د.تَيسِير الصّادِق🔻|مُمكن نصلّ على الحبيب!

قالت : كُنت ماشة مُشوار بعيد من البيت، ركبت المواصلات وسَرَحتَ من المحطّة المفروض أنزل فيها! نزَلتَ قلبي واجِعني، شايلة هُموم الدنيا كُلّها في رأسي : ياربّي أبوي العِلاج حينفعُه، وحيقدَر يدّيني رسوم الجامعة ؟ البزنس اللي عاجِبني ومفكّرة فيهُ أبداهُ ولا قريشاتي اللامّاها حتضِيع ساي! خطيبي حيكمّل معاي ولا نقاشنا الأخير حيخلّيهُ يفكّر ننهي الموضوع كلّه ؟ بفكّر وكل مرة يجيني سؤال جديد، ما حسّيت بالمسافة ولا الوقت! فجأة .. صوت مَرِة ما بعيد، قطَع لَي حبال تفكيري! صوت قال : يا بِتِّي . اتلفَتّتَ لقيتها حجّة كبيرة قاعدة في كُرسي مُتحَرِّك وبِتأشِّر لَي بي يدّها = تعالي . قطَعتَ الظلط ومشيت عليها، سلّمَت علَي وقالت لَي : معليش يا بِتّي ولد أخوي كل يوم بِقَطِّعني الكُبري ده عشان أقدَر أصَل الكشك جنب الشجرة بِهناك لكن الليلة هو عيّان، راقِد بإلتهاب عنده حُمّى! جِيت مسافة طويلة من البيت براي، لكن طَلعَة الكُبري دايرة شوية دَفرة وانتظرتَ يجي ولد أو راجِل مارّي، ما جاء وحاسّة يدي تِقلَت والله . ممكن تقدِّميني معاك شوية ؟! فكّرتَ سريع كده قلت يا بِت انتِ أصلاً ما معاك قروش تركبي تاني، أعملي الخير ربنا يجبُر خاطرك ♡ بِقينا ماشّين سوا، وقعدَت تحكي لَي عن حياتها وأهلها وزوجها اللي كان شايِلها في عيونه لكن اتوفّى فجأة! كلامها كلّه رضا وكانت سعيدة شديد ماشاء الله تبارك الله . كل كلمة بتحكِيها بتقول معاها : الحمدُلله .. الحمدُلله ♥️ وصّلتها ودعَت لَي وسلَّمَت علَي بمحنّة كأنها بتعرِفني أو من أهلها! وقالت لَي : الله فِي ،، عوَجة مافي♡ كمَّلتَ مشواري، ورجَعتَ البيت بهدومي زاتها وشكلي زاتُه .. لكن قلبي اتغيَّر تماماً واختَلَف! سبحان الله ربنا شغَلني عن هُمومي بطريقة عجيبة لِقيت صُحبة في الطريق ،، ونِسِيت كل شي في ثانية! هموم الحجّة الكبيرة شغلَت بالي طُول الطريق . وكيف رزقني رسالة طمّنَت قلبي وشالَت وجعي كلّه : الله فِي ،، عوَجة مافي♥️ بعد وصلت البيت، صلّيت المغرب وقلت أسمَع قران شوية، أول آية كانت : { وَلَا تَخَافِي وَلَا تَحْزَنِي ۖ } 😍 وقتها حسّيت بمعيّة ربنا ووكّلتَ أمري ليهُ تماماً، واتطمّنتَ .. #بيوت_متطمنة أصعَب الأوقات في حياة الإنسان هي اللي بجيهُ فيها إحساس الخوف من الجايّي! الخوف من الفُراق ،، الخوف من الوجَع ،،الخوف نفقِد ناس عزيزة علينا .. والشيطان شاطر و ده مدخلُه! إيّاك تخاف حاجة قبل ما تحصَل، وكّل أمرك لله جلّ في عُلاه = حتعرِف معنى الأمان والسكينة وراحة البال بإذنه تعالى ♡ ورسائل ربنا جميلة، وكلما نشوف هُموم غيرنا بنعرِف إنه كل زول عنده هُمومُه وحياته اللي مُنشَغِل بيها! ربنا لطيف ورحيم، وأي حاجة لخير وحِكمة الحمدُلله دائماً وأبدا 🌿 فاللهم عُمراً يطِيب بِصُحبَتك، قلباً يسِير و لايخاف، روحاً تطير إلى هُداك، حمداً يحفّ حياتنا، والصّبر يختمه رضاك. ممكن نصلّ على الحبيب!♥️ #تيسير_الصادق 🌹..

الحمدلله الذي بنعمته تتمّ الصّالِحات😍 لكل الناس اللي بتسأل وبتقول عايزة محاضرات شيخنا محمد سيد حاج عليه رحمة الله . ده تطبيق للشيخ متوفر لأجهزة الأندرويد والآيفون . 🥀يحتوي على أكثر من *300* محاضرة . 🥀 جميع المحاضرات مُقَسّمة حسب الفئة. 🥀 تطبيق بسيط وسَهل الإستخدام . 🥀أول تطبيق محاضرات للشيخ الراحل يتوفر على أجهزة الآيفون . يمكنكم تحميل التطبيق من خلال زيارة الرابط التالي : https://mohammed-sayed-hag.com ساهِم في نشر العلم من خلال مشاركة التطبيق 🌿 ممكن نصلّ على الحبيب!♥️ #تيسير_الصادق

قالت : كل مرة لمّن أكون في حلقة القرآن، بدعي بالختمة والنجاح والزوج الصّالح 💕 وبدعي لأهلي وكل حاجة نفسي فيها .. بعد الحلقة بقعُد على جنبة كده وببدأ الدعاء وسبحان الله أي حاجة بدعِي بيها بتُستجَاب! صحباتي في الحلقة كانوا بشاغلوني كل مرة يقولوا لَي : انتِ بتدعي بي شنو كل يوم ؟😁 أقول ليهم : بدعي بحاجات كتيرة، أوّلها = الختمة والنجاح والزوج الصالح . يقولوا لَي : أدعي لينا معاك، ماشاء الله عليكِ ما بتفوّتي يوم بدون ما نشوفك مركزة مع الدعاء! أقول ليهم : بحاول أتحرّى أوقات الإجابة، زي وقت نزول المطر وبين الأذان والإقامة والثلث الأخير من الليل والسجود . والحلقات دي محفوفة بالملائكة بإذن الله تعالى ♡ بِقَت كل وحدة منهم تقول لي : جزاكِ الله خيرا أنا كمان بِقيت أتحرى أوقات الإجابة وأدعي . مرّت الأيام والحمدلله ربنا إستجاب لَي 😍 ختَمتَ في سنة ونُص، مع إنه في البداية ما كنت بقدر أحفَظ كتير حِفظ مُتقَن! واتفوّقتَ في جامعتي واتخرّجتَ بأعلى مُعدّل في الدفعة اللهم بارِك ♡ وربنا رزقني زوج بنفس الصفات اللي كنت بتمنّاها وعايشة معاهُ في سعادة الحمدلله رب العالمين 🌿 #بيوت_متطمنة فاللهم ما تلهَج به ألسنتنا أنت به أعلَم فارزقنا، نسألك التوفيق للدعاء واليقين وحُسن العبادة، أن تُثمِر التقوى في قلوبنا خيراً، فتنتثِر الدعوات بين أيدينا نعيماً مع السعادات الوافِرة. ممكن نصلّ على الحبيب!♥️ #تيسير_الصادق

قالت : عندي دعوة من دعوات عرَفة الفاتت عايشاها اليومين ديل 😍 اللهم بارِك اللهم بارِك ♡ ونحنا ..؟ جهّزنا دعوات عرَفة الجايّة، ولا لِسه ما جاهزين! فاللهم اعطِ كُلّاً منا سُؤله، نسألُك الجَبر والسّتر مع العافية، فتُضيء حياتنا فرحاً بقُربِك، وتُحسِن خاتمتنا وتُدخلنا جنّات الفردوس أجمعين. ممكن نصلّ على الحبيب!♥️ #قيام_الليل

🥀 مُتابِع جوان الخطيب ؟! معناها عارِف محتواهُ ولايفاته كان فيها شنو، وعارِف إنه إتوفى قبل ما يمسح حاجة! شباب وشابات كُتار في اللحظة دي جوّاهم خوف = حيقابلوا ربنا كيف وصفحاتهم وحساباتهم مليانة ذنوب وسيئات! الخوف ما غلط . بالعكس علامة كويسة إنه الواحد عارف في حاجة لازم يصلّحها .. حتعمل شنو ؟! تتوب وتستغفر بنيّة صادقة وتمسَح كل الأغاني والملفات السيئة اللي في تلفونك ولابتوبك وما تعمل ليها شير تاني لا في ال stories بتاعت الواتس ولا الفيس . أفتح ال tiktok بتاعك وعاين ليهُ هل المقاطع اللي فيهُ دي بترضي ربنا سبحانه وتعالى ولا بتغضِبُه ؟! أقعُد مع نفسك وحاسِبها وأسألها : أنا جاهِز للرحيل من الدنيا دي، وقدّمتَ شنو للآخرة ؟ والكلام ده لكل الناس اللي بينشروا ويقدّموا محتوي في السوشيال ميديا ما مُتابعين جوان الخطيب بس! رسولنا الكريم عليه أفضل الصلاة وأتم التسليم قال : "إذا مات ابن آدم انقطع عمله إلا مِن ثلاث : صدقة جارية ، أو علم ينتفع به ، أو ولد صالح يدعو له" الواحد بعد يموت عملُه بينقطِع! لكن في حسنات بتكون مُتواصلة زي المذكورة في الحديث ده ♡ وكمان في سيئات بتكون ماشة! عشان كده يا أصحابه ويا متابعينه، لو بتحِبّوهُ جَد جَد وقّفوا مقاطعه عندكم وما تنشورها .. وأمسحوها عديل من كل الأجهزة اللي في يدينكم ، و كلّموا معاكم باقي الناس . فاللهم ارحَم محمد الخطيب وجميع موتى المُسلمين، اعفُ عنهم وعافِهم وتجاوز عن سيئاتِهم، اهدِ شباب وبنات المُسلمين وبارِك فيهم واغرس التقوى في قلوبهم، وارزقنا حُسن الخاتمة واجمعنا بمَن فارقونا في جنات الخُلد والنعيم . ممكن نصلّ على الحبيب !♥️ #تيسير_الصادق

في سنينك الجاية إختار الحاجات البتسعِدك وتريّح بالك♡ و أي حاجة مُتعِبة وبتسبّب ليك الضيق = وقّفها عنك تماماً وأبعِدها . دي حياتك إنت، ما حياة زول تاني! اختار تفاصيلها بما يُرضي الله تعالى ♡ ثم يرضيك و يفرّح قلبك .. ممكن نصلّ على الحبيب!♥️ #تيسير_الصادق

🏷️ أخواتي الكريمات موعدنا بعد خمس دقائق كونوا حضوراً❤️ 🚫 يمنع التسجيل، وحضور الرجال. •┈•✿•┈••┈•✿•┈• الرابط في القناة النسائية: https://t.me/+rGPTwawRT4s4NWU8

لقاءنا الأسبوعي من سلسلة "بيوت متطمّنة"💛 بعد ٣٥ دقيقة بإذن الله .. العنوان واضح من الصورة 😁😂