طُويْلبَةُ عِلمْ🤍🕊️

= لما الناس تبقى كويسة هبقى أنا كمان كويسة! = لما نفسيتي تتحسن هبقي أصلي! = لما أتخلص من المشاكل إللي عندي هحفظ قرآن! = لما أفضى بس هبقي أطلب العلم الشرعي! - لما أولادي يكبروا - لما بيتي يستقر - لما الظروف تتظبط طيب… وإمتى الظروف هتتظبط؟! أحيانًا المشكلة مش إن الظروف صعبة ، المشكلة إننا بنستنى الظروف تكون سهلة . وكأن الصلاح محتاج زمنًا مثاليًا وكأن الأثر لا يُصنع إلا لما تختفي الفتن، وتستقيم الظروف، ويصبح الطريق سهلًا. لكن القرآن يحكي لنا نموذجًا عكس كل ده تمامًا. طبعاً كلنا عارفين آسيا امرأة فرعون: تخيلي بقي لو أن امرأة فرعون قالت: - هستنى فرعون يتغير. - هستنى القصر ده يهدى. - هستنى الزمن يبقى أنسب للإيمان. - هستنى أقدر أعمل حاجة من غير ما أخسر كل حاجة. لو كانت استنت فعلاً كل ده ،ما كانت لتقول: ﴿رَبِّ ابْنِ لِي عِندَكَ بَيْتًا فِي الْجَنَّةِ﴾ آسيا كانت عايشة وسط بيئة من أصعب البيئات "مش زي بيئتنا حالياً يعني" ومع ذلك لم تجعل فساد ما حولها عذرًا لفساد ما بداخلها. وده يمكن أكتر شيء محتاجين نفتكره النهاردة👌 👈أنتِ مش مطالبة إنك تصلحي الدنيا كلها. ومش مطالبة إنك تستني زمنًا مثاليًا عشان تكوني صالحة. = الزمن ده فيه فتن؟ اه بس كوني أنتِ الثابتة. = الناس بتبعد عن القرآن؟ فعلاً بس خلي بيتك متعلقًا به. = المعاصي بقت عادية عند الناس وعايزين اعمل زيهم؟ عارفه والله بس خلي عندك حدود واوعي تتنازلي عنها. = الخير بقي قليل أوي؟ مش مهم بس زودي انتي الخير اللي في إيدك. = مش عارفة تعملي حاجة كبيرة؟ مش مهم اعملي الصغيرة اللي تقدري عليها ، يمكن تكون عند الله أعظم مما تتخيلي. يمكن أنتِ شايفة إنك مجرد أم بتربي أولادها، أو بنت بتحاول تثبت نفسها، أو زوجة بتحاول تصلح بيتها، أو واحدة بتحفظ كل يوم صفحة، أو واحدة بتحاول تبعد عن ذنب كل مرة تقع فيه لكن عند الله؟ قد يكون كل ده بناءً لبيتٍ في الجنة. ف اوعي تنتظري أن يتغير الزمان حتى تتغيري أنتِ. المصلحون لا يختارون أزمنتهم…لكنهم يختارون ماذا يتركون فيها.👌 فاسألي نفسك من دلوقتي: لو هو ده الزمن إللي اختاره الله لي سبحانه وتعالى ف إيه الأثر إللي سأتركه فيه؟ وتأكدي ان من اختارك لتعيشي زمنك بالتأكيد سيعطيكي أدوات قوتك وتميزك.. ف كوني أنتِ الخير الذي يحتاجه هذا الزمن. ❤️ #هبةُ_الله https://t.me/heba_allah_mohammed