የጽርሐ ጽዮን ሐዋርያት ጎላ ቅዱስ ሚካኤል የፍኖተ ብርሃን ሰ/ት/ቤት (Official Channel)

#ጼዴንያ_ማርያም ከሀገረ ደማስቆ በጼዴንያ ክፍል በመሪና ማርታ የምትባል ደግ ሴት ነበረች። አባ ቴዎድሮስ የሚባል ኢትዮጵያዊ መነኮስ ወደ ኢየሩሳሌም ሲሄድ መሽቶበት ከቤቷ በእንግድነት አድሮ ጧት ሊሄድ ሲነሳ ወደ ኢየሩሳሌም መሄዱን አውቃ የእመቤቴን ስዕል ገዝተህ አምጣልኝ ዋጋውን ልስጥህ አለችው። ገንዘቡንስ ሳመጣልሽ ትሰጪኛለሽ ብሏት ሄደ። ቅዱሳት መካናትን እጅ ነስቶ ስዕሉን ዘንግቶ ሳይገዛ ሲመለስ፤ "ለምንት ረሳዕከ ዘትብለከ ዛቲ ብእሲት" አደራ ጥብቅ አይደለምን? ያች ሴት አደራ ያለችህን ለምን ረሳህ የሚል ድምጽ ሰማ። ተመልሶ ሄዶ ገዝቶ በረሃ በረሃውን ሲሄድ አንበሳ መጣበት። ፈርቶ ሲጨነቅ ከስዕሉ ድምጽ ተሰምቶ አንበሳው ደንግጦ ሸሸ። ሁለተኛ፤ ሁለት ሽፍቶች አግኝተውት ሲፈራ እንደቀደመው ዓይነት ድምጽ ከስዕሉ ተሰማ። ምን መጣብን ብለው ሸሽተዋል። እሱም ይህን አይቶ #መድኃኒቴን_አሳልፌ_አልሰጥም ብሎ ወደ ሀገሩ ይዞ ሊሄድ በመርከብ ተሳፈረ። ጽኑ ማዕበል ተነሥቶ መርከቡን እየገፋ ደማስቆ ዳርቻ አደረሳቸው። ሌላ መጠጊያ የለውምና ልብሱን ቀይሮ ድምፁን ለውጦ ከቤቷ ገብቶ አደረ። ሲነጋ ወጥቶ ሊሄድ ከበራፉ ሲደርስ ደጃፏ ጠፍቶት "ወወዓለ እንዘ ያርመስምስ" ይላል ከቅጽሩ ሲታገል ዋለ። ማርታ አባቴ ያመመህ የደከመህ ትመስላለህ ዛሬን ደግሞ በዚህ አድርህ ነገ ትሄዳለህ አለችው፤ አደረ። በሁለተኛውም ዕለት እንዲሁ ሆነ፤ በሦስተኛው ቀን አባቴ እንዲህ ስትሆን ዛሬ ሦስተኛ ቀን ነው፤ የሆንከው ምንድር ነው ? አለችው። መድኃኒቴን አሳልፌ አልሰጥም ብዬ እንጂ ስዕል ግዛልኝ ያልሽን መነኮስ ነኝ ብሎ አውጥቶ ሰጣት። ደስ አላት። ተቀብላ በክብር አስቀመጠችው። በመዓልትም በሌሊትም መብራት ታበራለታለች። ይህችም ስዕል ወንጌላዊው ሉቃስ የሳላት ናት። "ወይእቲ ስዕል ትመስል ልብስተ ሥጋ ወያንጸፈጽፍ ሐፍ እምኔሃ" ይላል፤ ሥጋ የለበሰች ከፊቷም ወዝ የሚያንጸፋጸፍ ትመስል ነበረ። አባ ቴዎድሮስም ስዕሏን እያገለገለ ከእሷ ጋር ኑሯል። ከዚህ በኋላ ብዙ ተአምራት አድርጋለች፤ ሕሙም ፈውሳለች፤ ዕውር አብርታለች። በዘመኑ የነበረ ሊቀ ጳጳስ ዜናዋን ሰምቶ አመጣታለሁ ቢል የማይሆንለት ሆነ፤ ከዚያው ስዕል ቤት ሠርቶላት ካህናት መድቦላት ስዕሏ ወደ ማርታ ቤት የገባችበትን ዕለት መስከረም 10 ቀን እንዲከበር ሥርዓት ሠርቶላት ተመልሷል። #ከእመቤታችን_ወላዲተ_አምላክ_ረድኤትና_በረከት_ያሳትፈን! ምንጭ ፦ መጽሐፈ ስንክሳር፣ ተአምረ ማርያም፣ መዝገበ ታሪክ ይህ በጽ/ጽ/ሐ/ጎ/ቅ/ሚካኤል ቤ/ክ ፍ/ብ/ሰ/ት/ቤት እውቅና የተከፈቱ የማሕበራዊ ሚዲያ ገጾቻችን ናቸው። ቤተሰብ በመሆንና ለሌሎች በማጋራት አብረውን ያገልግሉ። የቴሌግራም ቻናል https://t.me/finotebirhan12 የዩቲዩብ ቻናላችን https://youtube.com/@finotebirhan12 የቲክቶክ አካውንታችን https://www.tiktok.com/@finotebirhan?_t=8i8eHwFI3Es&_r=1 የፌስቡክ ገጻችን https://www.facebook.com/Fbirhan?mibextid=2JQ9oc