د.تَيسِير الصّادِق🔻|مُمكن نصلّ على الحبيب!

- رُؤية شرعية، تَلِيها خِطبة .. ثم حُبّ صادق لا ننطق بهِ ولا نبوح! يتم الوصال فنُعلِن حينها ما خبّأناهُ = بعد عقد القِران ♡ حين ذاك سَتَعي لِمَ وجبَ عليكِ الصمت كل هذا! فكأنَّه إفطارٌ بعد صيامٍ لأعوامٍ وأعوام .. فإيَّاكِ والحرام يا عزيزتي، وإيَّاكِ والفرط في المشاعر 🎀 حتى فترة الخُطوبة ما هي إلَّا وعدٌ بالزواج! حافظي على قواعدها لكي تنعمي بنعيمٍ سرمديٍّ بإذن الله ♡ فاللهم آتِ الطيّبين بِقَدر ما صبروا من الخيرات، ألا تُفلِتنا يد الطمأنينة واليقين، ولا يقِلّ فينا الرضا والرجاء يا أرحم الراحمين. ممكن نصلّ على الحبيب!♥️ #صلاةالضحى "اللقاء النسائي لأختكم تيسير [الزواج (٢)] اليوم بإذن الله الساعة ٢ بتوقيت السودان _ ٣ بتوقيت مكة المُكرمة https://t.me/+rGPTwawRT4s4NWU8

.. بدأ البث يا جميلات 💛

🏷️ أخواتي الكريمات يسرنا دعوتكنّ اليوم الأحد لحضور محاضرة بعنوان:          【 نُــون النِّـسْـوَة 】        🎙تلقيها الدكتورة :       ❁ تيسيــر الصـــادق ❁           𖠇 حفظها الله ورعاها 𖠇 🗓 يوم الأحد: ٢٨/٤/٢٠٢٤ م 🕰 ٩:٠٠ مساءً توقيت مكة 🇸🇦 🔘 ٨:٠٠ مساءً توقيت السودان 🇸🇩 🔗 تُنقل عبر الرابط: https://t.me/+LXDuswq1rPc5NTQ0 🚫 يمنع التسجيل، وحضور الرجال. •┈•✿•┈••┈•✿•┈•

قالت : قرَّرت أصلِّح لِبسي وألبَس لِبس واسِع وهدومي كلها مافيها حاجة واسعة غير عباية وحدة! الظروف صعبة وما حبّيت أكلِّف أبوي الله يديهُ العافية ♡ صلِّيت الضُّحى ودعيت : يارب انتَ عارِف حالنا كيف وأنا نفسي ألبَس كويِّس . بعد المغرب في نفس اليوم، اتصلت عَلَي بت جيراننا كانت مُتسلِّفة مني قروش وأنا ناسياها عديل قالت لي جاية أجيب ليك قروشك♥️💃 شلتَ القروش ومشيت مع أمي السوق اشتريت عبايتين واسعات ومعاصِم وشُرّابات = ربنا يسّرها وبارَك في القروش الحمدلله . .. بت جِيراننا عُمرها ٣٩ سنة، ما حصَل اتقدّم ليها عريس ، ودايماً بتقول : نفسي أبقى أُم ويكون عندي بيت! انتظَمَت في صلاة الضُّحى ليها سنتين وشويّة 💕 قالت لَي : كنت بصلّي ركعتين، مرات أنسى ومرات أتذكّر. في الآخر بقيت بقعُد بعد صلاة الفجر أسبّح وأقرأ قُرآن ،، وطوّالي بقوم أصلّي الضُّحى بعد ما الشمس تشرِق صلاة الضحى دي فيها إحساس راحة كده وسعادة لِدرجة بِقيت بصلّي أقلّ شي أربعة ركعات كل يوم! وبدعي فيها ربنا يرزقني الزوج الصالح ويبقى عندي بيت وأفرِّح أهلي وأفرَح زي البنات ♡ ماشاء الله تبارك الرحمن اتخطَبَت واتزوّجت في أسبوعين! راجل محترم اللهم بارِك، عايشة معاهُ سعيدة وعندها بنوتة والتاني جايي في الطريق 😍 #صلاة_الضحى فاللهمّ حنايانا تُزهِر بِك وصفحاتُ أعمارِنا تزدانُ على بابِك، رِقّة الخاطِر بالهِداية ورحمةٌ تحُفّ الطّيبين عند ذِكرِك وسماع كِتابِك وآياتِك، فتسعد قُلوبنا جبراً في الدنيا وتقرّ العيون في أعلى الجِنان. ممكن نصلّ على الحبيب!♥️ #تيسير_الصادق

شيخنا محمدسيد حاج عليه رحمة الله حكَى قصة عن واحد حافظ القرآن، جمَعوا ليهُ قروش عشان يمشي مكة للعُمرة ♥️ مشى بالبحر ووصل مكّة وطاف وسعَى وقَعد هناك .. الزول ده عندُه ١٠٠ ريال بس في يدُّه! بقى ما بيطلَع من الحرم ويأكل من الأكل اللي بجيبوهُ الناس (طبعاً الناس بجيبوا أكل يومي للحرم في كل الوجبات) هو قال خايف على المِيّة ريال دي عشان ما عندُه غيرها لو ضاعت حينقَطِع! أصلاً بِرَحّلوهُ للسودان، والمِيّة ريال دي يوصل بيها من بورتسودان للخرطوم .. اها يوم بعد العِشاء طالع من الحرم لاقاهُ زول خليجي معاه أطفال وظاهِر عليهم إنهم جايين من بعيد . فالخليجي قال ليهُ : يا سوداني صلّيتوا العشاء ؟ الحافظ قال ليهُ : أي صلِّينا . الخليجي قال ليهُ : ما تصلّي بينا العشاء ؟ السوداني حافظ القرآن ده صوته نديّ و جميل جداً في التلاوة ماشاءالله ♡ عارفين حافظ القرآن ده في اليوم داك بات ونام في قصور الملك فهد فووووق! عارفين ليه ؟ لأنه الخليجي ده طلع أمير الفجيرة في الإمارات وساقه خلّاهُ يبيت معاهُ في القصور المَلَكيّة 💕 .. #القران لاحظوا معاي .. حافظ القرآن ده اللهم بارِك أصلاً لا اتجرّس لا شال هَمّ! كان متوكّل على ربنا سبحانه وتعالى وقاعِد في هدوء في الحرم؛ يأكل و يشرب و يتعبّد ♡ وفي لمحة بصَر = حاله اتغيَّر تماماً! ربنا جلّ جلالُه كريم ورحيم وقادر يبدّل الحال لِحال تاني خالص = حتى لو كل الظروف ما مساعدة..! بس كيف نحنا نتيقّن! وهو حافظ للقرآن الكريم و دي حاجة ما ساهلة إنه الواحد يحفظ كلام ربنا في صدره و يرتّل في أي وقت وأي مكان زي ما حابّي ♡ القرآن ده بيرفَع ويعلّي مقامنا في الدنيا وفي الآخرة بإذن الله ورسولنا الكريم ﷺ قال : "إنَّ اللَّهَ يَرْفَعُ بهذا الكِتَابِ أَقْوَامًا، وَيَضَعُ به آخَرِينَ"! القصة انتهت يا تيسير ؟! لالا دقيقة 😁 أمير الفجيرة أخد رقم السوداني والسوداني رجَع السودان خلاص، الأمير اتصل بيهُ ورسّل ليهُ مشى الفجيرة والآن هو إمام مسجد الأمير هناك (في الفجيرة)♡ ماشاء الله تبارك الله شفتو القرآن ده جميل و بيكرِم أصحابه كيف ؟♥️🌿 فاللهُم اجعلني وذرّيّتي من أهل القرآن الكريم الذين هُم أهل الله وخاصّته، ثبّته في صدورنا وبارِك به ومعه أيّامنا وحياتنا، أن تأتي بقُلوبنا مُطمئنةً أنه يزيّن صحائفنا، فنَرتقي به في الجَنّة و نُلبِس والدَينا حُلّة الكرامة وتاج الوَقار. ممكن نصلّ على الحبيب!♥️ #تيسير_الصادق "هذه القصّة نشرتُها ٢٠٢٢ سبحان الله، رَحِم الله أبا جعفَر وجعلنا من أهل القرآن الكريم" 🌹..

قالت : قبل عَقدي بشهرين بديت أجهّز حاجاتِي وكنت باخُد رأي صحبة عُمري في كل حاجة من تفاصيل المُناسَبة ♥️ قبل العقِد ب ١٢ يوم، خطيبي اتصل فجأة وقال لي : كل شي قِسمة ونصيب، ربنا يسعدك! فرحَتي وسعادتي كُلّها اتقلبَت في ثانية لحُزن كان بقطِّع قلبي ،، وشُفتَ في عيون أهلي وجَع ما دايرين يوصّلوهُ لَي، مع إني شايفاهُ واضِح قِدّامي! عدد كبير من الناس ظَهَروا على حقيقتهم شماتة وإساءة معاها سُوء ظَنّ كمان! بِقِيت ما قادرة أقابِل زول عشان ما يسألوني💔 وكلما أتناسَى أو أبدأ أنسى = يجي زول يسألني : هو خلّاكِ ليه ؟! والكسرة الأكبر بِقَت لمّن خطَب صحبتي زاتها اللي كانت بتجهّز معاي وكانت بتواسِيني لمّن كل شي إنتهى..! مرّت علَي ليالي بقضّيها بكاء لحدي ما الشمس تشرِق فوق في السماء اتألمتَ ،، اتوجعتَ ،، اتعذّبتَ 😭 لكن سبحان الله المِحنة دي بِقَت لَي سبب ألتزِم في صلاتي اللي كُنتَ بقطّعها ومُفَرّطة فيها .. عرِفتَ إنه مافي شي حينفعني غير = قُربي من ربنا سبحانه وتعالى وإنه الدنيا الوجَع فيها كتير وما أي زول يتقال عليهُ صاحِب إلا بعد مواقف وغربَلَة! بعد سنتين ونُص بِقِيت مُلتَزمة الحمدلله حفظت القرآن وبديت عِلم شرعي خلّيت الأغاني ووقّفتَ المُصافَحة♡ يوم كنت ماشة ناس خالتي معاي أختي، لاقُونا جيرانهم في الباب رحَلوا يادوب سلّمنا على البنات وما ركّزنا مع الأولاد كتير! أسبوع وبت خالتي جاتنا في البيت .. قالت ولد جيرانهم شافني اليوم داك وقال عايز يخطُبني♡ استخرتَ وأهلي سألوا عنّه، اتزوّجنا بسهولة شديدة سبحان الله ربنا عوَّضني وأكرَمني ،، راجل خَلوق وصاحِب دِين اللهم بارِك سعيدة معاهُ وكل يوم بحمِد ربنا عليهُ وعندنا توأم ولدين عمرهم ٤ شهور ماشاء الله😍 وخطيبي الفات واللي كنت مسمّياها صحبتي سمعت إنهم اتخطبوا وفركشوا! ما شمتانة أبداً بالعكس بقول الحمدلله ظهروا لَي على حقيقتهم في الوقت داك قبل العُمر يمشي يوم زيادة لِي قِدّام♡ .. أمر المؤمن كله خير نحمد ربنا في السرّاء والضرّاء، وما نتسخّط على الأقدار! العَترة بتصلّح المَشية، وما أي زول لاقيناهُ يتقال عليهُ صاحِب عُمر بدون مواقِف تثبِت طِيبته وصِدق نواياه . ومهما اتظلَمتَ واتخذَلتَ في الدنيا دي خلّيك واثق تماماً إنه ربنا عوّاض وعوضه جميل = حينسّيك كُل المُر اللي ضُقته وعِشته في يوم من الأيام!♥️🌿 #بيوت_متطمنة فاللهمّ أن يَجِد الشعور أهلَه حيث تُقَرّ العُيون ويهنأ الفؤاد، ألّا يخيب ظَنّ المُطمئنّة الآمِلة، ولا تتفاجأ الرّاجية بصِدقٍ على يقينٍ يُنتَزَع بالخيبات. ممكن نصلّ على الحبيب!♥️ #تيسير_الصادق

رسولنا الحبيب ﷺ جاء مارّي في يوم من الأيام على عبد الله بن مسعود وهو قاعد يصلّي معاهُ أبوبكر وعمر رضي الله عنهم أجمعين .. قام عبد الله بن مسعود رضي الله عنه افتتح القراءة بِسورة النساء ورسولنا الكريم ﷺ بيستمِع ♥️ فلمّا انتهى عبدالله بن مسعود من قراءته قال ﷺ : "مَن أحبّ أن يقرأ القرآن غَضّاً كما أُنزِل فليقرأ قرآءة إبن أم عَبد" = بيقصُد بيها عبد الله بن مسعود رضي الله عنه . بعدها عبدالله بن مسعود بدأ يدعي ورسولنا ﷺ يقول ليهُ : سَل تُعطَى ،، سَل تُعطَى ♡ فكان مِن دعاء عبدالله بن مسعود : "اللهم إني أسألك إيماناَ لا يرتَدّ، ونعيماً لا ينفَد، ومُرافَقة نبيّك ﷺ في أعلى جنِان الخُلد" والنبي ﷺ يقول : آمين آمين .. عمر بن الخطاب رضي الله عنه قال : قلت في نفسي والله لأغدونّ على عبدالله بن مسعود وأبشِّره بتأمين رسول الله ﷺ على دعائهِ💕 (يعني أمشي أبشّره وقت الغداة = بين الفجر والشروق) فلمّا وَصَلت لقِيت أبابكر رضي الله عنه سَبَقني إليه بالبشرى! فقال عمر رضي الله عنه : أنت سبّاق بالخير دائماً يا أبوبكر!♡ #السيرة فاللهم ارضَ عنهم أجمعين، أحيِنا وأمِتنا على سُنّة حبيبنا المُصطفى الصادق الأمِين، احشُرنا في زُمرَته و ارزقنا شفاعته، وأورِدنا حوضَه هانئين مُطمئنين ومُكرَمين برؤية وجهك الكريم. ممكن نصلّ عليه!♥️ #تيسير_الصادق

البنوتات ♥️ كم حاجة مهمة أحرصي عليها وشُوفِي الفرق الجميل في يومك وحياتك بإذن الله تعالى .. _ أول ما تسمعي الأذان، قومي صلّي وما تأخِّري صلاتك عشان حاجة دنيويّة . _بعد تصلّي ما تقومي من المُصلاية سريع! سبّحي واستغفري وأدعي بيَقين ♡ _حافظي على أذكار الصباح والمساء والنوم و أقري وِرد القرآن الكريم بعد تصلّي الفجر على طُول بدون تأخير لآخر اليوم . _ثبّتي وِرد إستغفار وتسبيح وحوقَلة وصلّ كتير على رسولنا الكريم ﷺ ♡ _خلّي همّك الأول في الدنيا هو الجنّة، و وكّلي كُل أمورك لله تعالى = حتعِيشي متطمّنة وبالِك مُرتاح شديد . _أحرِصِي على ال Skin and Hair Routine صباح ومساء، حتى لو بأبسَط مُنتجات متوفّرة حولِك؛ دي طبيعتنا اللي خلقنا بيها ربنا = حُبّ العِناية والجمال ♥️ _رتّبي يومك وحياتك كلها، ما تخلّي الحياة هي اللي تاخدِك وزمنك يضيع! _أحرِصي على العطاء وتقديم الخير ومُساعدة الغِير، سبحان الله حتلقي حياتك كُلها سعادة وتيسير 😍 _خلّي مكان قاعدة دايماً مُنَظَّم ورايق .. وانتِ في نفسك أنيقة وشعرك مُرَتَّب وريحتك حلوة وألبسي دهبك أو إكسسواراتك حتى لو في البيت ♡ _دخِّلي الرياضة في حياتك ويومك وما إلا تمشي جِيم! ممكن تتمشّي يومياً، وما تنسي أشربي موية كتير . _اختاري بيئتك والناس اللي حولِيك وأحرِصي على الصُّحبة الصالحة وأسألي ربنا يقرّب ليك الناس الطّيبة اللي فيها خير . _وما تضغطي نفسك وتحمّليها فوق طاقتها! دلّليها وطوّريها وكل فترة اتعلّمي شي مُفيد يضِيف ليك ♡ _وأي حاجة في الدنيا دي قبل ما تعمليها أسألي نفسك : هل بترضِي ربنا سبحانه وتعالى ولا لأ ؟! _ قبل النوم حاسبي نفسك في العِبادة والطاعة، تُوبي وسامحِي على قدر ما تقدَري وأضبُطي منبّهك لقِيام الليل 💕 #أنوثة #بيوت_متطمنة فاللهُم مولى الجمال خالِق الدنيا وخالِقِي زيّن قلبي بالإيمان واليقين مع التقوى، حياتي مُزدانةً بطاعتِك ومرضاتِك، ولتَكُن آخر لحظاتي رؤية مقعدي في أعلى الجِنان. ممكن نصلّ على الحبيب!♥️ #تيسير_الصادق 🎀🌸