HOP Ministry

#የጸሎት_ማስተካከያ_ጥሪ! እግዚአብሔር ሁሉን በአንድያ ልጁ በኢየሱስ ውስጥ ሰውሮታል። ተድላ፣ ደስታ፣ ሐሴት፣ ጥበብ፣ እውቀት በልጁ በኢየሱስ ክርስቶስ ውስጥ ነው ያለው። አንዴ የተገለጠ ብርሃን፣ እውቀት፣ እውነት፣ ሕይወት አለ፤ እርሱም በጌታ በኢየሱስ ክርስቶስ ውስጥ ነው። አሁን እግዚአብሔር እኛን ለማስደነቅ በየማለዳው የሚያመጣው፣ የሚገልጠው አዲስ መገለጥ የለም። እግዚአብሔር ጥበቡን፣ እውቀቱን፣ ሕይወቱን፣ እውነቱን በልጁ በክርስቶስ ኢየሱስ ገልጦ ጨርሷል። አሁን በእኛ የሚሰራው ስራ በልጁ በኢየሱስ የተገለጠውን እናይ ዘንድ የልቦና አይኖቻችንን ማብራት ነው። በዚህ ዘመን ከእግዚአብሔር ትኩረት (ከልጁ ከኢየሱስ) ላይ አይናችን እንዳይወሰድ፣ በአልባሌ ነገር ልባችን እንዳይያዝ፣ እግዚአብሔር በሚጠብቀን ስፍራ ላይ ሳይሆን ከምድሩ ነገር ጋር ተሰፍተን እንዳንገኝ ጸሎት መቀየር ይኖርብናል። ግለጥልኝ፣ አዲስ መገለጥ ስጠኝ ከሚለው አሳች መሻት ወጥተን በልጅህ የገለጥኸውን አሳየኝ፣ እንዳይ የልቦና አይኖቼን አብራ ማለት መቻል አለብን። እግዚአብሔር የልቦና አይኖቻችንን ሲያበራ፣ የጥበብና የመገለጥ መንፈስን ሲሰጠን፦ የተሰወረ የጥበብ እና የእውቀት ሀብት መገኛ የሆነውን ኢየሱስን ማየት፣ ማወቅ፣ እርሱ ላይ መተከል፣ ሳንታክት እርሱን መከታተል እንችላለን። የእግዚአብሔርን ጥበብ፦ ልጁን ክርስቶስ ኢየሱስን ማየት፣ በእርሱ ማረፍ፣ በእርሱ መርካት፣ በእርሱ መደሰት ይሁንልን!! ክርስቶስ ኢየሱስን ከማወቅ ታላቅነት ጋር ሲነጻጸር ሁሉ ነገር ጉድፍ ነውና ሁሉን እየናቅን፣ እያጣን እርሱን መከታተል ይሁንልን!! ኤፌሶን 1 (አዲሱ መ.ት) ¯¯¯¯¯¯¯¯¯¯ ¹⁷ የክብር አባት የሆነውን የጌታችንን የኢየሱስ ክርስቶስን አምላክ ይበልጥ እንድታውቁት፣ የጥበብና የመገለጥን መንፈስ እንዲሰጣችሁ ያለ ማቋረጥ እለምናለሁ። ¹⁸ እንዲሁም በእርሱ የተጠራችሁለት ተስፋ፣ ይህም በቅዱሳኑ ዘንድ ያለውን ክቡር የሆነውን የርስቱን ባለጠግነት ምን እንደሆነ ታውቁ ዘንድ የልባችሁ ዐይኖች እንዲበሩ ¹⁹ ለእኛ ለምናምነውም ከሁሉ በላይ ታላቅ የሆነውን ኀይሉን እንድታውቁ እጸልያለሁ። ይህም ኀይል እንደ እርሱ ታላቅ ብርታት አሠራር፣ ²⁰ ክርስቶስን ከሙታን ሲያስነሣውና በሰማያዊ ስፍራ በቀኙ ሲያስቀምጠው የታየው ነው። ቆላስይስ 2 (አዲሱ መ.ት) ¯¯¯¯¯¯¯¯¯¯ ² ደግሞም ልባቸው እንዲጽናናና በፍቅር እንዲተሳሰሩ፣ ፍጹም የሆነውን የመረዳት ብልጥግና አግኝተው የእግዚአብሔር ምስጢር የሆነውን ክርስቶስን እንዲያውቁ እተጋለሁ፤ ³ የተሰወረ የጥበብና የዕውቀት ሀብት ሁሉ የሚገኘው በእርሱ ዘንድ ነውና። ✍️ መክሊት አየለ 📆 June 29, 2026 #HOPMinistry #HearObeyPractice #DailyDevotional

#ዐላማችን_እርሱን_ደስ_ማሰኘት_ነው። ለእግዚአብሔር መኖር፣ እርሱን ማገልገል እኛ ብቁ (Qualified) ስለሆንን የምናደርገው ነገር አይደለም። እንዲያው ከወደደን ከታላቅ ፍቅሩ የተነሣ እግዚአብሔር ለእኛ ባበዛው ምህረት እንጂ። በሰው መስፈርት አንድ ሰው ላዘጋጀው የክብር ስፍራ ታዳሚዎችን መጥራት ሲያስብ፦ በሰው አይን የሚገቡ፣ የማያሳፍሩ፣ ሰው አይቶ አንዳች የሚመኩበት ጥሪት እንዳላቸው በቀላሉ መገመት የሚያስችለው ሞገስ ያላቸውን ሰዎች ይመርጣል። እግዚአብሔር ግን በልጁ በክርስቶስ ኢየሱስ ወደ ፍቅሩ ልጅ መንግሥት ያፈለሳቸው፣ ለከበረው ስፍራ የጠራቸው፦ እዚህ ግቡ የማይባሉ ኃጢአተኞችን ነው። የዚህን ዓለም ጥበብ ሊያሳፍር፣ የራሱን ጥበብ ሊገልጥ የዓለምን ሞኝ ነገር መረጠ። ታዲያ እግዚአብሔር ወድዶ፣ በራሱ ዋጋ ከፍሎ የራሱ ካደረገን፣ ለእርሱ የምንኖርበትን ምክንያት ከሰጠን፣ ለኃጢአት ሞተን ለጽድቅ እንድንኖር ካደረገ፣ ሞታችንን ወስዶ ሕይወቱን በእኛ ሊገልጥ ከወደደ፣ የሕይወት ትርጉም፣ ዓላማ፣ ግብ ከሰጠን፣ የምንኖርበት ምክንያትም ከሆነን፦ በምድር ልንኖር በቀረልን ዘመን ለእርሱ ከመኖር፣ እርሱንም ከማገልገል ውጪ ምን ተድላ፣ ምን ደስታ፣ ምን ክብር፣ ምን ዕድል ፈንታ አለን?! የእግዚአብሔር መሰዊያ ላይ በቆየን ቁጥር፣ ሁሉን እያጣን እርሱን በተከተልን ቁጥር፣ የእርሱን መንግሥት ለማስፋት፣ እርሱንም ለማድመቅ ራሳችንን በደበቅን፣ የእኛ የምንለውን ነገርም እያጣን በሄድን ቁጥር፦ እየነደድን ለእግዚአብሔር የምናበራ መብራት እንሆናለን። ሕይወታችን እኛ ጋር ሰንብቶ አያለማንም፤ ለራሳችን፣ ለክብራችን ሸሽገንም ጥቂት እንኳን አናተርፍበትም፤ ለእግዚአብሔር ስንዘራው፣ ስንሰጠው፣ ስንሰዋው ግን እልፍ፣ ብዙ እጥፍ እናተርፍበታለን፣ በእግዚአብሔር መንግሥት እጅግ የከበረ ዋጋ ያለውን ፍሬም እናጭዳለንና ሳንሰስት፣ ሳንዝል፦ ለእግዚአብሔር፣ ለመንግሥቱ ሥራ መሰዋት፣ መሰጠት ይሁንልን። ብንኖር ወይም ብንሞት ዓላማችን እግዚአብሔርን ደስ ማሰኘት ይሁንልን!! ጥቂቷ ዘመናችን ከእኛ ተሰውራ በእግዚአብሔር ፊት፣ በአደባባዮቹም ትብዛልን!! ጸጋ ይብዛልን!! “ስለዚህ በሥጋ ብንኖርም ወይም ከሥጋ ብንለይም ዐላማችን እርሱን ደስ ማሰኘት ነው።”   — 2ኛ ቆሮንቶስ 5፥9 (አዲሱ መ.ት) ✍️ መክሊት አየለ 📆 June 28, 2026 #HOPMinistry #HearObeyPractice #DailyDevotional

ሰሪያችን እግዚአብሔር ሆይ እጅህ ውስጥ ገብቶ እንደነበረ ሆኖ የሚወጣ ምንም የለም። ለሸክላ የመታደስ፣የመሰራት፣ እንደገና ውብ ሆኖና ሰሪው የሚፈልገውን ሌላ ቅርፅ ይዞ የመውጣት ዋስትናው የሸክላው ማንነት፣ ብልሽት፣ ተሰባሪነት ሳይሆን የሸክላ ሰሪው እጅ ነው፤ ምክንያቱም ሸክላው ምንም አይነት ሁኔታ ላይ ይሁን ሸክላ ሰሪው ባለቤት ነውና እንደገና፣ እንደወደደ አድርጎ ይሰራዋል። ለዚህ ነው ሕይወታችንን፣ መንገዳችንን፣ ነገሮቻችንን የሰሪያችን እጅ ላይ አኑረን ማረፍ የሚገባን፤ ምክንያቱም እርሱ በእኛና በነገሮቻችን ሁሉ ላይ የወደደውን መስራት ይችላል። ስለዚህ እኛም ሁሉን ለእርሱ እያስገዛን፣ እኛንና የእኛ የሆነውን ሁሉ፦ ለሁሉን ቻይ እና ለታማኝ እጁ እየሰጠን በእረፍት እንኖራለን!! ኤርምያስ 18 (አዲሱ መ.ት) ¯¯¯¯¯¯¯¯¯¯ ¹ ከእግዚአብሔር ወደ ኤርምያስ እንዲህ የሚል ቃል መጣ፦ ² “ተነሥተህ ወደ ሸክላ ሠሪው ቤት ውረድ፤ በዚያ መልእክቴን እሰጥሃለሁ።” ³ እኔም ወደ ሸክላ ሠሪው ቤት ወረድሁ፤ ሸክላውንም በመንኵ ራኩር ላይ ይሠራ ነበር። ⁴ ከጭቃ ይሠራው የነበረውም ሸክላ በእጁ ላይ ተበላሸ፤ ሸክላ ሠሪውም በሚፈልገው ሌላ ቅርጽ መልሶ አበጀው። ⁵ የእግዚአብሔርም ቃል ወደ እኔ እንዲህ ሲል መጣ፤ ⁶ “የእስራኤል ቤት ሆይ፤ ሸክላ ሠሪው እንደሚሠራው፣ እኔ በእናንተ ላይ መሥራት አይቻለኝምን?” ይላል እግዚአብሔር፤ “የእስራኤል ቤት ሆይ፤ ጭቃው በሸክላ ሠሪው እጅ እንዳለ፣ እናንተም እንዲሁ በእጄ ውስጥ ናችሁ። ✍️ መክሊት አየለ 📆 December 13, 2023 #HOPMinistry #HearObeyPractice #DailyDevotional

የእግዚአብሔር ሕልውና የሌለበት የዓለም እልፍ ቀን የቱንም ያህል ለስጋችን ቢመች እረፍት የለበትም። ስጋችን ሳይደላው፣ የምንፈልገውን ብዙ ነገር አጥተን ሳለን አብሮን ያለው የእግዚአብሔር ሕልውና ከብዙ ዓለማዊ ትርፍ ይበልጣል። በዓለም ያለውን ነገር አሁን ባንጨብጠው እንኳን ብዙ እንደክማለን እንጂ ነገም ቢሆን ማግኘታችን አይቀርም፤ ባናገኘውም ያለ እርሱ መኖር እንችላለን። እግዚአብሔር ግን ትናንትን በአብሮነቱ ያሻገረን፣ የአሁን መኖሪያችን፣ ለነገም ተስፋችን የሆነ፤ መኖሩ ለእኛ መኖር ዋስትና የሆነ የመኖራችን ሕልውና ነው። ከምንም በላይ ለእግዚአብሔር ሕልውና እና ከእርሱ ጋር ላለን ወዳጅነት ስፍራ እንስጥ! ከእርሱ ፊት እየራቅን ከእርሱ ጋር ያለን ሕብረት እየቀዘቀዘ በሄደ ቁጥር እየከሰምን፣ ሞገስ እያጣን፣ እየደረቅን ነው የምንሄደው። "ከዓለም እልፍ ቀን ይልቅ ከመኖር ከሕልውናህ ሩቅ አንድ ቀን ቤትህ ይሻላል መሸምገል ደግሞ እጅግ ይበልጣል ግን አንድ ነገር እለምንሃለሁ እርሷንም ደግሞ እጅግ እሻለሁ በቤትህ ውስጥ ቀሪ ዘመኔን እያየሁ መኖር ነው ውበትህን።" 👆🎶😇❤  Dawit Getachew “በሌላ ስፍራ ሺህ ቀን ከመኖር፣ በአደባባይህ አንዲት ቀን መዋል ይሻላል፤ በክፉዎች ድንኳን ከመቀመጥ ይልቅ፣ በአምላኬ ቤት ደጅ መቆም እመርጣለሁ።”   — መዝሙር 84፥10 (አዲሱ መ.ት) ✍️ መክሊት አየለ 📆 June 26, 2022 #HOPMinistry #HearObeyPractice #DailyDevotional

#የአሳብ_ቅኝት! አእምሮአችንን ከአሳብ ነጻ ልናደርገው አንችልም። ነገር ግን ምን ማሰብ እንዳለብን የመምረጥ መብቱ አለን። የሚያለማንን፣ የምናተርፍበትን፣ የሚያሳድገንን፣ ሕይወት ያለበትን ነገር መምረጥ የእኛ ድርሻ ነው። በአእምሮአችን የሞላው አሳብ፦ ስሜት መውለዱ፣ ወደ ተግባርም መቀየሩ አይቀሬ ነው። ስለዚህ የምናስበው ነገር አሉታዊ በሆነ መጠን ከዚያ የሚመነጩት ስሜቶቻችንም አሉታዊና ሕይወታችንን ጽልመት የሚያለብሱ፣ ወደ ጥፋትም የሚመሩን መሆናቸው አይቀርም። አብዛኞቻችን በማንፈልገው የስሜት ማዕበል ልንነዳ እንችላለን፤ ከስሜትም ነጻ የሆነ ሕይወት የለንም። ስሜቱ ግን፦ የሀዘን፣ የደስታ፣ የጭንቀት፣ የእረፍት፣ የብቸኝነት፣ የተፈላጊነት፣ ትኩረት የማጣት፣ በሰው የመከበብ፣ የባዶነት፣ የሙሉነት፣ የፍርሃትና የመሸማቀቅ፣ የድፍረትና በራስ የመተማመን....ወዘተ. አዎንታዊም ሆነ አሉታዊ ሊሆን ይችላል። እነዚህ ሁሉ ስሜቶች እኛን ከፍ እና ዝቅ እያደረጉ፣ አንዴ ወደ ላይ አንዴ ደግሞ ወደታች ሲያደርጉን ትኩረት ነፍገናቸው፣ ምንጫቸው ምን እንደሆነ ሳናውቅና ሳንለይ፣ ደግሞም አሉታዊውን ስሜት ፈጣሪውን የችግር ምንጭ ለይተን፣ አውቀን ለማስተካከል ካልሰራንበት፦ ስሜታችን የእኛ ገዢ ሆኖ፣ እኛም በእርሱ እየተነዳን ስንንገላታ እንኖራለን። በእኔ ምልከታ የስሜቶቻችንን ማዕበል ለመቆጣጠር፣ የስሜት መዋዥቅም ገንዘቡ እንዳያደርገን የችግሩ ዋና መሠረት፣ ምንጩ ላይ መስራት አለብን፤ ከውስጥ ሰውነት የሆነ ለውጥም ያስፈልገናል ባይ ነኝ። ማንኛውም ከውጭ ወደ ውስጥ የምናስገባቸው ነገሮች፣ ለምሳሌ፦ ስሜቶቻችንን ለመቆጣጠር፣ ለማስተካከል፣ ካለንበት ስሜት ለመውጣት ወይንም ወደ አንድ ተፈላጊ የስሜት ክልል ውስጥ ለመግባት ይረዱናል ብለን ወደ ውስጣችን የምናስገባቸው ነገሮች፤ ለምሳሌ የተለያዩ አደንዛዥ እጾች በወሰድናቸው ቅጽበት የሚያመጡት ውጤት አለ፤ የፈለግነውንም ስሜት ለማግኘት ይረዱናል፤ ነገር ግን በጊዜ ሂደት የእነርሱ ጥገኛ እየሆንን እንሄዳለን። የምንፈልገውን ስሜት፣ ለምሳሌ ደስታን ለማግኘት የግድ ከውጭ ወደ ውስጣችን የምናስገባው ነገር መኖር አለበት። ከነገሩ ጋር ያለን ንክኪ ሲቋረጥ ደግሞ መልሰን ወደማንፈልገው የስሜት እስራት ውስጥ እንገባለን። ይሄ አዙሪት ስር ነቀል ለውጥ ስለማያመጣ እውነተኛ መፍትሔ ከማይገኝበት ሀሰተኛ ምንጭ ጋር ተጣብቀን እንድንኖር፣ ሕያው የውሃ ምንጭ የሆነውን እግዚአብሔርን ትተን፣ ውሃ መያዝ የማይችሉትን ቀዳዳ የውሃ ማጠራቀሚያ ጉድጓዶች ለራሳችን ስንቆፍር ጊዜያችን እንዲባክን ያደርጋል። ከእግዚአብሔር የሆነው ፍጹሙ፣ ቅዱሱ የእግዚአብሔር ቃል የሚያስተምረን ለውጥ፦ ከውጪ ወደ ውስጥ የሚደረግ ሳይሆን፦ በውስጥ ሰውነታችን የሚደረግ ደግሞ ከውስጥ ጀምሮ ሁለንተናችንን፣ የውጪውን ሕይወትና ተግባራችንን ሁሉ የሚቆጣጠር ለውጥ እንደሆነ ነው። አሳባችንን፣ ስሜቶቻችንን፣ ተግባራችንን ለመግራት፣ የምናደርገው ጥረት ውጤታማ የሚሆነው ምንጫችንን፣ የተተከልንበትን መሠረት ስናስተካክል ነው። ስለዚህ የውስጥ ሰውነታችንን ዘወትር ለእግዚአብሔር ክፍት ማድረግ፣ መንፈስ ቅዱስ እንዲቆጣጠረንና በአእምሮአችን፣ በልባችን መታደስ እንድንለወጥ እንዲረዳን መፍቀድ ቁልፍ ነገር ነው። በተለምዶው ለሰው ልጅ መገልገያነት ከምንጠቀምባቸው ቁሶች መካከል፦ የጁስ መፍጫን እንደምሳሌ ብንወስድ የሚሰጠን ውጤት የሚመሰረተው በሰጠነው ጥሬ እቃ፣ ግብአት ላይ ነው። አቮካዶ ሰጥተነው የብርቱካን ጭማቂ አይሰጠንም። ግን ደግሞ ምንም ሰጠነው ምን የግብአት ምርጫውን ጉዳይ ለእኛ ትቶት መደበኛ ስራውን መስራቱን ይቀጥላል፤ ይፈጫል። ልክ እንደዚህ ምሳሌ የእኛ አእምሮም የሰጠነውን ሁሉ ተቀብሎ ማጠንጠን፣ ማብላላት መፍጨት፣ ማሰቡን አይተውም፤ ወደድንም ጠላንም እንደተሰጠው ግብአት መልካምም ሆነ ክፉውን ማሰቡን፣ ስሜት መፍጠሩን፣ ወደ ተግባር መቀየሩንም አያቆምም። ብልሆች ከሆንን መሠረታችንን፣ ምንጫችንን እግዚአብሔር ላይ፣ ቃሉ ላይ፣ የመንፈስ ፍሬ የሆኑት ነገሮች ላይ፦ ( የመንፈስ ፍሬ ግን ፍቅር፣ ደስታ፣ ሰላም፣ ትዕግሥት፣ ቸርነት፣ በጎነት፣ ታማኝነት፣ ገርነት፣ ራስን መግዛት ነው። እንደነዚህ ያሉትንም የሚከለክል ሕግ የለም። ---ገላትያ 5:22-23 (አዲሱ መ.ት)) መጽሐፍ ቅዱስ አስቡ የሚለን ነገር ላይ፦ (“በመጨረሻም ወንድሞች ሆይ፤ እውነት የሆነውን ሁሉ፣ ክቡር የሆነውን ሁሉ፣ ትክክል የሆነውን ሁሉ፣ ንጹሕ የሆነውን ሁሉ፣ ተወዳጅ የሆነውን ሁሉ፣ መልካም የሆነውን ሁሉ፣ በጎነት ቢሆን ወይም ምስጋና፣ እንደ እነዚህ ስላሉት ነገሮች አስቡ።”   — ፊልጵስዩስ 4፥8 (አዲሱ መ.ት)) በመትከል፣ በማጽናት በመንፈስ ቅዱስ ኃይል ከውስጥ ሰውነት የሆነ ለውጥን መለወጥ፣ አሳባችንን እና ስሜቾቻችንን በእግዚአብሔር ቃል፣ በእግዚአብሔር መንፈስ የተቃኙ ማድረግ፣ ወደ ሞት ከሚነዳን ክፉ የአሳብና የስሜት ማዕበል ማምለጥ፣ ተግባራችንንም እንደ እግዚአብሔር ፈቃድ ማድረግ እና በእረፍት በፍጹም ሰላም ውስጥ መኖር እንችላለን። “በመጨረሻም ወንድሞች ሆይ፤ እውነት የሆነውን ሁሉ፣ ክቡር የሆነውን ሁሉ፣ ትክክል የሆነውን ሁሉ፣ ንጹሕ የሆነውን ሁሉ፣ ተወዳጅ የሆነውን ሁሉ፣ መልካም የሆነውን ሁሉ፣ በጎነት ቢሆን ወይም ምስጋና፣ እንደ እነዚህ ስላሉት ነገሮች አስቡ።”   — ፊልጵስዩስ 4፥8 (አዲሱ መ.ት) ✍️ መክሊት አየለ 📆 June 25, 2026 #HOPMinistry #HearObeyPractice #DailyDevotional

ከኢየሱስ ጋር የቆየ፣ ሳይታክት ኢየሱስ ላይ ያተኮረ፣ ኢየሱስን ካወቀው ይልቅ ለማወቅ የተጋ ሰው የተሰወረ የዕውቀትና የጥበብ መዝገብ ባለቤት ይሆናል። የእግዚአብሔር ምስጢር፣ የእግዚአብሔር ጥበብ የሆነው ክርስቶስ ኢየሱስ ይብራራለታል። የተሰወረ የጥበብና የዕውቀት ሀብት ሁሉ በኢየሱስ ውስጥ አለ። ዕውቀት ወዴት አለ? ጥበብስ ከየት ይገኛል? ካልን አንድያ የእግዚአብሔር ልጅ ወደ ሆነው ወደ ኢየሱስ ዘንበል፣ ጥግት ማለት የግድ ያስፈልገናል። ምክንያቱም እግዚአብሔር አብ ዕውቀትንም ሆነ ጥበብን ከእርሱ ወዲያ ላይኖር በኢየሱስ ዘግቶታል!! ፍጹም የሆነውን የመረዳት ብልጥግና ካገኘን ለሌላ ለምንም ሳይሆን የእግዚአብሔር ምስጢር የሆነውን ክርስቶስ ኢየሱስን ለማወቅ ነው!! እግዚአብሔር ኢየሱስን በምናውቅበት ፍጹም በሆነው የመረዳት ባለጠግነት ይባርከን!! ቆላስይስ 2 (አዲሱ መ.ት) ¯¯¯¯¯¯¯¯¯¯ ² ደግሞም ልባቸው እንዲጽናናና በፍቅር እንዲተሳሰሩ፣ ፍጹም የሆነውን የመረዳት ብልጥግና አግኝተው የእግዚአብሔር ምስጢር የሆነውን ክርስቶስን እንዲያውቁ እተጋለሁ፤ ³ የተሰወረ የጥበብና የዕውቀት ሀብት ሁሉ የሚገኘው በእርሱ ዘንድ ነውና። ✍️ መክሊት አየለ 📆 June 24, 2024 #HOPMinistry #HearObeyPractice #DailyDevotional

#አይዘገይም!! 2ኛ ጴጥሮስ 3 (አዲሱ መ.ት) ¯¯¯¯¯¯¯¯¯¯ ⁸ ወዳጆች ሆይ፤ በጌታ ዘንድ አንድ ቀን እንደ ሺህ ዓመት፣ ሺህ ዓመትም እንደ አንድ ቀን መሆኑን ይህን አንድ ነገር አትርሱ። ⁹ አንዳንድ ሰዎች የዘገየ እንደሚመስላቸው ጌታ የተስፋ ቃሉን ለመፈጸም አይዘገይም፤ ነገር ግን ማንም እንዳይጠፋ ፈልጎ፣ ሁሉ ለንስሓ እንዲበቃ ስለ እናንተ ይታገሣል። ¹⁰ የጌታ ቀን ግን እንደ ሌባ ይመጣል፤ በዚያች ቀን ሰማያት በታላቅ ድምፅ ያልፋሉ፤ የሰማይም ፍጥረት በእሳት ይጠፋል፤ ምድርና በእርሷም ላይ ያለ ነገር ሁሉ ይቃጠላል። ¹¹ እንግዲህ ሁሉም ነገር በዚህ ሁኔታ የሚጠፋ ከሆነ፣ እናንተ እንዴት ዐይነት ሰዎች ልትሆኑ ይገባችኋል? አዎን፣ በቅድስናና በእውነተኛ መንፈሳዊነት ልትኖሩ ይገባችኋል፤ ¹² ደግሞም የእግዚአብሔርን ቀን እየተጠባበቃችሁ መምጫውን ልታፋጥኑ ይገባል። በዚያን ቀን ሰማያት በእሳት ተቃጥለው ይጠፋሉ፤ የሰማይም ፍጥረት በታላቅ ትኵሳት ይቀልጣል። ¹³ እኛ ግን ጽድቅ የሚኖርበትን አዲስ ሰማይና አዲስ ምድር በተስፋ ቃሉ መሠረት እንጠባበቃለን። ¹⁴ ስለዚህ ወዳጆች ሆይ፤ እነዚህን ሁሉ ነገሮች የምትጠባበቁ ስለ ሆናችሁ፣ ያለ ነውርና ያለ ነቀፋ ከእርሱ ጋር በሰላም እንድትገኙ ትጉ። ¹⁵ የጌታችን ትዕግሥት እናንተ እንድትድኑ እንደሆነ አስቡ፤ #HOPMinistry #HearObeyPractice #DailyDevotional

#ያለ_ቅድመ_ሁኔታ_የሆነ_እምነት! ለአብርሃም ከእግዚአብሔር በመጀመሪያ የቀረበለት ጥሪ እንተዋወቅ የሚል አልነበረም። ምንም የመሰረቱት ግንኙነት፣ ትውውቅ ሳይኖር የራሴ የሚለውን ነገር ሁሉ የሚያስጥል፣ የሚያስክድ እንዲሁም እግዚአብሔር ወደሚያሳየው ምድር የመውጣት፣ እግዚአብሔርን የመከተል ጥሪ ነበር። እግዚአብሔር ለአብርሃም ተለይቶ የመውጣት ጥሪ ሲያቀርብለት አብርሃም  #WH_QUESTIONS? (What, why, How, who, when, Where, Which, whom) አላቀረበም፤ ቆም ብሎም አላሰበበትም፣ አላንገራገረም፣ አልተከራከረም፣ ስለ መንገዱም ማብራሪያ አልጠየቀም፤ ይልቁንም በደፈናው እግዚአብሔርን አመነውና እግዚአብሔር እንደ ነገረው ሄደ፣ ተከትሎት ሄደ፣ እግዚአብሔር ወደ ሚያሳየው ምድር ለመሄድ ወጣ። የአብርሃም እምነት እጅግ ያስገርማል! የተናገረውን፣....ተለይተህ እኔ ወደማሳይህ ምድር ውጣ ያለውን እግዚአብሔርን የሰማበት መስማት ምን አይነት ይሆን? እርሱ ይናገር እንጂ፣ የእርሱ ይሁን እንጂ የትስ ቢሆን በሚል ልበ ሙሉነት፤ በመንገዴ ላይ፣ በመንገዴም መጨረሻ ላይ ምን ይገጥመኝ ይሆን? ብሎ ሳይጠይቅ የተናገረውን እግዚአብሔርን ለመከተል ወጣ። ከመንገዱ፣ ከማያውቀው አገር፣ ሊገጥመው ከሚችለው ችግር ፍርሃት በላይ የጠራውን እግዚአብሔርን አመነ። እግዚአብሔር ከተናገረ፦ በምን፣ በማን፣ መቼ፣ እንዴት...የሚሉት ጥያቄዎች ሳያሳስቡት የተናገረውን ይፈጽማል። እኛስ ይህንን ከቅድመ ሁኔታ በላይ፣ ከእኛ ስጋት በላይ፣ ከእኛ አለመቻልና ውስንነት በላይ፣ ከምንለምነውና ከምናስበው በላይ መስራት የሚችለውን እግዚአብሔርን ያለ ምንም ቅድመ ሁኔታ፣ ያለማንገራገር ለማመን፣ እንደ ነገረን ተለይተን ለመውጣት ምን ያህል ቅርብ ነን? ✍️ መክሊት አየለ 📆 August 21, 2024 #HOPMinistry #HearObeyPractice #DailyDevotional