3 130
订阅者
无数据24 小时
+137 天
+1930 天
帖子存档
3 130
یعقوب احمد وند(آیریلماز) آیریلدی بیزدن.
اوستاد یعقوب احمد وند(آیریلماز) اوزون خسته‌لیکدن سونرا دونن 1405/7/24 یاشادیغی یئرده اسلامشهرین - ایرین شهرکینده وفات ائتدی.
آیریلماز 1335-جی ایلده اردبیل شهرینده ایشیق دونیا گؤز آچمیشدی، ابتدایی ودبیرستانی دا ائله او شهرده بیتیرمیشدی. اوستاد آیریلماز 1359-جو ایل آنایوردوندان تهرانا کؤچمک مجبوریتینده قالدی. او، تهراندا اوزون ایللر اسلامشهرده، صالح آباددا و سون ایللر ایرین شهرکینده یاشاییردی. صابیر انجمنی‌نین قدیمی اویه‌سی یعقوب احمد وند(آیریلماز ) صابیر روحلو بیر شاعیر ایدی. او، اجتماعی-انتقادی شعیرلر یازاردی. هئچ بیر اجتماعی مسئله اونون درین باخیشیندان، آتشین قلمیندن اوزاقدا قالمیردی. او، بوتون چیرکین‌لیکلری گؤروردو. اونون حساس، کؤورک و شاعیرانه روحو بئله بیر مسئله‌لرله کنارا گله بیلمیردی. او سببدن ده اونون آتشین شعیرلری تأسوفله بو گونه‌جه ایشیق اوزو گؤرمه‌ییب. یقیناّ مساعد بیر شرایطده اوستاد آیریلمازین نئچه دفتر صاندیق شعیری ایشیق اوزو گؤره‌جک.
ادبیات سئونلر بو آجی آیریلیغی اوستادین عاییله‌سینه، سئونلرینه، خصوصیله صابیر انجمنینه؛قلمداشلارینا باش‌ساغلیغی وئریر. امینیک آیریلمازین فیزیکی بیزدن آیریلسا دا اونون آتشین شعیرلری خالقیمیزین یادداشیندا، آذربایجان ادبیاتیندا یاشایاجاق.
ادبیات سئونلر 1405/7/25
https://t.me/Adabiyyatsevanlar
3 130
آیریلماز
صمد چايلی
انسان اوغلو آنا ديلدن آيريلماز
ال ديرناقدان، ديرناق الدن آيريلماز
تيکان کولو اوز کامينا چکسه ده
گول بولبولدن، بولبول گولدن آيريلماز
داغين بئلي مارال لارا اويلاق دير
بئل مارال دان، مارال بئلدن آيريلماز
دنيزلره صفا وئرير سونالار
گول سونادان، سونا گولدن آيريلماز
کلمه لره جان باغيشلير ديل- دوداق
ديل دوداقدان، دوداق ديلدن آيريلماز
چک مضرابي گولسون قوپوز گولسون تئل
تئل مضرابدان مضراب تئلدن آيريلماز
ائل اوغلويام، من ائلينم ائل منيم
ائل ((چايلي)) دان، ((چايلي)) ائلدن آيريلماز
https://t.me/Adabiyyatsevanlar
3 130
ناصر داوران
سن اولدوز
بوشونا یورورلار اؤزلرین
پاساژلارین الوان ایشیقلاری.
اولدوز اولماسا
گئجه نی گؤسترمک اولماز.
عینیدیر شعرین دورومو
سن اولمادیغین یئرده.
آدین شهرده سسله نن گونده ن
ملکلر یئر اوزون ترک ائله میر
سانکی خلقتین ماجراسی
بو گونه یازیلمیش اؤنسؤز.
https://t.me/Adabiyyatsevanlar
3 130
سایین کانالداشلار
خبرین تنظیمینده سهوه ائلمیشیک آدی قالارقی, سئویملی اینسان دوکتور علی اکبر ساعدی غلامحسین ساعدی نین کیچیک قارداشی ایدی.
https://t.me/Adabiyyatsevanlar
3 130
Repost from ادبیات سئونلر
«کریم قربانزاده»
قوشلاردا اولسایدی پارا
گؤیلری ساتاردین قوشلارا
دنیزلری بالیق لارا
قاریش ,قاریش یئر کورسین ساتان کیمی آداملارا
دولارسیز قوش و بالیق
نه لازیم بو دونیایا؟
https://t.me/Adabiyyatsevanlar
3 130
حیدر بیات
سونرا یاغیش یاغدی
من یئریدیم، یاغیشلا دانیشمادان
سونرا توز اسدی
من یئریدیم، توزو یامانلامادان
آما او گؤزلریمه دولدو
من تله‌سیردیم
بلکی سن ایدین
بیر الینله اوزومه یاغیش چیله‌دین
بیر الینله گؤزومه توز سپدین
من تله‌سیردیم
بیر بالتا گزیردیم
اؤز هئیکلیمی سیندیرماغا
و بوتون هئیکل‌لر منه بنزیردی
هر کس بیر بالتا گتیرمیشدی
کیمسه اؤز هئیکلینی سئچه بیلمیردی.
بیز هامیمیز
بیر-بیرینه بنزیردیک.
https://t.me/Adabiyyatsevanlar
3 130
"کؤمور الماسی"
«قاراوللیلر وناغیللار»
ادبیات سئونلر: «ویدا حشمتی»
بیر کیشی واریدی، بنّالیقلا مشغول ایدی. اونون صداقتلی و گؤزل بیر آروادی واریدی. محبّت بو بنّانین قوللارینا گوج، اوره‌یینه صافلیق وئرمیشدی. ایشله‌ینده ائله اورکدن ایشله‌ییردی کی، یورولماق بیلمیردی. لاکین بو بنّانین خوشبختلییی اوزون سورمه‌‌دی. اؤزوندن چوخ سئودیی آروادی وفات ائتدی.
بو شهرده لوتولار یاشایاردی. اونلار بنّانین وارینا صاحب اولماق اوچون، اؤز اویناشلاریندان بیرینی، خالا قیزی آدینا بنّایا وئریب، توی ائله‌دیلر. لوتولار آروادا اؤیره‌تدیلر کی، سن اؤزونو مؤحکم خسته‌لییه وور. بنّانی ایناندیر کی، منیم خسته‌لیییمین درمانی کؤمور الماسدیر. قوی شهر به شهر کؤمور الماس آختارماقدا اولسون. او قاییدانا دک بیز یئییب، ایچیب، کئفه باخاریق. بنّا ایشدن گلیر گؤرور کی آرواد یورغان-دؤشک سالیب یاتیبدیر. ائله زاریییر کی، نیققیلتی‌سی عالمی باشینا گؤتوروبدور.
-آی خانیم اولماسین آزار! سنه نه اولوبدو؟
آرواد چتینلیک‌له جواب وئریر:
-کیشی من چوخ خسته‌لنمیشم. تکجه علاجیم کؤمور الماسدی.
-آی بالا او نه‌جور الماسدی؟ اونو هاردان تاپماق اولار؟
آرواد دئییر:
-آی کیشی من اؤز اؤلومومو ایستیرم، اما سنین زحمته دوشمه‌یینی ایسته‌میرم. کؤمور الماسی تاپماق اوچون، گرک فلان شهره گئده‌سن. اورا دا اون گونلوک یولدو. من ده سنه قییمارام.
کیشی حاضیرلانیب، کؤمور الماسی آختارماغا گئدیر. بیر-ایکی گون یول گئتدیکدن سونرا بیر دوزده، قویون اوتاران چوبانا راست گلیر. چوبان سوروشور:
-آی کیشی یایین بو ایستی‌سینده، هارا بئله تله‌سیرسن؟
کیشی جواب وئریر:
-آی چوبان قارداش آللاهدان گیزلی دئییل، سندن نه گیزلی، آروادیم خسته‌له‌نیبدیر. دئییر کؤمور الماس تکجه علاجیم‌دیر. ایندی گئدیرم کؤمور الماسی تاپام.
چوبان الینی الی اوستونه ووروب، برکدن گولور:
-آ کیشی آرواد سنی آلدادیبدیر. یقین اونون گؤز آلتی‌سی وارمیش.
کیشی اینانماییر. چوبان دئییر:
-ایندیکی منیم سؤزومو اینانمادین، گل ایکیمیز ده گئدک سیزه. اولانی-بیتنی اؤزون گؤر.
چوبان سورودن بیر ارکک سئچیب، کسیر. اتینی خورجونونون بیر گؤزونه قویور. قاپییا چاتاندا، کیشینی ده خورجونون او بیری گؤزونه قویور. قاپینی دؤینده، قولدورون بیری باییرا چیخیب، گؤرور کی چوباندی، چیینینده یئککه بیر خورجون وار. قولدورباشی سوروشور:
-قارداش سیزه کیم لازیمدی؟
چوبان دئییر:
-بو ائوین صاحبی بنّا منه تاپیشیردی بیر جمدک گتیرم، ایندی همین جمده‌یی گتیرمیشم.
قولدورباشی، چوبانین ایچری کئچمه‌یینه ایزین وئریر. چوبان کونجون بیر طرفینده خورجونونو یئره قویوب، جمده‌یی چیخاردیر. اؤزو ده خورجونون یانیندا اوتورور. گؤرور کی لوتولارین مجلیسی یئییب-ایچمک‌له دولودور. چالغیچی چالیر، اوخویان اوخویور. بونلار دا یئییب-ایچیر، اویناییرلار. آرواد اورتالیقدا اوخویور:
-اریمی گؤندردیم کؤمور الماسینا،
سیز چالین من اویناییم.
او کیشی‌نین گئتمه‌سینه-گئتمه‌سینه
او کیشی‌نین ایتمه‌سینه-ایتمه‌سینه
حاجی اورتالیغا چیخاراق:
-آلمانی قویدوم باجایا،
قورخورام آلما آجییا،
بیر بوسه وئر سن حاجییا.
او کیشی‌نین گئتمه‌سینه، آی گئتمه‌سینه.
قولدور مارال اوخویور:
آلمانی قویدوم خارالا
قورخورام آلما سارالا
بیر بوسه وئر بو مارالا
او کیشی‌نین گئتمه‌سینه، گئتمه‌سینه.
لوتو اوخویور:
-آلمانی قویدوم قوتویا،
بو قوتودان او قوتویا
بیر بوسه وئر بو لوتویا
او کیشی‌نین گئتمه‌سینه-گئتمه‌سینه.
چوبان اوزونو خورجونا ساری توتاراق:
چوبانام گزدیم دوزلری،
خورجوندان باخیر گؤزلری
ائشیتدین‌می بو سؤزلری؟
لوتولارین کللهسینه، آ کللهسینه.
چؤبان خورجونونون آغزینی آچار. ایکیسی بیرله‌شیب، لوتولاری دؤیرلر. آروادی دا قووارلار. بنّا چوبانلا عؤمورلوک دوست اولار.
https://t.me/Adabiyyatsevanlar
3 130
اوشاق ادبیاتی
کیم سلیقه لی دیر
یازان : علی صمدلی
کؤچورن : علی آغ گونئيلی ( ابرازی )
کتاب : ژنرالین اوشاقلیغی ) ناغیللاربؤلومو (
خالاسی آیسئلله آیتَنه خاریجی مارکالی کؤینک آلمیشدی . بو کؤینکلرین ، آغ یاخالاریندا ائله آیسئلله آیتَنه اوخشایان قیزلارین شکیللری وارادی . شکیلده کی قیزلار آغیزلارینی آچیب نَیه ایسه قهقه ایله گولوردولر .
قیزلار کؤینکلرینی گئیینیب لووغا ـ لووغا گزیردیلر .بیر آزدان خالالاری اونلاری یئمک ایستولونا دعوت ائتدیب :
ــ باخ ، سلیقه لی اولون ، یئمه یی اوستونوزه تؤکوب کؤینکلرینیزی کورلامایین ، ــ دئدی .
قیزلار یئمه یی باشلادیلار . آیسئلین گؤزو تئلئویزوردا قالدیغیندان سودلو سیییغی اوستونه داغیتدی . سودلو سیییق دوز شکیلده کی قیزین آغزینا دوشموشدو .
آیسئل:
ــ ائح ، خالامیز تاپیشیرمادی کی ، یئمه یی اوستونوزه داغیتمایین
آیتَن :
ـ ائح ، من اوستومه داغیتمادیم کی ، قیزا یازیغیم گلدی . قوی اودا خالامیزین بیشیردییی سودلو سیییق دان دادسین ــ دئدی .
https://t.me/Adabiyyatsevanlar
3 130
فیرلاندی، فیرلاندی، آما فایداسی یوخودو. داهـا چوخ یورولدو. بورونونو اوتلارین آراسیندا
گیزلتدی. آما داها دا پیس اولدو. میغ‌میغالار قویروغونا یاپیشـیب
سانجدیلار. قالین‌قویروق لاپ داشدی.
ـ دؤزون، هامینیزی اؤلدوره‌جم! اوجادان باغیردی، سسی بئش آغاج
اویانا گئتدی.
ـ سیزه دوشوندوره جه‌یم!... دوشوندوره جه‌یم!...
میغ میغالار نه اولدوغونو گؤرمک اوچون بیرآز اوزاقلاشدیلار. قالیـن
قویروق قیوراق، جلد، کندیرباز کیمی، بیر آغاجین باشینا چیخیب، لاپ یوغون بوداق اوسته اوتوروب. باغیردی:
ـ ایندی گلین قاباغا! بورنوزو اوواجاغام.
میغ‌میغالار زیل سسله گولدولر، هامیسی بیرلیکده قیللی قالین‌قویروغا ساری یومولدولار. ویزیلداییب، قالین قویروغون دؤوره سینده اویناییردیلار.
قالین‌قویـروق آیی اونلاری قوومایا چالیشیردی، بیلمه‌دن یوز میغ‌میغـا اوددو.
اؤسگورمه توتدو، آغاجین باشیندان دوشدو. تئز دوروب یارا خوراسینی اوووب دئـدی:
ـ هه! نئجه اوچدوغومو گؤزورسونوز؟
بو طرفدن میغ میغالاری گولمک توتدو، ویزیلدایان بورنواوزون
باغیردی:
یئیه‌جم سنی!...یئیه‌جم سنی!... یئیه جم سنی!...
دا اینـدی قالین قویروق یورغونلوقدان زوراکی ترپشیردی، آما یورولموشام دئمه‌یه اوتانیردی. ائله‌سی دالی قیچلاری اوسته اوتوروب، گؤز آلتی گودوردو.
سونوندا بیر قورباغـا دادینا یئتیشدی. قنوون آلتیندان چیخیب، بیرآز اوزاقلیقدا اوتوروب دئدی:
قالین قویروق بَی، نیه هئچینه اؤزونو اؤلدوروسن؟ بو اسگیک میغ‌میغالارا
باش قوشما. لیاقتلری یوخدور.
قالین‌قویروق سئوینجک دئدی: دوز دئییرسن. بیلمیرم نیه... قــوی
گلسینلر منیم...منیم...منیم...یوواما.
قیللی قالین‌قویروق قویروغونو چئویریب بوتون هیزیله باتاقدان
قاچدی. ویزیلدایان بورنو اوزون دالیسیجا گئتدی.
چیغیریردی: اوشاقلار قاباغین آلین. قاچیری. اونو توتون!
میغ‌میغالارین هامیسی بورنو اوزونون دووره‌سینه ییغیشیب، عقل لرین بیر_بیری اوسته قویوب، دوشوندولر. قالین قویروغون قاچماسینا اذن وئرمه‌یه قرار آلدیلار. چونکو ایندی باتاق اؤزلرینین اولموشدو. سون
۱۴۰۱
https://t.me/Adabiyyatsevanlar
3 130
اوشاق ادبیاتی
بورنو اوزون ویزیلدایان میغ میغا
صمد بهرنگی نین ترجمه لری
چئویرن : منیژه جم نژاد
صلاحینا دیر. داها تارتان- پارتان
سؤزلرینه قولاق آسماق ایسته میرم. ایندیجه سنی او خز پالتارلا بیرگه یئیه‌جه‌یم.
قالین قویروق اوندان داها دوزلو بیرسؤز ائشیتمه‌دیینی دوشوندو.
اوبیری بؤیرو اوسـته دؤندو، اوزونو پنجه‌سی‌له اؤرتدو، سونرا گئنه
خورولتوسو گؤیه گئتدی.
بورنو اوزون، اوبیری میغ میغالارین اونو گؤزله دییی یئره دوغرو اوچدو. هامی‌نین ائشیتمه‌سی اوچون، اوجا سسله دئدی:
اونو چوخ قورخوتدوم. دا بو طرفلره آیاق قویماغا جسارت ائله‌مز.
میغ میغالارین هامیسی بو سؤزدن حیرتده قالدیلار.
سوروشدولار: قالین قویروق ایندی هاردا؟
ـ بیلمک ایسته‌میرم. بــو چیرت- پیرتا حوصلم یوخدو. اونو پیس
قورخوتدوم. آشکارا دئدیم تئزلیکله گئتمه‌سه اونو بوتونلوکله یئیه‌جه‌یم.
ه...هـه ائله بو. هله منیم قورخوم‌دان ایندیه‌جه اولموش اولدوغونو سانیرام. اوندا اؤز گوناهی دیر.
میغ‌میغالار ویزیلداییب، نه ائده‌جکلرینی دانیشماغا باشلادیلار.
بوآیی عجب اوره‌ک آغریسی دیر. ایندیه‌جــه باتاق دا ائله قیشقیریق
دوشمه‌میشدی. بیرآز ویزیلداییب، سونوندا قالین‌قویروغو باتاقدان
قووماق قراری آلدیلار. مئشه ده ائوینه گئدیب، اوردا یاتماسینی ایسته‌دیلر.
باتاق بیزیمدیر. بیزدن اؤنجه آتالاریمیز، اونلاردان اؤنجه ده آتالاری ائله بو باتاق دا یاشاییب.
بیر هوشلو_باشلی خانیم میغ‌میغـا دئدی: منجه آیی‌له ایشیمیز اولماسا یاخشی‌دیر. مورگوله‌ییب، اؤزو دوروب گئدر.
آما اوبیری‌لرین آجیقلی باخدیغیندان قوجاخانیم قاچیب اؤزونو قورتارماق زوروندا قالدی.
ویزیلدایان بورنواوزون اوجا سسله باغیـردی: دوسـتلار، منیم دالیمجا
گلین. ایندی اونا آنلاداجاغیق.
بوتون میغ‌میغالار بورنواوزونون دالینجا دوشدولر: اوچور،
ویزیلدادیلار، اؤز سسلریندن ال- آیاغا دوشدولر. باتاغین کنارینا یئتیشدیلر. قیللی قالین‌قویروق آیی لاپ حرکتسیز دوشموشدور. بورنو
اوزون ویزیلدایان دئدی: دئمه‌دیم؟ یازیق حیوان قورخوسوندان جانی چیخیب. آما اونا_اوره ییم یاندی. او بویدا آیی بیر پوف ایله اولدو.
قالین قویروغون بورنو اوسته نارین میغ میغا آز قالا ایچری گئده‌جک دی، دؤنوب دئدی: یاتیبدیر. میغ‌میغالار ویزیلدادیلار:
بئ‌حیا حیوان!...باتاقلیق سسلریندن تیتره‌دی. بئش یوز میغ میغــا
ازیب، یوزونو ده اودوب، ایندی ده هئچ بیر شئی اولمامیش کیمی یاتیب.
قالین قویروق ائله‌سی یاتیب، خورولداییر، فیسیلداییردی.
بورنواوزون، قالین‌قویروغـا دوغـرو یومولورکن، باغیردی: اؤزونو یوخویا ووروب. اونا قاندیراجاغـام. آهای، دور آیاغا!
اوزون بورنونو، قالین‌قویروغون قیسا، قارا بورنونا سوخدو. قیللی
قالین‌قویــروق دوروب، بنگ! پنجه سینی بورنونا چالدی.
آما البتده بورنو اوزون میغ میغا اوندان اؤنجه بوروق وئرمیشدی.
ـ یاخشی، آیی‌بی خوشونا گلمه‌دی، یوخ؟ گئتسن یاخشی اولار،
یوخسا داها دا پیس اولاجاق. منیم آدیم بورنو اوزون ویزیلدیان میغ‌میغا دیر. تک‌ده دئییلـم. بؤیـوک آتام_ بؤیوک بورنواوزون، کیچیک قارداشـیم_ بالاجا بورنواوزون، منیمله آیاق‌دیرلار. گئت آیی!
قیللی قالین‌قویروق دوروب اوتوردو، دئدی: گئتمیرم! هامیزی ازرم، چوخدا بوی بوخونونا ناز ائلمه!
بورنواوزون گئنه‌ده قالین قویروغا ساری یومولوب، گؤزونو سانجدی.
قالین قویروغ سانجی‌دان باغیریـب، بورونونا بیر یومروق چکدی. آز قالا
گؤزو چیخاجاقدیر. آما بورنواوزون قاچیب، قالین قویروغون قولاغینا ویزیلدادی: سنی یئیه‌جه‌یم آیی بَی.
قیللی‌قالین‌قویروق آجیقلاندی، میغ‌میغالاری وورماق اوچــون،
بیر تـوس آغاجینی کوکوندن چیخاردی. چوخ اللشـدی. نئچه یول ووردو.
سونوندا یورولدو، آما تک بیر میغ‌میغا دا وورا بیلمـه‌دی. میغ‌میغـالار باشـی
اوسته اویناییر، اورکدن ویزیلداییردیلار. قالین‌قویروق بؤیوک بیرداش گؤتوروب، میغ‌میغالارا آتدی. آمـا حیـف! کئچـن دفعـه کیمـی فایداسیز ایـدی.
بورنو اوزون ویزیلدادی: یاخشی، آیی بیرایش گؤره بیلمه دین، هه؟
ایندیجه سنی یئیه‌جه‌یم.
بیرآز کئچدی. قیللی قالین‌قویروق آیی هله‌ده میغ‌میغـالارلا ساواشیردی. مئشه‌ده ایندیه‌جه بئله های- کوی ائشیدیلمه‌میش دیر.
قالین‌قویروغون باغیرتی لاری هر یئره چاتیردی. چوخلو آغاجی کوکدن چیخاردی. چوخلو داشی یئردن گوتوردو. ویزیلدایان بورنو اوزونو پنجه سینده توتماغی چوخ ایستیردی. قولاغی‌نین دیبینده قورجالانیردی. قالین قویروق هر نه اللشیردی، اونو توتا بیلمیردی. بورنونا اوقدر یومروق چکدی، دیدیشدیردی، بورنو قانادی. سونوندا قیللی قالین‌قویروق بتر-بتر یورولوب اوتوردو. خیریلدادی. تازا بیر نقشه چکمیش‌دیر. میغ‌میغالاری ازمک اوچون اوت-علف اوسته فیرلانماغا باشلادی. آردی وار...
3 130
Repost from ادبیات سئونلر
اوشاق ادبیاتی
هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین
https://t.me/Adabiyyatsevanlar
