Ethiopian Business Network

የደቡብ አፍሪካ ኩባንያዎች በአፍሪካውያን አለንጋ እየተቀጡ ነው #Ethiopia | በደቡብ አፍሪካ ውስጥ የተቀሰቀሰው የጸረ-ስደተኞች ተቃውሞ እና ሁከት ዲፕሎማሲያዊ ውጥረትን ያስከተለ ሲሆን፣ በተለያዩ የአፍሪካ ሀገራት ውስጥ የሚንቀሳቀሱ የደቡብ አፍሪካ ግዙፍ ኩባንያዎች ላይም ከፍተኛ የፖለቲካ ጫና እና የማዕቀብ ዛቻ እያሳደረባቸው ይገኛል። ​እንደ ኤምቲኤን ፣ ስታንዳርድ ባንክ እና ጎልድ ፊልድስ ያሉ በመላው አፍሪካ ሰፊ የንግድ እንቅስቃሴ ያላቸው የደቡብ አፍሪካ ተቋማት፣ ከሁከቱ ጋር ተያይዞ እየጨመረ የመጣውን ቀውስ ለማስተናገድ ተገደዋል ነው። ​በአህጉሪቱ ትልቁ የቴሌኮም ኦፕሬተር ኩባንያ የሆነው ኤምቲኤን ግሩፕ የነገሩን አሳሳቢነት ተከትሎ አንድ ከፍተኛ የስራ ኃላፊውን ወደ ጋና ልኳል። የአህጉሪቱ ትልቁ አበዳሪ የሆነው ስታንዳርድ ባንክ በበኩሉ ሁኔታውን በቅርበት እየተከታተለ መሆኑን አስታውቋል። በጋና የታርክዋ የወርቅ ማዕድንን የሚያስተዳድረው ጎልድ ፊልድስ ኩባንያም፣ የጋና ባለሥልጣናት በማዕድን ዘርፉ ላይ የሀገር ውስጥ ተሳትፎ እንዲያድግ ግፊት በማድረጋቸው ምክንያት የፈቃድ ማደስ ሂደቱ ላይ ተጨማሪ የፖለቲካ ጫና ሊያርፍበት እንደሚችል ተሰግቷል። በሌላ በኩል የደቡብ አፍሪካ የሀገር ውስጥ ጉዳይ ሚኒስቴር ባለፈው አንድ ወር ውስጥ ብቻ 7,400 ህገ-ወጥ ስደተኞችን በቁጥጥር ስር ማዋሉንና በዚህ አመት የተያዙት ስደተኞች ቁጥር ከ40,000 መሻገሩን አስታውቋል። ​ይህ በስደተኞች ላይ የሚፈጸመው ጥቃት በናይጄሪያ እና በጋና ያሉ የሲቪክ ማህበራት እና የመንግስት ባለስልጣናት በደቡብ አፍሪካ ኩባንያዎች ላይ ጠንከር ያለ እርምጃ እንዲወሰድ እንዲጠይቁ ምክንያት ሆኗል። የናይጄሪያ የውጭ ጉዳይ ሚኒስትር ቢያንካ ኦዱሜግዉ-ኦጁክዉ መንግስታቸው በደቡብ አፍሪካ ላይ ሊወስዳቸው የሚችላቸውን እርምጃዎች እያጠና መሆኑን ሲጠቁሙ፣ የጋና የውጭ ጉዳይ ሚኒስትር ሳሙኤል ኦኩዴቶ አብላክዋ ደግሞ ጉዳዩ በአፍሪካ ህብረት አጀንዳ ሆኖ እንዲወያይበት ጠይቀዋል። ​የኤምቲኤን ዋና ስራ አስፈፃሚ ራልፍ ሙፒታ በሰጡት ቃል፣ ኩባንያው 80% ገቢውን የሚያገኘው ከደቡብ አፍሪካ ውጭ ባሉ የአፍሪካ ሀገራት በተለይም ናይጄሪያና ጋና መሆኑን ጠቅሰው፣ ለጉዳዩ ትኩረት ሰጥተው ከየሀገራቱ መንግስታት ጋር እየተወያዩ መሆኑን ገልጸዋል። ​የደቡብ አፍሪካ የፍትህ ሚኒስትር ማማሎኮ ኩባዪ በበኩላቸው በጉዳዩ ዙሪያ ለጋዜጠኞች በሰጡት ቃል፣ እየሆነ ያለው ጥቃት “የሀገሪቱን ገጽታ እያበላሸው ነው፤ ይህንን ልንደብቀው አንችልም” ሲሉ የችግሩን አሳሳቢነት አምነዋል። በያፌት ገ/ህይወት