ኢብን ሽፋ - Ibn Shifa

እኛስ በጥላው ስር የምንሆንበት ከየትኛው የመልካም ስራ አይነት አለንበት?! እራሳችንን እንፈትሽ!! ————— አቢሁረይራ (ረዲየላሁ ዐንሁ) የአላህ መልእክተኛ (ሶለላሁ ዐለይሂ ወሰለም) እንዲህ ብለዋል አለ:- “ሰባቶቹን አላህ ጥላ በሌለበት ቀን በጥላው ስር ያደርጋቸዋል፣ 1, ፍትሃዊ መሪ፣ 2, አላህን በማምለክ (በዒባዳ) ያደገን ወጣት፣ 3, ልቡ ወደ መስጂድ የተንጠለጠለን ሰው፣ 4, ሁለት ለአላህ ብለው የሚዋደዱ ሰዎችን በእርሱ ጉዳይ ዱኒያ ላይ የተሰባሰቡ ሆነው በሞት ምክንያት የተለያዩ፣ 5, የመልካም ዝና (የተከበረ) ቤተሰብ አባልና የቁንጅና ባለ ቤት የሆነች ሴት ለሀራም ነገር ጠርታው እኔ አላህን እፈራለሁ ያላትን ወንድ፣ 6, ቀኝ እጁ የምትሰጠውን ግራ እጁ እስከማታውቅ ሶደቃን ደብቆ ለአላህ ብሎ የሰጠን ሰው፣ 7, ብቻውን ገለልተኛ ቦታ ሆኖ አላህን በማስታወስ ዓይኖቹ ያነቡን ሰው።” [ቡኻሪይና ሙስሊም ዘግበውታል] ታላቁ ሊቅ ኢብን ረጀብ አል-ሀንበሊ (ረሂመሁላህ) ይህን ሀዲስ ሲያብራሩ እንዲህ አሉ:- “ከእነዚህ ከሰባቶቹ የመጀመሪያው ፍትሃዊ መሪ ነው የተጠቀሰው። እርሱም በእለተ ትንሳዔ ከሌሎች ሰዎች ይበልጥ አላህ ዘንድ ቅርብ ነው። እርሱም ከአር-ረህማን ከቀኙ በኩል በሚንበር ላይ ነው። ይህ እድልም ስሜቱን አላህን ከማመፅ በመቃረኑ ምክንያት ነው፣ በቁጣ ጊዜም ሆነ በሌላ ጊዜ ያሻውን ለመወሰን ሙሉ ስልጣን እያለው ስሜቱ ወደ ጥፋት እየጠራችው በመታገሱና ስሜቱን በመቆጣጠሩ ምክንያት ነው። ፍትሃዊ መሪ ማለት ዱኒያ በሁሉ ነገሯ ወደ ራሷ ጠርታው እኔ የዓለማቱን ጌታ አላህን እፈራለሁ! ያለ ነው። እንዲህ ያለው መሪ ለአላህ ባሮች እጅግ ጠቃሚ ነው!። እርሱ ከተስተካከለ በጥበቃው ስር ያለው ሁሉ ይስተካከላል። በእርግጥ እንዲህ ያለው መሪ ‘ምድር ላይ የአላህ ጥላ ነው’ የሚልም ተዘግቧል፣ ምክንያቱም ፍጡሮች ሁሉ በእርሱ ጥላ ስር ይጠለላሉና በእነርሱ ፍትሃዊ ሰው ከሆነ አላህ  በጥላው ስር እንዲጠለል ያደርገዋል።” [ፈትሁ'ል ባሪ ሊብን ረጀብ ጥራዝ 4/59] ➣ ታላቁ ፈቂህ ኢብኑ ዑሰይሚን (ረሂመሁላህ) እንዲህ አሉ:- “በእርሱ ምክንያት ተሰባስበው በእርሱም ምክንያት የተለያዩ…’ ማለት:- ለአላህ ብሎ በመዋደድ ምክንያት ዱኒያ ላይ ተሰባስበው ውዴታቸው ሞት እስከሚለያያቸው ድረስ ቀጥለው በዚያው ሁኔታ እያሉ በሞት የተለያዩ ማለት ነው። ይህ የሚያመለክተው ለአላህ ብለው የሚዋደዱ ሰዎች ውዴታቸውን አንዳችም ዱኒያዊ ጉዳይ እንደማያቋርጠው ነው። እነርሱ የሚዋደዱ እንደሆኑ ይቀጥላሉ ውዴታቸውንም ሞት እንጂ አያቋርጠውም!። አንዳቸው በሌላኛው ላይ ቢሳሳት (ስህተት ቢፈፅምበት) እንኳን አለያም አንዱ በሌላው ላይ (ከወንድማዊ) ሀቁ ቢያጎድልበት ይህ አያንገበግባቸውም (ለእንዲህ ያለው ነገር ትኩረት ሰጥተው አይጣሉም) ምክንያቱም ለአላህ ብለው ነው የተዋደዱት፣ ነገር ግን ስህተቱን ያስተካክልለታል ያጎደለበትን (ወንድማዊ መብቱን) ግልፅ ያደርግለታል፣ ምክንያቱም ይህ ሙሉ ከሆነው ምክክር ነው። አላህ እኛንም አጠቃላይ ሙስሊሞችንም ለአላህ ብለው ከሚዋደዱት፣ በመልካም ነገርና አላህን በመፍራት ከሚረዳዱት እንዲያደርገን እንጠይቀዋለን!!።” [ሸርህ ሪያዱ ሷሊሂን ጥራዝ 2/155] ❓የቂያማ እለት የተጠቀሰው ጥላ የአላህ ጥላ ወይስ የፍጡር ጥላ ነው?! ታላቁ ፈቂህ ኢብኑ ዑሰይሚን (ዐለይሂ ረህመቱላህ) እንዲህ አሉ:- “በዚያች ከባድ ቀን ፍጥረታትን ከፀሃይ ሊከላከል የሚችል አንዳች ነገር የለም!። ዛፍም ድንጋይም ሆነ የተገነባ ነገር… ሌላም ነገር የለም። ነገር ግን አላህ ከፍጡራኖቹ የፈለገውን መርጦ የሚያጠልልበትን ጥላ ነገር ይፈጥራል፣ በእርሱም ጥላ በሌለበት ቀን በጥላው ስር ያደርጋቸዋል። ይህ ነው የሀዲሱ ትርጉም ሌላ ትርጉም ሌኖረውም አይፈቀደም!።” [ሸርህ ሪያዱ ሷሊሂን ጥራዝ 2/155] ልብ በሉ!:- አላህ ለእለተ ትንሳዔ የሚፈጥረው የሆነ ራሱን የቻለ ጥላ ነገር ነው እንጅ የአላህ የዛቱ ጥላ ነው ማለት አይደለም!። አላህ ሆይ! ወደር የሌለህ አዛኝ ነህና በእዝነትህና በይቅር ባይነትህ ጥላ በሌለበት ቀን በጥላው ስር ከምታደርጋቸው ደጋግ ባሮችህ አድርገን!! ✍🏻ኢብን ሽፋ (t.me/ibnshifa) የተለያዩ ት/ቶችን ለማግኘት የቴሌግራም ቻናላችን ⤵️ #join በማድረግ ይቀላቀሉ https://telegram.me/IbnShifa https://telegram.me/IbnShifa Follow Ibn Shifa's WhatsApp Channel: ⤵️⤵️ https://whatsapp.com/channel/0029VbAU7moHgZWXXXnNiL3f