Amhara Education Bureau

ከ88 ሚሊየን ብር በላይ በሆነ ወጭ የተገነባው የአጆ ሜዳ አንደኛና መካከለኛ ደረጃ ትምህርት ቤት ተጠናቆ ርክክብ ተካሄደ ። በሰሜን ወሎ ዞን ሃብሩ ወረዳ በከተማና መሰረተ መሰረተልማት ሚኒስቴር የከተማ ልማታዊ ሴፍቲኔት ኘሮጀክት ከ88 ሚሊየን ብር በላይ በሆነ ወጭ የተገነባው የአጆ ሜዳ አንደኛና መካከለኛ ደረጃ ትምህርት ቤት ተጠናቆ የዞኑ የስራ ኀላፊዎች በተገኙበት ርክክብ ተካሂዷል። የሰሜን ወሎ ዞን ትምህርት መምሪያ ኀላፊ ሰጠ ታደሰ እንዳሉት፣ ትምህርት ቤቱ ሁለት መማሪያ ክፍሎችን ጨምሮ ዘጠኝ ብሎኮች አሉት ። በሁለት ፈረቃ እስከ አንድ ሺህ ተማሪዎችን ለማስተማር እንደሚያስችልም ገልፀዋል። ትምህርት ቤቱ በጃራ የስደተኞች ካምኘ ላሉ ታዳጊዎች መጋቢ ሆኖ ያገለግላልም ብለዋል። በርክክብ ሂደቱ ላይ የተገኙት የወልድያ ከተማ አስተዳደር ተቀዳሚ ምክትል ከንቲባ ዱባለ አብራሬ፣ የሰሜን ወሎ ዞንን የትምህርት ሽፋን ከፍ ለማድረግና የትምህርት ቤቶችን ደረጃ ለማሻሻል ቀደም ሲል ከተማ አስተዳደሩ በጉባላፍቶ ወረዳ ሁለት ትምህርት ቤቶችን ገንብቶ ለዞኑ አስተዳደር ማስረከቡን አስታውሰዋል። የአጆ ሜዳ አንደኛና መካከለኛ ደረጃ ትምህርት ቤት የተፈናቃይ ወገኖች መጋቢ በመሆኑ ከተማ አስተዳደሩ በግንባታው ሂደት የበኩሉን ድርሻ ተወጥቷልም ነው ያሉት። ህብረተሰቡ ትምህርት ቤቱን እንዲጠብቅና እንዲንከባከብም አሳስበዋል። የሰሜን ወሎ ዞን ምክትል አስተዳዳሪና ገበያ ልማት መምሪያ ኀላፊ ታምራት ንጋቱ በበኩላቸው፣ ትምህርት ቤቱ ደረጃውን ጠብቆ ተገንብቶ መረከባቸውን አውስተዋል። ለ2019 የትምህርት ዘመን ማስጀመሪያ በቂ ግበዓት መኖሩን ጠቅሰው፣ ተጨማሪ የትምህርት ቁሳቁስ ለማሟላት ከሚመለከታቸው አካላት ጋር ዞን አስተዳደሩ መክሮ የመማሪያ ወንበር፣ ጥቁር ሰሌዳ፣ የቤተሙከራ፣ የቤተመጻህፍትና የአይሲቲ ማዕከሉን ሙሉ ለማድረግ እንደሚሰራም አስረድተዋል። የአካባቢው ሀገር ሽማግሌ ሸህ ሀሰን ከረሙ የትምህርት ቤቱ መገንባት የአካባቢው ወጣቶች አመለካከት በመለወጥ የህገወጥ ስደት ሰለባ ከመሆን ይታደጋል ሲሉ አስተያየታቸውን ለአሚኮ ተሰጥተዋል። አሚኮ #ደሴ #አሚኮ #ዜና #ሰሜን_ወሎ #ትምህርት #ወልድያ

ዓባይ ባንክ በትምህርት ቁሳቁስ ችግር ምክንያት መማር ለሚቸገሩ ተማሪዎች 50 ሺህ የመማሪያ ደብተሮችን ድጋፍ አደረገ። ነሐሴ 21 ቀን 2018 ዓ.ም /ትምህርት ቢሮ/ ዓባይ ባንክ ማኅበራዊ ኃላፊነቱን ለመወጣት እና የትምህርት ዘርፉን ከማሳደግ አኳያ በኢኮኖሚ ጫና ምክንያት ለልጆቻቸው የትምህርት ቁሳቁስ ማሟላት ለማይችሉ ወላጆች እና ልጆች ከትምሕርት ገበታቸው እንዳይቀሩ የሚያግዝ የ50,000 ባለ50 ገጽ ደብተሮችን ለአማራ ክልል ትምህርት ቢሮ አስረክቧል፡፡ ድጋፉ በክልሉ በተለያየ ምክንያት ትምህርታቸውን መከታተል እየፈለጉ በቁሳቁስ ዕጥረት ለተቸገሩ ተማሪዎች በፍትሐዊነት ለሁሉም ዞኖችና ከተማ አስተዳደሮች የሚሰራጭ ነው። የትምሕርት ቁሳቁስ ድጋፉ በአማራ ክልል መማር እየፈለጉ በአቅም ማነስ እና በሌሎች ሰው ሰራሽ እና ተፈጥሯዊ ችግሮች ምክንያት እገዛ ማግኘት ላልቻሉ ተማሪዋች በባንኩ መለያ በልዩ ህትመት የተዘጋጁ ደብተሮች ናቸው። ርክክቡ ዛሬ ነሐሴ 21 ቀን 2018 ዓ.ም በባሕርዳር ከተማ ሲካሄድ የአማራ ክልል ትምህርት ቢሮ ምክትል ኃላፊ አቶ መኳንንት አደመ ባደረጉት ንግግር፣ “የክልሉን የትምሕርት ስትራቴጂ ከማሳካት አኳያ እንደ ዓባይ ባንክ ያሉ አጋሮች የተቀናጀ ኢንቨስትመንት ከማካሄድ ባሻገር የማኅበራዊ ልማት ላይ በንቃት መሳተፍ ድርሻው ከፍ ያለ ነው” ብለዋል። ሀገራዊ የትምህርት ዘርፋን ለማሳደግ እና የተማሪዎችን ውጤታማነት ከፍ ለማድረግ ከሚደረገው እንቅስቃሴ ጎን ለጎን እንደ ዓባይ ባንክ ያሉ ቀዳሚ የልማት እና የፋይናንስ አጋሮች የሚያደርጉት ድጋፍ ለሌሎችም ምሣሌ የሚሆን ነው ተብሏል። ኃላፊው በክልሉ የትምህርት ዘርፍ የመሠረተ-ልማት እና የግብዓት እጥረቶችን ለመፍታት በሚያደርገው ጥረት የፋይናንስ ተቋማት እገዛ ወሳኝ መሆኑን ገልፀው፣ የዓባይ ባንክ የመማሪያ ደብተር ድጋፍም በከልሉ የተማሪዎችን የማቋረጥ ምጣኔን ለመቀነስ ለሚደረገው ጥረት ትልቅ ዐቅም ይኖረዋል ብለዋል። ድጋፋ በትምህርት መማሪያ ቁሳቁስ እጥረት ወደ ትምህርት ገበታ መሄድ ያልቻሉ የክልሉ ተማሪዋችን ችግር ለመቅረፍ እና “በዚህ ችግር ወደ ትምህርት ገበታቸው ያልመጡ ተማሪዋችን ተስፋ የሚያለመልም ነው” በማለት ምስጋናቸውን ለባንኩ አቅርበዋል፡፡ የዓባይ ባንክ ስትራቴጂ ዋና መኮንን አቶ ወንድይፍራው ታደሰ ባንኩ የማኅበራዊ ልማት ዘርፉን ከማሳደግ አኳያ እያከናወነ ያለውን ድጋፍ አስመልክተው መልዕክት አስተላልፈዋል። ዓባይ ባንክ “በእያንዳንዱ የማኅበረሰብ ጎጆ ገብቶ ቀዳሚ የፋይናንስ አጋር የመሆን ፍኖት እና በቀጣዩ ትውልድ የትምህርት ሥርዓት ውስጥ ዕውቀት-መር የኢንቨስትመንት አስተሳሰብ መገንባት” እየተተገበረ ያለ አቅጣጫ መሆኑን አሳውቀዋል። ባንኩ በተለያዩ ዘርፍች ማኅበረሰቡን የሚጠቅሙ እና የማህበራዊ ኃለፊነት የመወጣት ዕቅዱ አካል የሆኑ ድጋፎችን በተለያዩ የኢትዮጵያ ክፍሎች ለሚገኙ ተቋማት እና ዜጎች ሲያደርግ መቆየቱንም አውስተዋል። ዓባይ ባንክ በፋይናንሱ ዘርፍ ለብዙዎች የታላቅነት ምንጭ ከመሆን ባሻገር የኮርፖሬት ማኅበራዊ ኃላፊነትን እንደ ቁልፍ ስትራቴጂያዊ የማኅበረሰብ አጋርነት እና ተቋማዊ ትሥሥር ዓላማ የሚያውል መሆኑን አስረድተዋል፡፡ ዓባይ ባንክ አሁን ላይ ካደረገው የትምህርት ግብዓት ድጋፍ ባሻገር በጥቅል የኢኮኖሚ ዕድገት ላይ ከ4.8 ሚሊዮን በላይ ለሚሆኑ ደንበኞቹ ሰፊ የዲጂታል የባንክ አገልግሎቶች በማቅረብ ግንባር ቀደም የፋይናንስ አጋር በመሆን እየሠራ መሆኑ ተጠቅሷል። ከአማራ ብሔራዊ ክልላዊ መንግስት ትምህርት ቢሮ ተጨማሪ መረጃዎችን ለማግኘት የሚከተሉትን አማራጮች ይጠቀሙ 1. በዌብ ሳይት ገጻችን http://www.anrseb.gov.et/ 2. በዩቱብ ቻናላችን https://www.youtube.com/channel/UCARNQWN5bm5z2JmKsC_Cn8w 3. በፌስ ቡክ ገጻችን https://www.facebook.com/Amhara-Education-Bureau 4. በቴሌግራም ቻናላችን t.me/anrse ያግኙን             ‎ ‎

ከ54 ሺህ በላይ ተማሪዎችን ወደ ትምህርት ቤት የመለሰው የበጎ ፈቃድ ሥራ። በደቡብ ጎንደር ዞን በተካሄደው የክረምት በጎ ፈቃድ አገልግሎት ከ51 ሺህ በላይ ዜጎች በማዕድ ማጋራት ተጠቃሚ ኾነዋል። "ለአንድ ተማሪ አንድ ደርዘን ደብተር" በሚል መሪ መልዕክትም ከ54 ሺህ በላይ ተማሪዎች የትምህርት ቁሳቁስ ድጋፍ ተደርጎላቸዋል። የደቡብ ጎንደር ዞን ሴቶች፣ ወጣቶች እና ማኅበራዊ ጉዳይ መምሪያ ኀላፊ አንጓች ፋሲካው እንደገለጹት ይህ ስኬት በዞኑ በሚገኙ መምሪያዎች እና ተጠሪ ጽሕፈት ቤቶች የጋራ ርብርብ የተገኘ ነው። የበጎ ፈቃድ ሥራው ተጠናክሮ ይቀጥላል ብለዋል። የደቡብ ጎንደር ዞን ብልጽግና ፓርቲ ቅርንጫፍ ጽሕፈት ቤት ኀላፊ መንበር ክፈተው ድጋፍ ለሚሹ ዜጎች ቀድሞ መድረስ ለትውልድ የሚተርፍ ተግባር መኾኑን ጠቅሰዋል። የማኅበራዊ አገልግሎት ሥራዎችም በደም ልገሳ እና በቤት እድሳት ተጠናክረው እንደሚቀጥሉ ነው የጠቆሙት። በተደረገው ድጋፍ ከተጠቀሙ ወገኖች መካከል የሦሥት ልጆች እናት ወይዘሮ ደማም ተሾመ የተደረገላቸው የትምህርት ቁሳቁስ ድጋፍ ልጆቻቸውን ከጎዳና ሕይወት ታድጎ በነጻነት እንዲማሩ ማድረጉን ገልጸዋል። የ7ኛ ክፍል ተማሪዋ ዳሳሽ ምሥጋናው የተደረገላት ድጋፍ ከጓደኞቿ ጋር እኩል እንድትሰለፍ የሞራል ስንቅ እንደኾናት እና ጠንክራ በመማር ዶክተር የመኾን ራዕይ እንድትሰንቅ እንዳስቻላት ተናግራለች። ነሐሴ 18/2018 አሚኮ

"እድሜያቸው ለትምህርት የደረሱ ህጻናት ወደ ትምህርት ቤት እንዲመጡ ሁሉም የድርሻውን ሊወጣ ይገባል" አቶ ጥላሁን ወርቅነህ የአማራ ክልል ትምህርት ቢሮ ኃላፊ

የዋግ ኽምራ ብሄረሰብ አስተዳደር ትምህርት መምሪያ የ2019 ዓ.ም የትምህርት ዘመን እቅድ ትውውቅ መድረክ እያካሄደ ነው የዋግ ኽምራ ብሄረሰብ አስተዳደር ትምህርት መምሪያ የ2018 ዓ.ም የትምህርት ዘመን አፈጻጸምን ለመገምገምና የ2019 ዓ.ም. የትምህርት ዘመን ዕቅድን ለማስተዋወቅ ከተለያዩ ባለድርሻ አካላት ጋር በሰቆጣ ከተማ ውይይት እያካሄደ ነው። በመድረኩ የአለፈው የትምህርት ዘመን አፈጻጸም፣ የ2019 ዓ.ም. የተማሪዎች ምዝገባ ሁኔታ እና በቀጣዩ የትምህርት ዘመን ትምህርትን በተሻለ ሁኔታ ለማስፋፋት የሚያስፈልጉ ተግባራት በዝርዝር እንደሚመከር ተመላክቷል። የትምህርት መምሪያው ኃላፊ አቶ ሰይፉ ሞገስ፣ ለ2019 ዓ.ም. አዲሱ የትምህርት ዘመን ተማሪዎች ምዝገባን በተሳካ ሁኔታ ማከናወንና ተማሪዎች በወቅቱ ወደ ትምህርት ገበታ እንዲመዘገቡ ማድረግ ትኩረት የሚሻ ተግባር መሆኑን ገልጸዋል። በተያያዘም የዋግ ኽምራ ብሔረሰብ አስተዳደር ምክትል አስተዳዳሪና የኢንዱስትሪና ኢንቨስትመንት መምሪያ ሀላፊ አቶ ሹመት ጥላሁን በፕሮግራሙ ማስጀመሪያ እንደተናገሩት የትውልድ ግንባታ ላይ የትምህርት ሚና የላቀ መሆኑን ገልፀዋል። በመድረኩ በአለፈው ዓመት የተከናወኑ ስራዎችን በመገምገም ለቀጣይ ስራዎች ስኬታማነት መሠረት የሚጥልበት መሆኑን አክለዋል። በተለይም ባለፈው የበጀት ዓመት የታዩ ጥንካሬዎችን ማስቀጠል፣ የትምህርት ተደራሽነትን ማረጋገጥና ወደ 2019 ዓ.ም. ሊሸጋገሩ የማይገባቸውን እጥረቶች ከወዲሁ ማረም እንደሚገባ ባለድርሻ አካላት በትኩርት እንዲወያዩ አፅንኦት ሰጥተዋል። በተማሪዎች ምዝገባ ረገድም መሻሻል የሚያስፈልጋቸው ሁኔታዎች መኖራቸው አቶ ሹመት ተናግረዋል። በአለፈው አመት ከመማር ዕድሜያቸው ደርሰው መመዝገብ ከነበረባቸው ከ1ኛ እስከ 8ኛ ክፍል ተማሪዎች 14 በመቶ ያህሉ አለመመዝገባቸው ጠቁመዋል፡፡ ከ9ኛ እስከ12ኛ ክፍል ተማሪዎች አኳያም በትምህርት ገበታ መግባትና መመዝገብ ጋር ተያይዞ 54 በመቶ የሚሆኑት ከትምህርት ገበታ ውጭ እንደነበሩ አቶ ሹመት አስረድተዋል። በዋግ ኽምራ ብሄረሰብ አስተዳደር ትምህርት መምሪያ የእቅድና በጀት ዝግጅት ቡድን መሪ በዲያቆን ስዩም አጠቃላይ ሪፖርት እየቀረበ ይገኛል። ነሐሴ 18/2018 መረጃው የዋግ-ኽምራ ኮሙኒኬሽን ነው

በ12ኛ ክፍል የዩኒቨርስቲ መግቢያ ፈተና የአማራ ክልል ከክልሎች መካከል ቀዳሚ መሆኑ ተገለፀ። ።።።።።።።።።።።።።።።።።።።። ነሐሴ 16/2018(ትምህርት ቢሮ)በ2018 የትምህርት ዘመን የ12ኛ ክፍል አገር አቀፍ ፈተና ከወሰዱ ተማሪዎች መካከል 70ሺህ 544 ተማሪዎች የዩኒቨርስቲ መግቢያ ውጤት ማስመዝገባቸውን የትምህርት ሚኒስቴሩ የተከበሩ ፕሮፌሰር ብርሐኑ ነጋ ዛሬ ለጋዜጠኞች በሰጡት መግለጫ አብራርተዋል። አዲስ አበባ 32.3 በመቶ በማሳለፍ የተሻለ መሆኑን የገለፁት ሚኒስተሩ የአማራ ክልል ደግሞ ከድሬድዋ ቀጥሎ 15.56 በማሳለፍ ከክልሎች ቀዳሚ መሆኑን ገልፀዋል። በክልሉ የተመዘገበው ውጤትም ከአገራዊ አማካይ በላይ መሆኑን ተገልጿል። የአማራ ክልል ትምህርት ቢሮም ለተመዘገበው ውጤት ለክልሉ የትምህርት ባለድርሻ አካላት በሙሉ የእንኳን ደስ አላችሁ መልዕክት አስተላልፏል። ይህ ውጤት የተመዘገበው ባለፉት ሁለትና ሶስት አመታት የክልሉ ትምህርት በፈተና ውስጥ ሆኖ የተመዘገበ በመሆኑ ለቀጣይ የትምህርት ስራ ትልቅ መነቃቃት እንደሚፈጥር ነው የተገለፀው። ያም ሆኖ የተመዘገበው ውጤት የክልሉ ትምህርት በብዙ ፈተናዎች ውስጥ ሆኖ የተመዘገበ በመሆኑ ለመላው የክልላችን ማህበረሰብ በሙሉ እንኳን ደስ አላችሁ ማለት እንወዳለን። የክልላችን ሰላም ቢረጋገጥና ሙሉ ትምህርትቤቶቻችን ተከፍተው ተማሪዎችን ማስተማር ብንችል ከዚህ የላቀ ውጤት ማምጣት እንደምንችል ትልቅ ማሳያ ነው። ይህ ውጤት ለቀጣይ 2019 የትምህርት ዘመን መስፈንጠሪያ በመውሰድ ሁሉም ትምህርት ቤቶቻችን ተከፍ።ው ሁሉም ዕድሜያቸው ለትምህርት የደረሱ ነባርና አዲስ ተማሪዎች ወደ ትምህርት ቤት እንዲመለሱ ማህበረሰባችን ርብርብ እንዲያደርግ ጥሪያችንን እናስተላልፋለን። ይህ ውጤት እንዲመዘገብ ሌት ተቀን የሰራችሁ መምህራን፣ የትምህርት አመራሮች፣ በፈተና ሳትበገሩ ዓላማችሁን ለማሳካት የተጋችሁ እንቁ ተማሪዎቻችን፣ የተማሪ ወላጆች፣ ፈተና የማይበግረው የትምህርት ስርዓት ለመገንባት ሌት ተቀን እየደገፋችሁን ያላችሁ ከፍተኛ የክልላችን አመራሮች ለተመዘገበው ውጤት በድጋሜ እንኳን ደስ አላችሁ። የአማራ ክልል ትምህርት በፈተናዎች ውስጥ እያለፈ ቢሆንም ፈተናዎችን ተቋቁሞ ውጤት ከማስመዝገብ የሚያቆመው መሰናክል እንደሌለ የተመዘገበው ውጤት ማሳያ ነው። ከተባበርን፣ ከተደጋገፍን፣ የትምህርት ፋይዳ ከተረዳንና፣ ትምህርት የትውልድ መቅረጫ ቁልፍ መሳሪያ መሆኑን ከተረዳን የማናስመዘግበው ውጤት፣ የማናልፈው ፈተና አይኖርም። በውጤት ደረጃም 583 ውጤት በማምጣት በአማራ ክልል ሁለተኛው ከፍተኛ ውጤት ሆኖ ተመዝግቧል። ፈተናውን ከወሰዱ ሴት ተፈታኞች መካከል 583 ውጤት በማስመዝገብ የክልላችን ተማሪ ህዳሴ ዘመኑ ከአገው ምድር ሁለተኛ ደረጃ ትምህርት ቤት በአገር አቀፍ ደረጃ ከሴቶች ከፍተኛ ውጤት አስመዝግባለች። ይህም በትምህርት ፍትሐዊነት፣ ጥራት ላይ እያደረግነው ላለው ሁለንተናዊ ስራ ማሳያ ነው። ሌላው በክልላችን ካስፈተኑ ትምህርት ቤቶች መካከል ስምንት ትምህርት ቤቶች ሙሉ ለሙሉ ተማሪዎቻቸውን አሳልፈዋል። የእነዚህን ትምህርት ቤቶች ቁጥር ለማሳደግ በቀጣይ ተግተን እንሰራለን። 12ኛ ክፍል ሀገር አቀፍ ፈተና የወሰዱ ተማሪዎች ውጤታቸውን ከቀጣይ ሰኞ ጀምሮ ማወቅ እንደሚችሉ የትምህርት ሚኒስቴር አስታውቋል። #AmharaEducationBureau #AmharaEducation #ትምህርትለትውልድ#በጎነትለኢትዮጵያከፍታ#አንድደርዘንደብተርለአንድተማሪ ከአማራ ብሔራዊ ክልላዊ መንግስት ትምህርት ቢሮ ተጨማሪ መረጃዎችን ለማግኘት የሚከተሉትን አማራጮች ይጠቀሙ 📌 በዌብ ሳይት ገጻችን http://www.anrseb.gov.et/ 📌 በዩቱብ ቻናላችን https://www.youtube.com/channel/UCARNQWN5bm5z2JmKsC_Cn8w 📌 በፌስ ቡክ ገጻችን https://www.facebook.com/Amhara-Education-Bureau 📌 በቴሌግራም ቻናላችን t.me/anrse ያግኙን 📌 በቲክቶክ ገፃችን @amharaeducation bureau 📌 X ገፃችን@amharaeducationbureau

ማስታወቂያ ለፌዴራል ልዩ አዳሪ ሁለተኛ ደረጃ ትምህርት ቤቶች የተማሪዎች ተቀብሎ ለማስተማር የምዝገባ ማስታወቂያ ማውጣታችን ይታወሳል። ሆኖም አንዳንድ ክልሎች ዘግይተው የ8ኛ ክፍል ክልላዊ ፈተና ውጤት በመልቀቃቸውና በኢንተርኔት ምክንያት ያልተመዘገቡ ተማሪዎች በመኖራቸው ምዝገባው እስከ ነሃሴ 20/2018 ደረስ የተራዘመ መሆኑን እንገልጻለን። የመመዝገቢያ መስፈርቶች ✍️ ለ9ኛ ክፍል ተመዝጋቢዎች 👉 የ8ኛ ክፍል ክልላዊ ፈተና 80 በመቶ እና በላይ አማካኝ ውጤት ያለው/ያላት እንዲሁም በእንግሊዝኛና በሂሳብ ትምህርቶች 80 እና በላይ ያመጣ/ያመጣች ። 👉 ጥሩ ስነ -ምግባር ያለው/ያላት ✍️ ለ10ኛ ክፍል ተመዝጋቢዎች 👉 በ2017 የትምህርት ዘመን በ8ኛ ክፍል ክልላዊ ፈተና 70 እና በላይ አማካኝ ውጤት ያመጣ/ያመጣች 👉 በ9ኛ ክፍል ትራንስክሪብት 85 በመቶና በላይ አማካኝ ውጤት ያመጣ/ያመጣች እንዲሁም በእንግሊዝኛ እና ሂሳብ ትምህርት ዓይነቶች 80 በመቶና በላይ ያመጣ/ያመጣች፤ መሆኑን በድጋሚ እያስታወስን በዚህ ሊንክ https://sbs.moe.gov.et/apply በመግባት መመዝገብ የምትችሉ መሆኑን እናሳውቃለን። MOE

በዞኑ በ2019 የትምህርት ዘመን ከ820 ሽህ በላይ ተማሪዎችን መዝግቦ ለማስተማር እየተሰራ ነው። * በ2019 የትምህርት ዘመን ከ820 ሽህ በላይ ተማሪዎችን መዝግቦ ለማስተማር ታቅዶ እየተሰራ መሆኑን የምስራቅ ጎጃም ዞን ትምህርት መምሪያ ገለፀ። መምሪያው የ2019 የትምህርት ዘመን የንቅናቄ መድረክ እያካሄደ ነው። የመምሪያው ኀላፊ አቶ ጌታሁን ፈንቴ እንደገለፁት በመጭው 2019 የትምህርት ዘመን 118 ሽህ 741 የቅድመ መደበኛ 655 ሽህ 910 ፣ የአንደኛና መካከለኛ 45 ሽህ 954 በአጠቃላይ በዞኑ በሁሉም የትምህርት ደረጃዎች 820 ሽህ 260 ተማሪዎችን መዝግቦ ለማስተማር እየተሰራ መሆኑን ተናግረዋል። መምሪያ ኀላፊው የ2019 የትምህርት ዘመንን ውጤታማ ለማደረግ ለመምህራን እና ለትምህርት ባለሙያዎች የአቅም ግንባታ ስራ ፣ የትምህረት ተቋማትን ለመማር ማስተማር ስራውን ምቹ የማድረግና የትምህርት ግብዓት የማሟላት ስራ በትኩረት እየተሰራ መሆኑን ገልፀዋል። የትምህርት ዘርፉን ውጤታማ በማድረግ ባለፉት ዓመታት በነበረው የፀጥታ ችግር በዘርፉ የባከነውን ስራ ለማካካስ በቅንጅት እንደሚሰራ አቶ ጌታሁን አስረድተዋል። የምስራቅ ጎጃም ዞን ምክትል አስተዳዳሪ አቶ ዋለ አባተ በበኩላቸው ባጋጠመው የፀጥታ ችግር ባለፉት ተከታታይ ሶስት ዓመታት ህፃናት ከትምህርት ገበታ ውጭ መሆናቸውን እና በበርካታ የትምህርት ተቋማት ላይ ጉዳት እንደደረሰባቸው ገልፀው ከትምህርት ገበታ ውጭ የሆኑ ተማሪዎችን ወደ ትምህርት ገበታ ለመመለስ እና ጉዳት የደረሰባቸው የትምህርት ተቆማትን መጠገን የሁሉንም ተሳትፎና ርብርብ የሚጠይቅ በመሆኑ ሁሉም የበኩሉን ድርሻ እንዲወጣ አሳስበዋል። በዘርፉ ከገጠመን ችግር በአጭር ጊዜ በመውጣት የትውልድ ግንባታ ስራውን ውጤታማ ማድረግ ይገባል ያሉት ምክትል አስተዳዳሪው ማህበረሰቡ የበኩሉን ድርሻ ሊወጣ እንደሚገባ መልዕክት አስተላልፈዋል። በብልጽግና ፓርቲ የምስራቅ ጎጃም ዞን ቅርንጫፍ ጽ/ቤት ኀላፊ አቶ ተስፋየ በላይ በበኩላቸው በትምህርት ዘርፉ የሚስተዋሉ ችግሮችን በጥልቀት በመለየት እና የርብርብ ማዕከል በማድረግ በ2019 የትምህርት ዘመን ህፃናት ወደ ትምርት ቤት እንዲመለሱ ማድረግ እንደሚገባ ጨምረው ተናግረዋል። ህፃናት ወደ ትምህርት ገባታ እንዲመለሡ ለማድረግ የሁንም ተሳትፎ ተሳትፎና ርብርብ እንደሚጠይቅ አቶ ተስፋየ አሳስበዋል። ነሐሴ 15/2018 መረጃው የምስራቅ ጎጃም ዞን የመንግስት ኮሙዩኒኬሽን መምሪያ ነው #Amhara Education Bureau #ትምህርት ለትውልድ

የአማራ ክልል ትምህርት ቢሮ በ2018 የትምህርት ዘመን የላቀ አፈፃፀም ላስመዘገቡ የዞንና ከተማ አስተዳደሮች ትምህርት መምሪያዎች እውቅና ሰጠ ***** ነሃሴ 11/2018 ዓ.ም (ትምህርት ቢሮ)፦ የአማራ ክልል ትምህርት ቢሮ ሲያካሂድ የሰነበተውን የ2018 የትምህርት ዘመን እቅድ አፈጻጸም ግምገማና የ2019 ዓ.ም የእቅድ ትውውቅ መድረክ ዛሬ አጠናቋል፡፡ በግምገማ መድረኩ ተገኝተው የማጠቃለያ ሀሳብ የሰጡት የአብክመ ትምህርት ቢሮ ም/ኃላፊ ወ/ሮ እየሩስ መንግስቱ እንደገለፁት በበጀት አመቱ በርካታ ስኬቶች መመዝገባቸውን አውስተዋል። በ6ኛ እና 8ኛ ክፍል ክልል አቀፍ ፈተና የተመዘገበው ውጤት ካለፉት ሁለት አመታት ከተመዘገበው ውጤት አኳያ የተሻለ እንደሆነ ገልፀዋል። በመድረኩ ተገኝተው የማጠቃለያ ሀሳብና የትምህርት ማህበረሰቡ የጋራ ርብርብ የሚጠይቁ ጉዳዮች አጽንኦት ሰጥተው የገለፁት የአማራ ክልል ትምህርት ቢሮ ኃላፊ አቶ ጥላሁን ወርቅነህ በትምህርት ዘርፉ እየተመዘገቡ ያሉ ውጤቶች የትምህርት አመራሩና ማህበረሰቡ የጋራ ጥረት ውጤቶች ናቸው ብለዋል። በ2018 የትምህርት ዘመን በ6ኛ እና 8ኛ ክፍል ክልላዊ ፈተና የተመዘገበው ውጤት፣ በክልሉ መንግስት በጀት እየተገነቡ ያሉ አዳሪ ትምህርት ቤቶችን ግንባታ ለማጠናቀቅ እየተደረገ ያለው ጥረት፣ የ2ኛ ደረጃ ትምህርት ቤቶችን የኮምፒውተር እጥረት ለመፍታት የተደረገውን ጥረት፣ የተማሪ ምገባ ስራዎች፣ ቅድመ አንደኛ ደረጃ ትምህርት ቤቶችን ለማስፋፋትና ራስ ማስቻል የተሰሩ ስራዎች፣ በፌደራል ትምህርት ሚኒስቴር የሚገነቡ ሞዴል 2ኛ ደረጃ ትምህርት ቤቶች አበረታች ናቸው ብለዋል። ሆኖም ግን ሁሉም ዞኖች፣ ከተማ አስተዳደሮች፣ ወረዳዎች በሁሉም የትምህርት ስራዎች ወደ ተቀራራቢ አቅም እንዲመጡ ብዙ መስራት ይጠይቃል ብለዋል። በትምህርት ዘመኑ ሁሉም ተማሪዎች ወደ ትምህርት ቤት እንዲመዘገቡ የሁሉም የትምህርት ባለድርሻ አካላት ርብርብ እንደሚያስፈልግ ተናግረዋል፡፡ የቀጣይ ዓመት የትምህርት ምዘገባ ነሃሴ 18/2018 ዓ.ም እንደሚጀመር ያስታወሱት ቢሮ ኃላፊው በምዝገባ ሂደቱ ሁሉም አካላት ርብርብ እንዲያደርግ ጥሪ አቅርበዋል፡፡ በውይይት መድረኩ ማጠቃለያ በትምህርት ዘመኑ በአጠቃላይ አፈጻጸም የተሻለ ውጤት ያስመዘገቡ ሶስት ከተማ አስተዳደሮች እና ሶስት ዞን ትምህርት መምሪያዎች የኮምፒውተር፣ፕሪንተርና የእውቅና ሰርተፍኬት ተበርክቶላቸዋል። ከከተማ አስተዳደር ትምህርት መምሪያዎች ባህርዳር ፣ደሴ እና ደብረብርሃን ከተማ አስተዳደሮች በቅደም ተከተል ከ1ኛ እስከ 3ኛ ደረጃ በመያዝ እውቅና ያገኙ ሲሆን በተመሳሳይ በዞን ደረጃ ደቡብ ወሎ፣ ሰሜን ሸዋና ማዕከላዊ ጎንደር ዞኖች በቅደም ተከተል ከአንደኛ እስከ ሶስተኛ ደረጃ በመውጣት የተዘጋጀላቸውን ሽልማትና እውቅና ከክልሉ ትምህርት ቢሮ ኃላፊ ተረክበዋል፡፡ በ2019 የትምህርት ዘመን ከ7.6 ሚሊየን በላይ ተማሪዎችን ለመመዝገብ መታቀዱን የተገለፀ ሲሆን በተለያዩ ምክንያቶች ከትምህርት ገበታ ውጭ ሆነው የቆዩ ተማሪዎችን ጨምሮ ሁሉም ነባርና አዲስ ተማሪዎች በወቅቱ እንዲመዘገቡ ለማድረግ በቅንጅት መስራት እንደሚገባ በውይይቱ ስምምነት ተደርሷል፡፡ #AmharaEducation #ትምህርትለትውልድ#በጎነትለኢትዮጵያከፍታ#አንድደርዘንደብተርለአንድተማሪ ከአማራ ብሔራዊ ክልላዊ መንግስት ትምህርት ቢሮ ተጨማሪ መረጃዎችን ለማግኘት የሚከተሉትን አማራጮች ይጠቀሙ 📌 በዌብ ሳይት ገጻችን http://www.anrseb.gov.et/ 📌 በዩቱብ ቻናላችን https://www.youtube.com/channel/UCARNQWN5bm5z2JmKsC_Cn8w 📌 በፌስ ቡክ ገጻችን https://www.facebook.com/Amhara-Education-Bureau 📌 በቴሌግራም ቻናላችን t.me/anrse ያግኙን 📌 በቲክቶክ ገፃችን @amharaeducation bureau 📌 X ገፃችን@amharaeducationbureau