រដ្ឋបាលខេត្តកំពង់ចាម

ឯកឧត្ដម​ អ៊ុន​ ចាន់ដា​ អះអាងថា​ ចាប់ពីមានសង្គ្រាមឈ្លានពានពីប្រទេសថៃ ខេត្តកំពង់ចាម ទទួលជនភៀសសឹករហូតដល់ ៩.៩៧៨គ្រួសារ មានទាំងចាស់ជរា ស្ត្រីមានផ្ទៃពោះ និងកុមារ កំពង់ចាម​:​ ឯកឧត្តម អ៊ុន ចាន់ដា សមាជិកគណៈកម្មាធិការកណ្តាល ប្រធានគណៈកម្មាធិការបក្ស​ប្រជាជន​កម្ពុជា​ខេត្តកំពង់ចាម​ បានអះអាងថា​ ចាប់ពីមានសង្គ្រាមឈ្លានពានពីប្រទេសថៃ ខេត្តកំពង់ចាម ទទួលជនភៀសសឹករហូតដល់ ៩.៩៧៨គ្រួសារ ដែលមានមនុស្ស ប្រមាណ ២៩.៨៨០នាក់ មានទាំងចាស់ជរា ស្ត្រីមានផ្ទៃពោះ និងកុមារ​ ថ្លែងបែបនេះ​ក្នុងពិធីសំណេះសំណាលជាមួយយុវជនគណបក្សទូទាំងខេត្តកំពង់ចាម​ នាព្រឹកថ្ងៃទី​៧​ ខែកុម្ភៈ​ ឆ្នាំ​២០២៦​ ក្រោមវត្តមាន​ឯកឧត្តមបណ្ឌិត ជ្រុន ថេរ៉ាវ៉ាត សមាជិកគណៈកម្មាធិការកណ្តាល អនុប្រធានយុវជន គណបក្សថ្នាក់កណ្តាល និងជាប្រធានគណៈប្រចាំការនៃគណៈអចិន្ត្រៃយ៍យុវជនគណបក្ស ថ្នាក់កណ្តាល​ និង​ឯកឧត្តម កែវ រតនៈ សមាជិកគណៈកម្មាធិការកណ្តាល និងជាអនុប្រធានយុវជនគណបក្ស ថ្នាក់កណ្តាល​។ ថ្លែងក្នុងឱកាសនោះដែរ​ ឯកឧត្ដម​ អ៊ុន​ ចាន់ដា​ មានប្រសាសន៍ថា​ តាមរយៈសារនយោបាយជាបន្តបន្ទាប់ របស់ សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត លើបញ្ហាសំខាន់ៗរបស់ជាតិ ធ្វើឱ្យមហាជន បានឃើញច្បាស់ពីការរីកចម្រើនរបស់ជាតិ យល់ដឹងអំពីគោលការណ៍ គោលនយោបាយ របស់រាជរដ្ឋាភិបាល អំពីសភាពការណ៍ និងភារកិច្ចសំខាន់ៗ រួមទាំងឧបាយកល ដ៏ពិសពុលរបស់ពួកប្រឆាំងជ្រុលនិយម ជាពិសេសអំពីគោលជំហរដ៏ត្រឹមត្រូវរបស់កម្ពុជា ក្នុងការដោះស្រាយបញ្ហាព្រំដែនជាមួយប្រទេសថៃ ដោយសន្តិវិធី ឈរលើគោលការណ៍ច្បាប់អន្តរជាតិ និងការទូត។ ជាមួយគ្នានោះ​ ឯកឧត្ដម​ អ៊ុន​ ចាន់ដា​ ក៏បានសង្កត់ធ្ងន់ថា​ ទង្វើឈ្លានពានរបស់ថៃ បានធ្វើឱ្យ ប្រជាជនកាន់តែយល់ច្បាស់ អំពីគុណតម្លៃនៃសន្តិភាព ហើយក៏បញ្ជាក់ឱ្យឃើញច្បាស់ផងដែរថា ពាក្យ “អរគុណសន្តិភាព” ត្រូវតែលើកកម្ពស់។ ស្មារតីពង្រឹងសាមគ្គី ឯកភាពជាតិ ត្រូវបានពុះកញ្ជ្រោលឡើង នៅក្នុងចំណោមមហាជន យុវជន ដែលបានបង្ហាញច្បាស់តាមរយៈការគាំទ្រពេញទំហឹង ដល់វីរយុទ្ធជន សមរភូមិមុខ និងរាល់ចំណាត់ការ របស់រាជរដ្ឋាភិបាល ក្នុងនោះ រួមទាំងការគាំទ្រគ្រប់លទ្ធភាព ដល់វីរៈ កងទ័ព និងជនភៀសសឹកផងដែរ​៕

ឯកឧត្តម អ៊ុន ចាន់ដា ប្រធានគណៈកម្មាធិការគណបក្សខេត្ត ផ្ញើសារលិខិតសម្ដែងការអបអរសាទរគោរពជូនពរ សម្ដេច វិបុលសេនាភក្ដី សាយ ឈុំ អនុប្រធានគណបក្សប្រជាជនកម្ពុជា និងជា ឧត្តមប្រឹក្សាផ្ទាល់ព្រះមហាក្សត្រ ក្នុងឱកាសខួបចំរើនអាយុវឌ្ឍនៈ បវរសួស្ដី សិរីមង្គល ជូនសម្ដេច 🙏❤️🎂

ឯកឧត្តម ខ្លូត ផន ថ្លែងការកោតសរសើរចំពោះ គ.ក.ស.ក ខេត្តកំពង់ចាម ដែលបានខិតខំប្រឹងប្រែងបំពេញតួនាទីស្របតាមគោលនយោបាយ របស់ប្រមុខរាជរដ្ឋាភិបាលកម្ពុជា (កំពង់ចាម) ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ថ្លែងការកោតសរសើរចំពោះ គ.ក.ស.ក ខេត្ត ដែលបានខិតខំប្រឹងប្រែងបំពេញតួនាទី ភារកិច្ចរបស់ខ្លួនស្របតាម គោលនយោបាយដ៏ត្រឹមត្រូវរបស់ប្រមុខរាជរដ្ឋាភិបាល នៃព្រះរាជាណាចក្រកម្ពុជាដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងតែយកចិត្តទុកដាក់ចំពោះការគាំពារសុខភាព ជីវភាព ការផ្តល់សេវាសង្គម លើកកម្ពស់សមភាពយេនឌ័រ តម្រូវការស្ត្រី យុវជន កុមារ និងការងារសេវាសង្គមពាក់ព័ន្ធនានា នៅតាមឃុំ/សង្កាត់ ។ ថ្លែងបែបនេះនាព្រឹកថ្ងៃទី០៦ ខែមករា ឆ្នាំ២០២៦ នៅសាលាខេត្តកំពង់ចាម ថ្លែងក្នុងពិធីបើកកិច្ចប្រជុំបូកសរុបលទ្ធផលការងាររបស់គណៈកម្មាធិការ ពិគ្រោះយោបល់កិច្ចការស្ត្រី និងកុមារ ខេត្តកំពង់ចាម ប្រចាំឆ្នាំ២០២៥ និងលើកទិសដៅការងារឆ្នាំ២០២៦។ ដោយមានការអញ្ជើចូលរួមពី លោកជំទាវ អៀម វណ្ណី ប្រធាន គ.ក.ស.ក ខេត្ត និងលោកជំទាវ ជាអនុប្រធាន ព្រមទាំងលោក លោកស្រី ប្រធាន អនុប្រធានមន្ទីរ និង លោក លោកស្រី គ.ក.ស.ក ក្រុង-ស្រុកទាំង១០ផងដែរ។ ឯកឧត្តម ខ្លូត ផន ប្រធានក្រុមប្រឹក្សាខេត្ត ថ្លែងថា រាជរដ្ឋាភិបាលបានលើកកម្ពស់ និងយកចិត្តទុកដាក់ចំពោះស្ត្រី កុមារ ព្រមទាំងប្រជាពលរដ្ឋ និងជនងាយរងគ្រោះ ជាពិសេសបានផ្តល់ជូន នូវប្រាក់ឧបត្ថម្ភមួយចំនួន សម្រាប់ជួយដល់មាតា ទារក កម្មករ កម្មការីក្នុងរោងចក្រស្របតាមគោល នយោបាយសម្រាប់ផ្តល់មាតាភាព និងកម្មវិធីជំនួយសង្គមពិសេសសំដៅជួយដល់ជនក្រីក្រដែលមាន ប័ណ្ណសមធម៌ (ក្រ-១ និងក្រ-២) ដើម្បីសម្រាលដល់ជីវភាពក្នុងការរស់នៅ និងការបើកប្រាក់ឧបត្ថម្ភ សម្រាប់កម្មវិធីជាតិជំនួយសង្គម ផ្នែកបណ្តុះបណ្តាលជំនាញវិជ្ជាជីវៈ និងបច្ចេកទេសសម្រាប់យុវជន មកពីគ្រួសារក្រីក្រ និងគ្រួសារងាយរងហានិភ័យ ។ លើសពីនេះ រាជរដ្ឋាភិបាលបាននឹងកំពុងយកចិត្តទុកដាក់ ជួយគាំទ្រ និងសម្របសម្រួលក្នុងគោលដៅ កាត់បន្ថយវិសមភាពយេនឌ័រ និងខិតខំរៀបចំគោលនយោបាយ ផែនការយុទ្ធសាស្ត្រស្តីពី ការបង្កើន ចំនួនស្ត្រីក្នុងមុខតំណែងគ្រប់គ្រងនៅរដ្ឋបាលថ្នាក់ក្រោមជាតិ (២០២៤-២០២៨) ព្រមជាមួយការ ណែនាំ ដើម្បីដោះស្រាយតម្រូវការរបស់ស្ត្រី និងក្មេងស្រីនៅកម្ពុជា ឱ្យបានកាន់តែប្រសើរឡើង៕

អបអរសាទរ​ ពិធីចុះហត្ថលេខាលើអនុស្សរណៈនៃការយោគយល់រវាងខេត្តសម្ព័ន្ធមេត្រីភាព​ កំពង់ចាម​-ដុងណាយ​ (កម្ពុជា-វៀតណាម​)​ នៅព្រឹកថ្ងៃទី៦ ខែមករា ឆ្នាំ២០២៦ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញចូលរួមក្នុងពិធីចុះហត្ថលេខាលើអនុស្សរណៈនៃការយោគយល់រវាងខេត្តសម្ព័ន្ធមេត្រីភាព​ កំពង់ចាម​-ដុងណាយ​ (កម្ពុជា-វៀតណាម)) ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា​ និងជាប្រធានគណបក្សប្រជាជនកម្ពុជា និងឯកឧត្តម តូ ឡឹម (TO Lam ) ប្រមុខរដ្ឋវៀតណាម ស្ថិតនៅវិមាន ៧មករា រាជធានីភ្នំពេញ។

សមត្ថកិច្ចជលផលខេត្តកំពង់ចាម ចុះប្រតិបត្តិការបង្ក្រាបបទល្មើសនេសាទ ២ករណីក្នុងស្រុកកំពង់សៀម និងស្រុកស្ទឹងត្រង់ កំពង់ចាម : នៅថ្ងៃទី៥ ខែកុម្ភ: ឆ្នាំ២០២៦ នេះ សមត្ថកិច្ចជលផលខេត្តកំពង់ចាម បានសហការជាមួយអាជ្ញាធរមូលដ្ឋាន ចុះបង្ក្រាបបទល្មើសនេសាទបាន ២ករណីក្នុងស្រុកកំពង់សៀម និងស្រុកស្ទឹងត្រង់។ បើតាមមន្ត្រីជលផលបានឲ្យដឹងថា ក្នុងប្រតិបត្តិការខាងលើនោះ គឺខណ្ឌរដ្ឋបាលជលផលកំពង់ចាម បានសហការជាមួយអធិការដ្ឋានរដ្ឋបាលជលផលមេគង្គ ដោយមានការ សម្របសម្រួលពី ឯកឧត្តមព្រះរាជអាជ្ញា នៃអយ្យការអមសាលាដំបូងខេត្តកំពង់ចាម ចុះប្រតិបត្តិការត្រួតពិនិត្យ និងបង្រ្កាបបទល្មើសជលផល បានចំនួន ០២ករណី ដោយជនសង្ស័យគេចខ្លួនបាត់បន្សល់ទុកនូវវត្ថុតាងបទល្មើសជលផលរួមមាន៖ ករណីទី០១-កន្ត្រងមានភ្ជាប់ខ្សែភ្លើងចំនួន ០២ ក្រុមការងារអធិការកិច្ចជលផលបានបន្តតាមដាន និងស្រាវជ្រាវបន្ថែមលើករណីនេះ នៅចំណុចបឹងធំ ភូមិក្តីបឹង ឃុំវិហារធំ ស្រុកកំពង់សៀម។ ករណីទី០២ -ដងឆក់រួមផ្សំខ្សែរភ្លើងចំនួន ០២គូរ-កន្រ្តងដងត្រីចំនួន ០២ -អាគុយម៉ាក់ BLUE DOT កម្លាំង៤០អំពែរ ចំនួន០២គ្រឿង នៅចំណុច បឹងទួលព្រះឃ្លាំង ភូមិបឹង ឃុំទួលព្រះឃ្លាំង ស្រុកស្ទឹងត្រង់។

ថ្នាក់ដឹកនាំខេត្តកំពង់ចាម អញ្ជើញចូលរួមពិធីបិទសន្និបាតត្រួតពិនិត្យលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ (ទីស្តីការក្រសួងមហាផ្ទៃ) នារសៀលថ្ងៃទី៥ ខែកុម្ភៈ ឆ្នាំ២០២៦ នេះ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និង ឯកឧត្តម ខ្លូត ផន ប្រធានក្រុមប្រឹក្សាខេត្ត បានអញ្ជើញចូលរួមពិធីបិទសន្និបាតត្រួតពិនិត្យលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ស្ថិតនៅសាលប្រជុំអគារ S នៃទីស្តីការក្រសួងមហាផ្ទៃ។

សារលិខិតជូនពរ របស់ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម សូមគោរពជូនសម្ដេចវិបុលសេនាភក្ដី សាយ ឈុំ ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសពិធីចម្រើនជន្មាយុ

នៅព្រឹកថ្ងៃទី៥ ខែកុម្ភៈ ឆ្នាំ២០២៦ ឯកឧត្តម អ៊ុន ចាន់ដា អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម បានចាត់ឯកឧត្តម ស្រី សុភ័ក្ត្រ លេខាធិការសាខា រួមដំណើរដោយ ឯកឧត្តមនាយកសាខា លោក ប្រធានអនុសាខាស្រុក បាននាំយកគ្រឿងឧបភោគបរិភោគ និងបច្ច័យចូលរួមបុណ្យសព ឈ្មោះ អ៊ុន ចំរើន ភេទស្រី អាយុ ៤៩ឆ្នាំ ត្រូវជាប្រពន្ធ លោក ខុន វ៉ាន់ អាយុ ៤៣ឆ្នាំ ជាងជួសជុលម៉ូតូ មានទីលំនៅៗ ភូមិផ្អាវ ឃុំផ្អាវ ស្រុកបាធាយ ដែលបានទទួលមរណភាព កាលពីពេលថ្មីៗកន្លងទៅនេះ ដោយសារគ្រោះថ្នាក់ចរាចរណ៍ បង្កឡើងដោយរថយន្តម៉ាក Lexus 330 ដែលស្រវឹងស្រាជោគជាំបើករេចង្កូតទៅបុកម៉ូតូ ១គ្រឿងកំពុងបើកបរតាមផ្លូវហើយចូលដល់ក្នុងផ្ទះបណ្ដាលឱ្យឆេះទាំងរថយន្តជនបង្ក ឆេះទាំងផ្ទះស្នាក់នៅ និងបង្កឧ្យមានមនុស្សរបួសធ្ងន់ ១នាក់ និងស្លាប់បាត់បង់ជីវិតស្ត្រីម្ចាស់ផ្ទះ ១នាក់ នៅនឹងកន្លែង ។ ជនល្មើស ត្រូវបានឃាត់ខ្លួននិងចាត់វិធានការតាមច្បាប់ ។ ក្នុងឱកាសនោះដែរឯកឧត្តមបានផ្ដល់ជូនក្រុមគ្រួសារសព នូវគ្រឿងឧបភោគ បរិភោគ មួយចំនួន និងថវិកាចំនួន ១.៥០០.០០០រៀល ព្រមទាំងបានឧបត្ថម្ភថវិកាចំនួន ៥០០.០០០រៀល ដល់គ្រួសារបុរសដែលរងរបួសធ្ងន់កំពុងសង្គ្រោះបន្ទាន់នៅមន្ទីរពេទ្យកាល់ម៉ែត្រ ។

ថ្នាក់ដឹកនាំខេត្តកំពង់ចាម អញ្ជើញចូលរួមកិច្ចប្រជុំបូកសរុបលទ្ធផលសន្និបាតក្រសួងមហាផ្ទៃ (ទីស្តីការក្រសួងមហាផ្ទៃ): នាព្រឹកថ្ងៃទី៥ ខែមករា ឆ្នាំ២០២៦ នេះ ឯកឧត្ដម អ៊ុន ចាន់ដា អភិបាល នៃគណៈអភិបាលនៃគណៈអភិបាលខេត្តកំពង់ចាម និង ឯកឧត្តម ខ្លួត ផន ប្រធានក្រុមប្រឹក្សាខេត្ត អញ្ជើញ ចូលរួមក្នុងកិច្ចប្រជុំបូកសរុបលទ្ធផលសន្និបាតក្រសួងមហាផ្ទៃ ដើម្បីរាយការណ៍ជូនសម្ដេចធិបតី នាយករដ្ឋមន្រ្តី ក្នុងពិធីបិទនៅរសៀលនេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ។ បន្ទាប់ពីបានដំណើរការរយៈពេលមួយថ្ងៃកន្លះ គិតចាប់ពីព្រឹកថ្ងៃទី៤ ខែកុម្ភៈ ម្សិលមិញ នាព្រឹកថ្ងៃទី៥ ខែកុម្ភៈ នេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញបូកសរុបលទ្ធផលសន្និបាតត្រួតពិនិត្យលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងមហាផ្ទៃ។ ខ្លឹមសារសំខាន់ៗ នៃលទ្ធផលសន្និបាតនេះ នឹងត្រូវបានប្រមុខក្រសួងមហាផ្ទៃកម្ពុជា គោរពរាយការណ៍ជូន សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសដែលសម្ដេច នឹងអញ្ជើញជាអធិបតីភាពដ៏ខ្ពង់ខ្ពស់បិទសន្និបាត នារសៀលថ្ងៃដដែលនេះ។

នៅព្រឹកថ្ងៃ៤ ខែកុម្ភ: ឆ្នាំ២០២៦ ឯកឧត្តម ខ្លូត ចិន្តា អភិបាលរងខេត្ត និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំស្វាយទាប តំណាងដ៏ខ្ពង់ខ្ពស់ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមខេត្តកំពង់ចាម ដោយមានការនិមន្ត ចូលរួមពីព្រះចៅអធិការវត្តពាក់ព័ន្ធ ព្រមទាំងឯកឧត្តម នាយកសាខា , អាជ្ញាធរស្រុកឃុំ-ស្រុក បាននិមន្ត និងនាំយកនូវអំណោយមនុស្សធម៌របស់ម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងអណោយក្រុមការងារចុះជួយឃុំស្វាយទាបជូនគ្រួសារដែលបានរងគ្រោះអគ្គីភ័យ(ភ្លើងឆេះផ្ទះ)ចំនួន ៣គ្រួសារ នៅក្នុងឃុំស្វាយទាប ស្រុកចំការលើ ។ នាឱកាសនោះដែរឯកឧត្តម បានផ្ដល់អំណោយ ក្នុង១គ្រួសារទទួលបានអំណោយរបស់សាខាកាកបាទក្រហមកម្ពុជា ខេត្ត និងអំណោយរបស់ក្រុមការងារចុះមូលដ្ឋានឃុំស្វាប រួមមាន គ្រឿងឧបភោគ បរិភោគ និងសម្ភារមួយចំនួន ព្រមទាំងថវិកាសរុបចំនួន១.៤០០.០០០រៀល ផងដែរ។

សូមអបអរសាទរ ការិយាល័យប្រជាពលរដ្ឋខេត្តកំពង់ចាម ជាប់ជ័យលាភីលេខ១ ជាអង្គភាពឆ្នើមប្រចាំឆ្នាំ២០២៥។ ខេត្តកំពង់ចាម ក្រោមការដឹកនាំរបស់ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត បានធ្វើឲ្យខេត្តមួយនេះ ទទួលបានកេរ្តិ៍ឈ្មោះបោះសំឡេងល្បីរន្ទឺលើឆាកជាតិ-អន្តរជាតិ ប្រជាជនបានរស់នៅប្រកបដោយភាពសុខដុមរមនា ស្ថិតក្រោមម្លប់សុខសន្តិភាពសម័យ តេជោ-ធិបតី។

ថ្នាក់ដឹកនាំខេត្តកំពង់ចាម អញ្ជើញចូលរួមពិធីបើកសន្និបាតត្រួតពិនិត្យលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងមហាផ្ទៃ ទីស្ដីការក្រសួងមហាផ្ទៃ៖ នៅព្រឹកថ្ងៃទី៤ ខែកុម្ភៈ ឆ្នាំ២០២៦ នេះ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និង ឯកឧត្តម ខ្លូត ផន ប្រធានក្រុមប្រឹក្សាខេត្ត អញ្ជើញចូលរួមក្នុងពិធីបើកសន្និបាតត្រួតពិនិត្យលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងមហាផ្ទៃ ក្រោមអធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស្ថិតនៅសាលប្រជុំអគាS ក្រសួងមហាផ្ទៃ។ ពិធីនេះមានការអញ្ជើញចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួងមហាផ្ទៃ នាយករងខុទ្ទការល័យ អគ្គលេខាធិការ អគ្គនាយកដ្ឋានរដ្ឋបាល អគ្គស្នងការនគរបាលជាតិ អគ្គាធិការដ្ឋាន អគ្គនាយកដ្ឋានពន្ធនាគារ អគ្គនាយកដ្ឋានអត្តសញ្ញាណកម្ម អគ្គនាយកដ្ឋានភស្តុភារ និងហិរញ្ញវត្ថុ បណ្ឌិត្យសភានគរបាលកម្ពុជា អគ្គនាយកដ្ឋានសវនកម្មផ្ទៃក្នុង ក្រុមប្រឹក្សានីតិកម្ម សាលាជាតិរដ្ឋបាលមូលដ្ឋាន អគ្គនាយកដ្ឋានធនធានមនុស្ស អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ អគ្គលេខាធិការដ្ឋានគ្រឿងញៀន អគ្គលេខាធិការ គ.ជ.ប.ជ អគ្គលេខាធិការដ្ឋាន ក្រុមប្រឹក្សាកីឡាក្រសួងមហាផ្ទៃ រដ្ឋបាលរាជធានី ខេត្តទាំង២៥ តំណាងក្រសួង ស្ថាប័ន និងសមាជិក សជិកា ពាក់ព័ន្ធសរុបប្រមាណ៨០០នាក់។

លោកស្រី សម្បត្តិ ឆវី ភរិយាវីរយោធិនជួរមុខ ទិសសំពៅលូន ខេត្តបាត់ដំបង ទើបតែសម្រាលកូនរួច នៅភូមិថ្មគោល ឃុំរអាង ស្រុកកំពង់សៀម សប្បាយចិត្តបន្ទាប់ពីទទួលបានអំណោយពីថ្នាក់ដឹកនាំខេត្តកំពង់ចាម ។

នាព្រឹកថ្ងៃទី៣ ខែកុម្ភៈ ឆ្នាំ២០២៦ លោកជំទាវ ប៉ាង ដានី អភិបាលរងខេត្ត និងជាអនុប្រធានអចិន្ត្រៃយ៍សាខា តំណាងដ៏ខ្ពង់ខ្ពស់ ឯកឧត្តម អ៊ុន ចាន់ដា អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមខេត្តកំពង់ចាម ដោយមានការចូលរួមពី ឯកឧត្តម នាយកសាខា និងសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្ត ព្រមទាំងអាជ្ញាធរស្រុក បានចុះសួរសុខទុក្ខដល់ខ្នងផ្ទះ អ្នកស្រី សម្បត្តិ ឆវី អាយុ ៣១ឆ្នាំ ជាភរិយាវីរ: យោធិន ជួរមុខទិស សំពៅលូនដែលកំពុងសម្រាលក្រោយសម្រាលកូន នៅភូមិថ្មគោល ឃុំរអាង ស្រុកកំពង់សៀម។ ក្នុងឱកាសនោះដែរលោកជំទាវ និងក្រុមការងារ បានផ្តល់អំណោយមនុស្សធម៌ របស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ជូនអ្នកស្រី រួមមានគ្រឿងឧបភោគ បរិភោគ និងសម្ភារមួយចំនួន ព្រមទាំងថវិកាសរុបចំនួន ១.២០០.០០០រៀល។ សូមបញ្ជាក់ផងដែរថា អ្នកស្រី បានមកស្នាក់នៅផ្ទះម្តាយបង្កើត នៅភូមិថ្មគោល ឃុំរអាង ស្រុកកំពង់សៀម កាលពីថ្ងៃទី ៣១ ខែធ្នូ ឆ្នាំ២០២៥ ហើយបានសម្រាកសម្រាលកូន ដោយសុវត្ថិភាពនៅមន្ទីរពេទ្យបង្អែកខេត្តកំពង់ចាម ដែលសេវា សម្រាល និង ថែទាំព្យាបាល ជាបន្ទុកមន្ទីរពេទ្យបង្អែកខេត្តទាំងស្រុង នៅថ្ងៃទី ១ មករា ២០២៦ ។