រដ្ឋបាលខេត្តកំពង់ចាម

នៅថ្ងៃទី១៨ ខែសីហា ឆ្នាំ២០២៦ ឯកឧត្តម ឃន ប្រុស អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានអញ្ជើញជាអធិបតីបិទវគ្គបណ្តុះបណ្តាលតម្រង់ទិសស្តីពីការងារអភិវឌ្ឍ និងគ្រប់គ្រងក្របខ័ណ្ឌអនុវត្តការជំរុញបង្កើន ការថែទាំសុខភាពបឋម(ក.ជ.ថ.ស.ប) សម្រាប់រដ្ឋបាលស្រុក OD មន្ទីរពេទ្យបង្អែក ឃុំ និងមណ្ឌលសុខភាពទាំងអស់ក្នុងស្រុកស្រីសន្ធរ នៅសាលាស្រុកស្រីសន្ធរ។ វគ្គបណ្តុះបណ្តាលនេះរៀបចំឡើងក្នុងគោលបំណងពង្រឹងសមត្ថភាព និងការយល់ដឹងដល់មន្ត្រីពាក់ព័ន្ធ ដើម្បីធានាបាននូវប្រសិទ្ធភាពខ្ពស់ក្នុងការអនុវត្តការងារថែទាំសុខភាពបឋមជូនប្រជាពលរដ្ឋនៅមូលដ្ឋាន។ វគ្គបណ្ដុះបណ្ដាលក៏មានការអញ្ជើញចូលរួមពីក្រុមប្រឹក្សាស្រុក, អភិបាល អភិបាលរងស្រុក, ក្រុមការងារ PHC-BIF ថ្នាក់ខេត្ត, ថ្នាក់ដឹកនាំមន្ទីរសុខាភិបាល នៃរដ្ឋបាលខេត្ត, ប្រធាន អនុប្រធានOD មន្ទីរពេទ្យបង្អែក, ប្រធានផ្នែកលើកកម្ពស់សុខភាព,ប្រធាន អនុប្រធានមណ្ឌលសុខភាព ប្រធានការិយាល័យផែនការ, មេឃុំ ស្មៀនឃុំ មេប៉ុស្តិ៍ និងនាយកសាលាបឋម អនុវិទ្យាល័យ និងវិទ្យាល័យផងដែរ។

ដើម្បីចូលរួមសម្រេចបានចក្ខុវិស័យឆ្នាំ២០៣០ ខេត្តកំពង់ចាម ត្រូវការចំណូលសរុប ក្នុងរង្វង់ ៥,០០០លានដុល្លារ ដែលប្រជាជនម្នាក់ៗទទួលបាន ៤,០០០ដុល្លារក្នុងមួយឆ្នាំ កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានអះអាងថា ដើម្បីចូលរួមសម្រេចបានចក្ខុវិស័យ ជាប្រទេសមានចំណូលមធ្យមកម្រិតខ្ពស់នៅ ឆ្នាំ២០៣០ ខេត្តកំពង់ចាម ត្រូវការចំណូលផលិតផលក្នុងស្រុកសរុបក្នុងរង្វង់ ៥,០០០លាន ដុល្លារ ដែលប្រជាជនម្នាក់ៗទទួលបានចំណូលក្នុងរង្វង់ ៤,០០០ដុល្លារក្នុងមួយឆ្នាំ។ ថ្លែង បែបនេះក្នុងវគ្គបណ្តុះបណ្តាលស្តីពីការប្រមូលទិន្នន័យមូលដ្ឋានភូមិ ឃុំ សង្កាត់ ឆ្នាំ២០២៦ នាព្រឹកថ្ងៃទី២៧ តុលា ២០២៦ នៅមន្ទីរផែនការខេត្តកំពង់ចាម ។ ថ្លែងក្នុងឱកាសនោះដែរ ឯកឧត្តម អ៊ុន ចាន់ដា មានប្រសាសន៍ថា ក្នុងឆ្នាំ២០២៥កន្លងទៅ ខេត្តកំពង់ចាម មានកំណើនសេដ្ឋកិច្ច ៦.១% និងមានទំហំសេដ្ឋកិច្ច ៣,០៧៦ លានដុល្លារ។ សេដ្ឋកិច្ចរបស់ខេត្តកំពង់ចាម បានមកពីវិស័យ ៣សំខាន់ៗគឺ៖ វិស័យកសិកម្ម ៣៩% វិស័យឧស្សាហកម្ម ៣៣.៤% និងវិស័យសេវាកម្ម ២៧.៥% ហើយចំណូលជាមធ្យម សម្រាប់មនុស្សម្នាក់មានចំនួន ២,៨៣២ដុល្លារ ក្នុងម្នាក់។ ឯកឧត្តម រិន វីរៈ រដ្ឋលេខាធិការក្រសួងផែនការ បានថ្លែងថា ការអភិវឌ្ឍទិន្នន័យមូលដ្ឋាន ឃុំ សង្កាត់ (CDB) គឺពិតជាមានសារៈសំខាន់ណាស់ ដោយហេតុថាស្ថិតិ មិនគ្រាន់តែជា តួលេខប៉ុណ្ណោះទេ ប៉ុន្តែវាជាទ្រព្យសម្បត្តិយុទ្ធសាស្រ្តអរូបិយ៍សម្រាប់ការអភិវឌ្ឍសង្គម និងសេដ្ឋកិច្ចថ្នាក់ក្រោមជាតិ ពីព្រោះស្ថិតិដែលអាចជឿជាក់បាន ជួយគាំទ្រដល់ រដ្ឋាភិបាលក្នុងការត្រួតពិនិត្យកំណែ ទម្រង់ តាមដានវឌ្ឍនភាព និងធ្វើការសម្រេចចិត្ត ផ្អែកលើភស្តុតាង​ ដែលផ្តល់ផលប្រយោជន៍ដល់ប្រជាពលរដ្ឋ តាមរយៈការប្រើប្រាស់ទិន្ន ន័យស្ថិតិ​ ក្នុងការវិនិយោគអភិវឌ្ឍន៍សង្គម និងសេដ្ឋកិច្ចប្រកបដោយប្រសិទ្ធភាព។ ឯកឧត្តម រិន វីរៈ រំពឹងថា ក្នុងកម្មវិធីបណ្តុះបណ្តាលថ្ងៃនេះ ថ្នាក់ដឹកនាំមន្ទីរផែនការខេត្ត ទាំង ១៤ រួមមានខេត្តកំពង់ចាម ត្បូងឃ្មុំ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង ប៉ៃលិន ព្រះវិហារ ក្រចេះ មណ្ឌលគិរី រតនគិរី ស្ទឹងត្រែង និង ខេត្តសៀមរាប នឹងចូលរួមយ៉ាងសកម្ម ដើម្បីទទួលបានចំណេះដឹងថ្មីៗ ដើម្បីនាំទៅអនុវត្ត ក្នុងការងារ ជាក់ស្តែងឱ្យកាន់តែមានប្រសិទ្ធភាពផងដែរ ៕

អភិបាលខេត្តកំពង់ចាម អញ្ជើញជូនដំណើរប្រជាពលរដ្ឋ ៦៣គ្រួសារ ដែលទទួលបានដី និងផ្ទះ តាមរយៈកម្មវិធី «ផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព» នៅខេត្តស្ទឹងត្រែង (កំពង់ចាម)៖ នាព្រឹកថ្ងៃទី២៧ ខែតុលា ឆ្នាំ២០២៦ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញជួបសំណេះសំណាល និងជូនដំណើរបងប្អូនប្រជាពលរដ្ឋចំនួន ៦៣គ្រួសារ ដែលទទួលបានដីធ្លី និងផ្ទះ ស្របតាមគោលនយោបាយរបស់រាជរដ្ឋាភិបាលកម្ពុជា ក្រោមកម្មវិធី «ផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព» (ផ.ក.អ)។ ក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម និងប្រធានកាកបាទក្រហមកម្ពុជាខេត្ត បាននាំយកអំណោយមនុស្សធម៌ដ៏ថ្លៃថ្លារបស់សម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ផ្តល់ជូនបងប្អូនប្រជាពលរដ្ឋទាំង ៦៣គ្រួសារ ជាការជូនដំណើរ បងប្អូនប្រជាពលរដ្ឋទាំង ៦៣ គ្រួសារ ដែលត្រូវអញ្ជើញទៅកាន់តាំងទីលំនៅដ្ឋានថ្មី ស្ថិតក្នុងភូមិសាស្ត្រអូរសាវ ឃុំស្តៅ និងឃុំសាមឃួយ ស្រុកសេសាន ខេត្តស្ទឹងត្រែង។ ហើយនៅថ្ងៃទី២៧ តុលា នេះ ឯកឧត្តម អភិបាលខេត្ត ក៏បានចាត់ អភិបាលរងខេត្ត ចំនួន ២នាក់ និងក្រុមការងារផ្សេងទៀត ធ្វើការដឹកនាំបងប្អូនទាំង ៦៣ គ្រួសារ ទៅដល់ទីតាំងតែម្តង។ គួររំលឹកថា កាលពីថ្ងៃទី១៦ ខែតុលា ឆ្នាំ២០២៦ ឯកឧត្តម អ៊ុន ចាន់ដា អភិបាលខេត្តកំពង់ចាម បានដឹកនាំគណៈប្រតិភូខេត្ត អញ្ជើញចុះពិនិត្យទីតាំងដីសម្បទានសង្គមកិច្ច ក្រោមការអនុវត្តកម្មវិធី «ផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព» (ផ.ក.អ) ជាគម្រោងទី១។ គួរបញ្ជាក់ថា ការអនុវត្តកម្មវិធី «ផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព» (ផ.ក.អ) នេះ មានគោលបំណងរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋ និងបង្កើតឱកាសសម្រាប់ការអភិវឌ្ឍជីវភាពគ្រួសារឱ្យកាន់តែប្រសើរឡើង ស្របតាមគោលនយោបាយបញ្ចកោណ ដំណាក់កាលទី១ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ គោលបំណងសំខាន់នៃកម្មវិធីនេះ គឺការផ្សារភ្ជាប់ការការពារព្រៃឈើជាមួយនឹងការលើកកម្ពស់ជីវភាពប្រជាពលរដ្ឋ តាមរយៈការរៀបចំ និងការផ្តល់ដីស្របតាមគោលនយោបាយ និងច្បាប់ជាធរមាន ដើម្បីរួមចំណែកសម្រេចឱ្យបាននូវការអភិវឌ្ឍសេដ្ឋកិច្ច សង្គម និងបរិស្ថាន ប្រកបដោយចីរភាព៕

ខេត្តកំពង់ចាម ប្រារព្ធពិធីបិទការប្រណាំងទូក បណ្តែតប្រទីប តាំងពិព័រណ៍ និងអុជកាំជ្រួច នៅក្រុងកំពង់ចាម ក្នុងឱកាសថ្ងៃចេញព្រះវស្សា (កំពង់ចាម)៖ នារសៀលថ្ងៃទី២៦ ខែតុលា ឆ្នាំ២០២៦ ឯកឧត្តម អ៊ុន ចាន់ដា អភិបាលខេត្តកំពង់ចាម និងលោកជំទាវ ព្រមទាំងឯកឧត្តម ខ្លូត ផន ប្រធានក្រុមប្រឹក្សាខេត្ត បានអញ្ជើញចូលរួមពិធីបិទការប្រណាំងទូក «ង» ទូកអន្តរជាតិ បណ្តែតប្រទីប តាំងពិព័រណ៍សមិទ្ធផលនានា ការប្រគំតន្ត្រី និងអុជកាំជ្រួច នៅក្រុងកំពង់ចាម ក្រោមអធិបតីភាពឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាអនុប្រធានក្រុមការងារចុះមូលដ្ឋានខេត្តកំពង់ចាម។ សូមបញ្ជាក់ថា ក្នុងរយៈពេល ៥ថ្ងៃ នៃការរៀបចំពិធីបុណ្យចេញព្រះវស្សា ខេត្តកំពង់ចាមទទួលបានភ្ញៀវទេសចរជាតិ និងអន្តរជាតិសរុបចំនួន ៦៧៦.៦៣៦នាក់ មកលេងកម្សាន្តក្នុងព្រឹត្តិការណ៍ប្រណាំងទូក បណ្តែតប្រទីប អុជកាំជ្រួច និងតាំងពិព័រណ៍សមិទ្ធផលនានា។ ដោយឡែក នៅថ្ងៃទី២៦ ខែតុលា ឆ្នាំ២០២៦ ដែលជាថ្ងៃចេញព្រះវស្សា មានភ្ញៀវទេសចរមកចូលរួមទស្សនា និងកម្សាន្តក្នុងពិធីប្រណាំងទូកសរុបចំនួន ៣៦១.១១៥នាក់ ក្នុងនោះ ភ្ញៀវទេសចរជាតិចំនួន ៣១៥.៣៣០នាក់ និងភ្ញៀវទេសចរអន្តរជាតិចំនួន ១៣៧នាក់។ ព្រឹត្តិការណ៍នេះបានរួមចំណែកបង្កើតបរិយាកាសសប្បាយរីករាយ ជំរុញការចូលរួមរបស់ប្រជាពលរដ្ឋ និងភ្ញៀវទេសចរ ព្រមទាំងលើកកម្ពស់សក្តានុពលទេសចរណ៍របស់ខេត្តកំពង់ចាម។

រដ្ឋបាលខេត្តកំពង់ចាម សូមថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តម ហែម សុវត្ថិ ប្រធានក្រុមការងាររាជរដ្ឋាភិបាលចុះមូលដ្ឋានឃុំកោះសូទិន និង លោកជំទាវ ព្រមទាំងក្រុមការងារ ដែលបានឧបត្ថម្ភគាំទ្រកម្មពិធីប្រណាំងទូក ដែលបានឧបត្ថម្ភថវិកាចំនួន 5000 $ (ប្រាំពាន់ដុល្លាអាមេរិក) ជូនដល់រដ្ឋបាលខេត្ត ក្នុងការចូលរួមចំណែករៀបចំពិធីប្រណាំងទូក ង ទូកខ្នាតអន្តរជាតិ បណ្ដែតប្រទីប អុចកាំជ្រួច និងតាំងពិព័រណ៍សមិទ្ធផល ក្នុងឱកាសពិធីបុណ្យចេញព្រះវស្សា ថ្ងៃទី២៦ ខែតុលា ឆ្នាំ២០២៦ នៅក្រុងកំពង់ចាម ឱ្យប្រព្រឹត្តទៅដោយរលូន ⁠អធិកអធម និងបង្កភាពសប្បាយរីករាយជូនដល់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ-អន្តរជាតិ។ សូមបួងសួងដល់វត្ថុស័ក្តិសិទ្ធិទាំងអស់ក្នុងលោក សូមជួយប្រោះព្រំសព្ទសាធុការពរជ័យ សិរីសួស្តី ជ័យមង្គល និងវិបុលសុខគ្រប់ប្រការជូនចំពោះឯកឧត្តម និងលោកជំទាវ ព្រមទាំងក្រុមការងារ សូមបានប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។

អាជីវករលក់ផលិតផលខ្មែរអំពាវនាវពលរដ្ឋគាំទ្រផលិតផលស្នាដៃកូនខ្មែរ ដើម្បីជួយលើកកម្ពស់សេដ្ឋកិច្ចក្នុងស្រុក

អភិបាលខេត្តកំពង់ចាម អញ្ជើញបើកការប្រណាំងទូក បណ្តែតប្រទីប តាំងពិរព័រណ៍ និងអុជកាំជ្រួច នៅក្រុងកំពង់ចាម (កំពង់ចាម)៖ អភិបាលខេត្តកំពង់ចាម ឯកឧត្តម អ៊ុន ចាន់ដា រួមជាមួយថ្នាក់ដឹកនាំខេត្ត មន្ទីរអង្គភាពក្នុងខេត្តជាច្រើនទៀត នៅព្រឹកថ្ងៃទី២៦ ខែតុលា ឆ្នាំ២០២៦ នេះ បានអញ្ជើញប្រកាសបើកការប្រណាំងទូក បណ្តែតប្រទីប តាំងពិរព័រណ៍ និងអុជកាំជ្រួច នៅក្រុងកំពង់ចាម ។ ថ្លែងក្នុងឱកាសនោះ ឯកឧត្តម អ៊ុន ចាន់ដា បានសម្តែងនូវសេចក្តីសោមនស្សរីករាយក្រៃលែង ដោយបានឃើញបងប្អូន ប្រជាពលរដ្ឋ កីឡាករចំណុះទូក ដែលបានមកចូលរួមដោយទឹកមុខសប្បាយរីករាយ ក្នុងមហាគ្រួសារខ្មែរ ក្រោមដំបូលសុខសន្តិភាព។ ជាមួយគ្នានោះ ឯកឧត្តមអភិបាលខេត្ត បានវាយតម្លៃខ្ពស់ចំពោះថ្នាក់ដឹកនាំខេត្ត មន្ទីរ-អង្គភាពជុំវិញខេត្ត រដ្ឋបាលក្រុង-ស្រុក កងកម្លាំងប្រដាប់អាវុធទាំង៣ប្រភេទ រួមនឹងមន្ត្រីរាជការទាំងអស់ក្នុងខេត្ត ដែលបានសហការរៀបចំកម្មវិធីប្រណាំងទូក ការតាំងពិព័រណ៍ បណ្ដែតប្រទីប និងអុចកាំជ្រួច ដើម្បីបង្លក្ខណ:សប្បាយរីករាយជូនបងប្អូនប្រជាពលរដ្ឋខេត្តកំពង់ចាម និងបណ្តាខេត្តនានាដែលនៅជិតខាង ជាមួយនឹងការផ្សារភ្ជាប់មនោសញ្ចេតនារឭកដឹងគុណទៅដល់ថ្នាក់ដឹកនាំ និងវីរយុទ្ធជនជួរមុខ ដែលបញ្ជាក់ពីអត្ថន័យដ៏ ច្បាស់លាស់មួយគឺ ពួកយើងមានសេចក្តីសុខ ពួកយើងអាចរៀបចំព្រឹត្តិការណ៍កម្សាន្តសប្បាយបាន ក្នុងន័យថែរក្សាវប្បធម៌ ប្រពៃណី ដែលជាអត្តសញ្ញាណជាតិ មិនអាចប្រទេសណាមួយមកក្លែងបន្លំបានឡើយ។ ឯកឧត្តមអភិបាលខេត្តបានបន្តថា យើងអាចរៀបចំព្រឹត្តិការណ៍សប្បាយរីករាយនេះបាន គឺដោយសារការដឹកនាំដ៏ត្រឹមត្រូវ និងមុតស្រួចរបស់រាជរដ្ឋាភិបាល ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី មានវីរភាពរបស់យុទ្ធជនជួរមុខ ដែលបានឈរជើងយ៉ាងរឹងមាំ មានកម្លាំងមហាសាមគ្គីរបស់មហាជន ខ្មែរ ដែលបានវេញធ្លុងគ្នាតែមួយ បង្កើតបានជាខែលការពារអធិបតេយ្យ និងបូរណភាពទឹកដី ការពារនូវកិត្តិយស និងសេចក្ដីថ្លៃថ្នូររបស់ជាតិ និងប្រជាជន។ ទន្ទឹមនឹងនេះ ឯកឧត្តមអភិបាលខេត្តបានយកឱកាសនេះ សូមថ្លែងអំណរគុណ និងដឹងគុណដ៏ខ្ពង់ខ្ពស់បំផុតជូនចំពោះ សម្តេចអគ្គមហាសនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចមហាបវរធិបតី ប៊ុន ម៉ាណែត នាយករដ្ឋមន្ត្រី និង លោកជំទាវបណ្ឌិត ពេជ ចន្ទមុនី ប៊ុន ម៉ាណែត ព្រមទាំងវីរយុទ្ធជនជួរមុខ ទាំងអស់ សម្រាប់ការលះបង់ដ៏ធំធេង និងតែងតែនៅជាមួយ ការពារជាតិនិងប្រជាជនគ្រប់កាលៈទេសៈ ។