводле ч. 1 арт. 342 Крымінальнага кодэкса (удзел у дзеяннях, якія груба парушаюць грамадскі парадак). Справу супраць жыхара Жлобіна разглядала суддзя Святлана Андрэева. З чым звязана такое суровае пакаранне, як і абставіны ўзбуджэння крымінальнай справы дагэтуль невядома. 💌Падтрымайце палітвязня грашовымі пераводамі, пасылкамі і лістамі: СІЗА-3. 246003, г. Гомель, вул. Кніжная, 1А, Арцёму Шырыновічу Насановічу  💻Напісаць анлайн

📍Палітвязня Анатоля Латушку перавялі на турэмны рэжым у Гродна У судзе Шклоўскага раёна 22 сакавіка адбыўся суд па замене палітвязню рэжыму ўтрымання на турэмны. Суддзя Аляксандр Тараканаў пастанавіў перавесці палітвязня, асуджанага да шасці гадоў калоніі, у турму тэрмінам на шэсць месяцаў. Анатоль — стрыечны брат палітыка Паўла Латушкі. У судзе Цэнтральнага раёна Мінска 20 верасня 2022 года Анатолю прысудзілі шэсць гадоў калоніі, Алене Маліноўскай — чатыры гады калоніі, Ліліі Ананян — пяць гадоў "хатняй хіміі".   Падрабязнасці 👉 https://spring96.org/be/news/115034 💌Падтрымайце Анатоля: Турма № 1, 230023, Гродна, Кірава, 1, Анатоль Віктаравіч Латушка 💻Напісаць анлайн