كن مرشداً لذاتك✍️🏼

ما وراء المشاعر: "مش كل إحساس حقيقي يبقى دليل على حقيقة" من أكتر الحاجات اللي بتلخبطنا نفسيًا إننا بنفترض إن أي حاجة بنحسها لازم تكون صحيحة. لو حسيت إنك مرفوض… يبقى أكيد الناس رافضاك. لو حسيت إن حد اتغير عليك… يبقى أكيد مبقاش بيحبك. لكن الحقيقة هي: الإحساس حقيقي... أما التفسير فممكن يكون صحيح وممكن يكون لا. طب كده معناه اننا نشك في مشاعرنا؟! تعالوا نعرف اكتر من خلال امثلة: لو طفل شاف فقاعات صابون وارتعب منها، خوفه نفسه حقيقي جدًا واللي بتظعر في اعراض جسدية زي قلبه بيدق بسرعة، جسمه متوتر، وعينيه مليانة رعب. لكن هل الفقاعات فعلًا خطر؟ لا. شعور الخوف حقيقي... أما سبب الخوف فمش بالضرورة حقيقي. وده بيحصل مع الكبار طول الوقت. ممكن تتأخر رسالة من شخص مهم بالنسبالك، فتحس بالقلق. القلق هنا حقيقي. لكن لما عقلك يقول: "أكيد زعلان مني." أو "أكيد زهق مني." أو "أكيد هيسيبني." فدي تفسيرات، مش حقائق. المشكلة إننا أحيانًا بنتعامل مع التفسير وكأنه حقيقة مؤكدة، فنبدأ نتصرف على أساسه: نزعل، ننسحب، نهاجم، أو نحكم على الناس قبل ما نعرف الحقيقة. عشان كده النضج النفسي مش إنك تمنع إحساسك... النضج إنك تسمع إحساسك من غير ما تسلمه مفاتيح الحقيقة كلها. في فرق كبير بين "أنا حاسس بالخوف." و "إذًا فيه خطر." وفي فرق بين: "أنا حاسس إني مش محبوب." و "إذًا محدش بيحبني." الإحساس بيقولك إن فيه حاجة جواك محتاجة انتباه. لكن مش دايمًا بيقولك إيه اللي بيحصل برّه بدقة. لما تحس بإحساس قوي، جرّب تسأل نفسك: أنا حاسس بإيه بالضبط؟ إيه القصة اللي عقلي بيحكيها عن الإحساس ده؟ هل عندي دليل عليها؟ هل فيه تفسير تاني ممكن يكون منطقي؟ أوقات كتير هنكتشف إن اللي وجعنا مش الموقف نفسه... لكن القصة اللي بنحكيها لأنفسنا عنه. افتكر دايمًا: مش مطلوب منك تشك في إحساسك. لكن مطلوب منك تراجع تفسيرك له. لأن إحساسك يستحق ان تسمحله يكون موجود... أما استنتاجاتك فتستحق المراجعة. وده واحد من أهم الفروق بين الشخص اللي تقوده مشاعره، والشخص اللي يفهم مشاعره. 🌿 منقول