Wazema Media / Radio

ለቸኮለ! ቅዳሜ፣ ሐምሌ 18፣ 2018 ዓ፣ም የዋዜማ ዐበይት ዜናዎች 1፤ የአገራዊ ምክክር ኮሚሽን፣ በስምንት በተከፈሉ የአጀንዳ ምድቦች ላይ በመምከር ላይ የሚገኘው አገራዊ የምክክር ጉባኤ ወደ ቀጣዩ ምዕራፍ ተሸጋግሯል አለ። ዋና ኮሚሽነር ፕሮፌሰር መስፍን አርዓያ፣ ምክክሩ 10 አባላት ካሏቸው ንዑስ ቡድኖች 50 አባላት ወዳሏቸው ቡድኖች መሸጋገሩን ዛሬ በሠጡት ጋዜጣዊ መግለጫ ላይ ተናግረዋል። ዋና ኮሚሽነሩ፣ በቀጣዩ ሰኞ ምክክሩ 250 አባላት ወዳሏቸው ቡድኖች እንደሚሸጋገርና ከዚያም 500 አባላት ባሏቸው ቡድኖች ደረጃ እንደሚካሄድ ገልጸዋል። አገራዊ ጉባኤው በንዑስ ቡድኖች ደረጃ ምክክሩን የጀመረው ባለፈው ሰኞ ነበር። 2፤ የኢትዮጵያ ኦርቶዶክስ ቤተክርስቲያን ፓትርያርክ አቡነ ማትያስ፣ በደቡብ ወሎ አገረ ስብከት ቦረና ወረዳ በግዮን ዓባይ ቅድሥት አርሴማ፣ አቡነ አረጋዊ እና ቅዱስ ቂርቆስ አንድነት ገዳም ላይ ሐምሌ 15 ቀን ተፈጸመ የተባለውን የድሮን ጥቃት "በእግዚአብሔር የተከለከለ" እና "በታሪክ ፊት የሚያሳፍር" ነው በማለት አወገዙት። ይህን "አሰቃቂ" ጥቃት የፈጸሙ አካላት ለፍትሕ እንዲቀርቡ የጠየቁት ፓትርያርኩ፣ መንግሥት የሌሎችን ገዳማት ደኅንነት እንዲጠብቅ ጠይቀዋል። ፓትርያርኩ፣ በሀድያና ሥልጤ አገረ ስብከት አንድ የአምልኮ ሥፍራ በ"ኃይል" መፍረሱንና በምዕመናን ላይ "ጥቃት" መድረሱን በመግለጽም ድርጊቱን ኮንነዋል። የደቡብ ወሎ አገረ ስብከት፣ በገዳሙ ላይ ተፈጸመ ባለው የድሮን ጥቃት ሁለት ሴት መነኮሳት ሕይወታቸው ማለፉን አስታውቋል። አገረ ስብከቱ፣ በጥቃቱ 12 ሌሎች ሴት መነኮሳት ከባድና ቀላል አካላዊ ጉዳት እንደደረሠባቸው ገልጧል። የገዳሙ መኖሪያ ቤቶች፣ ንዋየ ቅድሳት እና የገዳሙ መናንያን የቀለብ እህል መውደማቸውንም አገረ ስብከቱ ጠቅሷል። መሠል ''አስከፊ'' ድርጊት በድጋሚ በቤተክርስቲያኒቱ እና በተከታዮቿ ላይ እንዳይፈጸም ጉዳዩ የሚመለከታቸው አካላት በትኩረት እንዲሠሩ አገረ ስብከቱ አሳስቧል። 3፤ የፌደራል ሲቪል ሠርቪስ ኮሚሽን፣ ሁሉም የሲቪል ሠርቪስ መስሪያ ቤቶች የሠራተኞቻቸውን ማስረጃዎች በተቀመጠው የጊዜ ገደብ ውስጥ እንዲያረጋግጡ አሳሰበ። ኮሚሽኑ፣ "የተሳሳቱ" የመንግሥት ሠራተኞች መረጃዎች መንግሥት አስተማማኝ የሠራተኛ መረጃ እንዳይኖረውና ለትክክለኛ ሠራተኞች ብቻ ደሞዝ እንዳይከፍል እንቅፋት ኾኖበታል ሲል ዛሬ በጉዳዩ ዙሪያ በተወያየ መድረክ ላይ ገልጧል። ኮሚሽኑ ለሁሉም መስሪያ ቤቶች አዲስ በዘረጋው ሥርዓት መሠረት፣ እያንዳንዱ የመንግሥት ሠራተኛ ልዩ የመለያ ቁጥር ይኖረዋል። የሲቪል ሠርቪስ ኮሚሽን ኮሚሽነር መኩሪያ ኃይሌ፣ የመንግሥት መሥሪያ ቤቶች የሠራተኞቻቸውን መረጃዎችና ማስረጃዎች በዲጂታል ሥርዓት እንዲይዙ አሳስበዋል። 4፤ ኢትዮጵያ፣ በዓለም ባንክ የካርበን ልቀት ቅነሳ ፕሮግራም ሥር ከልቀት የቀነሠችውን ካርበን ለሽያጭ በማቅረብ የመጀመሪያዋ አገር ኾነች። ዓለም ባንክ፣ ኢትዮጵያ "የተረጋገጠ" 14 ነጥብ 9 ሚሊዮን ቶን የካርበን ልቀት መቀነሷን አስታውቋል። ኢትዮጵያ በኦሮሚያ ክልል በባንኩ ድጋፍ በሚተገበረው የደን መመናመንን በመግታትና የአካባቢ ጥበቃን በማጠናከር የካርበን ልቀትን የመቀነስ ፕሮግራም የመጀመሪያ ዙር ግምገማ መቀነስ የቻለችው የካርበን ልቀት መጠን፣ ከአገሪቱ ለመግዛት ከታሠበው ካርበን የበለጠ መኾኑን ባንኩ ጠቅሷል። የባንኩ ማረጋገጫ፣ አገሪቱ ከዓለማቀፍ የካርበን ገበያ ተጨማሪ ገንዘብ እንድታሰባስብ እድል ይፈጥርላታል ተብሏል። ኢትዮጵያ እና ዓለም ባንክ እስከ 40 ሚሊዮን ዶላር የሚያስገኝ የካርበን ግዥ ስምምነት ከሦስት ዓመት በፊት የተፈራረሙ ሲኾን፣ የስምምነቱ ግብ በኦሮሚያ ክልል ከሚተገብረው ፕሮግራም እስከ አውሮፓዊያኑ 230 ድረስ 4 ሚሊዮን ሜትሪክ ቶን የካርበን ልቀት መቀነስ ነው። 5፤ የቦስተን ፓርትነርስ የግል ኩባንያ መስራችና የኩሪፍቱ ሪዞርትስ እና ስፓ ባለቤት ኢትዮጵያዊው ባለሀብት ታዲዮስ በለጠ፣ በኬንያ ቱሪዝም ዘርፍ ሊሠማሩ መኾኑን አስታወቁ። ታዲዮስ፣ በኬንያዋ ሞምባሳ ከተማ ከኬንያዊያን ባለሀብቶች ጋር የውሃ ፓርክ ለማቋቋም እንዳቀዱ ሰሞኑን የውጭ ጉዳይ ሚንስቴር ናይሮቢ ውስጥ የኢትዮጵያን ቱሪዝም ለኬንያዊያን ባለሀብቶች፣ ለአስጎብኝ ድርጅቶች፣ ለመገናኛ ብዙኀን ባለሙያዎችና ለማኅበራዊ መገናኛ ዘዴዎች ተጽዕኖ ፈጣሪዎች ባስተዋወቀበት መድረክ ላይ መናገራቸውን የኬንያ ጋዜጠኞች ዘግበዋል። የሞምባሳ የውሃ ፓርክ ሲጠናቀቅ፣ በምሥራቅ አፍሪካ ግዙፉ የውሃ ፓርክ እንደሚኾን ዘገባዎቹ ጠቅሠዋል። ውጭ ጉዳይ ሚንስቴር፣ የኬንያ አስጎብኝ ድርጅቶችና የመገናኛ ብዙኀን ባለሙያዎችን እንዲሁም የማኅበራዊ መገናኛ ዘዴዎች ተጽዕኖ ፈጣሪዎችን ወደ ኢትዮጵያ በመውሠድ የቱሪዝም መስህቦችን ለማስጎብኘት ማቀዱ ተገልጧል። እንዲሁም:- 1.ዐውደ ፋጎስ 89ኛ ዙር ውይይት ነገ ሐምሌ 19 ቀን 2018 ዓ.ም ከቀኑ 8:00 ጀምሮ በወመዘክር ይካሄዳል።በዚህኛው ዙር ብርሃኑ ሌንጂሶ (ዶ/ር) "ሀገር ግንባታ ፣ከጽንስ ሀሳብ እስከ ትግበራ" በሚል ርዕስ የውይይት መነሻ ሀሳብ ያቀርባል። 2. በአፍሪካ ጃዝ ቪሌጅ በየሳምንቱ ሰኞ ከምሽቱ 2:00 ጀምሮ ዕውቅ ሙዚቀኞች የሚሳተፉበት ልዩ የጃዝ ዝግጅት ለታዳሚዎች እየቀረበ ይገኛል። በዝግጅቱ ላይ የኢትዮ-ጃዝ መስራች ሙላቱ አስታጥቄ እና አንጋፋው ድምፃዊ ግርማ በየነ የሙዚቃ ስራዎቻቸውን የሚያቀርቡ ይሆናል። [ዋዜማ]