طُويْلبَةُ عِلمْ🤍🕊️

فيه دعاء صغير، لكن معانيه جميلة جدًا، واللي قالت لي على الصيغة دي بتقوله ٣ مرات في اليوم وبالنسبة ليها شافت من وراه حلول بس بالنسبة لي الدعاء ده كل جملة فيه بتفكرك بحاجة مهمّة عن علاقتك بربنا وبالدنيا اللي حواليك. بسم الله ما شاء الله، لا يسوق الخير إلا الله.. بسم الله ما شاء الله، لا يصرف السوء إلا الله.. بسم الله ما شاء الله، ما كان من نعمة فمن الله.. بسم الله ما شاء الله، ولا حول ولا قوة إلا بالله. 🪾 تعالوا نتأمل معانيه.. «لا يسوق الخير إلا الله».. يعني الخير مهما كترت أسبابه، ومهما كانت الطرق اللي جه منها، فربنا هو اللي ساقه ليك وقدّره. «لا يصرف السوء إلا الله».. يعني مهما أخدت بالأسباب واحتطت لنفسك، ففيه أقدار وأضرار كتير ربنا بيصرفها عنك من حيث لا تعلم. «ما كان من نعمة فمن الله».. ودي لوحدها محتاجة وقفة.. لإننا ساعات بنتعود على النعم لدرجة إننا بننسى إنها فضل من ربنا، من أبسط تفاصيل يومنا لحد أكبر أمنياتنا اللي اتحققت. «ولا حول ولا قوة إلا بالله».. يعني لا قدرة لينا على فعل شيء، ولا قوة لينا على تحمّل شيء، ولا توفيق لينا في أمر إلا بمعونة ربنا. 🪾 شايفين المعاني الجميلة دي؟ الدعاء ده بيفكرك إنك مش محتاج تنشغل بمين جابلك الخير، ولا تخاف من كل سوء ممكن يقابلك، ولا تنسب النعم لنفسك، ولا تعتمد على قوتك وحدها.. وزي ما دايمًا بنقول.. خد بالأسباب، واسعى، واطمن.. فالأمر كله بإيد ربنا عز وجل.