بيت العافية 🇩🇿

بارك الله في كل اخت تواصلت معي على الخاص لأجل صنع برهم الحروق، راني تفاهمت مع الاخت زينوبيا راهي تسكن في جيجل و موالفة تخدم منتجات تجميلية علاجية اخترتها هي بالضبط لأنها بنت المنطقة وباش تصل المنتجات لها في اقرب وقت وتخدمهم وتعرف الناس المتضررة والأماكن المنكوبة https://t.me/Nourattabiaz

📢 نداء للحرفيات وصاحبات المبادرات الإنسانية 🤍 الحرفيات اللي يخدمو المنتجات التجميلية والعلاجية، عندي شمع النحل الطبيعي تاعنا، صافي 100% 🐝🌿 الشمع تم استخراجه بعد عصر العسل، ثم تم تذويبه وتنقيته جيدًا من جميع الشوائب، يعني شمع نقي وطبيعي. راني نبحث على وحدة تخدم مرهم للحروق، لأنني حابة نتطوع بهذا الشمع للمساهمة في مساعدة المتضررين من الحرائق في جيجل، سكيكدة والمناطق المتضررة. عندي شمع النحل + زيت الزيتون، والوصفة سبق ونشرتها في الصفحة، لكن ما عنديش زيت الضرو. إذا تعرفو حرفية أو أخت تخدم هذا المرهم، وتقدر تعاوننا في تحضيره، تبعثلي من فضلكم باش نتواصل معها ونبعثولها شمع النحل. 🤲 الهدف هو أن نتعاونوا ونوصلوا المساعدة للناس اللي محتاجتها فعلًا. ونحتاج أيضًا مساعدتكم في الوصول إلى صفحات موثوقة، جمعيات أو مبادرات تطوعية تقدر تتكفل بإيصال المرهم والمواد للمتضررين. 📌 طاقولنا في التعليقات الصفحات والجمعيات اللي تقدر تساعدنا، وبارك الله في كل واحد يساهم في نشر النداء. يدًا بيد، نقدروا نديروا حاجة مليحة ❤️🇩🇿

حابة نخدمها عندى شمع النحل الطبيعي وزيت الزيتون لكن ماعنديش زيت الضرو شكون لي تتطوع و تخدم هذا المرهوشكون يعرف جمعيات خيرية توزعه للمتضررين

💔 اليوم ماشي وقت نتفرجو ونحزنوا برك… اليوم وقت نكونوا يد وحدة ونعاونوا بعضانا! حرائق جيجل، سكيكدة، بجاية ومناطق أخرى خلّات قلوبنا موجوعة… كاين اللي فقد عزيز، وكاين اللي فقد داره ورزقه في لحظات. ربي يرحم الضحايا، يشافي المصابين ويحفظ أهلنا كامل 🤲🏻🇩🇿 🤍 وبما أن أي مساعدة تقدر تفرق، اليوم حبيت نشارككم طريقة تحضير البرهم تع زمان : 🐝 100غ شمع نحل تلقاوه عند العشاب 🫒 1 لتر زيت زيتون بكر طبيعي من مصدر موثوق 🌽 100غ زيت الضرو الأصلي نسخن زيت الزيتون بلا ما يغلي، ونضيفوه للشمع ونخلطوا حتى يذوب. ثم نضيفوا زيت الذرة ونخلطوا مليح حتى يتجانس الخليط، ونخليه يبرد في درجة حرارة الغرفة حتى يتحصل على قوام كريمي. شاركوها… يمكن توصل لإنسان اليوم محتاجها. 🤍 ربي يحفظ أهلنا، وما تنساوش إخوتنا من صالح دعائكم 🤲🏻

ليلة سوداء جوزناها البارحة في جيجل الجبال كلها نار الشمس حمراء دخان حارق حرارة عظيمة ، اصوات الاسعافات والشرطة لم تتوقف غادرنا جيجل مع ساعات الفجر الأولى طوابير كثيرة ، دخان ونيران في أعلى الطرقات ، الكهوف العجيبة أصبحت أعجوبة .. كنا نسارع الوقت للخروج من جيجل وإذا بنا نجد نفس الشي في بجاية الله المستعان ربي يرحم لي ماتو ويسلك لي بقاو

ينضج بداية من جويلية حتى اواخر اوت وذاتي التلقيح ميديرش الباكور وثمار تاعو كبار وغزير الانتاج يصلح التجفيف

يمكن تجفيف انواع التين الأخرى من خلال شقها إلى شقين أو أربعة ثم تركها في الشمس فوق حصيرة من دوم أو قصب في مكان مهوي ومشمس وتخزن ليلا هذه الطريقة نسموها الشريحة وتجي قاسية نوعا ما و القشرة غليظة وماشي طرية بعكس الأنواع الخاصة بالتجفيف تكون طرية ومعسلة وحلوة

🍈☀️ تجفيف التين بطريقة صحية وطبيعية من «دار العولة الصحية» 🌿 راني جئتكم بالطريقة الأصلية نتاع جدودنا لتجفيف الكرموس بدون مواد اضافيه أو كيميائية كما يفعل السورين والتركيين والمشارقة تجفيف التين التقليدي يبدأ من اختيار الصنف المناسب. ماشي كل أنواع التين تصلح بنفس الدرجة؛ الأفضل تين ناضج، حلو، متماسك وغني بالسكريات والمواد الصلبة. ومن الأصناف المعروفة للتجفيف «تعمريت»، ثماره بيضاء وحلوة ومعسلة، وعند اكتمال نضجها تبدأ تجف وحدها فوق الشجرة. 🌳 نخليو التين يكمل نضجه، حتى يفقد جزءاً من مائه وينكمش ويولي أكثر حلاوة وتركيزاً، ثم يسقط وحده أو نهزو الشجرة باش تسقط الثمار الناضجة. 🧺 نجمعوه ونفرشوه فوق حصيرة نظيفة وجافة أو مسطحات من القصب مرفوعة عن الأرض، في مكان مشمس وجيد التهوية، ونرتبوه في طبقة واحدة ونقلبوه من وقت لآخر. 🌧️ أهم شرط: الماء ما يقيسوش! نحموه من المطر والندى والرطوبة، لأن رجوع الماء للثمرة يبطئ التجفيف ويرفع خطر العفن والخمائر. 🔬 علمياً، التجفيف يقلل الماء المتاح لنمو الكائنات الدقيقة، بينما تتركز السكريات الموجودة أصلاً، لذلك يصبح التين أحلى. يعني ما زادش فيه السكر، وإنما الماء هو اللي نقص. 🏺 وبعد ما يكمل جفافه، نجمعوه ونحفظوه في وعاء فخاري نظيف وجاف أو سلل وقفف من الدوم ، مع التأكد أن التين جاف بما يكفي قبل التخزين. 🌿 إذن سر تجفيف الكرموس ونجاحه يعتمد على نوعية التين بدرجة 70% ثم بقية العوامل الأخرى

الكتابة 🍅 كيفاش نختارو أفضل طماطم للتجفيف؟ | من دار العولة الصحية 🍅 ماشي كل طماطم تصلح بنفس الدرجة للتجفيف، والفرق ماشي في اللون والشكل فقط… الفرق الحقيقي راهو في كمية اللب والماء داخل الثمرة. إذا حبيتي طماطم مجففة بنينة، مركزة وتعطيك مردود مليح، اختاري طماطم تكون: 🍅 ملحمة وكثيفة: يعني فيها كمية كبيرة من اللب مقارنة بالعصارة. 🍅 قليلة الماء والعصارة: كلما كانت مائية بزاف، راح تحتاج وقت أطول باش تنشف وتعطيك وزن أقل بعد التجفيف. 🍅 ذات جدار لحمي سميك: كي تقطعيها، لازم تشوفي طبقة مليحة من اللب، وما تكونش أغلبها جيوب كبيرة مليانة عصارة وبذور. 🍅 ناضجة مليح ولونها أحمر قوي: لأن النضج الجيد يعطي نكهة ولونًا أفضل بعد التجفيف. 🍅 قليلة الفراغات والهلام: لأن الجزء الهلامي المحيط بالبذور غني بالماء، ووجوده بنسبة كبيرة يقلل من مردود التجفيف. 🔎 كل هذه المواصفات موجودة في طماطم روما بأنواعها منها زنڨولا المعروفة في الجزائر ذات 3 جيوب، ملحمة وقليلة العصارة، بينما الأنواع الأخرى عندها جيوب كبيرة 5 مليانة هلام وعصارة، فالأولى غالبًا تكون أفضل للتجفيف وتعطي مردودًا أعلى.و الأوفر والأفضل اقتصاديًا للعولة. 🌿 دار العولة الصحية نحوّل خيرات الموسم إلى عولة منزلية صحية، عملية واقتصادية. ❤️

عولة الفلفل الصيفية بأنواعها كلها في منشور واحد (الهريسة والدرسة والهريسة عربية وفلفل عكري و بوفجوخ وبومنقوع ..) زيدو ذكروني بوصفات اخرى ما حطيتهاش و من فضلكم جام وبارتاج وكومنتار باش تصل هذه الوصفات لأكبر فئة من الناس

الهريسة والدرسة طريقة صنعها واحدة الاختلاف يكون في نوع الفلفل هل هو حار أو حلو

🌶️ هريسة حارة منزلية من دار العولة الصحية 🌶️ إذا عندكم فلفل أحمر حار، ملحم وطويل ولونه أحمر أرجواني قاتم، نقدروا نحولوه لعولة بنينة وعملية نستعملوها في الشطاطح والتتبيلات والمرقة الحمراء. نحتاجو: فلفل أحمر حار، رأس ثوم، ملعقة كبيرة قصبر وكروية، ملعقة كبيرة ملح، وفنجان زيت زيتون. نغسلو الفلفل مليح، ننحيو الرأس والبذور والقطمير، ثم نقطّعوه ونحطوه يفور على البخار حوالي نصف ساعة، مع التقليب من وقت لآخر باش يوصل البخار لجميع القطع. بعد ما يطيب، نخليه يبرد ويتقطر مليح. والأفضل نحطوه في مصفاة داخل الثلاجة ليلة كاملة، باش نتخلصو من أكبر قدر ممكن من الماء. في اليوم الموالي نرحي الفلفل مع الثوم في الأشوار أو بالرحاية التقليدية، ثم نحط الخليط في قدر ونضيفولو الملح والقصبر والكروية وزيت الزيتون. نخليه على نار هادئة مع التحريك المستمر حتى تتبخر الرطوبة الزائدة ويولي الخليط كثيف ومتماسك. ونقدرو حتى ندخلوه للفرن مدة قصيرة على حرارة هادئة باش يعاوننا ينشف أكثر من الرطوبة، ويزيد يعطيه بنة مميزة. بعد ما تبرد الهريسة، نعمرها في برطمانات زجاجية نظيفة ومعقمة ونغلقوها مليح. إذا راح نحفظوها في الثلاجة للاستعمال القريب، نكتفيو بالتبريد. أما إذا حبينا نحفظوها كعولة لمدة أطول، فالأفضل تصبيرها وتعقيمها في حمام مائي لمدة ساعة ثم تركها تبرد وتخزين في البلاكار لمدة سنة كاملة وهذه الهريسة تجي روعة في الشطاطح بأنواعها: شطيطحة سردين، دجاج، لحم… وحتى في التتبيلات والمرقة الحمراء. 🌶️🔥 من دار العولة الصحية… وصفة بسيطة، مكونات نظيفة، وعولة تربحلكم الوقت وتزيد البنة لأطباقكم. ❤️ لي عندها طريقة خلاف تحطها في