Popular Journal

သီပေါ၌ ယာယီပိတ်ထားသည့် အခြေခံပညာကျောင်း ၁၇ ကျောင်း ပြန်လည်ဖွင့်လှစ် သီပေါ၊ သြဂုတ် ၃၀ ရှမ်းပြည်နယ်မြောက်ပိုင်း၊ သီပေါမြို့နယ်အတွင်း အကြောင်းအမျိုးမျိုးကြောင့် ယာယီပိတ်ထားခဲ့ရသည့် အခြေခံပညာကျောင်း ၁၇ ကျောင်းကို ပြန်လည်ဖွင့်လှစ်ခဲ့သည်။ ကျောင်းသား၊ ကျောင်းသူများအတွက်လည်း ပညာရေးအထောက်အကူပြုပစ္စည်းများနှင့် ကျောင်းဝတ်စုံများ ပေးအပ်သည့် အခမ်းအနားကို ဩဂုတ် ၂၉ ရက်က ဆင်ကျော့နှင့် ဆောင်ကြဲ အ.ထ.က ကျောင်းများအပါအဝင် မူလွန်လခွဲနှင့် မူလတန်းကျောင်းများ၌ ကျင်းပခဲ့ကြောင်း သိရသည်။ အဆိုပါ အခမ်းအနားသို့ ပြည်သူ့လွှတ်တော်ကိုယ်စားလှယ် ဦးစိုင်းကောင်းသက်စံ၊ ပြည်နယ်ပညာရေးမှူး ဦးတင့်ဆွေ၊ သီပေါမြို့နယ်ပညာရေးမှူး ဒေါ်လွင်လွင်မာတို့ တက်ရောက်ခဲ့ကြသကဲ့သို့ ရှမ်းပြည်တိုးတက်ရေးပါတီ (SSPP/SSA) မှ စစ်ဦးစီးချုပ် စဝ်သျှံဖနှင့် အဖွဲ့ဝင်များ၊ ဝမ်ဟိုင်းပညာရေးဌာနမှ တာဝန်ရှိသူများ၊ ကျောင်းကော်မတီဝင်များနှင့် ဒေသခံပြည်သူများ တက်ရောက်ခဲ့ကြသည်။ ယခု ကျောင်းများ ပြန်လည်ဖွင့်လှစ်နိုင်ရေးအတွက် ပညာရေးတာဝန်ရှိသူများ၊ SSPP/SSA အပါအဝင် ဒေသခံအဖွဲ့အစည်းများ၊ ကျောင်းကော်မတီများနှင့် ဒေသခံများ ပူးပေါင်းဆောင်ရွက်ခဲ့ကြခြင်းဖြစ်ပြီး ကလေးငယ်များ ပညာသင်ကြားနိုင်ရေးအတွက် လိုအပ်သည့် ပညာရေးအထောက်အကူပြုပစ္စည်းများနှင့် ကျောင်းဝတ်စုံများကိုလည်း ပေးအပ်ခဲ့သည်။ နှစ်အတန်ကြာ ပညာသင်ကြားခွင့် အကန့်အသတ်များနှင့် ကြုံတွေ့ခဲ့ရသည့် ဒေသခံ ကလေးငယ်များအတွက် အဆိုပါ ကျောင်းများ ပြန်လည်ဖွင့်လှစ်နိုင်ခြင်းသည် ဒေသ၏ ပညာရေးဖွံ့ဖြိုးတိုးတက်မှုအတွက် အရေးပါသည့် ခြေလှမ်းတစ်ရပ် ဖြစ်လာခဲ့သည်။ ကျောင်းများ ပြန်လည်ဖွင့်လှစ်နိုင်ရေးအတွက် အစိုးရ၊ တပ်မတော်၊ လွှတ်တော်ကိုယ်စားလှယ်များ၊ ပညာရေးဌာန တာဝန်ရှိသူများ၊ ဒေသခံအဖွဲ့အစည်းများ၊ ဆရာ ဆရာမများနှင့် မြို့ခံပြည်သူများက အသီးသီး ပူးပေါင်းပါဝင် ဆောင်ရွက်ခဲ့ကြခြင်းဖြစ်ကြောင်း သိရသည်။

သီပေါ၌ ယာယီပိတ်ထားသည့် အခြေခံပညာကျောင်း ၁၇ ကျောင်း ပြန်လည်ဖွင့်လှစ်

ပြည်ပရောက်လုပ်သားများ၏ မိသားစုလွှဲငွေ တရားဝင်လမ်းကြောင်းမှ လွှဲပို့ရေး အေဂျင်စီများ ပူးပေါင်းဆောင်ရွက်ရန် အလုပ်သမားဝန်ကြီး တိုက်တွန်း နေပြည်တော်၊ ဩဂုတ် ၃၀ ပြည်ပတွင် အလုပ်လုပ်ကိုင်နေသည့် မြန်မာအလုပ်သမားများ၏ မိသားစုလွှဲပို့ငွေများကို တရားဝင်လမ်းကြောင်းမှ လွှဲပို့စေရေးအတွက် ပြည်ပအလုပ်အကိုင်အကျိုးဆောင် လိုင်စင်ရအေဂျင်စီများအနေဖြင့် တာဝန်ရှိမှု၊ တာဝန်သိမှုဖြင့် ပူးပေါင်းဆောင်ရွက်ကြရန် အလုပ်သမားဝန်ကြီးဌာန ပြည်ထောင်စုဝန်ကြီး ဦးခင်မောင်စိုးက တိုက်တွန်းပြောကြားသည်။ ပြည်ထောင်စုဝန်ကြီးသည် ဩဂုတ် ၂၉ ရက်က ပြည်ပသို့ အလုပ်သမားစေလွှတ်လျက်ရှိသည့် အေဂျင်စီများမှ မန်နေဂျင်းဒါရို-က်တာများနှင့် တွေ့ဆုံစဉ် ထိုသို့ ပြောကြားခဲ့ခြင်းဖြစ်သည်။ ရွှေ့ပြောင်းလုပ်သားများ၏ မိသားစုလွှဲပို့ငွေများကို တရားဝင်လမ်းကြောင်းမှ လွှဲပို့ခြင်းသည် အလုပ်သမားမိသားစုများ၏ လူမှုစီးပွားဘဝကို အထောက်အကူဖြစ်စေသည့်အပြင် နိုင်ငံအတွက် နိုင်ငံခြားဝင်ငွေ ပိုမိုရရှိစေကာ နိုင်ငံဖွံ့ဖြိုးတိုးတက်ရေးကိုလည်း အထောက်အကူပြုကြောင်း ပြည်ထောင်စုဝန်ကြီးက ပြောကြားခဲ့သည်။ အေဂျင်စီများမှတစ်ဆင့် ပြည်ပသို့ စေလွှတ်ခဲ့သည့် အလုပ်သမားများ၏ လုပ်ခလစာမှ မိသားစုလွှဲပို့ငွေ ၂၅ ရာခိုင်နှုန်းကို တရားဝင်လမ်းကြောင်းမှ လွှဲပို့စေရေးအတွက် အေဂျင်စီနှင့် အလုပ်သမားအကြား သဘောတူညီချက်စာချုပ် ချုပ်ဆိုသည့်စနစ်ကို ၂၀၂၃ ခုနှစ်မှစတင် ဆောင်ရွက်ခဲ့ခြင်းဖြစ်သည်။ ထို့ပြင် ပြည်ပရောက်အလုပ်သမားများ၏ လွှဲပို့ငွေဆိုင်ရာ အချက်အလက်များ တိကျစွာရရှိရေးနှင့် လွယ်ကူအဆင်ပြေသည့် ငွေလွှဲစနစ် ဖြစ်ပေါ်လာရေးအတွက် Authorized Dealer (AD) လိုင်စင်ရဘဏ်များ၊ မြန်မာနိုင်ငံတော်ဗဟိုဘဏ်တို့နှင့် ပူးပေါင်းညှိနှိုင်း ဆောင်ရွက်လျက်ရှိကြောင်း သိရသည်။

ပြည်ပရောက်လုပ်သားများ၏ မိသားစုလွှဲငွေ တရားဝင်လမ်းကြောင်းမှ လွှဲပို့ရေး အေဂျင်စီများ ပူးပေါင်းဆောင်ရွက်ရန် အလုပ်သမားဝန်ကြီး တိုက်တွန်း

ရေကျဆင်းပါက အချိန်မီ ပြန်လည်စိုက်ပျိုးနိုင်ရေး စက်ယန္တရား၊ မျိုးစေ့နှင့် သွင်းအားစုများ အသင့်ပြင်ဆင်ထား လေးမျက်နှာ၊ ဩဂုတ် ၃၀ ဧရာဝတီတိုင်းဒေသကြီးအတွင်း ရေကျဆင်းပါက ရေဘေးသင့်တောင်သူများ အချိန်မီ ပြန်လည်ထွန်ယက်စိုက်ပျိုးနိုင်ရေးအတွက် လိုအပ်သည့် စက်ယန္တရားများ၊ မျိုးစေ့နှင့် စိုက်ပျိုးရေးသွင်းအားစုများကို အသင့်စုဖွဲ့ပြင်ဆင်ထားကြောင်း ဧရာဝတီတိုင်းဒေသကြီးဝန်ကြီးချုပ် ဦးအေးကျော်က ပြောကြားသည်။ တိုင်းဒေသကြီးဝန်ကြီးချုပ်သည် ဩဂုတ် ၂၈ ရက် နံနက်ပိုင်းက လေးမျက်နှာမြို့ပေါ်ရှိ နဝင်းကျောင်းတိုက်အပါအဝင် ရေဘေးကယ်ဆယ်ရေးစခန်းများသို့ သွားရောက်ကာ ရေဘေးသင့်ပြည်သူများနှင့် တွေ့ဆုံစဉ် ထိုသို့ ပြောကြားခဲ့ခြင်းဖြစ်သည်။ ထို့ပြင် တိုင်းဒေသကြီးအတွင်းရှိ တာတမံများ ကြံ့ခိုင်ရေးလုပ်ငန်းများကို မိုးကုန်ကာလတွင် ဆက်လက်ဆောင်ရွက်သွားမည်ဖြစ်ပြီး ရေကျဆင်းပြီးနောက် ပြည်သူများ၏ အသက်မွေးဝမ်းကျောင်းလုပ်ငန်းများ ပုံမှန်ပြန်လည်လည်ပတ်နိုင်ရေးအတွက် သက်ဆိုင်ရာဝန်ကြီးဌာနများ၊ လူမှုရေးအဖွဲ့အစည်းများနှင့် ပြည်သူများ ပူးပေါင်းဆောင်ရွက်ကြရန် တိုက်တွန်းခဲ့သည်။ ယင်းနောက် တိုင်းဒေသကြီး ပြည်သူ့ကျန်းမာရေးဦးစီးဌာနမှ တိုင်းဦးစီးမှူးက ရေဘေးကာလအတွင်း ဖြစ်ပေါ်နိုင်သည့် မြွေအန္တရာယ်နှင့် ဝမ်းပျက်ဝမ်းလျှောရောဂါများနှင့်ပတ်သက်၍ ကျန်းမာရေးအသိပညာပေးခဲ့ပြီး ဝန်ကြီးချုပ်နှင့် တာဝန်ရှိသူများက ရေဘေးသင့်ပြည်သူများအတွက် ဆန်ရိက္ခာနှင့် ထောက်ပံ့ပစ္စည်းများ ပေးအပ်ခဲ့ကြောင်း သိရသည်။

ရေကျဆင်းပါက အချိန်မီ ပြန်လည်စိုက်ပျိုးနိုင်ရေး စက်ယန္တရား၊ မျိုးစေ့နှင့် သွင်းအားစုများ အသင့်ပြင်ဆင်ထား

ရန်ကုန်-ပြည် ရထားလမ်းပိုင်းတွင် DEMU ရထားများ မြန်နှုန်းမြှင့်တင်ပြေးဆွဲနိုင်ရေး အဆင့်မြှင့်တင်ပြုပြင်နေ ရန်ကုန်၊ ဩဂုတ် ၃၀ DEMU ရထားများ ပြေးဆွဲလျက်ရှိသည့် ရန်ကုန်-ပြည် ရထားလမ်းပိုင်းတွင် ခရီးသွားပြည်သူများ အဆင်ပြေချောမွေ့စွာ သွားလာနိုင်ရေး၊ ရထားများ အချိန်မှန်ပြေးဆွဲနိုင်ရေးနှင့် မြန်နှုန်းမြှင့်တင်ပြေးဆွဲနိုင်ရေးတို့အတွက် ရထားလမ်းအဆင့်မြှင့်တင်ပြုပြင်ရေးလုပ်ငန်းများ ဆောင်ရွက်လျက်ရှိကြောင်း သိရသည်။ အဆိုပါလုပ်ငန်းများ ဆောင်ရွက်နေမှုကို ပို့ဆောင်ရေးဝန်ကြီးဌာန ဒုတိယဝန်ကြီး ဦးအောင်မြိုင်က ကွင်းဆင်းကြည့်ရှုစစ်ဆေးခဲ့သည်။ ရန်ကုန်-ပြည် ရထားလမ်းပိုင်း အရှည် ၁၆၁ မိုင်အနက် Automatic Leveling, Lining & Tamping Machine (ALLTM) စက်ကြီး လေးစီးဖြင့် ရထားလမ်းမြှောက်ခြင်းနှင့် ပါကင်ရိုက်ခြင်းလုပ်ငန်း စုစုပေါင်း ၁၂၁ မိုင် ဆောင်ရွက်ပြီးစီးပြီဖြစ်ပြီး ကျန်ရှိသည့် မိုင် ၄၀ ကို လာမည့် စက်တင်ဘာ ၃ ရက်တွင် အပြီးဆောင်ရွက်သွားမည်ဖြစ်သည်။ ထို့ပြင် ၉ ချောင်းဆက် သံလမ်းခင်းခြင်းလုပ်ငန်းအဖြစ် တညင်းကုန်းမှ ဖလုံအထိ ၃၇ မိုင်နှင့် ပြည်မှ ဇီးကုန်းအထိ ၄၃ မိုင်၊ စုစုပေါင်း မိုင် ၈၀ ဆောင်ရွက်ပြီးစီးထားသည်။ ကျန်ရှိသည့် ဖလုံမှ ဇီးကုန်းအထိ ၆၈ ဒသမ ၅ မိုင်ကို ၂၀၂၆-၂၀၂၇ ဘဏ္ဍာနှစ်အတွင်း အပြီးဆောင်ရွက်ရန် လျာထားကြောင်း သိရသည်။ လက်ရှိတွင် ALLTM စက်ကြီးများဖြင့် နတ်တလင်း-ပေါင်းတည်၊ သဲကုန်း-ဆင်မြီးဆွဲ၊ ဆင်မြီးဆွဲ-မှော်ဇာနှင့် မှော်ဇာလမ်းဆုံ-ပြည်ဘူတာကြား ရထားလမ်းပိုင်းများ၌ အဆင့်မြှင့်တင်ပြုပြင်ရေးလုပ်ငန်းများ ဆက်လက်ဆောင်ရွက်လျက်ရှိသည်။

ရန်ကုန်-ပြည် ရထားလမ်းပိုင်းတွင် DEMU ရထားများ မြန်နှုန်းမြှင့်တင်ပြေးဆွဲနိုင်ရေး အဆင့်မြှင့်တင်ပြုပြင်နေ

FIFA U-15 World Cup and Festival အတွက် မြန်မာ ယူ-၁၅ လက်ရွေးစင်အသင်း ပဏာမကစားသမား ၃၂ ဦး စာရင်းထုတ်ပြန် ရန်ကုန်၊ ဩဂုတ် ၃၀ အဇာဘိုင်ဂျန်နိုင်ငံ၌ အောက်တိုဘာ ၂၂ ရက်မှ ၃၁ ရက်အထိ ကျင်းပမည့် FIFA U-15 World Cup and Festival ပြိုင်ပွဲသို့ သွားရောက်ယှဉ်ပြိုင်ရန် မြန်မာနိုင်ငံဘောလုံးအဖွဲ့ချုပ် (MFF) က မြန်မာ ယူ-၁၅ လက်ရွေးစင်အသင်း၏ ပဏာမကစားသမား ၃၂ ဦး စာရင်းကို ထုတ်ပြန်ကြေညာလိုက်သည်။ အဆိုပါ ပဏာမလူစာရင်းတွင် ရန်ကုန်နှင့် မန္တလေးမြို့များ၌ ပြုလုပ်ခဲ့သည့် Open Try Out စနစ်ဖြင့် ရွေးချယ်ခံရသူများ အပါအဝင် တောင်ကြီး၊ မန္တလေး၊ မော်လမြိုင်နှင့် ရန်ကုန်ဇုန် FIFA/MFF U-15 League 2026 တို့မှ ထက်မြက်သည့် လူငယ်ကစားသမားများ ပါဝင်လာကြသည်။ ထို့အပြင် နေပြည်တော် (RTC) မှ ကစားသမားများ၊ MFF Academy Selection Team (YGN) နှင့် MFF Academy Selection Team (MDY) တို့မှ ခြေစွမ်းပြသနိုင်ခဲ့သည့် ကစားသမားများလည်း ပဏာမစာရင်းတွင် ပါဝင်ကြသည်။ ရွေးချယ်ခံရသည့် ပဏာမကစားသမား ၃၂ ဦးသည် စက်တင်ဘာ ၃ ရက် နောက်ဆုံးထား၍ မြန်မာနိုင်ငံဘောလုံးအဖွဲ့ချုပ်သို့ သတင်းပို့ရမည်ဖြစ်ပြီး အဇာဘိုင်ဂျန်ခရီးစဉ်အတွက် လေ့ကျင့်ရေးစခန်း ဝင်ရောက်ရမည်ဖြစ်သည်။ လေ့ကျင့်ရေးစခန်း ကာလအတွင်း ကစားသမားများ၏ ခြေစွမ်းနှင့် ကြံ့ခိုင်မှုများကို စိစစ်ပြီးမှသာ အဇာဘိုင်ဂျန်သို့ သွားရောက်ယှဉ်ပြိုင်မည့် အပြီးသတ်လူစာရင်းကို ထပ်မံရွေးချယ်ထုတ်ပြန်သွားမည်ဖြစ်ကြောင်း သိရသည်။

FIFA U-15 World Cup and Festival အတွက် မြန်မာ ယူ-၁၅ လက်ရွေးစင်အသင်း ပဏာမကစားသမား ၃၂ ဦး စာရင်းထုတ်ပြန်

ပြည်တွင်းလိဂ် ဒုတိယရာသီဝက်နှင့် AWCL အုပ်စုအဆင့်အတွက် ဂျပန်ကလပ်များရှိ အဆင့်မြင့် ကစားသမားများ‌ ရှာဖွေခေါ်ယူမည် ရန်ကုန်၊ ဩဂုတ် ၃၀ ပြည်တွင်းလိဂ် ဒုတိယရာသီဝက်နှင့် AFC Women’s Champions League (AWCL) အုပ်စုအဆင့် ပွဲစဉ်များအတွက် အသင်းကို ပိုမိုတောင့်တင်းလာစေရန် ဂျပန်ကလပ်များရှိ အဆင့်မြင့် ကစားသမားများ‌ ရှာဖွေခေါ်ယူမည်ဖြစ်ကြောင်း၊ ကစားသမားသစ်များ ရှာဖွေခေါ်ယူနိုင်ရေးအတွက် ဧရာဝတီအမျိုးသမီးအသင်း နည်းပြ ကူမီကိုသည် ဂျပန်နိုင်ငံသို့ ထွက်ခွာသွားပြီ ဖြစ်ကြောင်း သိရသည်။ နည်းပြ ကူမီကိုသည် ဂျပန်နိုင်ငံတွင် ကလပ်အသင်းများ၊ ကစားသမားများနှင့် တိုက်ရိုက်တွေ့ဆုံကာ အသင်း၏ လိုအပ်ချက်နှင့် ကိုက်ညီမည့် အရည်အသွေးမြင့် ကစားသမားများကို ရွေးချယ်သွားမည်ဖြစ်သည်။ ပြီးခဲ့သည့် ပြိုင်ပွဲတွင် ဧရာဝတီအသင်း၌ လာရောက်ကစားခဲ့သည့် ဂျပန်ကစားသမား ၅ ဦးအနက် အချို့ သို့မဟုတ် အားလုံးကို AWCL အုပ်စုအဆင့်အတွက် ပြန်လည်ခေါ်ယူနိုင်ရေး သက်ဆိုင်ရာ ကလပ်များနှင့် ဆွေးနွေးညှိနှိုင်းသွားမည်ဖြစ်ပြီး အခက်အခဲရှိပါက နေရာလိုအပ်ချက်များအတွက် ကစားသမားသစ်များကို ထပ်မံရှာဖွေသွားမည်ဖြစ်သည်။ လာမည့် AWCL အုပ်စုအဆင့်တွင် အနည်းဆုံးတစ်ပွဲ အနိုင်ရရှိရန်နှင့် ပေးဂိုးနည်းပါးစေရန် ရည်မှန်းထားသလို လာမည့်နှစ် AWCL ပြိုင်ပွဲသို့ ထပ်မံဝင်ရောက်ခွင့်ရရေးအတွက် ပြည်တွင်းလိဂ် ချန်ပီယံဆုရရှိရန် အရေးကြီးကြောင်းလည်း နည်းပြ ကူမီကိုက ပြောကြားခဲ့သည်။ လက်ရှိတွင် အသင်း၌ ဒဏ်ရာရ ကစားသမားများရှိနေခြင်းနှင့် နိုင်ငံခြားသား ကစားသမားများ၏ စာချုပ်ကိစ္စ စိန်ခေါ်မှုများ ရှိနေသော်လည်း အနားယူကာလအတွင်း လက်ရှိကစားသမားများ၏ အရည်အသွေး တိုးတက်ရေးကို အထူးပြု လေ့ကျင့်ပေးသွားမည်ဖြစ်ကြောင်း သိရသည်။

ပြည်တွင်းလိဂ် ဒုတိယရာသီဝက်နှင့် AWCL အုပ်စုအဆင့်အတွက် ဂျပန်ကလပ်များရှိ အဆင့်မြင့် ကစားသမားများ‌ ရှာဖွေခေါ်ယူမည်

ထားဝယ်မြို့၌ ကရင်ရိုးရာ ဝါခေါင်လ ချည်ဖြူဖွဲ့မင်္ဂလာအခမ်းအနား ကျင်းပခဲ့ ထားဝယ်၊ဩဂုတ်-၃၀ ကရင်တိုင်းရင်းသားတို့၏ ရိုးရာယဉ်ကျေးမှုအစဉ်အလာတစ်ခုဖြစ်သည့် ဝါခေါင်လ ချည်ဖြူဖွဲ့မင်္ဂလာအခမ်းအနားကို တနင်္သာရီတိုင်းဒေသကြီး၊ ထားဝယ်မြို့ရှိ ပုလဲဧကရီခန်းမတွင် (ဩဂုတ် ၂၉) နံနက်ပိုင်းက ကျင်းပခဲ့သည်။ အဆိုပါပွဲသို့ တိုင်းရင်းသားလူမျိုးများရေးရာ ပြည်ထောင်စုဝန်ကြီး ဦးသန်းမောင်၊ တိုင်းဒေသကြီးလွှတ်တော်ဥက္ကဋ္ဌ ဦးမြတ်ကို၊ တိုင်းဒေသကြီးဝန်ကြီးချုပ် ဦးဇော်နိုင်ဦးနှင့် တိုင်းဒေသကြီးအစိုးရအဖွဲ့ဝင် ဝန်ကြီးများ၊ လွှတ်တော်ကိုယ်စားလှယ်များ၊ ဒေသခံ ကရင်တိုင်းရင်းသားများ တက်ရောက်ခဲ့ကြသည်။ အခမ်းအနားတွင် ကရင်ရိုးရာဓလေ့ထုံးတမ်းများနှင့်အညီ ဝါခေါင်လ ချည်ဖြူဖွဲ့မင်္ဂလာကို စုပေါင်းဆင်နွှဲခဲ့ကြပြီး တက်ရောက်လာသူများအား ချည်ဖြူဖွဲ့ မင်္ဂလာပြုပေးခဲ့ကြသည်။

ငသိုင်းချောင်းမြို့နယ်အတွင်း လှေတိမ်းမှောက်မှုကြောင့် ပျောက်ဆုံးနေသည့် အသက် ၂၈ နှစ်အရွယ် အမျိုးသားတစ်ဦး၏ ရုပ်အလေ-ာင်း ၂ ရက်အကြာတွင် ပြန်လည်ရှာဖွေတွေ့ရှိ ငါးသိုင်းချောင်း၊ ဩဂုတ် ၃၀ ဧရာဝတီတိုင်းဒေသကြီး၊ ငါးသိုင်းချောင်းမြို့၊ ရွာသစ်ကုန်းတံတားအနီးတွင် လှေတိမ်းမှောက်မှုဖြစ်ပွားပြီးနောက် ရေနစ်ပျေ-ာက်ဆုံးနေသည့် အသက် ၂၈ နှစ်အရွယ် အမျိုးသားတစ်ဦး၏ ရုပ်အလေ-ာင်းကို ၂ ရက်အကြာတွင် ပြန်လည်ရှာဖွေတွေ့ရှိခဲ့ကြောင်း မြေပြင်ရှာဖွေကယ်ဆယ်ရေးအဖွဲ့ထံမှ သိရသည်။ ဖြစ်စဉ်မှာ ဩဂုတ် ၂၇ ရက် ည ၉ နာရီခန့်က ငါးသိုင်းချောင်းမြို့၊ ရွာသစ်ကုန်းတံတားအနီး၌ အမျိုးသား ၂ ဦး စီးနင်းလာသည့် လှေတစ်စီး တိမ်းမှောက်ခဲ့ခြင်းဖြစ်သည်။ လှေမှောက်ချိန်တွင် အမျိုးသား ၁ ဦးမှာ လှေကို ဖက်တွယ်ထားနိုင်၍ အသက်ရှင်လျက် ကယ်တင်နိုင်ခဲ့သော်လည်း ကျန် ၁ ဦးဖြစ်သည့် ငါးသိုင်းချောင်းမြို့ခံ ကိုကောင်းထက်ဇော် (ခ) ဖိုးထောင်သည် ရေထဲမျောပါသွားသည့် ဂစ်တာကို ဆယ်ယူရန် ကြိုးစားစဉ် ရေနစ်ပျေ-ာက်ဆုံးသွားခဲ့ခြင်း ဖြစ်သည်။ အဆိုပါ ပျောက်ဆုံးသူအား မြန်မာနိုင်ငံ လူမှုကယ်ဆယ်ရေးအဖွဲ့များက ဩဂုတ် ၂၈ ရက်အထိ လိုက်လံရှာဖွေခဲ့သော်လည်း ရေအလွန်နက်သည့်အတွက် ရှာဖွေရေးလုပ်ငန်းများ ခက်ခဲခဲ့သည်။ ထို့နောက် ဩဂုတ် ၂၉ ရက် နံနက် ၆ နာရီခန့်တွင် ပျေ-ာက်ဆုံးနေသူ၏ ရုပ်အလေ-ာင်းကို ပြန်လည်ရှာဖွေတွေ့ရှိခဲ့ပြီး ငါးသိုင်းချောင်း ပြည်သူ့ဆေးရုံကြီး ရင်ခွဲရုံသို့ ပို့ဆောင်ထားရှိကြောင်း သိရသည်။

ငသိုင်းချောင်းမြို့နယ်အတွင်း လှေတိမ်းမှောက်မှုကြောင့် ပျောက်ဆုံးနေသည့် အသက် ၂၈ နှစ်အရွယ် အမျိုးသားတစ်ဦး၏ ရုပ်အလေ-ာင်း ၂ ရက်အကြာတွင် ပြန်လည်ရှာဖွေတွေ့ရှိ

ဒုတိယအကြိမ် ချင်းမိုင်နိုင်ငံတကာရုပ်ရှင်ပွဲတော် ၂၀၂၆ တွင် မြန်မာရုပ်ရှင်ဇာတ်ကား(၂)ကားပြသ ချင်းမိုင်မြို့၊ Central Chiang Mai Airport Plaza တွင် ဩဂုတ် ၂၈ ရက်ကကျင်းပသည့် "ဒုတိယအကြိမ်ချင်းမိုင်နိုင်ငံတကာရုပ်ရှင်ပွဲတော် ၂၀၂၆"တွင် မြန်မာရုပ်ရှင်ဇာတ်ကား(၂)ကားပါဝင်ပြသလျက်ရှိကြောင်း သိရသည်။ "ညမွှေးပန်းကလေးရဲ့ကျောက်ပုစွန်"နှင့် "ကံကောင်း" ရုပ်ရှင်ကားတို့ကိုပါဝင်ပြသခဲ့ပြီး ပွဲတော်ဖွင့်ပွဲကို သြဂုတ် ၂၈ ရက်ကကျင်းပရာ မြန်မာကောင်စစ်ဝန်ချုပ်ရုံး၊ ချင်းမိုင်မြို့မှ ကောင်စစ်ဝန်ချုပ်ဦးမင်းကျော်လင်းက ထိုင်းနိုင်ငံ(မြောက်ပိုင်း)ရုပ်ရှင်နှင့်ဒီဂျစ်တယ်မီဒီယာအသင်းဥက္ကဋ္ဌ Mr. Adisorn Suddee ၏ဖိတ်ကြားချက်အရတက်ရောက်ခဲ့ကြောင်း သိရသည်။ " ဒုတိယအကြိမ် ချင်းမိုင်နိုင်ငံတကာရုပ်ရှင်ပွဲတော် ၂၀၂၆"ကို ဩဂုတ် ၂၈ ရက်မှ သြဂုတ် ၃၀ ရက်အထိ ကျင်းပလျက်ရှိကြောင်း သိရသည်။

သံလွင်မြစ်ရေနှင့် စစ်တောင်းမြစ်ရေ ဘားအံမြို့နှင့် မဒေါက်မြို့တို့၏ စိုးရိမ်ရေမှတ်အထက်ကျော်လွန်ရောက်ရှိနေ သံလွင်မြစ်ရေနှင့် စစ်တောင်းမြစ်ရေ ဘားအံမြို့နှင့် မဒေါက်မြို့တို့၏စိုးရိမ်ရေမှတ်အထက်ကျော်လွန်ရောက်ရှိနေသည်ဟု မိုးလေဝသနှင့် ဇလဗေဒညွှန်ကြားမှုဦးစီးဌာနထံမှ သိရသည်။ သံလွင်မြစ်ရေသည် လက်ရှိအချိန်၌ ဘားအံမြို့၏ စိုး ရိမ်ရေမှတ်အထက် (၁)ပေ (၁၀)လက်မခန့်ကျော်လွန်ရောက်ရှိနေပြီး လာမည့် ၂၄ နာရီအတွင်း (၃)လက်မခန့် မြင့်တက်လာနိုင်ကာ ယင်းမြို့၏ စိုးရိမ်ရေမှတ်အထက် တွင် ဆက်လက်တည်ရှိနိုင်ကြောင်း သိရသည်။ ထို့ပြင် စစ်တောင်းမြစ်ရေသည်လည်း မဒေါက်မြို့၏ စိုးရိမ်ရေမှတ်အထက် (၂)ပေ (၉)လက်မခန့်ကျော်လွန်ရောက်ရှိနေပြီး လာမည့်(၂၄)အတွင်း (၂)လက်မခန့်မြင့်တက်လာနိုင်ကာ ယင်းမြို့၏ စိုးရိမ်ရေမှတ်အထက်တွင် ဆက်လက်တည်ရှိနိုင်ကြောင်း သိရသည်။ ထို့ကြောင့် ဘားအံမြို့နယ်နှင့် မဒေါက်မြို့များအတွင်းရှိ မြစ်ကမ်းအနီးနှင့် မြေနိမ့်ပိုင်းနေထိုင်သူများအနေဖြင့် ရေဘေးလွတ်ရာနေရာများသို့ရှောင်ရှားကြရန် သတိပေးနှိုးဆော်ထားကြောင်း သိရသည်။ ထို့အတူ လက်ရှိအချိန်၌ ဘင်္ဂလားပင်လယ်အော်(အနောက်မြောက်ပိုင်း)နှင့် ယင်းနှင့်ဆက်စပ်လျက်ရှိသော အိန္ဒိယနိုင်ငံ၊ အနောက်ဘင်္ဂလားပြည်နယ်-ဩရိဿပြည်နယ်မြောက်ပိုင်းကမ်းခြေတို့တွင်ဖြစ်ပေါ်နေသော လေဖိအားနည်းရပ်ဝန်းသည် ဆက်လက်တည်ရှိနေပြီး လာမည့် ၄၈ နာရီအတွင်း ပိုမိုအားကောင်းလာနိုင်ပြီး အနောက်-အနောက်မြောက်ဘက်သို့ရွေ့လျားနိုင်ကာ အိန္ဒိယနိုင်ငံ၊ ဩရိဿပြည်နယ်မြောက်ပိုင်း-အနောက်ဘင်္ဂလားပြည်နယ်တို့သို့ဖြတ်ကျော်နိုင်ကြောင်း သိရသည်။

သံလွင်မြစ်ရေနှင့် စစ်တောင်းမြစ်ရေ ဘားအံမြို့နှင့် မဒေါက်မြို့တို့၏ စိုးရိမ်ရေမှတ်အထက်ကျော်လွန်ရောက်ရှိနေ

ဖလမ်းမြို့ ပြည်သူ့ဆေးရုံ၏ အပျက်အစီးများကိုရှင်းလင်းဖယ်ရှား အကြမ်းဖက်ဖြစ်စဥ်များကြောင့် ပျက်စီးမှုများဖြစ်ပေါ်ခဲ့သည့် ချင်းပြည်နယ်၊ ဖလမ်းမြို့ရှိ ပြည်သူ့ဆေးရုံ၏ အပျက်အစီးများကိုရှင်းလင်းဖယ်ရှားမှုများပြုလုပ်လျက်ရှိကြောင်း သိရသည်။ အလုံးစုံပျက်စီးခဲ့သော ဖလမ်းမြို့ပြည်သူ့ဆေးရုံရှိ နှစ်ထပ်လူနာဆောင်၊ ဖျား နာဆောင်၊ ဓာတ်မှန်၊ ဓာတ်ခွဲ ခန်း၊ Oxygen Plant ၊ ခွဲစိတ်ဆောင်(အဟောင်း)၊ (အဟေသားဖွားမီးယပ်ဆောင်)၊ အရိုးကုသဆောင်(အ ဟောင်း)နှင့် ဆေးစတိုခန်းများ၏ အပျက်အစီးများကို တပ်မတော်သားများနှင့် ဒေသခံများက လူအား၊ စက်အားဖြင့်ရှင်းလင်းဖယ်ရှားလျက်ရှိကြောင်း သိရသည်။ ထို့သို့ ရှင်းလင်းဖယ်ရှားနေမှုကို နယ်စပ်ရေးရာဝန်ကြီး ဌာန ဒု-ဝန်ကြီးဗိုလ်ချုပ်ကျော်စွာဦးနှင့် တာဝန်ရှိသူများကကြည့်ရှုစစ်ဆေးခဲ့ကြကြောင်း သိရသည်။

ထရမ့်ရဲ့ 'ဂရင်းလန်း အစီအစဉ်' ဟာ အာတိတ်ဒေသကို အမေရိကန်ရဲ့ ထိန်းချုပ်မှုအောက် သွတ်သွင်းဖို့ ရည်ရွယ်ခြင်းဖြစ်ဟုဆို ​အမေရိကန်သမ္မတ ဒေါ်နယ်ထရမ့်ရဲ့ 'ဂရင်းလန်း(Greenland) အစီအစဉ်' ဟာ တကယ်တမ်းကျတော့ ကျန်နေတဲ့ အာတိတ်ဒေသတစ်ခုလုံးကို အမေရိကန်ရဲ့ ထိန်းချုပ်မှုအောက်ကို သွတ်သွင်းဖို့ ရည်ရွယ်ခဲ့တာပါလို့ ရုရှားသမ္မတရဲ့ အကြံပေးနဲ့ အရှေ့ပိုင်း စီးပွားရေးဖိုရမ်(EEF)ကျင်းပရေးကော်မတီရဲ့ အလုပ်အမှုဆောင်အတွင်းရေးမှူးဖြစ်သူ အန်တန် ကိုဘာကော့ဗ်(Anton Kobyakov) က TASS သတင်းဌာနကို ပြောကြားပါတယ်။ ​"အချို့အဆိုအရ EU နဲ့ ဒိန်းမတ်တို့က ဟန့်တားခဲ့တယ်လို့ဆိုပြီး၊ နောက်အဆိုတစ်ခုအရကျတော့ အီရန်ကို တိုက်ခိုက်ဖို့ ပြင်ဆင်နေတာကို ဖုံးကွယ်ဖို့အတွက် လုပ်ခဲ့တာလို့ ပြောကြတဲ့ ထရမ့်ရဲ့ 'ဂရင်းလန်း အစီအစဉ်' ဟာ တကယ်တော့ ကျန်နေတဲ့ အာတိတ်ဒေသကိုပါ အမေရိကန် လက်အောက်ရောက်ဖို့ ရည်ရွယ်တာပါ။ ဒီအထဲမှာ ဂရင်းလန်းနဲ့ ကနေဒါ ကိစ္စတွေကို ချိတ်ဆက်ပေးမယ့် ကနေဒါမြောက်ပိုင်းက အနောက်မြောက်ရေကြောင်းလမ်း(Northwest Passage) အပြင်၊ မြောက်ပိုင်းပင်လယ်ရေကြောင်းလမ်း(NSR) စတင်ရာ ဘားရန့်စ်ပင်လယ်(Barents Sea) ထဲက ရုရှားပိုင်ရေပြင်အထိ ကျယ်ပြန့်တဲ့ ဥရောပမြောက်ပိုင်းဒေသတွေလည်း ပါဝင်ပါတယ်။ ဒီလိုအခြေအနေမျိုးမှာမှသာ အမေရိကန်အနေနဲ့ ဗြိတိန်ကို မှီခိုနေရတဲ့ နော်ဝေတွေ အဓိကပါဝင်တဲ့ စကင်ဒီနေဗီးယန်းနိုင်ငံတွေရဲ့ အကူအညီနဲ့တောင်မှ ရုရှားရဲ့ NSR ရေကြောင်းလမ်း စွမ်းဆောင်ရည်ကို ယှဉ်ပြိုင်နိုင်မှာ ဖြစ်ပါတယ်" လို့ သူက ပြောပါတယ်။ ​ပစိဖိတ်သမုဒ္ဒရာကနေ မြောက်အတ္တလန္တိတ်ကို ဖြတ်ပြီး ဥရောပကို သွားမယ့်၊ ရုရှားရဲ့ NSR ရေကြောင်းလမ်းကို အစားထိုးနိုင်တဲ့ ဒီစီမံကိန်းဟာ အခုဆိုရင် စင်ပေါ်တင် ဘေးဖယ်ထားခံလိုက်ရပြီဖြစ်လို့ ရုရှားအတွက်တော့ သိသာထင်ရှားတဲ့ ယှဉ်ပြိုင်မှု အားသာချက်တွေ ရယူနိုင်ဖို့ အခွင့်အရေး အပြည့်အဝ ရသွားပြီလို့ ကိုဘာကော့ဗ်က ဆက်လက်ပြောကြားခဲ့ပါတယ်။