باوکی عبدالله

بۆچی ناتوانم شەونوێژ و خەتمی قورئان ئەنجام بدەم؟! پێش ئەوەی تەنها خەمت شەونوێژ و زۆریی خەتمکردن و قورئان خوێندن بێت، سەیرێکی دڵی خۆت بکە، وە بخوێنەرەوە دەربارەی تاوان و نەخۆشییەکانی دڵ… کە هەندێکیان بریتین لە: (ڕیابازی، حەسادەت، سەرسامبوون بەخۆت، لووتبەرزی، کینە، ڕقەبەرایەتی، توڕەبوون بۆ غەیری خوای گەورە، ڕەزیلی، ڕەتکردنەوەی حەق بەهۆی لووتبەرزییەوە، تەماعکاری، ترسان لە هەژاری، ناڕازیبوون بە قەدەری خودا، لەخۆگۆڕان بەهۆی نیعمەتەوە، گەورەکردنی دەوڵەمەندەکان لەبەر سەروەتەکەیان، گاڵتەکردن بە هەژاران لەبەر هەژارییان، فەخرکردن بەخۆوە، فیز و دەعیە، پێشبڕکێکردن لەسەر دونیا، خۆهەڵکێشان، خۆڕازاندنەوە بۆ دروستکراوەکان، ماستاوچێتی و سازشکردن لەسەر حەق، حەزکردن بە وەسفکردن، سەرقاڵبوون بە عەیبەی خەڵکییەوە لەجیاتی عەیبەی خۆت، لەبیرکردنی نیعمەتەکان، هەروەها خۆشویستن و ئارەزووکردن و ترسان لە غەیری خوای گەورە). [الدر الثمين (575)] وە بیر لە حاڵی خۆت بکەرەوە، بزانە چەندەها نەخۆشی لە دڵتدا هەیە کەچی تۆ لێی بێئاگا و غافڵیت، لەوانەیە وا بزانیت تەزکیەی نەفست کردووە کەچی لە ڕاستیدا نەخۆشیت!! وە وا گومان مەبە کە مەسەلەکە تەنها بە زۆریی کردەوە و کۆششێکی گەورەوە بێت، لەگەڵ پشتگوێخستنی دڵ و نەدانی پشکی خۆی لە پاکبوونەوە و چاکسازی!! دڵ و تەزکیەی نەفس شایستەی پێدانی گرنگیی زیاترە، نە ستەم لەو بکە و نە ستەم لە خۆشت بکە. ئیبن ڕەجەبی حەنبەلی دەفەرموێت: (سەرقاڵبوون بە پاککردنەوەی دڵەکان باشترە لە زۆرکردنی ڕۆژوو و نوێژ لەگەڵ بوونی فێڵ و فەسادیی ناو دڵەکان). لطائف المعارف (446). هەروەها ڕەحمەتی خوای لێبێت دەفەرموێت: (زۆربەی پەرستشە سوننەتەکانی پێغەمبەری خوا صلى الله عليه وسلم و هاوەڵە تایبەتەکانی بە زۆریی ڕۆژوو و نوێژ نەبووە، بەڵکو بە چاکەکاریی دڵەکان و پاکی و سەلامەتییان و بەهێزیی پەیوەستبوونیان بە خوای گەورەوە بووە، ئەوەش لە ترسی ئەو و خۆشویستن و بەگەورەزانین و شکۆدارکردنی، وە ئارەزووکردنی ئەوەی لای خوایە، و دوورکەوتنەوە لەو شتانەی کە لەناو دەچن). لطائف المعارف (254)