በአዲስ አበባ ከተማ አስተዳደር የከተማ ውበትና አረንጓዴ ልማት ቢሮ

አረንጓዴ አሻራ የ7 ዓመታት ጉዞ *** ✅ ጠቅላላ የተተከሉ ችግኞች ➡ ከ48 ቢሊዮን በላይ ✅ የችግኞች የመጽደቅ ምጣኔ ➡ 84% (ከ40 ቢሊዮን በላይ የጸደቁ) ✅ የሀገራችን የደን ሽፋን ➡ ከነበረበት 3% ተነሥቶ ወደ 23.6% ደርሷል ✅ ያገገመ የተራቆተ መሬት ➡ ከ10 ሚሊዮን ሔክታር በላይ ✅ የተፈጠረ ጠቅላላ የሥራ ዕድል ➡ ከ1.2 ሚሊዮን በላይ ዜጎች

የአረንጓዴ ዐሻራ መርሃ ግብር ወቅት ላይ እንገኛለን። ከስምንት ቢሊዮን በላይ ችግኞች ለተከላ ዝግጁ በሆኑበት በዚህ ወቅት፣ አረንጓዴ ለሆነች ነገ፣ ሁላችንም ተስፋን እንትከል! ጠቅላይ ሚኒስትር ዐቢይ አሕመድ (ዶ/ር)

#የመዲናዋ የአረንጓዴ ልማት ከታሪካዊና ባህላዊ ሀዉልቶቿ ጋር ተደምረዉ ለከተማዋ ድምቀት ሰጥቷታል፡፡ በአዲስ አበባ ከተማ የተገነቡ ታሪካዊና ባህላዊ ሀውልቶች ለከተማዋ የውበት፣ የታሪክና የቱሪስት መስህብነት እሴት እጅግ ከፍተኛ ፋይዳ አላቸው። እነዚህ ሀውልቶች የከተማዋን የስነ-ህንጻ ውበት ከማሳደግ ባለፈ የሀገሪቱን ማንነት፣ ጀግንነትና የኪነ-ጥበብ ጥልቅ ምስጢር ለዓለም ህዝብ በጉልህ የሚያሳዩ ህያው ምስክሮች ናቸው። በዚህ ላይ ሀዉልቶቹ የቆሙበት አካባቢዎች በአረንጓዴ መሰረተ ልማቶች እያሸበረቁ መምጣታቸዉ ከተማዋ ይበልጥ ደምቃ እንድትታይ የራሳቸዉን ሚና በመጫወት ላይ ይገኛሉ፡፡ የከተማዋን ስነ-ውበት (Aesthetics) ማበልጸግ ሀውልቶች የአንድን ከተማ አሰልቺና ተመሳሳይነት ያላቸውን ህንጻዎችና መንገዶች እይታ በመስበር ለዓይን ማራኪ የሆነ የከተማ ውበትን ይፈጥራሉ። በአደባባዮችና በዋና ዋና የትራፊክ መጋጠሚያዎች ላይ የሚቆሙት ቅርሶች ለከተማዋ ልዩ የንድፍ (Design) መዋቅር ይሰጧታል። እነዚህ የጥበብ ስራዎች ከአካባቢያቸው አረንጓዴ ልማትና ዘመናዊ መንገዶች ጋር ተዋህደው ሲታዩ ለአዲስ አበባ ልዩና ውብ እይታን ያጎናጽፏታል። ታሪክንና ባህልን በኪነ-ጥበብ የመግለጽ ፋይዳ ሀውልቶች ዝምተኛ ነገር ግን ተናጋሪ የከተማዋ ጌጦች ናቸው። ከተማዋን ውብ ከሚያደርጓት ነገሮች አንዱ ታሪኳን በአደባባይ መግለጧ ሲሆን፣ እንደ ሰማዕታት ሀዉልት (ስድስት ኪሎ) እና ሚያዝያ 27 የድል ሀውልት (አራት ኪሎ) ያሉ የኪነ-ጥበብ ስራዎች የሀገሪቱን ነፃነትና መስዋዕትነት በግልጽ ያሳያሉ። በቅርቡ ደግሞ ታድሰዉ በመሰራታቸው መዲናዋ የኪነ-ጥበብና የባህል ማዕከል መሆኗን በማሳየት ረገድ የራሳቸውን ውበት ጨምረዋል። ለቱሪዝም መስህብነትና ለከተማዋ ገፅታ ያላቸው ሚና አንድን ከተማ ለጎብኚዎች ማራኪ ከሚያደርጉ ዋና ዋና መዳረሻዎች መካከል በዋና ዋና መንገዶችና ፓርኮች ውስጥ የሚገኙ ሀውልቶች ቀዳሚውን ስፍራ ይይዛሉ። ወደ አዲስ አበባ የሚመጡ የውጭ ሀገር ቱሪስቶችም ሆኑ የአገር ውስጥ ጎብኚዎች እነዚህን መዋቅሮች በመጎብኘት ፎቶግራፎችን ይነሳሉ፤ ይህም ከተማዋ በቱሪዝም ዘርፍ ያላትን ውበትና ገጽታ በከፍተኛ ደረጃ ያሳድጋል። ሀውልቶቹ ከዘመናዊ የከተማ ኮሪደር ልማት ጋር ተዋህደው ሲደራጁ አዲስ አበባን የባህልና የኪነ-ጥበብ መዲናነቷን ይበልጥ ያጎላታል። በቅርቡ ተሰርተዉ ለህዝብ ክፍት የተደረጉ በኪነ ጥበቡ አንቱ ለተባሉ ሰዎች፤ ሀገራችንን በአለም አደባባይ ያስተዋወቁ ለታዋቂ አትሌቶቻችን፤በጦር ግምባሮች ጭምር ተጉዘዉ መከላከያችንን የሚያጀግን የአርት ስራዎቻቸዉን በማቅረብ ከጠላት ጋር ፍልሚያ አድርገዉ ለሀገራቸዉ ዘመን ተሻጋሪ ተግባር ለፈፀሙ አርቲስቶቻችን የቆመዉ ሀዉልት ለመዲናችን አስደማሚ ዉበት አጎናፅፏታል፡፡ በመዲናዋ የተሰሩና በመሰራት ላይ ያሉ ሀውልቶች የከተማዋን የቀድሞ ታሪክ ከዘመናዊው ውበት ጋር በማስተሳሰር፣ አዲስ አበባ ለነዋሪዎቿ ምቹና ለዓይን ማራኪ፣ ለጎብኚዎቿ ደግሞ የማይረሳ ትዝታ የምትሰጥ ከተማ እንድትሆን ትልቅ አስተዋጽኦ ያበረክታሉ። #የከተማ ውበትና አረንጓዴ ልማት ቢሮ ኮሙዩኒኬሽን ጉዳዮች ዳሬክቶሬት

ለዘንድሮ የአረንጓዴ አሻራ የችግኝ ተከላ መርሃ ግብር በምን መልኩ እንዘጋጅ? አረንጓዴ አሻራ መርሃ ግብር የሀገራችንን ስነ-ምህዳር ለመጠበቅ እና የአየር ንብረት ለውጥን ለመቋቋም የተጀመረ ታላቅ ሀገራዊ ንቅናቄ ነው። ይህንን የክረምት ወቅት የአረንጓዴ አሻራ መርሃ ግብር ስኬታማ ለማድረግ እያንዳንዱ የህብረተሰብ ክፍል አስቀድሞ መዘጋጀት እና የበኩሉን አስተዋጽኦ ማበርከት ይጠበቅበታል። እንደ ህዝብ እና ማህበረሰብ የሚደረጉ ቅድመ ዝግጅቶች የአረንጓዴ ልማት ስራ ስኬታማ የሚሆነው መላው ህብረተሰብ በባለቤትነት ስሜት ሲንቀሳቀስ ነው። ማህበረሰቡ አስቀድሞ የሚተከሉበትን ቦታዎች መለየት፣ የመትከያ ጉድጓዶችን ማዘጋጀት እና ለአካባቢው አየር ንብረት ተስማሚ የሆኑ ችግኞችን መምረጥ አለበት። በችግኝ ተከላ ስራዎች ላይ ንቁ ተሳትፎ ለማድረግ የጋራ እቅዶችን ማውጣት እና የተተከሉ ችግኞች እንዳይጠፉ የጥበቃና የእንክብካቤ ስርአት መዘርጋት ቀዳሚ ተግባር ሊሆን ይገባል። የወጣቶች ዝግጅት እና ተሳትፎ ወጣቶች የጉልበት እና የፈጠራ አቅም ባለቤቶች በመሆናቸው የንቅናቄው ግንባር ቀደም መሪዎች ናቸው። ወጣቶች በማህበራዊ ሚዲያ እና በተለያዩ መድረኮች ስለ አረንጓዴ አሻራ ጠቀሜታ ግንዛቤ የመፍጠር ስራ መስራት ይኖርባቸዋል። በፈቃደኝነት ላይ የተመሰረቱ የችግኝ ተከላ ግብረ-ኃይሎችን በማደራጀት ጉድጓዶችን በመቆፈር፣ ችግኞችን በማጓጓዝ እና በመትከል ረገድ ግንባር ቀደም ሚና መጫወት አለባቸው። የቡድን እና የተደራጁ አካላት ሚና የተለያዩ ማህበራዊ፣ እምነት ተኮር እና የበጎ አድራጎት ቡድኖች አባሎቻቸውን በማስተባበር የተጠናከረ ዝግጅት ማድረግ ይችላሉ። እያንዳንዱ ቡድን የተወሰነ የተከላ ቦታ (ብሎክ) በመረከብ ለችግኞቹ ቀጣይነት ያለው እንክብካቤ ለማድረግ ኃላፊነት መውሰድ አለበት። በቡድን ደረጃ የሚደረግ ዝግጅት ስራዎችን በተደራጀ መንገድ በፍጥነት ለመከወን እና የተከላውን ጥራት ለመጠበቅ በእጅጉ ያግዛል። የከፍተኛ እና የታችኞቹ ተቋማት ኃላፊነት የመንግስት፣ የግል እና የሲቪል ማህበረሰብ ተቋማት ለአረንጓዴ አሻራ መርሃ ግብሩ ስኬት የንብረት፣ የገንዘብ እና የሰው ኃይል ድጋፍ ማድረግ ይጠበቅባቸዋል። ተቋማት ለሰራተኞቻቸው የተከላ መርሃ ግብር በማዘጋጀት፣ የችግኝ መግዣ በጀት በመመደብ እና ተቋማዊ አሻራቸውን የሚያሳርፉበት ስፍራ በማዘጋጀት መሳተፍ አለባቸው። ከተከላው ባሻገር ችግኞቹ እስኪጸድቁ ድረስ የክትትል ስልቶችን ቀርጾ መተግበር ከተቋማት የሚጠበቅ ታላቅ ኃላፊነት ነው። የተማሪዎች ተሳትፎ እና ዝግጅት ተማሪዎች በትምህርት ቤቶቻቸው ውስጥ ባሉ የአካባቢ ጥበቃ ክለቦች አማካኝነት ቅድመ ዝግጅት ማድረግ ይችላሉ። የትምህርት ቤት ቅጥር ግቢዎችን እና አካባቢዎችን በመለየት የችግኝ መትከያ ቦታዎችን ማዘጋጀት ከተማሪዎች የሚጠበቅ ተግባር ነው። በትምህርት እረፍት ወቅትም በየአካባቢያቸው በሚደረጉ የችግኝ ተከላ መርሃ ግብሮች ላይ በመሳተፍ እና ችግኞችን በመንከባከብ የአረንጓዴ ልማት ባህልን በተግባር ሊላመዱ ይገባል። የአረንጓዴ አሻራ መርሃ ግብር የሁላችንንም የተቀናጀ ጥረት የሚጠይቅ በመሆኑ፣ ካሁኑ በተደራጀ መንገድ በመዘጋጀት የዘንድሮውን የክረምት ወቅት በታላቅ ስኬት ማጠናቀቅ ይኖርብናል።

አረንጓዴ ዐሻራ ለምግብ ሉዓላዊነት ++++++++++ #የአረንጓዴ ዐሻራ መርኃ-ግብር ተፈጥሮን የመንከባከብ ጉዳይ ብቻ ሳይሆን፤ የሀገርን የኢኮኖሚ ሉዓላዊነትና የምግብ ዋስትናን የማረጋገጥ ተግባርም ጭምር ነው። በአንድ ጀንበር 700 ሚሊየን ችግኞችን የመትከል አቅም ላይ የደረሰው ኢትዮጵያን አረንጓዴ የማልበስ ዘመቻ፤ የደን ሽፋናችንን ከማሳደግና ከአካባቢ ጥበቃ ባሻገር፤ ለምግብ ዋስትና መረጋገጥ፣ ለሥርዓተ-ምግብ መሻሻልና ለሀገር ሉዓላዊነት ሰፊ ሚና እየተጫወተ ይገኛል፡፡ በተለይም ለምግብነት የሚውሉ ዛፎችና የተለያዩ ጠቀሜታዎች ያላቸው ዕፅዋት ላይ ትኩረት መደረጉ፤ የምግብ ዋስትናን ለማረጋገጥ ለሚደረገው ጉዞ ትልቅ አቅም ፈጥሯል፡፡ የውኃ እጥረትን በከፍተኛ ደረጃ ስለሚቀርፍና የውኃ አካላት በደለል እንዳይሞሉ ስለሚከላከል፤ አርሶ አደሮች ከክረምት ወቅት ጥገኝነት ወጥተው በበጋ ወቅትም በመስኖ በዓመት ሁለቴና ከዚያም በላይ እንዲያመርቱ ዕድል ይሰጣቸዋል። የአረንጓዴ ዐሻራ መርኃ-ግብር የአየር ንብረቱን በማመጣጠን፣ ዝናብ በወቅቱ እንዲጥልና የአካባቢ ሙቀት እንዲቀንስ በማድረግ ረገድ ትልቅ ሚና አለው። መርኃ-ግብሩ አርሶ አደሩን ካልተጠበቀ የተፈጥሮ አደጋ ተከላክሎ አስተማማኝ ምርት እንዲሰበስብና የምግብ ዋስትናውን እንዲያረጋግጥ ይረዳዋል። ይህ ደግሞ የአየር ንብረት መለዋወጥ የምርት እጥረት በሚያስከትልበት አስቸጋሪ ወቅት እንኳ የምግብ አቅርቦት እንዳይቋረጥ ዋስትና ይሆናል።

ከሀገር በቀል ጥበብ እስከ መዲናዋ ውበት አዲስ አበባን ከተፈጥሮ ጋር ያስታረቀው አረንጓዴ ልማት አዲስ አበባ የተመሰረተችው ከተራራ እና ከውኃ ጋር በተያያዘ የሕይወት ዑደት ውስጥ ነው። እንጦጦ ለአዲስ አበባ የተፈጥሮ ውበቷና ከነፋስ መከላከያ መከታዋ ሲሆን፤ ቀጨኔ፣ ቀበና፣ ግንፍሌ፣ ቡልቡላ እና ሌሎችም ወንዞች ደግሞ የከተማዋ ዋነኛ የሕይወት መስመሮች ነበሩ። ይህንን የቆየና የልማት አቅጣጫ በአዲስ እሳቤ ለመቀየር፣ አዲስ አበባ አረንጓዴ እና ተፈጥሮን ማዕከል ያደረገ መንገድ መያዝ ግድ ስላላት፤ በጠቅላይ ሚኒስትር ዐቢይ አሕመድ (ዶ/ር) መሪነት ይፋ የሆነውን ከተማዋን የማስዋብ ፕሮጀክት በመቅረጽ በ2011 ዓ.ም ወደ ተግባራዊ ስራ ተገብቷል። በዚህ አዲስ መዋቅር ከተሰሩ በርካታ ስኬታማ ተግባራት መካከል የሚጠቀሰው የእንጦጦ-ቀጨኔ መድኃኔዓለም የወንዝ ዳርቻ ልማት፤ የተራራ፣ የሸለቆ፣ የባህል፣ የሥራ ፈጠራ እና የአካባቢ ጥበቃ ታላቅ ድምር ውጤት ሆኗል። ይህ ልማት ሀገር በቀል ማንነትንና እውቀትን ያከበረ መሆኑን ያሳየበት፣ የኮንሶዎችን የዘመናት ጎርፍ የመከላከል ጥበብ የእርከን ሥራ በተግባር የተገበረበት ነው፡ አረንጓዴ ልማት ውበት ብቻ ሳይሆን የጠንካራ ኢኮኖሚ መሰረትም ጭምር ነው። በእንጦጦ-ቀጨኔ እና በመላው አዲስ አበባ የሚገኙ የወንዝ ዳርቻ የልማት ሥፍራዎች አሁን ላይ ለዜጎች ሰፊ የሥራ ዕድልን መፍጠር ችለዋል። ካፌዎች፣ የብስክሌት ሽያጭና ኪራዮች፣ እንዲሁም የቱሪስት አገልግሎቶች ለነዋሪው አዲስ የገቢ ምንጭ የፈጠሩ ሲሆን፤ በሌላ በኩል የሚፈጠሩት የባህል እና የገበያ ትስስሮች ለአካባቢው ልዩ ድባብ መፈጠሪያ እና ለማኅበረሰቡ ማንነትን መግለጫ መንገድ ሆነዋል። በተለይም ቀጨኔን በሸክላ ሥራዋ፣ ሽሮሜዳን ደግሞ በሸማ ጥበቧ የምናውቃቸውን የእጅ ጥበብ ባለሙያዎች፣ ምርቶቻቸውን ደህንነቱ በተጠበቀ፣ ለጎብኚዎች በቀላሉ በሚደርስ እና ንጽህናው በተጠበቀ የሕዝብ ገበያ ለማቅረብ ሰፊ ዕድል አግኝተዋል። ፅዱ ከተማ ማለት ውብ መንገድ ብቻ ሳይሆን ጤናማ ነዋሪ፣ የተጠበቀ ተፈጥሮ፣ የተነቃቃ ኢኮኖሚ እና ለትውልድ የሚተርፍ ማለት ነው።

አረንጓዴ ዐሻራ - የኢትዮጵያ ኢኮኖሚ አዲስ ሞተር ***** የኢትዮጵያ የአረንጓዴ ዐሻራ መርሐ ግብር የሥነ ምኅዳር ጥበቃ እና የአየር ንብረት ለውጥ መከላከያነትን ተሻግሮ፣ የሀገራችን ዘላቂ የኢኮኖሚ ዕድገት መሪ ሞተር እና አዲሱ የኢኮኖሚ የጀርባ አጥንት እየሆነ መጥቷል። ከተፈጥሮ ጥበቃው ባሻገር ያለው ተጨባጭ የኢኮኖሚ እምቅ አቅም በሀገራችን ቁልፍ ዘርፎች እና በሀገር በቀል የኢኮኖሚ ማሻሻያ አጀንዳ ላይ ትልቅ መዋቅራዊ ለውጥ እያመጣ ይገኛል። ይህ ታላቅ ብሔራዊ ንቅናቄ በሁለት ምዕራፎች ከ48 ቢሊዮን በላይ ችግኞችን በመትከል ኢትዮጵያን አረንጓዴ ማልበሱን ቀጥሏል። ይህ ተግባር የተራቆቱ መሬቶችን መልሶ በማቋቋም የአፈር መሸርሸርን በመቀነስ እና የብዝኃ ሕይወትን በመጠበቅ ረገድ ዓለም አቀፍ አድናቆትን ከማትረፉም በላይ፣ ኢትዮጵያ በዓለም አቀፉ የአየር ንብረት ለውጥ መድረክ የድርድር አቅሟን እንድታሳድግ አስችሏታል። በግብርና ምርታማነት እና የምግብ ዋስትና ላይ የደን ሽፋኑ መጨመር የአፈር መሸርሸርን በመግታት የከርሰ-ምድር ውኃ በከፍተኛ ሁኔታ እንዲበለጽግ አድርጓል። ይህ የተፈጥሮ ሚዛን መስተካከል የግብርና ምርታማነትን ከማሳደጉም በላይ፣ የሀገራችንን የክረምት ዝናብ ጥገኝነት በመቀነስ ለዘመናዊ የመስኖ ልማት እና ለበጋ ስንዴ ምርት ሰፊ እና አዳዲስ ምቹ ዕድሎችን ከፍቷል። በተለይም አቮካዶ፣ ፓፓያ እና አፕልን ጨምሮ ለምግብነት የሚውሉ የፍራፍሬ ችግኞች በስፋት መተከላቸው የሀገር ውስጥ ገበያን ከማረጋጋት አልፎ ለአግሮ ፕሮሰሲንግ ኢንዱስትሪዎች ጠንካራ ግብዓት በመሆን እና በውጭ ንግድ (ኤክስፖርት) ዘርፍ ተወዳዳሪነትን በማሳደግ ላይ ይገኛል። ይህ ንቅናቄ በሚሊዮን የሚቆጠሩ ዜጎችን፣ በተለይም ሴቶችን እና ወጣቶችን በችግኝ ማፍላት እና መትከል ሂደቶች ላይ በማሳተፍ ሰፊ የሥራ ዕድል ፈጥሯል። ከዚህም ባለፈ የአካባቢ መለምለም እንደ ዘመናዊ የንብ ማነብ፣ የፍራፍሬ ልማት እና የሐር ምርት ያሉ አዳዲስ እና ዘላቂ የገቢ ምንጮችን ለአርሶ አደሩ እና ለአነስተኛ ነጋዴዎች በማስገኘት ማኅበራዊ እና ኢኮኖሚያዊ ትስስሩን አጠናክሮታል። ኢትዮጵያ በታዳሽ ኃይል እና በማኑፋክቸሪንግ ዘርፍ ላይ የጀመረችውን ጉዞ ስኬታማ ለማድረግ የአረንጓዴ ዐሻራ ሚና የላቀ ነው። በተለይም በታላቁ የኢትዮጵያ ሕዳሴ ግድብ፣ እንዲሁም በሌሎች የሃይድሮ ኤሌክትሪክ ማመንጫዎች ተፋሰስ አካባቢዎች የሚደረገው የችግኝ ተከላ የአፈር ደለል ወደ ግድቦቹ እንዳይገባ ይከላከላል። ይህም የኃይል ማመንጫ ተርባይኖችን ደኅንነት በመጠበቅ የግድቦቹን ዕድሜ እና የማመንጨት አቅም ያሳድጋል። የኢትዮጵያ ደኖች እያደጉ ሲሄዱ የሚመጥጡትን የካርቦን መጠን ወደ ገንዘብ በመቀየር ወደ ዓለም አቀፉ የካርቦን ገበያ እና እንደ REDD+ ወዳሉ የካርቦን ንግድ ሥርዓቶች ለመግባት ሰፊ በር ከፍቷል። ይህም ሀገራችን አዲስ የውጭ ምንዛሬ እና የአረንጓዴ ልማት ፈንድ እንድታገኝ ያደርጋታል። በሌላ በኩል ኢትዮጵያ ለጎረቤት ሀገራት ችግኞችን በማጋራት የምታሳየው አረንጓዴ ዲፕሎማሲ በቀጣናው የትብብር መንፈስን በመፍጠር፣ የበረሃማነት መስፋፋትን በጋራ ለመከላከል እና የጋራ የባሕር ዳርቻ እና የወደብ ደኅንነትን ጭምር ታሳቢ ያደረገ ቀጣናዊ የኢኮኖሚ ትሥሥርን ለማጠናከር ትልቅ መሣሪያ ሆኗል። በአረንጓዴ ዐሻራ አማካኝነት እያገገሙ የመጡ የተፈጥሮ ደኖች እና በመዲናዋም ሆነ በክልሎች የተገነቡት ዘመናዊ አረንጓዴ ፓርኮች ለቱሪዝም ዘርፉ አዲስ ሕይወት ዘርተዋል። የአረንጓዴ ዐሻራ መርሐ ግብር የአየር ንብረት ለውጥ የሚያስከትለውን ኢኮኖሚያዊ ኪሳራ ለመቀነስ ብቻ ሳይሆን፣ ኢትዮጵያ የምትመኘውን ዘላቂ፣ ሁሉን አቀፍ እና ለአየር ንብረት የማይበገር ዘመናዊ የኢንዱስትሪ እና የግብርና ሥርዓት ለመገንባት ዋነኛ ስትራቴጂያዊ መሣሪያ ሆኖ እያገለገለ ይገኛል።

የመዲናዋ የዘንድሮ የአረንጓዴ አሻራ የችግኝ ዝግጅት አፈፃፀም የላቀ መሆኑ ተገለፀ፡፡ የአዲስ አበባ ከተማ መጪውን ክረምት ተከትሎ ለሚከናወነው የአረንጓዴ አሻራ የችግኝ ተከላ መርሃ ግብር የችግኝ ዝግጅት በሚፈልገው ደረጃ  ልክ መዘጋጀቱ  ተገልጿል፡፡ የከተማ ዉበትና አረንጓዴ ልማት ቢሮ አመራሮች በመዲናዋ የተለያዩ ክ/ከተሞች የሚገኙትን የችግኝ ጣቢያዎችን ችግኝ ዝግጅት ተዘዋዉረዉ የተመለከቱ ሲሆን  ለ2018/19 ዓ.ም የአረንጓዴ አሻራ የችግኝ ተከላ መርሃ ግብር አስፈላጊ የሆኑ የችግኝ ዓይነቶች በታቀደላቸዉ ጊዜ  መሠረት ከወዲሁ ማዘጋጀት መቻሉን በምልከታቸዉ አረጋግጠዋል ፡፡ ችግኝ ጣቢዎች የተለያዩ ዓይነት ስብጥር ያላቸውን የጥላ፤ ለምግብነት የሚዉሉ ፍራፍሬ ችግኞች ፤ለዉበት እና ለመድኃኒትነት  አገልግሎት የሚሰጡ ችግኞችን ማዘጋጀት ተችሏል። በተለይ ለዘንድሮዉ የአረንጓዴ አሻራ የችግኝ ተከላ መርሃ ግብር  ዘርፈ ብዙ አገልግሎት የሚሰጡ ሀገር በቀል ዛፎችና የፍራፍሬ ችግኝ ዝግጅት ላይ ትኩረት ተደርጎ ተሰርቷል። በመጨረሻም አመራሮች በቀጣይነት ልዩ ትኩረት ሊሰጣቸው በሚገቡ አንኳር ጉዳዮች ዙሪያ ለችግኝ ጣቢያዎቹ ተጨማሪ የስራ መመሪያና አቅጣጫ ሰጥተዋል።

የዘንድሮው የዓለም አካባቢ ጥበቃ ቀን እና የኢትዮጵያ አረንጓዴ ምላሽ ****** ዛሬ ዓለም አቀፉ ማኅበረሰብ የዓለም አካባቢ ጥበቃ ቀንን እያከበረ ይገኛል። የዘንድሮው በዓል በአዘርባጃን ሪፐብሊክ ዋና አስተናጋጅነት ባኩ ከተማ "በተፈጥሮ አነሣሽነት፣ ለአየር ንብረት፣ ለነገው ሕልውናችን" በሚል መሪ ቃል እየተከበረ ነው። ዓለም አቀፉ ዘመቻም "ለአየር ንብረት እርምጃ አሁኑኑ" በሚል መሪ ቃል እየተመራ ይገኛል። ምድራችን እጅግ የበረቱ የአየር ንብረት መዛባት ምልክቶችን እያሳየች ባለችበት በዚህ ወሳኝ ወቅት ኢትዮጵያ ለችግሩ ምላሽ የሚሰጡ ግዙፍ ተግባራዊ ሥራዎችን በማከናወን ላይ ትገኛለች። የዘንድሮው የዓለም አካባቢ ጥበቃ ቀን አህጉራዊ እና ዓለም አቀፋዊ እውነታዎች የዘንድሮው በዓል የሚከበረው የዓለም የአየር ንብረት መዛባት በከፍተኛ ፍጥነት እየጨመረ መምጣቱን ሳይንሳዊ መረጃዎች በሚያሳዩበት ወቅት ነው። እ.አ.አ ከ2015 እስከ 2025 የነበሩት 11 ዓመታት በዓለም ታሪክ ውስጥ እጅግ ሞቃታማ ዓመታት ሆነው ተመዝግበዋል። በባኩ እየተካሄደ ባለው ዝግጅት ላይ የተባበሩት መንግሥታት ድርጅት ዋና ጸሐፊ አንቶኒዮ ጉቴሬዝን ጨምሮ በርካታ ዓለም አቀፍ መሪዎች መልዕክታቸውን አስተላልፈዋል። የአፍሪካ ኅብረት የ2026 ዓመትን ዘላቂ የውኃ አቅርቦት እና አስተማማኝ የንፅህና አጠባበቅ ሥርዓቶችን ለማረጋገጥ ትኩረት የሰጠበት መሪ ቃል የአህጉሪቱን የአየር ንብረት መቋቋም አቅም ለማሳደግ ያለመ ነው። ይህ አህጉራዊ ንቅናቄ ኢትዮጵያ ከምትከተለው ፖሊሲ ጋር ቀጥተኛ ትሥሥር ያለው መሆኑ የሀገራችንን ስልታዊ ትክክለኛነት ያረጋግጣል። የኢትዮጵያ ልዩ ትኩረት እና ታሪካዊው የአረንጓዴ አሻራ ንቅናቄ ኢትዮጵያ የአየር ንብረት ለውጥን ለመቋቋም እና የሥነ-ምኅዳር መራቆትን ለመቀልበስ ከወሰደቻቸው እርምጃዎች መካከል በጠቅላይ ሚኒስትር ዐቢይ አሕመድ (ዶ/ር) መሪነት በ2011 ዓ.ም የተጀመረው የአረንጓዴ አሻራ መርሐ-ግብር ግንባር ቀደሙን ስፍራ ይይዛል። ይህ ታላቅ ሀገራዊ ንቅናቄ በዓለም ላይ ካሉት ትልልቅ የደን መልሶ ማልማት ሥራዎች አንዱ ሆኖ ተመዝግቧል። መርሐ ግብሩ ከተጀመረበት ጊዜ አንስቶ እስካሁን ከ48 ቢሊዮን በላይ ችግኞች ተተክለዋል። በዚህ ዓመት መርሐ ግብሩ ስምንት ዓመት የሚሆነው ሲሆን፣ አጠቃላይ የተተከሉትን ችግኞች ቁጥር ከ54 ቢሊዮን ለማድረስ ግብ ተቀምጦ እየተሠራ ነው። ይህ ከፍተኛ ሀገራዊ ጥረት የኢትዮጵያን የደን ሽፋን በአስደናቂ ሁኔታ በ2010 ከነበረበት 17.2 በመቶ ወደ 23.6 በመቶ ከፍ እንዲል አድርጎታል። ይህም ኢትዮጵያ ለአየር ንብረት ጥበቃ በተግባር ያስመሰከረችበት ቁርጠኝነት የሚያሳይ ለውጥ እያመጣ ይገኛል። ከሀገር አቀፍ የላስቲክ እገዳ እስከ ዘላቂ የኢኮኖሚ ሽግግር ሌላኛው የኢትዮጵያ አስደናቂ የአካባቢ ጥበቃ እርምጃ በአንድ ጊዜ አገልግሎት ላይ በሚውሉ የላስቲክ ከረጢቶች ላይ የተጣለው ሙሉ እገዳ ነው። የሕዝብ ተወካዮች ምክር ባፀደቀው የደረቅ ቆሻሻ አስተዳደር እና አወጋገድ አዋጅ ቁጥር 1383/2017 መሠረት በሀገር አቀፍ ደረጃ የአንድ ጊዜ አገልግሎት የሚሰጡ የላስቲክ ከረጢቶች ምርት፣ ሽያጭ እና አጠቃቀም ሙሉ በሙሉ ተከልክሏል። ይህ እገዳ የአፈር እና የውኃ ብክለትን ለመቀነስ ከፍተኛ አስተዋጽኦ የሚያበረክት ሲሆን፣ በአማራጭነት የወረቀት እና የሸራ ከረጢት አምራች ወጣት ሥራ ፈጣሪዎችን በማነቃቃት አዳዲስ የኢኮኖሚ እድሎችን እየፈጠረ ይገኛል። ከዚህም ባሻገር፣ ሀገራችን በየዓመቱ ለነዳጅ የምታወጣውን 5 ቢሊዮን ዶላር ገደማ ወጪ ለመቀነስ እና የአየር ብክለትን ለመግታት የኤሌክትሪክ ተሽከርካሪዎችን በማስፋፋት ላይ ሰፊ ትኩረት አድርጋለች ። ቀጣናዊ ተፅዕኖ እና የ"አረንጓዴ ወንድማማችነት" ትሥሥር የኢትዮጵያ የአካባቢ ጥበቃ ጥረት በሀገር ውስጥ ብቻ የተገደበ ሳይሆን ቀጣናዊ እና አህጉራዊ ፋይዳው እጅግ እየጎላ መጥቷል። በ"አረንጓዴ ወንድማማችነት" መርሕ መሠረት ኢትዮጵያ ለጎረቤት ሀገራት ለምሳሌ ለጅቡቲ እና ለደቡብ ሱዳን ሁለገብ ጥቅሞች ያሏቸውን ችግኞች እያቀረበች ትገኛለች። የናይጄሪያ ምክትል ፕሬዝዳንት ካሺም ሸቲማን ጨምሮ በርካታ የአፍሪካ መሪዎች የኢትዮጵያን አረንጓዴ አሻራ ተሞክሮ ለአፍሪካ አህጉር ስልታዊ አርአያ ሲሉ አወድሰውታል። የአፍሪካ ኅብረትም ይህንን የኢትዮጵያ ጥረት የምድረ-በዳነት መስፋፋትን ለመከላከል ለሚደረገው የአህጉሪቱ የታላቁ አረንጓዴ ግንብ ተነሣሽነት ትልቅ ደጋፊ አድርጎ ይመለከተዋል።

ለኑሮ ምቹ እና ለቱሪስቶች ማራኪ የሆነች መዲናን እስከመፍጠር የደረሰዉ የአዲስ አበባ የአካባቢ ጥበቃና ንጽህና ልማት ንጹህና ምቹ አካባቢ ለሰዉ ልጆች ጤና፤ ደህንነት እና አጠቃላይ የኑሮ ሁኔታ ያለዉ ጠቀሜታ የላቀ ነዉ፡፡ ንጽህናዉ የተጠበቀ አካባቢ በቆሻሻ ውሃ ወይም በምግብ ብክለት አማካኝነት የሚተላለፉ በሽታዎችን ለመከላከል ያግዛል፡፡ ንጽህናዉ የተጠበቀ አካባቢ በሰዉ ልጆች የአእምሮ እና የስነ-ልቦና ጤንነት ላይ ያለዉ ድርሻም የጎላ ነዉ፡፡ ንጹህ አየር፣ ንጹህ ውሃ እና ውብ መልክዓ ምድር የሰውን ልጅ የመንፈስ እርካታን ይጨምራል። ንጽህናዉን ያልጠበቀ አካባቢ በመተንፈሻ አካላት ጤና ላይ የተለያዩ እክሎችን የሚፈጥር ሲሆን በአየር ላይ የሚሰራጩ ብናኞች፣ ከተቃጠሉ ቆሻሻዎች የሚወጣዉ ጭስ እና መጥፎ ጠረን ለጤና ጠንቅ ነዉ። ንጹህናዉን የተጠበቀ አካባቢ ግን የአየር ጥራትን የሚያሻሽል ስለሆነ እንደ አስም፣ የሳንባ ኢንፌክሽን እና በሌሎች የመተንፈሻ አካል በሽታዎች የመያዝ እድልን በእጅጉ ይቀንሳል። የአካባቢ ንጽህና ለሃገርም ሆነ ለግለሰብ ኢኮኖሚ ትልቅ አስተዋጽኦ አለው። በሽታዎችን በመከላከል፣ ለህክምና የሚወጣውን የግለሰብ እና የመንግስት ወጪ ለመቆጠብ ያግዛል፡፡ ንጹህ እና ውብ ከተሞች ለቱሪስቶች ማራኪ በመሆናቸው ገቢን ይጨምራሉ፤ ለኢንቨስትመንትም ምቹ ናቸው። የአካባቢ ንጽህና መጠበቅ የውሃ አካላትን፣ አፈርን እና አየርን ከመርዛማ ኬሚካሎች እና ከፕላስቲክ ብክለት ይከላከላል። ይህም ተፈጥሮ ራሷን እንድታድስ እና ለወደፊት ትውልድ ንጹህ ሀብት ለማስተላለፍ ያስችላል፡፡ የአካባቢ ንጽህና የአንድ ግለሰብ ወይም የመንግስት ሃላፊነት ብቻ ሳይሆን የመላዉ ህዝብ የጋራ ኃላፊነት ነው። እያንዳንዱ ግለሰብ ቆሻሻን በአግባቡ በመጣል፣ ዛፎችን በመትከል እና አካባቢውን በመንከባከብ ለጤናማ ማህበረሰብ ግንባታ የበኩሉን አስተዋጽኦ ማድረግ ይችላል። በመዲናችን አዲስ አበባ የአካባቢ ጤናን ከመጠበቅ ረገድ በርከታ ተግባራት የተከናወኑ ሲሆን ከአሁን ቀደም ዋንኛ የጤና ጠንቅ የነበሩ ወንዞች ታክመዉና ጸድተዉ ወደ መዝናኛ ስፍራዎች ተቀይረዋል፡፡ በቆሻሻ ተዉጠዉ የነበሩ አካባቢዎችና ጎዳናዎች ዛሬ ላይ ጸድተዉ የእግረኛና የሳይክል መንገድ፤ የህዝብ መዝናኛ ፤ የስፖርት ማዘዉተሪያ፤ የህጻናት መጫወቻና የአይን ማረፊያ ሆነዋል፡፡ በከተማ ዉበትና በአረንጓዴ አሻራ መርሃ ግብር በመንገድ ዳር፤ በወንዝ ዳርቻና በኮሪደር ልማት የተተከሉ ችግኞች ለአዲስ አበባ አዲስ ገጽታን ብቻ ሳይሆን አዲስ አየርና አዲስ ጠረንን ፈጥረዋል፡፡ የአካባቢን ጤናን ለመጠበቅ በሁሉም ክፍለ ከተሞች የተሰሩት እነዚህ የልማት ስራዎች ተላላፊ በሽታዎችን ከመከላከልና የህብረተሰቡን ጤና ከማረጋገጥ ባሻገር አዲስ አበባን ለኑሮ ምቹና ለቱሪስቶችም ማራኪ እንድትሆን አድርገዋል፡፡