Jura Legal Update

የኮንዶሚኒየም ቤት የደረሰው ሰው ዕጣው ከደረሰው 5 ዓመት ባይሞላውም እንኳ፣ ሌላ የኮንዶሚኒየም ቤት ከደረሰው ሌላ ሰው ጋር በስምምነት ቤታቸውን ሊቀያየሩ ይችላሉ? የኮንዶሚኒየም ቤት የደረሰው ሰው ሌላ የኮንዶሚኒየም ቤት ከደረሰው ሰው ጋር ዕጣው ከደረሰው አምስት ዓመት ባይሞላውም በልውውጥ ወይም በስምምነት ሊቀያየሩ ይችላሉ ወይስ አይችሉም የሚለው ጥያቄ በብዙዎች ዘንድ ይነሳል። ​የአዲስ አበባ ከተማ አስተዳደር አካላት የአስተዳደሩን ቤቶች የማስተላለፍ ኃላፊነትና አፈጻጸሙን ለመወሰን የወጣው አዋጅ ቁጥር 19/97 አንቀጽ 14 (2) ድንጋጌ ገዢው ጠቅላላው ዋጋውን ከፍሎ ቢያጠናቅቅም ቤቱን ለሦስተኛ ወገን በሽያጭ ወይም በስጦታ ማስተላለፍ የሚችለው ቤቱን ከገዛ 5 ዓመት ሲሞላው ብቻ ይሆናል በማለት ይደነግጋል። ድንጋጌው በግልጽ ቃል የጠቀሰው ቤቱን በሽያጭ ወይም በስጦታ ማስተላለፍን በመሆኑ፣ ዕጣው ከወጣ 5 ዓመት ባልሞላው ቤት ላይ የተደረገ የኮንዶሚኒየም ቤት ልውውጥ በዚህ አዋጅ መሠረት የተከለከለ ነው ወይ? የሚለው ነጥብ መታየት ያለበት ጥያቄ ነው። ​ይህን ጥያቄ በተመለከተ የፌደራል ጠቅላይ ፍርድ ቤት ሰበር ሰሚ ችሎት በቅጽ 19 በሰበር መዝገብ ቁጥር 105919 ላይ አስገዳጅ የሕግ ትርጉም ሰጥቶበታል። ችሎቱ በውሳኔው ላይ ድንጋጌው የከለከለው ቤትን በሽያጭ ወይም በስጦታ ማስተላለፍን እንጂ ልውውጥን ወይም ቅይይርን ባለመሆኑ፣ በዚህ አግባብ የተደረገው የልውውጥ ውል ሕገወጥ ነው ሊባል አይችልም ሲል ወስኗል። ​ለዚህም እንደ ምክንያት የጠቀሰው፣ ሕግ አውጭው ይህንንም ልውውጥ መከልከል ፈልጎ ቢሆን ኖሮ "በማናቸውም አኳኋን" ማስተላለፍ አይቻልም የሚል አጠቃላይ የሆነ ቋንቋ መጠቀም ይችል እንደነበር ነው። ከዚህም በላይ በዕጣ የደረሰው ሰው ቤቱን በሽያጭም ሆነ በስጦታ ለሦስተኛ ወገን እስከ 5 ዓመት ጊዜ ድረስ ማስተላለፍ አይችልም ተብሎ በሕግ መብቱ ሲገደብ ታሳቢ የተደረገው፣ ግለሰቡ በጊዜያዊ ችግር ምክንያት ቤቱን ሸጦ መጠለያ እንዳያጣ በማሰብ ነው። በለውጥ ጊዜ ግን አንደኛው ቤት በሌላ ቤት የሚተካ በመሆኑና ያለቤት የሚቀር ሰው ስለሌለ፣ ልውውጥን መከልከል ከሕጉ ዓላማ አንጻር ምክንያታዊ አይሆንም። ​ስለዚህም የኮንዶሚኒየም ቤት የደረሰው ሰው ሌላ የኮንዶሚኒየም ቤት ከደረሰው ሰው ጋር እጣው ከደረሰው 5 ዓመት ባይሞላውም እንኳ በልውውጥ ወይም በስምምነት የመቀያየር ሙሉ ሕጋዊ መብት አላቸው የሚል ድምዳሜ ላይ መድረስ ይቻላል። መልካም ጊዜ! Jura Legal Update ቴሌግራም: https://t.me/JuraLegalUpdate ፌስቡክ:https://www.facebook.com/share/1c2WCxGTV7/