د.تَيسِير الصّادِق🔻|مُمكن نصلّ على الحبيب!

قالت : كل مرة لمّن أكون في حلقة القرآن، بدعي بالختمة والنجاح والزوج الصّالح 💕 وبدعي لأهلي وكل حاجة نفسي فيها .. بعد الحلقة بقعُد على جنبة كده وببدأ الدعاء وسبحان الله أي حاجة بدعِي بيها بتُستجَاب! صحباتي في الحلقة كانوا بشاغلوني كل مرة يقولوا لَي : انتِ بتدعي بي شنو كل يوم ؟😁 أقول ليهم : بدعي بحاجات كتيرة، أوّلها = الختمة والنجاح والزوج الصالح . يقولوا لَي : أدعي لينا معاك، ماشاء الله عليكِ ما بتفوّتي يوم بدون ما نشوفك مركزة مع الدعاء! أقول ليهم : بحاول أتحرّى أوقات الإجابة، زي وقت نزول المطر وبين الأذان والإقامة والثلث الأخير من الليل والسجود . والحلقات دي محفوفة بالملائكة بإذن الله تعالى ♡ بِقَت كل وحدة منهم تقول لي : جزاكِ الله خيرا أنا كمان بِقيت أتحرى أوقات الإجابة وأدعي . مرّت الأيام والحمدلله ربنا إستجاب لَي 😍 ختَمتَ في سنة ونُص، مع إنه في البداية ما كنت بقدر أحفَظ كتير حِفظ مُتقَن! واتفوّقتَ في جامعتي واتخرّجتَ بأعلى مُعدّل في الدفعة اللهم بارِك ♡ وربنا رزقني زوج بنفس الصفات اللي كنت بتمنّاها وعايشة معاهُ في سعادة الحمدلله رب العالمين 🌿 #بيوت_متطمنة فاللهم ما تلهَج به ألسنتنا أنت به أعلَم فارزقنا، نسألك التوفيق للدعاء واليقين وحُسن العبادة، أن تُثمِر التقوى في قلوبنا خيراً، فتنتثِر الدعوات بين أيدينا نعيماً مع السعادات الوافِرة. ممكن نصلّ على الحبيب!♥️ #تيسير_الصادق

قالت : عندي دعوة من دعوات عرَفة الفاتت عايشاها اليومين ديل 😍 اللهم بارِك اللهم بارِك ♡ ونحنا ..؟ جهّزنا دعوات عرَفة الجايّة، ولا لِسه ما جاهزين! فاللهم اعطِ كُلّاً منا سُؤله، نسألُك الجَبر والسّتر مع العافية، فتُضيء حياتنا فرحاً بقُربِك، وتُحسِن خاتمتنا وتُدخلنا جنّات الفردوس أجمعين. ممكن نصلّ على الحبيب!♥️ #قيام_الليل

🥀 مُتابِع جوان الخطيب ؟! معناها عارِف محتواهُ ولايفاته كان فيها شنو، وعارِف إنه إتوفى قبل ما يمسح حاجة! شباب وشابات كُتار في اللحظة دي جوّاهم خوف = حيقابلوا ربنا كيف وصفحاتهم وحساباتهم مليانة ذنوب وسيئات! الخوف ما غلط . بالعكس علامة كويسة إنه الواحد عارف في حاجة لازم يصلّحها .. حتعمل شنو ؟! تتوب وتستغفر بنيّة صادقة وتمسَح كل الأغاني والملفات السيئة اللي في تلفونك ولابتوبك وما تعمل ليها شير تاني لا في ال stories بتاعت الواتس ولا الفيس . أفتح ال tiktok بتاعك وعاين ليهُ هل المقاطع اللي فيهُ دي بترضي ربنا سبحانه وتعالى ولا بتغضِبُه ؟! أقعُد مع نفسك وحاسِبها وأسألها : أنا جاهِز للرحيل من الدنيا دي، وقدّمتَ شنو للآخرة ؟ والكلام ده لكل الناس اللي بينشروا ويقدّموا محتوي في السوشيال ميديا ما مُتابعين جوان الخطيب بس! رسولنا الكريم عليه أفضل الصلاة وأتم التسليم قال : "إذا مات ابن آدم انقطع عمله إلا مِن ثلاث : صدقة جارية ، أو علم ينتفع به ، أو ولد صالح يدعو له" الواحد بعد يموت عملُه بينقطِع! لكن في حسنات بتكون مُتواصلة زي المذكورة في الحديث ده ♡ وكمان في سيئات بتكون ماشة! عشان كده يا أصحابه ويا متابعينه، لو بتحِبّوهُ جَد جَد وقّفوا مقاطعه عندكم وما تنشورها .. وأمسحوها عديل من كل الأجهزة اللي في يدينكم ، و كلّموا معاكم باقي الناس . فاللهم ارحَم محمد الخطيب وجميع موتى المُسلمين، اعفُ عنهم وعافِهم وتجاوز عن سيئاتِهم، اهدِ شباب وبنات المُسلمين وبارِك فيهم واغرس التقوى في قلوبهم، وارزقنا حُسن الخاتمة واجمعنا بمَن فارقونا في جنات الخُلد والنعيم . ممكن نصلّ على الحبيب !♥️ #تيسير_الصادق

في سنينك الجاية إختار الحاجات البتسعِدك وتريّح بالك♡ و أي حاجة مُتعِبة وبتسبّب ليك الضيق = وقّفها عنك تماماً وأبعِدها . دي حياتك إنت، ما حياة زول تاني! اختار تفاصيلها بما يُرضي الله تعالى ♡ ثم يرضيك و يفرّح قلبك .. ممكن نصلّ على الحبيب!♥️ #تيسير_الصادق

🏷️ أخواتي الكريمات موعدنا بعد خمس دقائق كونوا حضوراً❤️ 🚫 يمنع التسجيل، وحضور الرجال. •┈•✿•┈••┈•✿•┈• الرابط في القناة النسائية: https://t.me/+rGPTwawRT4s4NWU8

لقاءنا الأسبوعي من سلسلة "بيوت متطمّنة"💛 بعد ٣٥ دقيقة بإذن الله .. العنوان واضح من الصورة 😁😂

قالت : أختي ماشاء الله ربنا يحفظها أدب وأخلاق وجميلة شكل ورُوح♥️ مما هي في الجامعة أي عريس يتقدّم ليها، بيختفي وما بجي راجِع تاني والموضوع بكون خلاص إنتهى! نحنا ما ركّزنا مع القصة دي، لكن حبوبتي الله يديها العافية قالت لينا : العرسان اللي بختفوا ديل قصّتهم غريبة، وأي شي قِسمة ولِخير إن شاءالله ♡ كلّمَت أختي تقرأ سورة البقرة وتقِيم الليل وتستغفَر .. أختي لمن بدت تقرأ سورة البقرة كانت بتبكي شديد ومرات نفسها يتضايَق ومرة مرة بتنوم في نُص القِراية! بعد فترة بقت ماشاء الله بتقرأها في جلسة وحدة وإستغفارها وصَل آلاف كل يوم ♥️ أنا وهي بنضبٌط المنبه لقيام الليل قبل الفجر برُبع ساعة نصلّي ونقعُد ندعي بصلاح الحال لينا ولأخواننا وكل شي عايزنُّه . والله بقينا نصحى بدون منبهات من الجمال اللي شفناهُ في قيام الليل♡ وسورة البقرة بنقرأها مع بعض أنا وأختي وأمي الصباح بعد ما نشرب الشاي 😁 إحساس حلو إنك تقرأ البقرة من الصباح . وفي الشهر السابع من بدينا، أختي اتخطبَت واتزوّجت في ١٣ يوم 😍 بدينا البرنامج ده لعلاج أختي لكن عِشنا معاهُ سعادة وتسهيل في كل الأمور . وما وقفنا تاني الحمدلله رب العالمين 🌿 #بيوت_متطمنة فاللهمّ حفظاً وجبراً وراحة بال لنا ولجميع المُسلمين، آتِ كلاً منا سؤله يا رحمن يا رحيم، أن تُجازِ صبر الطيّبات بالمسرّة والكرم الوفير، فتطمئنّ القلوب مع الرفيق الصّالح، وتنتَثر المودة والرحمة مع السعادة والنّعيم. ممكن نصلّ على الحبيب!♥️ #تيسير_الصادق ما تنسوا لقاء اليوم يا جميلات💃 من سلسلة الزواج الساعة ٢ بتوقيت السودان، ٣ بتوقيت مكة المُكرمة بإذن الله .. 🥀https://t.me/+rGPTwawRT4s4NWU8

. لعلّ القادم :حفظ قرآن وزوج صالح وحجة إلى بيت الله الحرام . أبشري ❤️..

🏷️ أخواتي الكريمات يسرنا دعوتكنّ اليوم الأحد لحضور سلسلة محاضرات : 【 نُــون النِّـسْـوَة 】 بعنوان: 【 حــلاوة الإلتــزام 】 🎙تلقيها الدكتورة : ❁ تيسيــر الصـــادق ❁ 𖠇 حفظها الله ورعاها 𖠇 🗓 يوم الأحد: 12/5/2024م 🕰 ٩:٠٠ مساءً توقيت مكة 🇸🇦 🔘 ٨:٠٠ مساءً توقيت السودان 🇸🇩 🔗 تُنقل عبر الرابط: https://t.me/+LXDuswq1rPc5NTQ0 🚫 يمنع التسجيل، وحضور الرجال. •┈•✿•┈••┈•✿•┈•

قالت : في رمضان مشيت التراويح زي كل يوم مع إني كنت كسلانة وقلت ما ماشة، لكن اتشجّعتَ ومشيت 😁 الصلاة بدَت وفي وحدة من الركعات الإمام قرأ الآية : { وَقَدِمْنَا إِلَى مَا عَمِلُوا مِنْ عَمَلٍ فَجَعَلْنَاهُ هَبَاءً مَنْثُورًا }💕 فجأة حسّيت الآية دي دخلت قلبي جوّة لمّن اتخلَعتَ مع إنه سمعتها كتير سبحان الله! بكيت شديد في الصلاة لمّن نفسي اتكتَم . اتذكّرتَ صلاتي وصيامي وصدقاتي وكل عمل خير بعمله في الدنيا، واتخيّلتَ إني أجي يوم القيامة ألقاهُ مافي! صراحة أنا بتكلّم في الناس دايماً من وراهُم، ومرات كتيرة ما بحب الخير لمعارفي . بتمسِكتي غِيرة لمن أختي تنجح وبتضايَق جداً لمّن صحباتي تحصل ليهم حاجة سمحة! عارفاهُ حسد ومرض قلوب لكن كنت عميانة بمحبة الدنيا ومخدوعة فيها . بعد سلّمنا في التراويح جنبي خالتو جارتنا قالت لَي : يا بتي مالِك ؟ انتي كويسة ؟ كنت في لحظة ضَعف وحسرة، حكيت ليها قالت لَي : تُوبي واستغفري ومن الليلة أدعي ربنا كتير إنه يشفيك من أمراض القلوب دي لأنها بتاكُل من حسناتِك! أقري قرآن كتير بتدبُّر بتلقي قلبك اتغيّر للأحسن إن شاءالله واتصدّقي بنيّة الشفاء من الإبتلاء ده . فعلاً بديت طوالي أعمل اللي قالته لي خالتو وحسّيت بِفَرِق كبير الحمدلله 😍 الآية بقت لي سبب توبة وتغيير كبير في حياتي الحمدلله على رسائل ربنا 🌿 #بيوت_متطمنة فاللهمّ أشغِلني بآخِرتي ونفسي يا أرحم الراحمين، إملأ قلبي بمحبة الخير للغَير ما حَييت، أن أعيش متوكلةً عليك وروحي مغمورةً بالتقوى واليقِين، فتُحسِن خاتمتي وتُضاعِف أجري، وفي الآخرة أهنأ وأحبّتي في جنات الخُلد والنعيم. ممكن نصلّ على الحبيب!♥️ #تيسير_الصادق