✨रंगले जग कवितांचे✨ Owner= प्रांजल

*वर्तुळ* या भौतिक सुखाचे अन् जगण्याचे वर्तुळ, जन्मांतरीही कळत नाही, नेमके कसे जगावे याचे गणित, शेवटपर्यंत सुटत नाही... काळाला कवेत घेणाऱ्या लाटा, बाहूंमध्ये येण्यापूर्वी शांत होत नाही, अन अथांग किनाऱ्यावर उभे राहून, समुद्राचा तळ कधी दिसत नाही... तसेच आहे कोडे या जन्म-मृत्यूचे, जे अंतिम प्रवासातही सुटत नाही, काय या खाणाखुणा प्रेम-विरहाच्या, हा अनोखा भास सुखस्वप्नात का बदलत नाही? या वेड्या मनाला स्वतःचीच भाषा, नेमकी का उमजत नसावी? जे कधीच भेटणार नाही, त्याची ओढ आयुष्यभर का संपत नसावी? डोईवरचे हे नियतीचे वर्तुळ, नेमके गोलच का असावे? हा एकच यक्षप्रश्न आहे, ज्याचे उत्तर स्वतःलाच कधी सापडत नाही... - विकास सुखधाने, साहित्यिक