Marhamat tumani hokimligi MATBUOT XIZMATI🇺🇿

MARHAMAT TUMANI HOKIMI ILYOSBEK UMRZAQOVNING “USTOZ VA MURABBIYLAR KUNI” MUNOSABATI BILAN BAYRAM TABRIGI Hurmatli ustoz va murabbiylar! Qadrli ta’lim sohasi fidoyilari! Avvalo, barchangizni yurtimizda keng nishonlanayotgan 1 oktyabr — "Ustoz va murabbiylar kuni" bilan samimiy muborakbod etaman!  Inson hayotida shunday kasb egalari borki, ularning mehnati yillar o‘tgani sayin yanada qadr topadi. Ustoz ana shunday ulug‘ zotdir. Ustoz shogirdiga nafaqat harf tanitadi, bilim beradi. U uning qalbiga ezgulik, Vatanga muhabbat, mehnatsevarlik, insonparvarlik va yurtga sadoqat tuyg‘ularini singdiradi. Shu bois har bir inson hayotida uning birinchi ustozi, maktabdagi mehribon muallimi alohida o‘rin tutadi. Bugun Marhamat tumani ta’lim tizimida mehnat qilayotgan ustoz va murabbiylarimizning samarali mehnati, erishilayotgan natijalar va o‘quvchilarimizning yutuqlari barchamizni quvontiradi. Ayni paytda tumanimizda 50 ta umumiy o‘rta ta’lim maktabi faoliyat yuritib, ularda 32 mingdan ortiq o‘quvchi ta’lim olmoqda. Ularning ta’lim-tarbiyasi bilan 2500 nafardan ziyod pedagoglar shug‘ullanmoqda. Bu raqamlar ortida qancha mehnat, izlanish, sabr va mashaqqat borligini yaxshi anglaymiz. Ayniqsa, o‘tgan o‘quv yilida bitiruvchilarimiz erishgan natijalar tahsinga sazovor. 1000 nafarga yaqin bitiruvchimiz oliy ta’lim muassasalariga qabul qilinib, talaba bo‘lish baxtiga erishdi. Eng quvonarlisi, 31 nafar bitiruvchimiz 189 balllik yuqori natijani qayd etib, nufuzli oliy ta’lim muassasalari talabalari safiga qo‘shildi. Bu — avvalo, o‘quvchilarimizning intilishi, ota-onalarning ishonchi va, eng muhimi, ustozlarimizning mashaqqatli mehnati samarasidir. Tumanimiz maktablarida ta’lim sifatini oshirish, o‘quvchilarni zamonaviy bilim va kasblarga yo‘naltirish borasida ham izchil ishlar olib borilmoqda. Ustozlar mehnatiga yaratilayotgan sharoit va ularning kasbiy salohiyatiga bo‘lgan e’tibor natijasini ham bugungi ko‘rsatkichlarda ko‘rish mumkin. Jumladan, 2025 yilda 50 nafar pedagogimiz 1000 AQSH dollaridan ziyod maosh olgan bo‘lsa, 2026 yilda bu ko‘rsatkich 139 nafarga yetdi. Bu, o‘z navbatida, o‘qituvchilik kasbining jamiyatdagi nufuzi va qadri tobora yuksalib borayotganidan dalolat beradi. Bugungi bayramda yana bir quvonchli voqeani alohida ta’kidlashni istardim. Joriy yilda o‘tkazilgan “Yil o‘qituvchisi” tanlovida Marhamat tumani Ixtisoslashtirilgan maktabining ona tili va adabiyoti fani o‘qituvchisi Mirzayeva Gulg‘uncha Maxammatovna g‘oliblikni qo‘lga kiritdi. Bu nafaqat ustozimizning shaxsiy yutug‘i, balki butun Marhamat ta’lim tizimining yutug‘idir. Gulg‘uncha Maxammatovnani ushbu yuksak natija bilan yana bir bor samimiy tabriklayman. Aziz ustozlar! Sizlarning mehnatingiz natijasi bugun emas, yillar o‘tib namoyon bo‘ladi. Bugun siz ta’lim berayotgan bolalar ertaga shifokor, muhandis, olim, tadbirkor, rahbar va yurt taraqqiyotiga hissa qo‘shadigan munosib insonlar bo‘lib yetishadi. Shogirdning qo‘lga kiritgan har bir yutug‘ida ustozning mehnati, har bir muvaffaqiyatida ustozning duosi va har bir ezgu ishida ustoz bergan tarbiya mujassam. Fursatdan foydalanib, ta’lim sohasida ko‘p yillar samarali mehnat qilgan, bugun ham yosh avlod tarbiyasiga o‘zining boy tajribasi bilan hissa qo‘shayotgan faxriy ustozlarimizga alohida minnatdorlik bildiraman. Qadrli ustoz va murabbiylar! Sizlarga mustahkam sog‘liq, oilaviy xotirjamlik, qalb xotirjamligi va sharafli faoliyatingizda ulkan muvaffaqiyatlar tilayman. Doimo shogirdlaringiz yutug‘idan faxrlanib, ularning kamolini ko‘rib yurish nasib etsin! Xonadoningizdan fayzu baraka, mehr-oqibat va quvonch arimasin! Ustozga ehtirom — ilmga ehtirom. Ustoz mehnatiga e’tibor — kelajakka e’tibor. Barchangizni yana bir bor 1 oktyabr — Ustoz va murabbiylar kuni bilan chin qalbimdan muborakbod etaman! Bayramingiz muborak bo‘lsin, aziz va muhtaram ustozlar!