Defence Construction Enterprise

የመከላከያ ኮንስትራክሽን ኢንተርፕራይዝ የ5 ዓመት ስትራቴጂክ ዕቅዱን ይፋ አደረገ። የኢፌዴሪ መከላከያ ሠራዊት ሃምሌ 03 ቀን 2018 ዓ.ም የመከላከያ ኮንስትራክሽን ኢንተርፕራይዝ ከ2019 እስከ 2023 በጀት ዓመት የሚተገበር አዲስ ስትራቴጂክ ዕቅድ ይፋ አድርጓል። ተቋሙ በስትራቴጂክ ዕቅዱ 61.6 ቢሊዮን ብር ገቢ ለማግኘትና የፕሮጀክቶችን የጊዜ መዘግየት ምጣኔ ወደ ዜሮ የማውረድ ግብ ሰንቋል። ይህ ዕቅድ ተቋሙን ከዘመኑ የቴክኖሎጂ አቅጣጫ ጋር በማስተሳሰር ተወዳዳሪነቱን ለማረጋገጥ ያለመ ነው። ዕቅዱ በአራት ዋና ዋና ምሰሶዎች ላይ የተመሰተ ሲሆን የፕሮጀክት ክንውን ብቃትን ማሳደግ፣ የፋይናንስ ዘላቂነትን ማረጋገጥ፣ የዲጂታል ሽግግርና የሰው ኃይል ልማትን ማፋጠን፣ እንዲሁም የአመራር አስተዳደር ሥርዓትን ማጠናከር ናቸው። የኢንተርፕራይዙ ዋና ሥራ አስፈጻሚ ብርጋዲየር ጄኔራል ኢንጂነር ሰጠኝ ሊኪሳ እንደገለጹት፤ ተቋሙ ኢአርፒ (ERP) እና ቢም (BIM) ቴክኖሎጂዎችን ሙሉ በሙሉ ተግባራዊ ያደርጋል። በተጨማሪም የማሽነሪዎችን አጠቃቀም በጂፒኤስ (GPS) በመቆጣጠር እና የሠራተኞች ፍልሰትን ከ5 ከመቶ በታች በማውረድ ውጤታማነቱን ለማሳደግ ታቅዷል። ለስኬታማነቱም በውጤት ላይ የተመሰረተ የአስተዳደር ሥርዓት (OKR) ለመተግበር ታቅዷል፡፡ ከዚህ በተጨማሪ በዲጂታል ክትትል የታገዘ የተጠያቂነት አሠራር ተግባራዊ ይሆናል። ለስትራቴጂክ ዕቅዱ ስኬታማነት እያንዳንዱ ፕሮጀክት እና የሥራ ክፍል ዕቅዱን ለሠራተኞች ማዳረስ፣ የሥራ አፈጻጸምን ከሠራተኛ ጋር ማገናኘት፣ እንዲሁም የድጋፍና ቁጥጥር ሥርዓትን (ቼክ ሊስት) መተግበር እንደሚገባ ተመላክቷል። ኢንተርፕራይዙ የሚያጋጥሙትን የፕሮጀክት መዘግየት፣ የወጪ መናር እና የገንዘብ ፍሰት እጥረት የመሳሰሉ ተግዳሮቶችን ለመፍታትም ከባለድርሻ አካላት ጋር በቅንጅት ይሠራል፡፡ የ5 ዓመት ስትራቴጂክ ዕቅዱ በኢንተርፕራይዙ የዕቅድ ዝግጅት መምሪያ ተወካይ በኮሎኔል ምንውየለት አሰፋ የቀረበ ሲሆን፣ ከስትራቴጂክ ዕቅዱ መነሻ የተዘጋጀው የ2019 በጀት ዓመት ዕቅድ ደግሞ በአቶ ግዛው ክፍሌ ቀርቦ በሰፊው ውይይት ተደርጎበታል።   ዘጋቢ ማርታ ተፈሪ ፎቶግራፍ መሳይ ያደታ   የኢፌዴሪ መከላከያ ሠራዊት ድረ-ገፅ https://dfmc.mod.gov.et/ የኢፌዴሪ መከላከያ ሠራዊት ዩቲዩብ https://youtube.com/@fdredefenseforce-9629?si=Av-sDKCopw1FfTW2 የኢፌዴሪ መከላከያ ሠራዊት  ቴሌግራም  https://t.me/+E_EOiTY9eq85ODI0 የኢፌዴሪ መከላከያ ሠራዊት ፌስቡክ https://www.facebook.com/fdredefense.official