በአዲስ አበባ ከተማ አስተዳደር የከተማ ውበትና አረንጓዴ ልማት ቢሮ

የመስቀልና የኢሬቻ በዓላትን አስመልክቶ አዲስ አበባን ውብና ማራኪ የማድረግ ሥራ ተጠናክሮ እንደቀጠለ ነዉ፡፡ በአዲስ አበባ ከተማ የሚከበሩትን ታላላቅ የመስቀልና የኢሬቻ የአደባባይ በዓላትን በደመቀ ሁኔታ ለማክበር መዲናዋን ለእንግዶች ውብና ማራኪ የማድረግ ሥራ ተጠናክሮ መቀጠሉን የከተማ ውበትና አረንጓዴ ልማት ቢሮ አስታወቀ። ቢሮው በተለይም በሁሉም የከተማዋ መግቢያ በሮች ላይ ልዩ ትኩረት በመስጠት የእንክብካቤና የተለያዩ የማስተካከያ ሥራዎችን በስፋት እያከናወነ ይገኛል። የዚህ ሰፊ ንቅናቄ ዋና ዓላማ የከተማ ውበትና አረንጓዴ ልማት ሥራዎችን ከሃይማኖታዊ፣ ባህላዊ እና ማኅበራዊ እሴቶች ጋር በማስተሳሰር የኅብረተሰቡን ንቁ ተሳትፎ ማረጋገጥ መሆኑ የተገለፀ ሲሆን ይህም የመዲናዋን ገጽታ በተሻለ መልክ በማጉላት የተጀመሩ የልማት ሥራዎችን ቀጣይነትና የመጨረሻ ግብ ለማሳካት ትልቅ ዕድል እንደሚፈጥር ታምኖበታል። እስካሁን በተከናወኑ ተግባራት የከተማዋ የአረንጓዴና የውበት መሠረተ ልማቶች አበረታች ደረጃ ላይ በመድረሳቸው የውበትና የአረንጓዴ ሥራዎች ከሀገር ውስጥና ከውጭ ሀገር የሚመጡ በርካታ ጎብኚዎች ወደ መዲናዋ ሲገቡ የሀገርን ገጽታ ከመገንባትና የኢኮኖሚ እንቅስቃሴን ከማሳደግ አንጻር ትልቅ መድረክ ሆነው እንደሚያገለግሉ ተመልክቷል። የበዓላቱን መቃረብ ተከትሎ በተቀመጠው አቅጣጫ መሠረት፣ በተቋሙ የአረንጓዴ ልማት እንክብካቤና የውበት ሥራዎች ላይ የአመራሮችና የሠራተኞች ሚና ከፍተኛ መሆኑ ተነግሯል። በመሆኑም ሁሉም የሥራ ባልደረቦች እርስ በርስ በመቀናጀት፣ በዓላቱ ከተቋሙ ግብ ጋር በተጣጣመ መልኩ አስፈላጊው ዝግጅት ተደርጎላቸው በውጤታማነት እንዲከበሩና እንዲጠናቀቁ በጋራ መረባረብ እንደሚጠበቅባቸው ጥሪ ቀርቧል።

ኮሪደር ልማት--- ከከተማ ውበት በላይ በአዲስ አበባ በፍጥነት እና በጥራት እየተከናወነ የሚገኘው የኮሪደር ልማት ፕሮጀክት፣ የከተሞችን መልክዓ-ምድር ከመቀየር ባሻገር፣ የዜጎችን የእለት ተእለት ህይወት እና የከተሞችን የወደፊት እጣ ፈንታ እየለወጠ ይገኛል። የከተሞችን አሮጌ ገጽታ በመቀየር፣ ለኑሮና ለንግድ ምቹ፣ ማራኪ እና ለመጪው ትውልድ የሚመጥኑ ዘመናዊና ውብ ከተሞች እያደረጋቸው ይገኛል። ልማቱ በከተሞች ለዘመናት ሳይሟሉ የቆዩትን የጎዳና ላይ መብራቶችን፣ የአረንጓዴ ስፍራዎችን፣ ደረጃቸውን የጠበቁ የእግረኛ መንገዶችን፣ ልዩ የብስክሌት መስመሮችን እና ለአካል ጉዳተኞች ምቹ መተላለፊያዎችን፤ የስፖርት ማዘውተሪያ ስፍራዎች እና ሌሎች መሰረታዊ ጉዳዮችን አካቶ የተሰራ ነው፡፡ ይህም ነዋሪዎች ያለስጋት እንዲንቀሳቀሱ ከማስቻሉም ባሻገር፤ የስፖርት ማዘውተሪያዎች ምቹ ሜዳዎችና የህጻናት መጫዎቻዎች በመሰራታቸው በጤናውም ረገድ የራሱ አስተዋጽኦ እያበረከተ ይገኛል። የትራፊክ እና የእግረኛ መንገዶችን በማስፋት፣ የቴሌኮም፣ የመብራት እና የውሃ መስመሮችን በጥበብ በማስተጋበር የከተሞች የመሰረተ ልማት ጥራትን ወደ ላቀ ደረጃ አሸጋግሯል። እንዲሁም የቆሻሻ ማስወገጃ አውታሮችን በአንድ ላይ አቀናጅቶ በመገንባት ከተሞችን ለኑሮ ምቹ እና ጽዱ እንዲሆኑ አድርጓል። አረንጓዴ ፓርኮች፣ የህዝብ መዝናኛዎች እና የኪነ-ጥበብ ስፍራዎች መስፋፋታቸውም ነዋሪዎች ማህበራዊ ትስስራቸውን እንዲያጠናክሩ እና ከከተማ ውጥረት እፎይታ እንዲያገኙ እያስቻለ ነው። በልማቱ ወቅት ከተፈጠረው ሰፊ የስራ እድል ባሻገር፣ ከተሞች ውበት ብቻ ሳይሆን ኢኮኖሚያቸው በ24 ሰዓት እንዲንቀሳቀስ እድል ከፍቷል፡፡ የኮሪደር ልማቱ አዲስ አበባን ለአለም አቀፍ ዲፕሎማሲ፣ ስብሰባዎችና ለቱሪዝም ሳቢና ተመራጭ በማድረግ የውጭ ምንዛሬ ገቢን እያሳደገ ሲሆን፤ ይህም ኢትዮጵያ ያለፈውን ታሪኳን አክብራ፣ የዛሬውን ጉድለቷን ሞልታ፣ ነገን በብልጽግና እና በዘመናዊነት ለመቀበል እያደረገች ያለችውን ጉዞ ያሳያል። በአጠቃላይም የኮሪደር ልማቱ የዜጎችን የኑሮ ጥራት ያሻሻለና ኢትዮጵያ በዘመናዊነት፣ በውበትና በብልፅግና ጎዳና እየገሰገሰች መሆኗን የሚያረጋግጥ አዲስ የታሪክ ምዕራፍ ሲሆን፤ በመላው ሀገሪቱ ሲተገበር ደግሞ እንደ ሰንደቅ አላማ የኢትየጵያ አንዱ መለያ መሆኑ አይቀርም።

ያለ ህብረተሰብ ድጋፍና ቀጥተኛ ተሳትፎ የሚሳካ እና ቀጣይነት ያለው የልማት ጉዞ የለም ! የመስቀል እና የኢሬቻ የአደባባይ በዓላት በኢትዮጵያ ባህላዊና ሃይማኖታዊ እሴቶች ውስጥ ትልቅ ስፍራ ያላቸው ብቻ ሳይሆኑ፣ የከተሞቻችንን የውበት፣ የጽዳትና የአረንጓዴ መሰረተ ልማቶች ዘላቂ ለማድረግ በህብረተሰቡ ዘንድ ግንዛቤንና ማህበራዊ ለውጥን ለመፍጠር ያላቸው ሚና እጅግ ግዙፍ ነው። እነዚህ በዓላት በሚሊዮን የሚቆጠሩ ሰዎችን በአንድነት የሚያሳታፉ በመሆናቸው፣ ከተማን የማስዋብና የተፈጥሮ አካባቢን የመንከባከብ ባህልን በትውልድ ውስጥ ለመቅረጽ እንደ ትልቅ መድረክ ያገለግላሉ። ያለ ህብረተሰብ ድጋፍና ቀጥተኛ ተሳትፎ የሚሳካ እና ቀጣይነት ያለው የልማት ጉዞ የለም። የአደባባይ በዓላቱ በሚከበሩባቸው ወቅት ህብረተሰቡ አካባቢውን በንቃት በማጽዳት፣ አረንጓዴ ቦታዎችን በመንከባከብና አደባባዮችን በማስዋብ የሚያሳየው ተነሳሽነት ለዚህ ትልቅ ማሳያ ነው። ማህበረሰቡ እነዚህ የአረንጓዴና የውበት ልማቶች በቀጥታ ራሱንና አካባቢውን እንደሚጠቅሙ፣ ለጤናውና ለከተማዋ ገጽታም ወሳኝ መሆናቸውን አምኖ ከተቀበለ በተግባር የማይተረጉመውና የማይጠብቀው የልማት ስራ የለም። በዓላቱ የጋራ ሀላፊነትንና ባለቤትነትን በማስረጽ ረገድ የአመለካከት ለውጥ የሚያመጡ ግንባር ቀደም ማህበራዊ መሳሪያዎች ናቸው። ይህ በበዓላት ሰሞን የሚታየው የተባበረ ክንድ እና የህዝብ ተሳትፎ ለዋና ከተማችንና ለሌሎች ከተሞች ልማት ብቻ የሚውል ሳይሆን፣ ድንበር ተሻጋሪ የሆነ ትልቅ ሀገራዊና ቀጣናዊ ፋይዳ አለው። የአደባባይ በዓላቱ የሰላም፣ የፍቅርና የጋራ ትብብር እሴቶችን የሚያጎሉ በመሆናቸው፣ ህዝቦች ለአረንጓዴ ልማትና ለከተማ ውበት የሚያደርጉት ጥረት የሀገርን መልካም ገጽታ በመገንባት ቱሪዝምን ይስባል። ይህ የጋራ ጥረት ከከተማ አልፎ ለመላው ሀገራችን ብሎም ለጎረቤት ሀገራት ጭምር በአርአያነት የሚጠቀስ ትሩፋትን ያስገኛል፤ ህብረትን በማጠናከርም የጋራ እድገትን ያረጋግጣል።

የመዲናዋ ወንዞች ትንሣኤ

የአረንጓዴ መሰረተ ልማት ውበት፤ ከበዓላት ድምቀት እስከ ትውልድ ቀረጻ የመስቀል እና የኢሬቻ በዓላት የኢትዮጵያዊያን ባህላዊና መንፈሳዊ እሴቶች መገለጫ ብቻ ሳይሆኑ፣ የከተሞቻችንን ወቅታዊ ገጽታ፣ ውበትና የአረንጓዴ መሰረተ ልማት ግንባታ ለህብረተሰቡ በግላጭ ለማሳየት ትልቅ ዕድል የሚፈጥሩ ታላላቅ መድረኮች ናቸው። በእነዚህ በዓላት ወቅት በሚሊዮን የሚቆጠሩ ታዳሚዎች ወደ አደባባዮች በሚወጡበት ጊዜ በከተማዋ የተገነቡት የወንዝ ዳርቻ ልማቶች፣ የከተማ የደን ቦታዎች፣ ዘመናዊ ፓርኮች፣ መናፈሻዎች፣ ሰፊ ፕላዛዎችና ማራኪ ፏፏቴዎች በልዩ ሁኔታ ጎልተው ይታያሉ። ከዓመት ዓመት እየተስፋፋ የመጣው ይሄው የከተማ ውበትና የአረንጓዴ ልማት ስራ፣ ለበዓላቱ ድምቀትና ማራኪነት የራሱን እምቅ አስተዋፅዖ እያበረከተ ይገኛል። መንግስት ለከተማ ውበትና ለአረንጓዴ ልማት እየሰጠ ያለው ልዩ ትኩረት፣ ከተሞች ከኮንክሪት ጫካነት ወጥተው ለኑሮ ምቹና ሳቢ እንዲሆኑ እያደረገ ነው። በዓላቱን ተገን በማድረግ በምሽት የሚበሩ ልዩ ውበት ያላቸው የጌጣጌጥና የውበት መብራቶች እንዲሁም ለምለም የፓርክ ስፍራዎች፣ የከተማዋን የስበት ማዕከልነት ከማሳደጋቸውም በላይ ህዝቡ መንግስት ለልማቱ እያደረገ ያለውን ከፍተኛ ርብርብ በቀጥታ እንዲረዳና የልማቱ ባለቤት እንዲሆን በር ይከፍታሉ። ይህ ልማት በዓላቱ በሚያስተላልፏቸው የሰላም፣ የፍቅርና የወንድማማችነት እሴቶች ታጅቦ የከተማዋን ገጽታ አዲስ ምዕራፍ ላይ አሳርፎታል። ከሁሉ በላይ ግን፣ እነዚህ የውበት ስራዎችና የአረንጓዴ መሰረተ ልማቶች ንፁህ፣ ውብና ፅዱ ከተማን ለሚቀጥለው ትውልድ የማስተላለፍ ትልቅ አገራዊ አደራ አካል ናቸው። ተፈጥሮንና ልማትን አጣጥሞ የያዘ አካባቢን መፍጠር፣ መጪው ትውልድ ለተፈጥሮ እንክብካቤ የሚሰጥ፣ ውበትን የሚወድና የአካባቢ ጥበቃ ንቃተ-ህሊናው የዳበረ እንዲሆን በማድረግ ረገድ “ትውልድን የመቅረፅ” የላቀ ሚና አለው። በመሆኑም፣ በዓላቶቻችንን በውብ አደባባዮች ስናከብር፣ ባህላችንን ከዘመናዊ የከተማ ስልጣኔ ጋር በማዋሃድ ነገን የሚረከብ ጤናማና አርቆ አሳቢ ትውልድ የመቅረጽ መሰረት እየጣልን እንገኛለን።

የአዲስ አበባ የወንዝ ዳርቻና የኮሪደር ልማት ለዓለም አቀፍ እውቅና +++++++++++ አዲስ አበባ ዝቅተኛ የአደጋ ተጋላጭነትላት፣ ደኅንነቷ የተጠበቀና የአየር ንብረት ለውጥን የምትቋቋም ከተማ በሚል ከአፍሪካ ቀዳሚ፣ ከዓለም 2ኛ ደረጃን በመያዝ እውቅና አገኘች። ዓለም አቀፉ የጂኦስፓሻል ኩባንያ «አልፋ ጂኦ» (Alpha Geo) አዲስ አበባን በሦስት መመዘኛዎች መዝኗታል። ምዘናውም በአካላዊ የአየር ንብረት ለውጥ ተጽዕኖ፣ በአደጋ ተጋላጭነት፣ በፖሊሲ ምላሽና አስተዳደርና በአየር ንብረት ለውጥ ማላመድ እርምጃዎች ላይ ያተኮረ ነው። በእነዚህ መስፈርቶች ከ72 የዓለም አቀፍ ከተሞች ጋር ተወዳድራ ሁለተኛ ደረጃን በመያዝ ለዓለም ከተሞች ምሳሌ መሆን የቻለችው። ከአሜሪካዋ ቺካጎ ቀጥሎ የተቀመጠችው አዲስ አበባ፤ በኮሪደር እና በወንዝ ዳርቻ ልማት ያከናወነቻቸው አበይት ሥራዎችና የዘረጋቻቸው ዘመናዊ መሠረተ ልማቶች ለዚህ አህጉራዊና ዓለም አቀፋዊ ደረጃ አብቅተዋታል። አዲስ አበባ የዓለምን ቀልብ የምትስብና ለነዋሪዎቿ ምቹ ከተማ ብቻ ሳትሆን፤ የአደጋ ተጋላጭነቷ ዝቅተኛ የሆነች፣ ደኅንነቷ የተጠበቀና አረንጓዴ ልማትን ያረጋገጠች ከተማ ሆናለች። በዓለም አቀፉ ኩባንያ የተሰጠ ማረጋገጫ ለፖሊሲ አውጪዎች፣ ለኢንቨስተሮችና ለመሠረተ ልማት አልሚዎች ከተማዋን በተመለከተ ስትራቴጂካዊ ውሳኔዎችን ለማሳለፍ ከፍተኛ ጠቀሜታ አለው። በአሁኑ ወቅት በዓለም ላይ የሚገኙ ከተሞች ፈጣን የሕዝብ ቁጥር ጭማሪ እያስተናገዱ የሚገኙ ሲሆን፣ አዲስ አበባ የሕዝቧን አዳዲስ ፍላጎቶች ታሳቢ ያደረገ ፈጣንና ዘላቂ ምላሽ በመስጠት ላይ ትገኛለች። በዚህ መርህ የተቃኘውና በ8 ወንዞች 59 ኪሎ ሜትር ርዝመት ላይ እየተካሄደ ያለው የወንዝ ዳርቻ ልማት የጎርፍ አደጋን ከመቀነስ ባለፈ፣ የከተማዋን የሙቀት መጠን በመቀነስ፣ ነዋሪዎች ንጹሕ አየር የሚያገኙበትን፣ የአካል ብቃት እንቅስቃሴ የሚያደርጉበትንና አእምሯቸውን የሚያድሱበትን ሁለንተናዊ ዕድል ፈጥሯል።

የውበትና የአረንጓዴ ልማቶቻችን ከሕዝብ ተጠቃሚነት አንፃር ሲቃኙ፡- የአረንጓዴና የውበት ልማት ሥራዎች የአንድን አካባቢ ገጽታ ከመቀየር ባለፈ ቀጥተኛና ቀጣይነት ባለው መልኩ የሕዝብን ሁለንተናዊ ጥቅም ታሳቢ ያደረጉ ስትራቴጂካዊ ኢንቨስትመንቶች ናቸው። ከተሞችና መንደሮች ሲዋቡና በአረንጓዴ ተክሎች ሲሸፈኑ፣ የነዋሪው ማኅበራዊ፣ ኢኮኖሚያዊና ሥነ-ልቦናዊ ተጠቃሚነት በከፍተኛ ደረጃ ይረጋገጣል። እነዚህ ልማቶች የተፈጥሮ ሚዛንን ጠብቀው ለትውልድ የሚተርፍ መልካም አካባቢን ለመፍጠር ያለሙ ናቸው። በመጀመሪያ ደረጃ፣ እነዚህ የልማት ሥራዎች ለኅብረተሰቡ ጤናማና ምቹ የመኖሪያ አካባቢን ይፈጥራሉ። አረንጓዴ ቦታዎችና መናፈሻዎች የአየር ብክለትን በመቀነስ፣ ንጹሕ አየርን በመለገስና የአየር ንብረት መዛባትን በመከላከል ረገድ የሚጫወቱት ሚና ከፍተኛ ነው። ነዋሪዎች ከዕለት ተዕለት የሥራ ጫና አርፈው አእምሯቸውን የሚያድሱባቸው፣ አካላዊ እንቅስቃሴ የሚያደርጉባቸውና ልጆቻቸውን በነፃነት የሚያጫውቱባቸው ማራኪ የሕዝብ መዝናኛ ሥፍራዎች በመሆናቸው ለሕዝብ ጤና ትልቅ አስተዋጽኦ ያበረክታሉ። በሌላ በኩል፣ የአረንጓዴና የውበት ልማቶች ከፍተኛ የሥራ ዕድል ፈጠራን በማምጣት የሕዝቡን የኑሮ ደረጃ ያሻሽላሉ። ከችግኝ ማፍላት፣ ከተከላ፣ ከጽዳትና ኮብልስቶን ንጣፍ ጀምሮ መናፈሻዎችን እስከማስተዳደርና የአገልግሎት ዘርፎችን እስከማስፋፋት ድረስ በርካታ ወጣቶችና ሴቶች የቋሚና ጊዜያዊ የሥራ ዕድል ተጠቃሚ ይሆናሉ። በተጨማሪም አካባቢዎች ሲዋቡ የቱሪስት መስህብነታቸው ስለሚጨምር ለአገር ውስጥና ለውጭ እንግዶች ምቹ በመሆን የንግድ እንቅስቃሴን ያነቃቃሉ። በአጠቃላይ፣ የአረንጓዴና የውበት ልማት ሥራዎቻችን ለዕይታ ማማር ብቻ ሳይሆን የሕዝብን ሁለንተናዊ ፍላጎትና ተጠቃሚነት መነሻ ያደረጉ ናቸው። የነዋሪዎችን ጤና በመጠበቅ፣ የሥራ ዕድል በመፍጠርና የአካባቢን ጠቃሚነት በማሳደግ የሕዝብን የኑሮ ጥራት ማረጋገጥ መቻላቸው የልማቶቹን ሕዝባዊ ዓላማና ስኬታማነት በግልጽ ያሳያል።

የመዲናዋ አረንጓዴ መሰረተ ልማት ስራዎቻችን የአደባባይ በዓላት የውበት ምንጮች ናቸዉ፡፡ የአደባባይ በዓላቶቻችን ህዝባችን ከአንድነትና ከባህል መገለጫነታቸው ባለፈ፣ ለአረንጓዴ መሰረተ ልማቶችና ለከተማ ንፅህና ተገቢውን ትኩረት እንዲሰጥ ትልቅ የግንዛቤ ማስጨበጫ መድረኮች ናቸው። ህዝቡ በእነዚህ ታላላቅ የአደባባይ በዓላት ላይ በሚታደምበት ወቅት በከተማዋ የተከናወኑ የልማት ስራዎችን በተገቢው መንገድ የመመልከት ዕድል ያገኛል። ይህ ተሞክሮም ህብረተሰቡ የከተማዋን መልካም ገፅታ በበጎ ጎኑ ተረድቶና ተቀብሎ፣ ራሱም የልማቱ ንቁ ተሳታፊና ዋና አካል እንዲሆን ከፍተኛ መነሳሳትን ይፈጥርለታል። በመዲናችን በስፋት እየተገነቡና እየለሙ ያሉ የአረንጓዴ መንገድ ዳርቻዎች፣ የመንገድ አካፋዮች፣ የደን፣ የፓርክና የመናፈሻ ቦታዎች የከተማዋን ስነ-ምህዳራዊ ሚዛን ከመጠበቅ ባለፈ ለዐይን የሚማርኩ የውበት ምንጮች እየሆኑ ነው። ከእነዚህም ጋር ተያይዞ የተገነቡና የለሙ የንፅህና መጠበቂያ ስፍራዎች፣ የውበት መብራቶች፣ ማራኪ የቀለም ቅቦች፣ ቅርጻቅርጾች፣ የውበት ሀረጎችና በየግንቡ ላይ የተሳሉ ማራኪ ስዕሎች የከተማዋን ገፅታ ሙሉ በሙሉ ቀይረውታል። በተለይም እንደ ሴቶች አደባባይ እና ወጣቶች አደባባይ ያሉ ቦታዎች የከተማዋን ውበት አጣምረው የያዙ በመሆናቸው፣ የዜጎችን ውበትን የማድነቅና የመጠበቅ ንቃተ ህሊና በእጅጉ ያሳድጋሉ። እነዚህ የአረንጓዴና የውበት ስራዎች ፋይዳ በመዲናችን ብቻ የሚወሰን ሳይሆን አለም አቀፍ ተፅዕኖ አለው። በተለይ ከሀገራችን የተለያዩ አካባቢዎች ወደ መዲናችን በአደባባይ በዓላት ላይ ለመታደምና ለማክበር የሚመጡ በርካታ እንግዶች፣ ከከተማዋ የልማት እንቅስቃሴ ትልቅ ትምህርትና ልምድ ይወስዳሉ። በአረንጓዴና በተለያዩ የውበት ስራዎች የበለፀገችውን መዲናቸውን ተመልክተው በመደነቅ፣ ተመሳሳይ የልማትና የውበት ስራዎችን ወደ መጡበት አካባቢ በመውሰድ በተግባር ለመድገም መነሳሳትን ያገኛሉ። ይህም የአረንጓዴ መሰረተ ልማት ባህል በመላው ሀገሪቱ እንዲስፋፋና ይበልጥ እንዲጠናከር ምቹ ዕድልን ይፈጥራል።

የመስቀልና ኢሬቻ በዓላትን ምክንያት በማድረግ ከተማዋን ለእንግዶች ምቹና ማራኪ ለማድረግ የማስዋብ ስራው ከወዲሁ እተከናወነ መሆኑ ተገለፀ፡፡ የከተማ ዉበትና አረንጓዴ ልማት ቢሮ አመራሮችና ሰራተኞች በ2019 ዓ.ም መስከረም ወር አጋማሽ ጀምረዉ የሚከበሩ የመስቀልና ኢሬቻ የአደባባይ በዓላት ባህላዊ እሴቶቻቸዉን ጠብቀዉ በሰላም እንዲከበሩ ለማድረግ ሰራተኛዉ ከተማዋን ንፁህና ዉብ እንዲሁም ሰላማዊ በማድረግ ረገድ የድርሻዉን መወጣት በሚችልበት ሁኔታ ላይ ዉይይት አድርገዋል፡፡ ስለ በዓላቱ አጠቃላይ ሁኔታ የሚገልጽ ሰነድ በቢሮዉ አማካሪ አቶ ብሩክ ኤልያስ የቀረበ ሲሆን፤በቀረበዉ ሰነድ ላይ የቢሮዉ ሰራተኞች ሃሳብና አስተያየታቸዉን ሰጥተዋል፡፡ ሁለቱም የአደባባይ በዓላት በዩኒስኮ ተመዝግበዉ የአለም ቅርስ መሆን በመቻላቸዉ ብዙ ቱሪስቶች እና ዲፕሎማቶች በበዓላቱ አከባበር ላይ ከመገኘታቸዉ ጋር ተያይዞ የሀገርን ገፅታ በበጎ ጎን ከማስተዋወቅና ሰላማዊ ሆኖ እንዲጠናቀቅ ሰራተኛዉ በሚችለዉ ሁሉ የሚጠበቅበትን ሚና መጫወት እንዳለበት ተገልጿል፡፡ የአደባባይ በዓላት ከመሆናቸዉ ጋር ተያይዞ ላልተገባ ዓላማ ሳይዉሉ ባህላዊ ዕሴቶቻቸዉን ጠብቀዉ በሰላማዊ መንገድ እንዲከበሩ ከማድረግ አንፃር ሁሉም ሰራተኛ ሚና አለዉ ተብሏል ፡፡ የዘንድሮዉ አከባበር በሀገርና አለም አቀፍ ደረጃ ተቀባይነት ባገኘ ስኬታማ 7ኛ ሀገራዊ ምርጫ እና አብረዉን የዘለቁትን አለመግባባቶች በሰላማዊ መንገድ ለመፍታት በታሪካችን ለመጀመሪያ ጊዜ ሁሉንም የህብረተሰብ ክፍል የወከለ ሀገራዊ ምክክር ባደረግን ማግስት መሆኑ ከሌለዉ ጊዜ የተለየ እንደሚያደርገዉ ከቀረበዉ ሰነድ መረዳት ተችሏል፡፡ በመጨረሻ የማጠቃለያ መልዕክት ያስተላለፉት የቢሮዉ ጽ/ቤጽ ኃላፊ አቶ ታደለ አለሙ በዓሉን ምክንያት በማድረግ በአረንጓዴ መሰረተ ልማቶቻችን ላይ ጉዳት እንዳይደርስ በያለንበት አካባቢ ግንዛቤ የመስጠት ስራ መስራት አለብን ብለዋል፡፡