Werabe City Government Communication Affairs Office

ዐቢይ አሕመድ (ዶ/ር) የኢፌዴሪ ጠቅላይ ሚኒስትር ሆነው ተሰየሙ የሕዝብ ተወካዮች ምክር ቤት ዐቢይ አሕመድን (ዶ/ር) የኢፌዴሪ ጠቅላይ ሚኒስትር አድርጎ ሰይሟል። 7ኛው የሕዝብ ተወካዮች ምክር ቤት 1ኛ ዓመት የሥራ ዘመን የምክር ቤቱ መመስረቻ 1ኛ መደበኛ ጉባዔ እየተካሄደ ነው፡፡ ምክር ቤቱ በጉባዔው ዐቢይ አሕመድን (ዶ/ር) ጠቅላይ ሚኒስትር አድርጎ ሰይሟል፡፡ የ7ኛው ጠቅላላ ምርጫ አሸናፊ በሆነው ብልጽግና ፓርቲ እጩ ተደርገው የቀረቡት የፓርቲው ፕሬዚዳንት እና ጠቅላይ ሚኒስትር ዐቢይ አሕመድ በምክር ቤቱ ፊት ቀርበው ቃለ መሃላ ፈጽመዋል፡፡ መስከረም 25፣ 2019 [ወራቤ ከተማ ኮሙኒኬሽን]

ክብርት ጊስቲት ሙፈሪሃት ካሚል የፌዴሬሸን ምክር ቤት አፈ ጉባኤ ሆነው ተሰየሙ የኢፌዴሪ ፌዴሬሽን ምክር ቤት የ7ኛው የፓርላማ ዘመን 1ኛ ዓመት የሥራ ጊዜ 1ኛ መደበኛ ጉባዔውን በዛሬው ዕለት ማካሄድ ጀምሯል። በዚህም ወ/ሮ ሙፈሪሃት ካሚልን የምክር ቤቱ አፈ ጉባኤ አድርጎ ሰይሟል። 25-01-2019

ኢትዮጵያ በዓባይ ወንዝ እና በቀይ ባሕር ዙሪያ ያላትን መልክዓ ምድራዊ እና ታሪካዊ እውነታዎች በማንኛውም ኃይል ሊቀየሩ አይችሉም - የኢፌዴሪ የውጭ ጉዳይ ሚኒስቴር የውጭ ጉዳይ ሚኒስቴር ባወጣው መግለጫ እንዳስታወቀው፤ ኢትዮጵያ የዓባይ ወንዝ መነሻ ስትሆን፣ ከሞላ ጎደል አብዛኛው የዓባይ ውሃ የሚመነጨው ከኢትዮጵያ ከፍተኛ ቦታዎች ነው፡፡ ወንዙ ለናይል ወንዝ አጠቃላይ የውኃ መጠን 85 በመቶውን አስተዋጽኦ ያደርጋል፡፡ በመሆኑም በዓባይ ወንዝ አጠቃቀም እና አስተዳደር ዙሪያ የሚደረጉ ማናቸውም ውይይቶች እነዚህን መሠረታዊ እውነታዎች ያገናዘቡ መሆን አለባቸው ብሏል፡፡ በተመሳሳይ ቀይ ባሕር ኢትዮጵያ መልክዓ ምድራዊ እና ታሪካዊ ትስስር ያላት የውኃ አካል መሆኑን የጠቀሰው መግለጫው፤ በጊዜ ሂደት የፖለቲካ ድንበሮች ቢቀያየሩም ኢትዮጵያ ከቀይ ባሕር ጋር ያላት የጠበቀ ቁርኝት ዛሬም እንደቀጠለ መሆኑን አስገንዝቧል፡፡ የኢትዮጵያ ቅርብ የተባለው ድንበር ከባሕር ዳርቻው 48 ኪ.ሜ  ብቻ ርቀት ላይ እንደሚገኝም አብራርቷል፡፡ በመሆኑም በቀጣናዊ የባሕር ላይ ጉዳዮች እና የደኅንነት መዋቅር ላይ የሚደረግ ማንኛውም ውይይት የኢትዮጵያን ሕጋዊ ጥቅሞች እና ከቀይ ባሕር ጋር ያላትን ዘላቂ ትስስር ከግምት ውስጥ ያስገባ መሆን አለበት ሲል አሳስቧል፡፡ እነዚህ መልክዓ ምድራዊ እና ታሪካዊ እውነታዎች በፖለቲካዊ ዲስኩር፣ በማስገደድ እርምጃዎች ወይም ሀገርን በማተራመስ ድርጊቶች ሊቀየሩ እንደማይችሉ የገለጸው ሚኒስቴሩ፤ በተላላኪዎች  አማካይነት የሚወሰዱ እርምጃዎች ወይም የጥቃት ድርጊቶች መሬት ላይ ያለውን እውነታ እንደማይቀይሩት ሁሉ፣ ኢትዮጵያ በቀጣናው ያላትን ሕጋዊ ጥቅም፣ ሚና እና ኃላፊነት ሊያሳንሱት አይችሉም ሲል አስምሮበታል፡፡ ኢትዮጵያ ሰላማዊ ግንኙነትን፣ የጋራ መከባበርን እና ቀጣናዊ ትብብርን ማጠናከር እንደምትቀጥል ያረጋገጠው ሚኒስቴሩ፤ ሉዓላዊነቷን፣ የግዛት አንድነቷን እና ዋነኛ ብሔራዊ ጥቅሞቿን ለመጠበቅ ምንጊዜም ዝግጁ መሆኗን አስታውቋል፡፡ በመጨረሻም ሁሉም የቀጣናው ተዋናዮች የጋራ ፈተናዎችን ከግጭት እና አንዱ ተጠቃሚ ሌላው ተጎጂ ከሚሆንበት (ዜሮ-ድምር) አካሄድ ይልቅ፣ ገንቢ በሆነ ውይይት፣ በአጋርነት እና በመልካም ጉርብትና መርሆች ላይ ተመሥርተው እንዲፈቱ የውጭ ጉዳይ ሚኒስቴር በመግለጫው ጥሪ አቅርቧል፡፡ 25-01-2019

"ከእውነተኛ አጋርነታችን የሚቀዳ፤ በጋራ መከባበር ላይ የተመሰረተ፣ በላቀ ርዕይ የተሞላ ዕድገትንና ለውጥን ለሚሹ ሁሉ ኢትዮጵያ መድረሻ ብቻ ሳትሆን፤ ሁለተኛ ቤታቸው መሆኗን እናረጋግጣለን"- ጠቅላይ ሚኒስትር ዐቢይ አሕመድ (ዶ/ር)

አዲስ መንግሥት፣ አዲስ አቅጣጫ፣ አዲስ ተስፋ፦ የኢትዮጵያ የታደሰ የከፍታና የዕድገት ምዕራፍ ~~~~~ አዲስ መንግሥት፣ አዲስ አቅጣጫ፣ አዲስ ተስፋ በሚል መሪ ጽንሰ-ሀሳብ የሚገለጸው ይህ ታሪካዊ ምዕራፍ፣ ሀገራችን ኢትዮጵያ ወደ ላቀ የስልጣኔ ማማ፣ ዘላቂ ሰላምና ሁለንተናዊ ብልጽግና ለመሸጋገር የያዘችውን ፅኑ ሀገራዊ ቁርጠኝነት የሚያሳይ ነው። ከታሪካዊው የሕዝብ ተወካዮች ምክር ቤት አዳራሽ የሚመነጨው ይህ አዲስ አቅጣጫ፣ የሕዝባችንን የነገ ብሩህ ተስፋ በፅኑ መሠረት ላይ ለመገንባትና የሀገር በቀል ልማት ስትራቴጂዎቻችንን በላቀ የውጤታማነት ደረጃ ለማስቀጠል የተቀረፀ ታላቅ ራዕይ ነው። ይህ የታደሰ ጉዞ በሁሉም የልማት መስኮች የተመዘገቡ ስኬቶችን ይበልጥ በማጠናከር፣ ተቋማዊ አቅምን በማጎልበት እና የዜጎችን ተጠቃሚነት በማረጋገጥ ወደ ተጨባጭ ተግባር ይቀየራል። የሕዝባችንን አንድነትና ጥንካሬ አስተባብሮ በመያዝ፣ በጋራ ጥረትና በማይበገር ቁርጠኝነት ወደፊት መራመድ የነገዋን የበለፀገችና የታፈረች ኢትዮጵያን እውን የማድረጊያ ዋነኛ ቁልፍ ነው። #ትልቅ_ሀገር #ትልቅ_ሕዝብ #ታላቅ_ርዕይ በአዲስ ተስፋና በጠራ አቅጣጫ ኢትዮጵያን እንገነባለን! #Ethiopia #NewEra #Parliament #HopeAndProgress #NationalVision #EBCDotstream #PMAbiyAhmed Werabe City Government Communication Affairs Office

ዛሬ ላይ የኢትዮጵያ ሕዝብ ይህንን የተግባር አመራር፣ ይህንን የማይደክም ብርቱ ክንድ፣ ይህንን የትንሣኤ ፋና አይቶ ዳግም ድምፁን ሰጥቷል። የመደመር መንግሥት በሕዝብ ይሁንታ ዳግም መመረጡ፣ የተጀመሩትን የልማት ምዕራፎች የማጽናት እና ኢትዮጵያን አፍሪካዊ የብልጽግና ተምሳሌት የማድረግ ራዕይን የማስፈጸሚያ ታላቅ ጉልበት ነው። ይህ የሕዝብ ድምፅ ከአምስት ዓመታት የፈተና እና የድል ጉዞ በኋላ፣ መንግሥት በሠራቸው የማይፋቁ አሻራዎች የታመነበት እና ወደፊትም ከዚህ የገዘፉ ታላላቅ ሀገራዊ ራዕዮችን እንዲያሳካ የተሰጠ አዲስ የታሪክ አደራ ነው። የመደመር መንግሥት ዛሬም በተግባር አመራሩ፣ በፈተና የማይበገረው ጽናቱ እና ፍልስፍናው ይበልጥ ጸንቶ እየገሰገሰ ነው። ይህ ድምፅ የትላንት ድሎችን የማስቀጠል፣ የዛሬን ስኬቶች የማላቅ እና የነገዋን ታላቅ ኢትዮጵያ ያለ ጥርጥር ዕውን የማድረግ የጽናት ውል ነው። የመደመር መንግሥት አሁንም በሥራው፣ በአሻራው፣ በክብሩ እና በልዕልናው ዳግም ወደፊት እየመጣ ነው!(ኢቢሲ) #ትልቅ_ሀገር! #ትልቅ_ሕዝብ! #ታላቅ_ርዕይ! #Ethiopia #EBC #Medemer #የመደመር_መንግሥት Werabe City Government Communication Affairs Office

የመደመር መንግሥት እየመጣ ነው! ~~~~~~~ ታሪክ በአጋጣሚዎች ድንኳን ሥር ብቻ አይጠለልም፤ የዘመናት የታፈነ ቁጭት፣ የሕዝብ ብርቱ መሻት እና የዕጣ ፈንታ ጥሪ ተጋጥመው በሚወልዱት ታላቅ የታሪክ እጥፋት ውስጥ እንጂ። ኢትዮጵያ በነጠላ ፖለቲካዊ ትርክቶች ታንቃ፣ በኢኮኖሚ ውድቀት አፋፍ ተንገዳግዳ፣ በውጭ ዕዳ ቀንበር ጀርባዋ ጎብጦ በቆመችበት አፋፍ ላይ፣ ያ የታሪክ እጥፋት በመደመር መንግሥት ምሪት ታወጀ። ያ ታሪካዊ ክስተት ሀገራዊ ሕልውናን ከዘመናዊ ሥልጣኔ ጋር አቆራኝቶ፣ የሕዝብን ሥነ ልቦናዊ ስብራት የመጠገን እና ኢትዮጵያን ካቀረቀረችበት ቀና የማድረግ ጽኑ ጉዞ ማስጀመሪያ ነበረ። ይህን ታሪካዊ ጉዞ ያስጀመሩት ጠቅላይ ሚኒስትር ዐቢይ አሕመድ (ዶ/ር)፣ ያመለጡትን እና ያጣቸውን ዕድሎች ቁጭ ብሎ በመቁጠር የሚቆዝሙ ሳይሆኑ፣ ያለፈውን ወረት ጠብቆ የታዩ ስህተቶችን በዕውቀት እያረሙ ወደፊት በመገስገስ የሚያምኑ ተራማጅ እና የገቢር ነበብነት ጥበብ የተላበሱ ናቸው። በቃላት ድርደራ ያልታጠረ፣ በተግባር ሜዳ የተፈተነ ብርቱ ጽናት። ጠቅላይ ሚኒስትር ዐቢይ፣ ከተለመደው የፖለቲካ ንግግር ባሻገር፣ ኢትዮጵያ በውስጧ የታመቀውን ሀብቷን አውቃ፣ ጥሪቷን ተረድታ እና ጸጋዎቿን ገልጣ እንድትታይ ያልፈነቀሉት ድንጋይ የለም። ከጉባ በረሃ እስከ ቤኒሻንጉል ማማዎች፣ ከኦሞ ሸለቆ እስከ ደቡብ የተፈጥሮ ጸጋዎች ድረስ ደከመኝ ሰለቸኝ ሳይሉ የተመላለሱበት አሻራ መሬት ላይ ጉልህ ምስክር ሆኖ ቆሟል። ጠቅላይ ሚኒስትሩ በተራራ ሸለቆው፣ በጓዳ ጎድጓዱ፣ በፀሐይ እና በቁሩ እየተንከራተቱ የደከሙት ለአንዲት እናት ሀገር ክብር ነበር። የኢትዮጵያን አፈር እና ድንጋይ፣ ወንዝ እና ሸለቆ በማንበብ፣ የታመቁ የተፈጥሮ ሀብቶቿን ወደ ተጨባጭ ልማት የመቀየር ተዓምር ተከናወነ። ሀገራችን ለዘመናት የተሸከመችውን የረሃብና የልመና ማቅ ለመግፈፍ የተካሄደው ተጋድሎ የምግብ ሉዓላዊነትን ዕውን አድርጓል። ልመናን የምትጸየፍ፣ በራሷ አፈር እና ላብ የምትተማመን ሀገር ዕውን ለማድረግ ባላቸው ጽኑ ራዕይ፣ የተረጂነትን የሥነ ልቦና ሰንሰለት በመበጠስ፣ ስንዴን ከውጭ ከማስገባት ወጥታ በአፍሪካ ቀዳሚ አምራች እና ላኪ እንድትሆን የተደረገበት መንገድ አርቆ አሳቢነታቸውን እና የሕዝብ አስተባባሪነትን ቁልጭ አድርጎ ያሳያል። የሌማት ትሩፋት ንቅናቄ እና በክረምት እና በበጋ የሚካሄደው የኩታ ገጠም እርሻ፣ ኢትዮጵያ በራሷ ላብ ቆማ የምትበላ ሀገር እንድትሆን አስችለዋታል። የሰው ልጅን ከተፈጥሮ ጋር ያለውን ጥልቅ ግንኙነት እና የተፈጥሮን ሚዛን የጠበቀው የመደመር ፍልስፍና የሰውን አቅም ማጎልበት ብቻ ሳይሆን የተፈጥሮን እምቅ ኃይል ከሰው ልጅ ሕልውና ጋር በማስተሳሰር ለብቸኝነት እና ለስብራት ሁነኛ ምላሽ ሰጥቷል። ጠቅላይ ሚኒስትር ዐቢይ ይህንን የተፈጥሮ እሳቤ በጠራ ፍልስፍናዊ መሠረት በማዋሃድ በዓለም ታሪክ ታይቶ በማይታወቅ አኳኋን የመሩት የአረንጓዴ አሻራ ንቅናቄ፣ ባለፉት ስምንት ዓመታት ብቻ ኢትዮጵያ በአስደናቂ ፍጥነት ወደፊት እንድትራመድ አድርጓታል። ሀገራችን እስካሁን ባለው ጉዞ ከ56 ቢሊዮን በላይ ችግኞችን በመትከል ታላቅ ታሪካዊ ገድል የፈጸመች ሲሆን፣ ይህም ግዙፍ ሀገራዊ አቅሟን በተግባር በማረጋገጥ ላይ ትገኛለች። ይህ ምድርን በአረንጓዴ ልምላሜ ያለበሰ ንቅናቄ የአፈር መሸርሸርን ከመግታት ባለፈ ለምግብ ዋስትና እና ለቀጣዩ ትውልድ የተተከለ የማይደርቅ የተስፋ ካስማ ሆኗል። ለዚህም ጠቅላይ ሚኒስትሩ ከተባበሩት መንግሥታት የግብርና እና ምግብ ድርጅት የተከበረውን የ"አግሪኮላ ሜዳልያ" ተሸላሚ ሆነዋል። የዘመናት የቁጭታችን ማማ የሆነው ታላቁ የኢትዮጵያ ሕዳሴ ግድብ በብዙ ውስብስብ ሴራዎች እና የመጓተት አረንቋ ውስጥ ወድቆ ከነበረበት ተነሥቶ፣ ግንባታው ሙሉ በሙሉ ተጠናቅቆ ወደ ፍጻሜው እንዲደርስ የተደረገው በጠቅላይ ሚኒስትሩ ብረት የለበሰ ጽናት እና ቁርጠኝነት ነው። ጠቅላይ ሚኒስትር ዐቢይ አሕመድ (ዶ/ር) በቦታው በፀሐይ እና በቁር እየተመላለሱ፣ ዓለም አቀፍ ጫናዎችን እና የጂኦ ፖለቲካ ሴራዎችን በዲፕሎማሲያዊ ብልሃት እየመከቱ፣ የኢትዮጵያውያን የልብ ትርታ የሆነው ግድብ በስኬት ተጠናቆ ለትውልድ እንዲበቃ አድርገዋል። ከዚህም በዘለለ፣ ኢትዮጵያ በታሪክ ሂደት ካጣችው እና ከራቀችው የተፈጥሮ ሀብቷ ወደ ቀይ ባሕር እንድትመለስ የተከተሉት ግንባር ቀደም አመራር ታሪካዊ የታሪክ እጥፋት ነው። ለሦስት ዐሥርት ዓመታት የታፈነውን የባሕር በር እና የቀይ ባሕር ባለቤትነት ፍትሐዊ ጥያቄ ወደ አደባባይ በማውጣት፣ ኢትዮጵያ የመልክዓ ምድር እስረኛ ሆና እንዳትቀር፣ ፍላጎቷ በሰላማዊ መንገድ እና በጋራ ተጠቃሚነት መርህ እንዲከበር በማድረግ ረገድ ያሳዩት ቆራጥነት ሀገራችንን ወደ ተፈጥሯዊ የስትራቴጂ ማማዋ የመለሰ ድፍረት ነው። የባሕር ኃይልን ዳግም በማቋቋም የቀይ ባሕር ቀጣናን ፍትሐዊ የትስስር መድረክ ለማድረግ የተያዘው ጽኑ አቋም፣ የኢትዮጵያን ዘመን ተሻጋሪ ጂኦ ስትራቴጂካዊ ተደማጭነት ዳግም አረጋግጧል። የከተሞችን ገጽታ የቀየረው የኮሪደር ልማት፣ ዜጎች በሀገራቸው ታሪክ እና ውበት እንዲኮሩ ያደረጉት እንደ አንድነት፣ ወዳጅነት እና እንጦጦ ፓርኮች ያሉ የገበታ ለሸገር ድንቅ ሥራዎች፣ እንዲሁም በክልሎች የተንሰራፉት ጎርጎራ፣ ወንጪ፣ ሃላላ ኬላ እና ኮይሻ የተፈጥሮ ጸጋዎችን ወደ ኢኮኖሚ የለወጡ ሕያው ምስክሮች ናቸው። በአዲሱ የገበታ ለትውልድ ማዕቀፍም በጨበራ ጩርጩራ እና በሌሎች የሀገራችን ክፍሎች የተገነቡት መዳረሻዎች ነባር አቅማችንን አውጥተው ተጨማሪ ገቢ እና የሥራ ዕድል እየፈጠሩ ይገኛሉ። በቢሾፍቱ የተጀመረው አዲሱ ዓለም አቀፍ አውሮፕላን ማረፊያ ግንባታም ሀገራችንን የአፍሪካ የአቪዬሽን ማዕከልነቷን ያጸናላታል። ኢኮኖሚውን ከአንድ አቅጣጫ አውጥቶ በብዝኃ ዘርፍ እንዲያንሰራራ ለማድረግ በተተገበረው ሀገር በቀል የኢኮኖሚ ማሻሻያ፣ የሀገራችን የገቢ አሰባሰብ እመርታዊ ለውጥ አስመዝግቧል። የውጭ ዕዳ ጫናን በተሳካ ድርድር በማቃለልና የኢኮኖሚውን መዋቅር ወደ ላቀ ደረጃ በማሸጋገር የፋይናንስ መረጋጋት ተፈጥሯል። ጀማሪ ቢዝነሶችን፣ የአፍሪካ የመጀመሪያ የሆነውን የሰው ሠራሽ አስተውሎት (AI) ኢንስቲትዩት እና የዲጂታል ክፍያ ሥርዓቶችን በማስፋፋት ሀገራችንን ወደ ዘመናዊው ዓለም ያሸጋገረ የዝላይ መንገድ ተመንድጓል። በዓለም አቀፍ መድረክ ድምጿ ጎልቶ የሚደመጥ፣ ክብሯ ወደ ላቀ ከፍታ የተሸጋገረ፣ ታላላቅ ኃያላን ሁሉ የሚፈልጓት እና ዓይናቸውን የሚጥሉባት፣ በቀጣናው አስተማማኝ ተጽዕኖ ፈጣሪ የሆነች ግዙፍ ኢትዮጵያ ዕውን ሆናለች። ዲፕሎማሲያችን ከተከላካይነት ወደ አጀንዳ ሰጪነት ተቀይሮ የብሪክስ (BRICS) አባል መሆን ተችሏል። አዲስ አበባ የዓለም አቀፍ ጉባኤዎች ማዕከልነቷ ተጠናክሮ ኢትዮጵያ ታላላቅ ዓለም አቀፍ ሁነቶችን የምታስተናግድ ተመራጭ መዳረሻ ሆናለች። ኢትዮጵያ የጎረቤቶቿ አለኝታ፣ የአፍሪካ ድምፅ፣ የዓለም መሪዎች መድረሻ እና መናኸሪያ ሆናለች። ይህ ሁሉ ድል የተመዘገበው ተኝቶ በማደር ሳይሆን፣ በጠቅላይ ሚኒስትር ዐቢይ ዕረፍት አልባ የሌሊት እና የቀን ተጋድሎ፣ በመስዋዕትነት እና በተግባራዊ ገቢር ነበብ ሥራ ነው። የጠቅላይ ሚኒስትሩ ጥልቅ ፍልስፍና የሀገራችንን ታሪካዊ ክብር ከዘመናዊ አሠራር ጋር በማዋሃድ በአጭር ጊዜ ውስጥ የማይታሰቡ ታላላቅ ድሎችን መሬት ላይ አስቀምጧል።

በወራቤ ከተማ በልዩ ልዩ የሥራ መስኮች ዙሪያ ከባለድርሻ አካላት ጋር የውይይት መድረክ ተካሄደ! ~~~~~~~ መስከረም 25፣ 2019 [ወራቤ ኮሙኒኬሽን] በወራቤ ከተማ አስተዳደር በልዩ ልዩ የሥራ ዘርፎች የሚከናወኑ ተግባራትን ለማጠናከርና የተሻለ ውጤት ለማስመዝገብ ከባለድርሻ አካላት ጋር የውይይትና የምክክር መድረክ ተካሂዷል። በመድረኩ በአስራ ስምንቱ የማታገያ አጀንዳዎች ዙሪያ ሰፊ ውይይት የተካሄደ ሲሆን በከተማዋ በተለያዩ የሥራ መስኮች የተጀመሩ ተግባራትን ወደ ውጤት ለማምጣት የአመራርና የባለድርሻ ተቋማት የቅንጅት አሠራር ማጠናከር እንደሚገባ አቅጣጫ ተቀምጧል። የውይይት መድረኩን የመሩት የወራቤ ከተማ አስተዳደር ምክትል ከንቲባና የማዘጋጃ ቤቱ ዋና ሥራ አስኪያጅ አቶ ሻፊ ሙዜ በከተማዋ የመጡ ለውጦችን በማጠናከር ዘላቂነት እንዲኖራቸው በተቀናጀ መልኩ መሥራት እንደሚገባ ገልጸዋል። የከተማዋን ሰላምና ጸጥታ ለማረጋገጥ የማታ ሮንድ አሠራርን በማጠናከር ከጸጥታ አካላት ጋር በቅንጅት መሥራት እንደሚገባ አቶ ሻፊ አመልክተዋል። ሕገ-ወጥ እንቅስቃሴዎች ከመከሰታቸው በፊት በመከላከልና በቅንጅት በመሥራት የከተማዋን ሰላም ማስጠበቅ እንደሚገባም ምክትል ከንቲባው ጠቁመዋል። አቶ ሻፊ ሙዜ በሁሉም የሥራ ዘርፎች የተሻለ ውጤት ለማስመዝገብ የተቋማትን ቅንጅታዊ አሠራር ማጠናከርና የንቅናቄ አጀንዳዎችን በዕቅድና በተግባር ማስፈጸም እንደሚገባ አስገንዝበዋል። የከተማዋን ጽዳትና ውበት በተመለከተም የአካባቢ ንጽህናን ለማስጠበቅ በተፈቀደላቸው ቦታ ላይ ብቻ ቆሻሻን መልቀቅና የከተማ አጠቃቀም ሥርዓትን መጠበቅ እንደሚገባ ተነስቷል። በዚህም ከተፈቀደለት ቦታ ውጪ ደረቅና ፍሳሽ ቆሻሻን የሚያስወግዱ የንግድ ተቋማትም ሆኑ የመኖሪያ ቤቶች በሕጉ መሠረት ተገቢው ሕጋዊ እርምጃ እንደሚወሰድ ተገልጿል። በሁሉም የሥራ ዘርፎች ተግባራትን በተገቢው መልኩ በመፈጸም የሚጠበቀውን ለውጥና ውጤት ማስመዝገብ እንደሚገባ ተጠቁሟል።

በወራቤ ከተማ የአቅም ውስንነት እና የአካል ጉዳተኛ ለሆኑ ቤተሰቦች የተለያዩ ቁሳቁሶች ድጋፍ ተደረገ! መስከረም 24፣ 2019 [ወራቤ ከተማ ኮሙኒኬሽን] የወራቤ ከተማ አስተዳደር ሰራተኛና ማህበራዊ ጉዳይ ጽ/ቤት በዛሬው እለት በአልከሶ ቀበሌ ቃልቃል መንደር ለአቅመ ደካማ ቤተሰቦች ምግብ ነክ እና የተለያዩ ቁሳቁሶችን ድጋፍ አድርጓል። የተደረገው ድጋፍም ዊልቸር፣ አልባሳት፣ ዶሮ እና የዶሮ ቀለብ እንዲሁም ምግብና ምግብ ነክ ቁሳቁሶችን ድጋፍ ማድረግ የተቻለ ሲሆን ከዚህ በተጨማሪም የአካል ጉዳተኛ ለሆነው ህጻን የህክምና ወጪ የሚሆን 60,000 ሺህ ብር፤ በአጠቃለይ ከ140,000 ሺህ ብር በላይ ድጋፍ ማድረግ ተችሏል። የከተማዉ ሰራተኛና ማህበራዊ ጉዳይ ጽ/ቤት ከቀበሌው አመራሮችና ወጣቶች ጋር በመሆን ነው ተሰባስቦ ለአቅመ ደካሞቹ ማስረከብ የተቻለው። በድጋፉ ላይ መልዕክት ያስተላለፉት የወራቤ ከተማ አስተዳደር ሰራተኛና ማህበራዊ ጉዳይ ጽ/ቤት ኃላፊ አቶ አብዱረህማን ሸመሀመድ መሰል የበጎ ተግባራት ተጠናክረው መቀጠል እንዳለባቸው በመግለጽ በየቤቱ ተደብቀው የቀሩ አካል ጉደተኞች እንዳሉና ሰብዓዊ ድጋፎችን ሚፈልጉ ብዙ እንዳሉ በማወቅ ሁሉም በቻለው እገዛ ማድረግ ከሁላችንም ይጠበቃል ብለዋል። በተደረገው የድጋፍ መርሃ-ግብር የአልከሶ 01 ቀበሌ የአመራር አካላት መገኘታቸውን ከከተማው ሰራተኛና ማህበራዊ ጉዳይ ተቋም ያገኘነው መረጃ ያመለክታል።

ድንገተኛ የእሳት አደጋ እንዳይከሰት ለማስቻል የተላለፈ የቅድመ ጥንቃቄ መልዕክት! መስከረም 24፣ 2019 [ወራቤ ከተማ ኮሙኒኬሽን] በተለያዩ ምክንያቶች ድንገተኛ የእሳት አደጋዎች እየተከሰቱ በመሆኑ ማህበረሰቡ የእሳት አደጋን አስቀድሞ ለመከላከል ከፍተኛ ጥንቃቄ እንዲያደርግ የወራቤ ከተማ አስተዳደር ፖሊስ ጽ/ቤት የጥንቃቄ መልዕክት አስተላልፏልደ እንደ ጽ/ቤቱ መረጃ የክረምቱ ወቅት እየተገባደደ በመምጣቱ ከፍተኛ ንፋስ ሊከሰት የሚችልበት ጊዜ በመሆኑ በቀላሉ የሚቀጣጠሉ ቁሳቁሶች በአግባቡ ካልተያዙ የእሳት አደጋን ሊያስከትሉ እና ሊያባብሱ ይችላሉ። በመሆኑም ማህበረሰቡ እንደ ገለባ፣ ደረቅ ሳር፣ ቤንዚንና ሌሎች በቀላሉ የሚቀጣጠሉ ቁሳቁሶችን ከመኖሪያ ቤትና ህንፃዎች ማራቅ፣ በአግባቡ ማከማቸት እና ከእሳት ምንጭ ጋር እንዳይገናኙ ጥንቃቄ ማድረግ እንደሚገባ ተመላክቷል። የእሳት አደጋ ሊያስከትሉ የሚችሉ የኤሌክትሪክ ገመዶች፣ ክብሪትና ሌሎች ተቀጣጣይ ቁሳቁሶችን ከህፃናት ንክኪ ማራቅ እንደሚገባም ጽ/ቤቱ ያስገነዝባል። ህብረተሰቡ ለተለያዩ ማህበራዊ ጉዳዮች ከቤት ሲወጣም ህፃናትን፣ አረጋውያንን፣ ህሙማንንና እንስሳትን በቤት ውስጥ ብቻቸውን በመተው ቤቱን ዘግቶ እንዳይሄድ ጥሪ ቀርቧል። በተለይም በገጠር አካባቢ ምግብ ለማብሰል እሳት የሚጠቀሙ ሰዎች ሥራቸውን ካጠናቀቁ በኋላ እሳቱን ሙሉ በሙሉ ማጥፋታቸውን ማረጋገጥ እንደሚገባም ጽ/ቤቱ አሳስቧል። የእሳት አደጋ ከተከሰተ በኋላ ከማስተካከል ይልቅ አደጋው ከመድረሱ በፊት ተገቢውን የጥንቃቄ እርምጃ መውሰድ አደጋን ለመከላከል፣ ህይወትን እና ንብረትን ለማዳን ወሳኝ መሆኑን የወራቤ ከተማ አስተዳደር ፖሊስ ጽ/ቤት ገልጿል።

"የመደመር መንግሥት የወጣቶችን ሁለንተናዊ ተጠቃሚነትና የአመራርነት ሚና ለማጠናከር በትኩረትና በቁርጠኝነት እየሰራ ይገኛል"- ጠቅላይ ሚኒስትር ዐቢይ አሕመድ (ዶ/ር)

ከወራቤ ከተማ ፖሊስ ተቋም የተላለፈ የጥንቃቄ መልዕክት! በወራቤ ከተማ እና አካባቢዋ ለሚገኙ የተሽከርካሪ ባለንብረቶችና ተጠቃሚዎች በሙሉ፡ ከቅርብ ጊዜ ወዲህ በተለያዩ አካባቢዎች የሞተር ሳይክል ተሽከርካሪዎች ስርቆት እየተስተዋለ በመሆኑ የወራቤ ከተማ አስተዳደር ፖሊስ ጽ/ቤት የከተማዋን ነዋሪዎችና በየአካባቢው የሚገኙ የመንግስትና የግል ተሽከርካሪ ባለንብረቶች፣ አከራዮችና ተጠቃሚዎች ተገቢውን የጥንቃቄ ርምጃ እንዲወስዱ አሳስቧል። በተለያዩ አካባቢዎች የተሽከርካሪ ስርቆት እየተፈጸመ በመሆኑ የስርቆት ወንጀሎችን አስቀድሞ ለመከላከል የተሽከርካሪ ባለንብረቶችና ተጠቃሚዎች ከፍተኛ ጥንቃቄ ማድረግ እንደሚገባ ጽ/ቤቱ ገልጿል። ስለሆነም ሞተር ሳይክሎችንና ሌሎች ተሽከርካሪዎችን በመኖሪያ ቤትም ሆነ በሥራ ግቢ ውስጥ በሚያቆሙበት ወቅት ከእይታ በማይርቁበት እና በተገቢው የጥበቃ ሥርዓት በተዘረጋበት ቦታ እንዲያቆሙ፣ በተለይም በሌሊት ተሽከርካሪዎቻቸውን በቁጥጥርና በጥበቃ ሥር ባለ ቦታ እንዲያሳድሩ ተጠይቋል። እንዲሁም ለኪራይ የሚውሉ ተሽከርካሪዎችን ለማንኛውም ሰው በቀላሉ ከማከራየት በመቆጠብ የተከራዩን ሰው ማንነትና መረጃ በአግባቡ በማረጋገጥ ተገቢውን ጥንቃቄ እንዲያደርጉ ጽ/ቤቱ አሳስቧል። የከተማዋ ነዋሪዎች በአካባቢያቸው አጠራጣሪ ሁኔታ፣ እንቅስቃሴ ወይም ግለሰብ ሲመለከቱ በአቅራቢያቸው ለሚገኝ የፖሊስ አባል በአፋጣኝ መረጃ እንዲያደርሱ ጥሪ ቀርቧል። የተሽከርካሪ ደህንነት የባለንብረቱን ብቻ ሳይሆን የመላው ማህበረሰብን ትብብር የሚጠይቅ በመሆኑ ሁሉም ነዋሪዎች ንቁ በመሆን ንብረትን ከስርቆት ለመጠበቅ የሚያስችሉ የጥንቃቄ ርምጃዎችን እንዲወስዱ የወራቤ ከተማ አስተዳደር ፖሊስ ጽ/ቤት ያሳስባል። መስከረም 24፣ 2019 [ወራቤ ከተማ ኮሙኒኬሽን]

የወራቤ ከተማ አስተዳደር በክረምት የበጎ ፈቃድ አገልግሎት የገነባቸውን የአረጋውያንና አቅመ ደካሞች መኖሪያ ቤቶች መርቆ ቁልፍ አስረከበ! መስከረም 24፣ 2019 [ወራቤ ከተማ ኮሙኒኬሽን] የወራቤ ከተማ አስተዳደር በክረምት ወራት በበጎ ፈቃድ አገልግሎት መርሃ-ግብር ለአረጋውያንና ለአቅመ ደካማ የማህበረሰብ ክፍሎች ያስገነባቸውን የመኖሪያ ቤቶች መርቆ ለባለቤቶቻቸው ቁልፍ አስረክቧል። ይህ የቤት ግንባታ በኢኮኖሚ አቅማቸው ውስንነት ምክንያት ተገቢ የመኖሪያ ቤት ማግኘት ለማይችሉ አረጋውያንና አቅመ ደካሞች የተሻለ የኑሮ ሁኔታ ለመፍጠር፣ ሰብአዊ ክብራቸውን ለመመለስና ማህበራዊ ድጋፍን ለማጠናከር ያለመ መሆኑ ተገልጿል። የወራቤ ከተማ አስተዳደር ከንቲባ አቶ ያሲን ከሊል በርክክቡ ወቅት እንዳሉት የበጎ ፈቃድ ተግባር አረጋውያንን መጠለል ብቻ ሳይሆን ራሳቸውን እንዲችሉ የማድረግ ስራ እየተሰራ መሆኑን በመግለጽ የመተጋገዝና የመረዳዳት ባህላችንን በማጎልበት ሰብዓዊ ድጋፍ የሚሹ ወገኖችን ማገዝ እንደሚገባ ተናግረዋል። የአረጋዊያን የመኖሪያ ቤቶች ግንባታ ላይ አስተዋጽኦ ላበረከቱ የንግዱ ማህበረሰብ እና ለሌሎችም በየደረጃው ለሚገኙ ባለድርሻ አካላት አቶ ያሲን ምስጋናቸዉን አቅርበዋል። የስልጤ ዞን ወጣቶችና ስፖርት መምሪያ ኃላፊ አቶ ፈቱ ኪምባዶ፣ የዞኑ ንግድና ገበያ ልማት መምሪያ ሃላፊ አቶ ኢስማኢል ዲላ፣ የወራቤ ከተማ አስተዳደር የመንግስት ዋና ተጠሪ አቶ ናስር ቡሽራ፣ የወራቤ ከተማ አስተዳደር ምክትል ከንቲባና የማዘጋጃ ቤቱ ስራ አስኪያጅ አቶ ሻፊ ሙዜ፣ የከተማው ብልጽግና ፓርቲ የፖለቲካና አቅም ግንባታ ዘርፍ ሃላፊ አቶ ነስሬ አማን፣ የከተማ አስተዳደሩ ብልጽግና ፓርቲ አደረጃጀት ዘርፍ ሃላፊ አቶ ባህረዲን ሀሰን፣ የከተማዉ ወጣቶችና ስፖርት ጽ/ቤት ሃላፊ አቶ አህመድ ባሙድ፣ የከተማ አስተዳደሩ ንግድና ገበያ ልማት ጽ/ቤት ሃላፊ አቶ አክመል አብደላ እና ሌሎች የዞንና የከተማ አስተዳደሩ አመራሮች እንዲሁም የአካባቢው ነዋሪዎች ተገኝተዋል።