512
Subscribers
+324 hours
+57 days
+330 days
Posts Archive
Ҳайфи он умр, ки дар ғафлату исён гузарад,
Ҳайфи он рӯз, ки бе лаззати имон гузарад.
Ҳар ки ҳам ҷону ҳам амвол ба дунё бифурӯхт,
Охир аз олами серӯза пушаймон гузарад.
@davlatobod1
Тори ман ҳаргиз нашуд бо нағмаи афлок ҷӯр,
Довари бинмуд моро гаҳ кару гаҳ гунгу кӯр
Гаҳ қазоват мекунанд аҳволи моро бе далел,
Гоҳ обам медиҳанд ин ҷоҳилон аз баҳри шӯр
Ҳар ду рӯйи ростиро кардаанд охир сияҳ,
Ҳар дурӯғи хешро хонанд пайғоме зи нур.
Аз Худо хоҳам, ки рӯзе довариро сар кунад
Бохабар созад касифонро зи ранҷу сӯзи гӯр;
Сард, Ҷайҳунӣ, макун қалбат зи аҳволи ҷаҳон.
То тавонӣ гир худро аз бари бадхулқ дур.
@davlatobod1
Ҳар ки афзуда гашт симу зараш,
Зар наборида з-осмон ба сараш.
Аз куҷо ҷамъ карда сарвату мол?
Ё худаш дузд буда ё падараш.
Лоҳутӣ
@davlatobod1
Боз о, боз о, ҳар он чӣ ҳастӣ, боз о,
Гар кофиру габру бутпарастӣ, боз о.
Ин даргаҳи мо даргаҳи навмедӣ нест
Сад бор агар тавба шикастӣ, боз о.
Абӯсаид Абулхайр.
@davlatobod1
Агар ақл дори ай банда
Ба инсонҳо макун ханда
Бикун бо дасти худ хайре
Бигардӣ шахси арзанда
Хиёнатро макун пеша
Шави рӯзе ту шарманда
Ба ҳар ҷо тухми некӣ кор
Машав дар фитна парканда
Ҳамеша боши ту ҳақгӯй
Миёни халқ тобанда
Сахи бошию хайрандеш
Маханд бар ҳоли талбанда
Мадад аз Ҳақ Таолоҳ хоҳ,
Чу ҳасти бар Худо банда
✍Қаҳрамон Ғафуров
@davlatobod1
Чу тан дорию бахту ҳар ду ҷавон,
Бияндўз номи накў дар ҷаҳон.
Ҷавони накўном воло бувад,
Аз он номи некў ба бало равад.
Бувад зиштномӣ ба ҳар ҷой зишт,
Ба зиштӣ набинанд рўи биҳишт.
Шунидам, ки Нўшинравон чун бимурд,
Зи гетӣ ба ҷуз номи некў набурд.
@davlatobod1
Бо душмани ман чу дўст бисёр нишаст,
Бо дўст набоядам дигар бор нишаст.
Парҳез аз он шакар, ки бо заҳр омехт,
Бигрез аз он магас, ки бо мор нишаст.
@davlatobod1
Муаллим гуфт: «Тавоно бувад ҳар ки...?»
Тавоно бувад ҳар ки доро буд,
Зи сарват дили пир барно бувад.
Тиҳидаст ба ҷое нахоҳад расид,
Агар чӣ шабу рӯз кушо бувад.
Надонист Фирдавсии покзод,
Ки шеъраш дар ин мулк беҷо бувад.
Гар ӯро хабар буд, аз ин рӯзгор,
Ки зар бар ҳама чиз воло бувад.
Намегуфт он шеъри маъруфро:
«Тавоно бувад ҳар ки доно бувад!»
Ғазали Исмоил Зарифӣ
Умри ширин чун насими даргузар бигзашту рафт,
Дар набарди зиндагонӣ безафар бигзашту рафт.
Табъи мавзуну сухансанҷе нашуд ҳосил маро,
Ёри ман аз пеши рӯям пурҳазар бигзашту рафт.
Чорасозе ҷустаму ҳаргиз нагаштам чорасоз,
Аз сарири мулки армон чорагар бигзашту рафт.
Пушти мо хам гашт аз бори фузуни рӯзгор,
Аз бари ғафлатпаноҳон додгар бигзашту рафт.
Ношунида панди кас шатранҷи ҳастӣ бохтем,
Чун нафас аз пеши рӯ аҳли назар бигзашту рафт.
Асли худ нашнохтему хешро гум сохтем,
Ҳасрато, айёми мо андар ҳадар бигзашту рафт.
Эй Зарифӣ, дуриҳо ҷустем аз аҳли ҳунар,
Беҳунар мондем, чун аҳли ҳунар бигзашту рафт.
@davlatobod1
Ғазали Исмоил Зарифӣ
Эй парирӯ, аз гулу шамшоду райҳон хуштарӣ,
Бо лаби лаъли худ аз лаъли Бадахшон хуштарӣ.
Офати ҷонӣ, вале нурӣ ба чашми тираам,
Меҳнати ҷонӣ, вале аз ганҷи кайвон хуштарӣ.
Кош аз лаъли лабат як қатра бар ман мерасид,
Ташнаро аз Замзаму аз баҳри Уммон хуштарӣ.
Бар шаби торам ба ҳусни хеш мебахшӣ зиё,
Дар шабистони дил аз хуршеди тобон хуштарӣ.
Тахту бахту давлатам ҳаргиз намеояд ба кор,
Дар баҳо аз давлату тахти Сулаймон хуштарӣ.
Дар қудуми ту намоям гавҳари ҷонро нисор,
Доманат гирам, ки аз Мӯсои Имрон хуштарӣ.
Гаштаам бемору дардамро бихонанд лоилоҷ,
Доруе ҳаргиз наҷӯям, чун зи дармон хуштарӣ.
Ҷони худ бахшад, Зарифӣ, дар баҳои бӯсае,
Ҷон надорад арзише, илло зи сад ҷон хуштарӣ.
@davlatobod1
«Сарам хоки раҳи ҳар чор сарвар,
Абубакру Умар, Усмону Ҳайдар.
Бишинанд чор бурҷи ҳавзи Кавсар,
Чироғу масҷиду миҳробу минбар».
Зи дасти ҳар яке гирам қадаҳро,
Диҳам обе ба ёрони паямбар.
@davlatobod1
Ғазали Исмоил Зарифӣ
Эй дареғо, нашудам ҳамдами соҳибназарон,
Умри ман сарф шуд андар васати бебасарон.
Эй басо зуҳраваше тарки мани шайдо гуфт,
Беибо бар сари ман ҷамъ шуданд навҳагарон.
Шишаи қалби маро раҳгузарон санг заданд,
Бар пашизе нахариданд дилам шишагарон.
Лола доғи ҷигарам диду зи ман рӯй нуҳуфт,
Гуфт: «Ҷойи ту бувад ғамкадаи хунҷигарон».
Ҳолати хеш мани шӯридасавдо донам,
Пойро мекашам аз анҷумани кӯру карон.
Шоми торики маро равшание пайдо нест,
Дур мондам зи шафооти хуши пардадарон.
Якдилу якҷиҳату якамалу якрӯям,
Нашавам бозичаи нағмаю сози дигарон.
@davlatobod1
ҒАЗАЛИ МАВЛАВИ ҶУНУНӢ
Бинмо ҷамоли ҷонфазо, ё раҳматал лил оъламин.
Дар хоби муштоқон даро, ё раҳматал лил оъламин.
Дар мотамат ҷамъи малак, нолон ба фавқи ҳар фалак,
Аз аршу фаршу то самак, ё раҳматал лил оъламин.
Бе шамъи ту парвонаҳо, аз сӯзи дил девонаҳо,
Наъразанон мастонаҳо, ё раҳматал лил оъламин.
Рӯи гулат то шуд хазон, ҳасрат ба ҷони булбулон,
Дар ҳар чаман шӯру фиғон, ё раҳматал лил оъламин.
Шайдои рӯят ҳар замон, аз доғ ояд дар фиғон,
Бигзаштаанд аз хону мон, ё раҳматал лил оъламин.
Бечорагони хастаро, дармондаи бишкастаро,
Ҳал карда уқди бастаро, ё раҳматал лил оъламин.
Ҳурону ғилмон ҳар тараф, гирди мазорат баста саф,
Сад шишаи шарбат ба каф, ё раҳматал лил оъламин.
Ризвон ба хизмат мунтазир, хони наъими дилпазир,
Бар тахти фирдавси амир, ё раҳматал лил оъламин.
Ҷони Ҷунун қурбони ту, бо ҷумлаи ёрони ту,
Бо аҳли хонадони ту, ё раҳматал лил оъламин.
@davlatobod1
Ғазали Исмоил Зарифӣ
Эй фалак, моро гирифтори хатар кардӣ чаро?
Рӯзу шаб побанди дарди пою сар кардӣ чаро?
Ношукуфта дар лаби мо ғунчаи боғи умед,
Ноумед аз хеш, эй бедодгар, кардӣ чаро?
Базми мо бе шамъи рӯйи дӯстон ҳеҷ аст, ҳеҷ,
Дур аз мо ламъаи шамсу қамар кардӣ чаро?
Сели бедоди ту созад хонаи ҷонро хароб,
Ҷисми моро бар дифои худ сипар кардӣ чаро?
Хаста гардидему пеши роҳи мо танг аст, танг,
Дилпарастонро ба ҳасрат навҳагар кардӣ чаро?
Дар хаёли ошён афсонаи мо шуд тамом,
Ошиқонро чӯҷаи беболупар кардӣ чаро?
Аҳли донишро накардӣ ёд боре аз карам,
Сифлагонро ҳар куҷо бологузар кардӣ чаро?
Боз мепурсам зи ту, эй сифла, эй аъдои ҷон,
Умрҳо моро гирифтори хатар кардӣ чаро?
@davlatobod1
