डॉ. शैलेंद्र देवळाणकर

आजच्या दैनिक सकाळ मधील उच्च शिक्षण संस्था आणि सेमीकंडक्टर यांचा परस्पर संबंध अधोरेखित करणारा उच्च शिक्षण संचालक डॉ. शैलेंद्र देवळाणकर यांचा विशेष लेख सेमीकंडक्टरचा "दुसरा डाव" यशस्वी होणार ? नुकतंच पंतप्रधान नरेंद्र मोदींनी "सेमीकंडक्टर मिशन 2.0"ची घोषणा केली आहे. त्याअंतर्गत भारतात नव्याने आकार घेणाऱ्या सेमीकंडक्टर किंवा मायक्रोचिप इंडस्ट्रीसाठी जवळपास 1.27 लाख कोटी रुपयांचा निधी ठेवण्यात आलेला आहे. आज सेमीकंडक्टर हा विषय केवळ इलेक्ट्रॉनिक्स उद्योगापुरता मर्यादित राहिलेला नाही. त्याचा संबंध आता जागतिक पुरवठा साखळीशी आहे; आर्थिक सुरक्षिततेशी आहे; एखाद्या देशाच्या संरक्षण क्षमतेशी आहे; तसेच कृत्रिम बुद्धिमत्तेशीही आहे. या क्षेत्रामध्ये भारताला पुढील पाच वर्षांत आघाडीचे स्थान निर्माण करायचे असेल, तर अतिशय विचारपूर्वक, दीर्घकालीन आणि संघटित पद्धतीने पावले टाकावी लागतील. भारतामध्ये सध्या सेमीकंडक्टरच्या क्षेत्रात एकूण 12 प्रकल्प कार्यान्वित आहेत आणि त्यामधील एकूण गुंतवणूक 1.64 लाख कोटी रुपये इतकी आहे. भारत सेमीकंडक्टरच्या क्षेत्रामध्ये आता अधिक गुंतवणूक करण्याच्या दिशेने वाटचाल करतो आहे.