ကဗျာဂယ်လာရီ-Poetry Gallery

အဖြေမလိုပါဘူး ချစ်တယ်လို့ပြောခဲ့တာ မေးခွန်းမှမဟုတ်တာ -မင်းခိုက်စိုးစန်

ဝဋ်ရှိရင် ကြေအောင်ဆပ်ရတယ်တဲ့ တမြေ့မြေ့ ခံစားရချင်းအတူတူ သေအောင်ပဲ ဆပ်ပစ်လိုက်ချင်ပါတယ်။ -ထွန်းဟိန်းယံ

Happy 81th Birthday

ပျော်ရတဲ့အချိန်တွေဟာ သိပ်ကို တိုတောင်းနေခဲ့ပြီး အဆင်မပြေရတဲ့ အချိန်တွေက အမြဲပိုသာနေခဲ့တယ်။ -ခက်နှောင်

သူမှ ရောက်မလာရင်တော့ ဒီည မှောက်အောင်သောက်မှရမယ် ဒါမှ နာသမျှပျောက်မှာ...။ ဒါနဲ့ပြောရအုံးမယ်.... နောက်ညလည်း ထပ်မှောက်ရအုံးမယ်ထင်တယ်...။ -ထွန်းဟိန်းယံ

အဆင်မပြေပြီးသား ဒီလူအတွက် အဆင်ပြေစရာ ထွေထွေထူးထူး သိပ်မလိုတော့ သူအဆင်ပြေပါစေလို့ သူ့အတွက် ဆုတောင်းနေခဲ့တာ။ အခုသူ့ကို အဆင်ပြေပါစေလို့ ဆုတောင်းစရာမလို့တော့အောင် တစ်ယောက်သောသူနဲ့ အဆင်ပြေနေ့တော့။ မျက်ရည်စို့စို့နဲ့ ဝမ်းသာလျှက်။ -ထွန်းဟိန်းယံ

ချစ်လျှက်နဲ့ လမ်းခွဲတယ်ဆိုတာ တစ်ယောက်လက်ထဲကို တစ်ယောက်ထည့်ပေးလိုက်တဲ့ စိတ်ရောဂါတစ်ခုပါပဲ။ မင်းရော တကယ်လွတ်မြောက်နိုင်ခဲ့လို့လား။ -မောင်ခက်လူ

အဆွေးည ဘယ်တော့ ပြန်ဆုံကြမယ်မသိပေမယ့် ဘယ်လောက် ချစ်နေပါ့မယ်ဆိုတာ ကိုယ့်ဘက်က သေချာပါတယ်။ မင်းမြင်နိုင်တဲ့အခါ စင်္ကြာဝဠာဟာ ငါဖြစ်နိုင်ပေမယ့် မင်းမမြင်နိုင်တော့တဲ့အခါ ငါဟာ အမှိုက်ပေါ့။ ဘယ်လောက်လိုက်လိုက် ပြန်ပါမလာရင် အမောဆို့တတ်တာသိပါတယ် ဘယ်လောက် ဆိုက်ဆိုက် ငြင်းခဲ့တဲ့ရထားတွေလဲရှိပါတယ်။ မင်းမို့ပါကွယ် အရာရာ ဖြည့်တွေးရင်း ည‌တွေကျော်ပြီး မိုးလင်းခဲ့ပါတယ်။ -ထွန်းဟိန်းယံ

ဝိညာဉ်အမွှာ --------------------- ငါစောင့်ထိန်းသမျှ သီလဟာ မင်းအတွက် အကာအကွယ်ဖြစ်ပါစေ ငါပြုဖူးသမျှ ဒါနသာ မင်းအတွက် အရိပ်အာဝါသဖြစ်ပါစေ ငါ့အတွက်ဖြင့် ဘဝဆက်တိုင်း မဟုတ်တောင် ည, မနက်တိုင်း မင်းဆံနွယ်လေးထိပြီး အိပ်ခွင့်နိုးခွင့် ရချင်လှတယ် ကောင်းကင်ရောက်ရောက် ငရဲရောက်ရောက် မင်းကို ပိုပြီး ချစ်နေပါ့မယ် ။ ဆန်းကျော်စွာဝင်း

ဓူဝံကြယ် ဘယ်အရပ်မှာလဲ မေးရင် မင်း မျက်ဝန်းလေး ထိုးပြမယ် "ရှင် စကားသိပ်တတ်တယ် ၁၂ ကြိုးကဝေ လား " မေးလို့ " ကိုယ်က ၁၁ ကြိုးကဝေ ကျန်တဲ့ ၁ ကြိုးကို မင်းအတွက် ခေါင်းစည်းကွင်းလေး လုပ်ပေးမယ် " ပြောတော့ မင်းရယ်လိုက်ပုံက မြေဩဇာမသုံးတဲ့ ဆလတ်ရွက်လို ။ ထနောင်းပင်ပေါ် ခြေဗလာနဲ့တက်မိသူပါ မင်းနဲ့ပတ်သက်သမျှ နာကျင်မှုကစ ဖက်တွယ်ရတာ လှလိုက်တာ မင်းနဲ့ ရန်သတ်တဲ့နေ့မှာ ကိုယ့်အရိပ်ကိုယ် ရန်သူထင်ပြီး မင်းနဲ့ အဆင်ပြေတဲ့နေ့မှာ မျက်နှာကြက်က အိမ်မြှောင်လေးနဲ့ သီချင်းတပုဒ်ကို တယောက်တပိုဒ် ဆိုဖြစ်တယ် ။ မင်းက ကိုယ့်ဘဝ သဲနာရီထဲက တဖြည်းဖြည်း ကျနေတဲ့ အသက်ဓာတ် ကိုယ်ဟာ မင်းအတွက် ဘေးမခစေမယ့် ရွှေချည်တံတိုင်း အေးမြစေမယ့် လေပြည်လှိုင်း မင်းအသက်ရှူသံအတိုင်း လှုပ်ခတ်ချင်တဲ့သစ်ရွက် မင်းအကြည့်အတိုင်း စီးဆင်းချင်တဲ့မြစ်လက်တက်။ ကိုယ် တယောက်တည်းဆို မီးစ မင်းနဲ့နှစ်ယောက်ဆို မီးတောက် လောကဓံတောင် မီးရှို့ပြမယ့်သူတွေ မဟုတ်လား တခုခုဖြစ်လာရင် မင်းက အရှေ့ကိုပဲကြည့်ပါ နောက်ကျောအတွက် မပူနဲ့ ကိုယ် ရှိတယ် မင်းဆိုတာလည်း ကိုယ့်အရာအားလုံးပါပဲ ။ ဒီညတော့ မင်းစိတ်ကောက်သွားလို့ထင်ပ မျက်နှာကြက်မှာ အိမ်မြှောင်လေး မရှိတော့ဘူး အင်း.... သူလည်း မင်းဘက် ပါသွားပြီ ထင်တယ် ။ ။ #ဆန်းကျော်စွာဝင်း

❝ ခေတ်ပြိုင်သူငယ်ချင်း ❞ မျက်လုံးပွင့်တာနဲ့ လူ့အဖြစ် ဘာအဓိပ္ပါယ်ရှိသလဲ တွေးတယ် စက်ရုပ်လိုပဲ အဝတ်လဲ၊ မြို့ထဲသွား၊ ပိုက်ဆံရှာ အမှောင်နှစ်တွေ ရှည်လျား 'လူ့ဘဝဟာ ဒီထက် မပိုတော့ဘူးလား' သူငယ်ချင်းက လောကကို အကောင်းမြင်ကြည့်ဖို့ ပြောတယ် မင်းလို အဆင်ပြေနေရင် အဲဒီ ဖီလိုဆိုဖီကို သိပ်ကြိုက်မိမှာပေါ့ မင်း ကိုရီးယားဇာတ်လမ်းထဲ မျောနေချိန် ငါ အနာဂတ်ကို အသိစိတ်မဲ့ မျှော်ငေးလို့ အခြားတစ်ဖက်က လှည့်တွေး ငါ့အမေ ရွတ်နေကျတရား 'အနိစ္စ၊ ဒုက္ခ၊ အနတ္တ' စကားလုံး အဟောင်းကြီးဆိုပေမဲ့ ဒီနေ့ထိ ခေတ်မီနေတုန်းပဲ သူငယ်ချင်း။ ▪️အောင်ရင်ငြိမ်း

ဘဝမှာ ဘာအလိုရှိရဦးမှာလဲ... ကမ္ဘာကြီးကိုလား... ချမ်းသာကြွယ်ဝမှုကိုလား... စွမ်းအားတွေကိုလား... အာဏာကိုလား... ကိုယ့်ကို ပြုံးပြနေတဲ့ ချစ်သူလေးရဲ့ မေတ္တာတွေ ရရင်... ဘဝမှာ ဘာကိုထပ်ပြီး အလိုရှိရတော့မလဲ... ။ -လောင်ချိတ်

တစ်ခါလောက်တော့ မျက်ရည်တွေကိုသာ မိုးလို လွတ်လွတ်လပ်လပ် ရွာချခွင့်ရနိုင်ရင် သိပ်ကောင်းကောင်းမှာ...။ -ထွန်းဟိန်းယံ

မနက်စောစောသက်ပြင်း ------------------------------------- စိတ်ရှိသလောက်သာ ခံစားမှုနောက်ကို လိုက်ကြေးဆိုရင် အသက်တောင် ပြန်ပါမလာဘူး ကုန်ကူးသလိုပဲ တရားမ၀င် နယ်စပ်ဖြတ်ကျော်လာတဲ့ သတင်းစာတစောင်လိုပဲ ဘ၀ပဲ ခုတော့ မပျော်ရပါဘူး ။ ။ -ကြည်ဇော်အေး

ကဗျာ ဖတ်ချင်ရင်joinထားပါဗျ https://t.me/poetryzone200 #Ads

ကဗျာ ဖတ်ချင်ရင်joinထားပါဗျ https://t.me/poetryzone200 #Ads

သို့/ ကမ္ဘာကြီး ------------ စစ်ဆိုတာ သူတို့အတွက် သတင်းစာခေါင်းကြီးပိုင်း ငါတို့အတွက် နေ့စဉ်ဖြတ်သန်းရတဲ့အသက်ရှူသံ ကမ္ဘာကြီးရဲ့ ဘယ်ထောင့်ချိုးမှာ စစ်ဖြစ်ပါစေ ငါတို့မှာ ဘဝနဲ့ရင်းပြီး နားလည်ပါရဲ့ ချစ်ရသူကို ဆုံးရှုံးလိုက်တဲ့ မျက်ဝန်းတွေမြင်ရင် မျက်ရည်က အလိုလိုစီးကျလာတယ် ။ " ကိုယ်ချင်းစာတယ်ဆိုတာ ကိုယ့်အမာရွတ်ဟောင်းကို သူစိမ်းတစ်ယောက်ရဲ့ဒဏ်ရာနဲ့ တိုက်ကြည့်ရတာမျိုး" ငါတို့က မြန်မာနိုင်ငံသားလေ..... မီးနဲ့ မျက်ရည်ရဲ့ ဘာသာစကားကို ငါတို့ထက်ပိုပြီး ကျွမ်းကျင်တဲ့သူ ရှိဦးမလား။ ဒုက္ခဆင်းရဲ ဘာသာရပ်ကို ဂုဏ်ထူးနဲ့ အောင်မြင်ထားတဲ့ လူငယ်တွေ စုဝေးနေတဲ့ တိုင်းပြည် ဇာတ်သိမ်းခန်းမရှိသေးတဲ့ အညာဒရာမာတစ်ခုကို အသက်နဲ့ရင်းပြီး ကိုယ်တိုင်သရုပ်ဆောင်နေရသူ ကျောမွဲပြည်သူတွေရဲ့ တိုင်းပြည် သွေးညှီနံ့လေးမှ မရှူရရင် အဆုတ်ဟာ လေရဲ့အရသာကို မေ့နေတဲ့အထိ စစ်ပွဲနဲ့ အသားကျခဲ့တယ် ငြိမ်းချမ်းရေးဆိုတာ ငါတို့ရဲ့ တုန်ရီနေတဲ့လက်ဖဝါးနှစ်ဖက်ကြားမှာ မငြိမ်းအောင်ကာထားရတဲ့ ဖယောင်းတိုင်မီးလေးပါပဲ။ ဆန်းကျော်စွာဝင်း

လွမ်း ကိုယ်က ချစ်ရတဲ့သူ ကိုယ့်အပေါ် အချစ်ဆုံးသူကို ကိုယ့်ကို အမုန်းရဆုံးသူဖြစ်အောင် လုပ်ရတာ မလွယ်ပါ့လား။ အရက်ကြိုက်တာကို သူ မကြိုက်လို့ ဖြတ်ခဲ့တဲ့ကောင်က ဒီမှာ ဘီယာသောက်ပြီး မူးနေပြီ။ မူးလေ အလွမ်းပြေမယ်ထင်ခဲ့ပေမယ့် မူးလေ ပိုရူးလေဖြစ်ရပြီကွယ်... ဒီကောင့်အသည်း ကျွမ်းသွားအောင် ထပ်သောက်မယ်...။ -ထွန်းဟိန်းယံ

မမသီရိ ------------- မျက်ဝန်းကိုကြယ်နဲ့နှိုင်းတဲ့ ကဗျာတွေဖတ်ပြီး မမနဲ့နှိုင်းဖို့ ကြယ်လိုက်ရှာတယ် နဂါးငွေ့တန်းသာ ဆုံးသွားတယ် မမမျက်ဝန်းလောက် လှတဲ့ကြယ်မတွေ့ခဲ့ နောက်တစ်ခါ Big Bangထပ်ဖြစ်လို့ စကြဝဠာအသစ်ဖြစ်တဲ့အခါ မမသီရိမျက်ဝန်းနီးပါး လှတဲ့ကြယ်များ ပါစေလို ။ ဂယ်လီလီယို ရှာမတွေ့တဲ့ကြယ်ဟာ မမသီရိမျက်ဝန်းလေး ဖြစ်မယ် Kဇော်မစပ်ဖြစ်တဲ့ ကဗျာလေး ထူးအိမ်သင် မဆိုဖြစ်တဲ့ သီချင်း ဗီသိုဗင် မတီးနိုင်တဲ့ စန္ဒယားလေး ဒါဗင်ချီ ငိုစေတဲ့ မမသီရိ ကျနော့်အမှောင်တွေ ခွင်းပြီး မမသီရိအပြုံးနဲ့ လင်းပါတော့ ။ မဟာဆန်သူလို့ ပြောရင် ရင်ဖုံးနဲ့ဆံထုံး ပြေးမြင်သူတွေ မမသီရိကို ခေါ်ပြချင်တယ် ဂျင်းဘောင်းဘီ၊ အော်တာရှပ်နဲ့ ဆံပင်ရှည်တွေ ဖြန့်ချရင်လည်း သိပ်ကို မဟာဆန်လို့ရတဲ့အကြောင်း ရှင်းပြချင်ရဲ့ ။ ချစ်ခြင်းမေတ္တာနဲ့ အရည်ရွှမ်းတဲ့ သစ်သီးလို သစ်မွှေးပင်ထိပ်ဖျားက သဇင်ပန်းလို ဉာဏ်ပညာအပြည့်နဲ့ မလိုင်ခဲလို မမသီရိဟာ ချိုတယ်ဆိုတာထက် နည်းနည်းပိုတယ် ။ မမဘေးမှာ နှုတ်ခမ်းကို ထိခွင့်ရဖို့ ကံကောင်းတဲ့ ကော်ဖီခွက်လေးဖြစ်ချင်တယ် မမခေါင်းမှာ ဆံနွယ်တွေ နမ်းခွင့်ရဖို့ မာန်တက်တဲ့ စပယ်တွေ ဖြစ်ချင်တယ် ကွန်ပျူတာလေးအစ ဘောပင်လေးအဆုံး မမသီရိ ထိတွေ့သမျှအရာရာ ဖြစ်ချင်စိတ်နဲ့ ရူးနေတဲ့ စာရွက်လေးဟာ ကျနော်ပဲ ။ မမသီရိရေ ခေါ်ရင် မကြားနိုင်တဲ့ အကွာဝေးမို့ တယ်လီဖုန်းလေးအားကိုးနဲ့ မိုက်ရူးရဲတဲ့ကောင်ပါ Black listထဲ ကျနော်ရှိတယ် Block listထဲ ကျနော်ရှိတယ် တစ်ခါ တစ်ခါ ပြန်မဖြေတဲ့ messageတွေအတွက် မာန်တောင် တက်ချင်တယ် မင်းကုသလည်း ပဘာဝတီကို စိတ်ရှည်လက်ရှည် စောင့်ခဲ့တယ် အောင်ချိမ့်လည်း ခင်ခင်ပျိုကို စောင့်ခဲ့တယ် သစ်ငုတ်တောင် တိုက်ပါများရင် နဲ့ရဲ့မဟုတ်လား မမဆံပင်ရှည်တွေက ဘာသားနဲ့ ထုထားလို့လဲ မမ ဥပေက္ခာကျောက်ဆောင်ကို မြတ်နိုးခြင်းအရှိန်ဟုန်နဲ့ ဝင်တိုက်မယ် မြားနတ်မောင်ကို လာဘ်ထိုးမယ် ကျနော့်နဖူးမှာ မမနာမည် တက်တူးထိုးမယ် ဗီးနပ်သနားတဲ့တစ်နေ့ မမ ကျနော့်ကို တွေ့မှာပါ ။ မမသီရိကိုင်ထားတာ မီးစာတစ်ဖက် ရေမှုတ်တစ်ဖက်ဆိုရင်တောင် အလောင်ကျွမ်းခံမယ့်ကောင်မို့ ကျနော့်ကိုလောင်တဲ့မီး မမကိုအပူဟပ်တဲ့အခါ ရေမှုတ်လေးကို မမဖို့ ချန်ထားပါ ။ ဘုရားရင်ပြင်ဟာ ပေဘယ်လောက်ရှည်လဲ တစ်ပေမှာ ခြေလှမ်းဘယ်လောက် ရှိလဲ ဘုရားရင်ပြင်မှာ ပန်းစည်းလေးပွေ့ပြီး လျှောက်လာတဲ့ မမသီရိ ခြေလှမ်းအရေတွက်ကို ကုဋေတစ်သန်းနဲ့ မြှောက်ကြည့်တော့ အနိစ္စ ဒုက္ခ အနတ္တ မမ အဲ့ဒီလိုအော်ရင်း စိတ်တွက်စက်လေး ဟမ်းသွားပေါ့ ။ ။ ဆန်းကျော်စွာဝင်း

❝ ဆံပင်တွေ ရှည်လာပြီးနောက် ❞ နယ်နိမိတ်ချင်း ထိစပ်နေပေမဲ့ တစ်မြို့စီဆိုတာက အလွမ်းသက်သက်ပြောစကားပဲ ဆံရင်းနဲ့ ဆံဖျားမှာတောင် လွမ်းလောက်စရာ အကွာအဝေးရှိပါတယ်။ ဘဝအဆက်ဆက်က တစ်စက်ချင်း ကျလာတဲ့ ရေစက်ကလေးတွေ စုပြီး မင်းနဲ့ ဆုံချင်တယ်။ ချစ်ခြင်းမေတ္တာကသာ အနိုင်ရရှိပါစေ ။ ▪️ဆူးရစ်နွယ်