رسايل - Rsaa2l

#ورد_القرآن #أذكار_الصباح #أذكارك_حصنك_الحصين لاتنسوا الدعاء لـ إخواننا في أهل غزه والسودان

المهاجرين والبداية من الصفر 🤏 الصحابة المهاجرين لما دخلوا المدينة كانوا في مرحلة الصفر.. لأن مكة كانت فيها أموالهم وتجارتهم وبيوتهم وأملاكم وحتى أهلهم.. وهم طبعاً تركوا كل ده وطلعوا من مكة بطولهم.. يعملوا إيه ؟ يستسلموا؟ يعيطوا على اللبن المسكوب؟ لا.. أومال عملوا ايه؟ بدأوا من الصفر.. طلبوا من إخوانهم الأنصار يعرفوهم أماكن الأسواق ونزلوا يبحثوا ويصنعوا فرص عمل وكسب جديدة في بلد جديدة.. ممكن اللي كان شغال في مكة تاجر كبير له إسم بقى في المدينة بائع صغير على أده.. واللي كان رائد أعمال بقى عامل.. واللي كان في بقه معلقة ذهب بقى ماشي حافي.. مكنش عندهم مشكلة ينزلوا كل الطبقات الاجتماعية دي فجأة.. وتخلوا عن كل أساسيات الحياة العادية مش بس الرفاهية.. كل واحد فيهم غير عقليته وتأقلم سريعاً مع نمط الحياة الجديدة في المجتمع الجديد.. انت كمان.. مهما خسرت في تجارتك.. سقطت في كليتك.. مجبتش المجموع اللي كنت بتحلم بيه.. اترفدت من وظيفتك.. فشلت في علاقة زواج او خطوبة.. فقدت كل أهلك وأحبابك.. متستسلمش.. ابدأ من الصفر.. اتقفل في وشك باب رزق افتح بداله ألف باب.. والشغل مش عيب مهما كان طالما شغلانة شريفة.. وماهي إلا سنوات معدودة وأصبح المهاجرين رواد في المنطقة كلها.. #رسايل_الهجرة1446هـ

صيام يوم عاشوراء

"إِنَّمَا الْمُؤْمِنُونَ إِخْوَةٌ" من أكتر الحاجات اللي قصة الهجرة أثبتتها روح الإخوة بين المؤمنين اللي خلت اتنين مايعرفوش بعض قبل كده ويدوب لسه حالا ضيف جاي جديد عليه بس المؤمن ده أخوه بجد يعني أخوه فيشاركه بيته ويشاركه أكله ويرحب بيه في بلده ويشاركه في كل كبيرة وصغيرة هو ده اللي محتاجين نحس بيه مع أخواتنا المستضعفين في غز**ة والسودان ومع أي مؤمن في أي مكان إحساس إنك أخويا حتة مني فالوجع اللي فيك ده وجعي فمش هبطل أدعيلك ولا أتكلم عن وجعك أصله وجعي إحساس إن المسلم السوداني أو السوري ده أخوك فترحب بيه وتقوله إنت بجد في بلدك مش غريب اوعى في يوم تنتقص من أخوك أو تعايره أوعى تنسى "إِنَّمَا الْمُؤْمِنُونَ إِخْوَةٌ" فافتكر دايما إخواتك المستضعفين في غز**ة وادعيلهم كتييير وقاطع عشان دم إخواتك #رسايل_الهجرة1446هـ

قصة كليم الله 2️⃣ مع ولادة سيدنا موسى... كانت السنة اللي فرعون بيقتل فيها أي مولود ذكر فخافت أمه عليه ومابقتش عارفة تتصرف ازاي لو حرس فرعون وصلوا له هيقتلوه أكيد في الوقت ده ربنا ألهمها فكرة إنها تحطه في صندوق في البحر وماتخافش !!! وتبدأ أم موسى تنفذ الإلهام اللي حصلها ده بس بعد ماترضع ابنها الأول وبعدها ترمي ابنها في صندوق في البحر وترمي معاه قلبها ويمشي الصندوق في حفظ الله في طريق محدد عشان يوصل لبيت فرعون شخصيا وياخد الحرس الصندوق العجيب اللي وصلهم ويتفتح الصندوق في وجود زوجة فرعون اللي اسمها آسية وبمجرد ماتشوف إن الصندوق ده في طفل تفضل تتحايل على فرعون إنه مايقتلوش وإنه يمكن يكون خير ليهم ويقولوا إنه ابنهم وقدام المحايلات دي ... يستسلم فرعون لرغبتها ويسيبه مايقتلوش وده كان تسخير من ربنا ليه عشان تحصل بعد كده الأحداث اللي ماكانش حد يتخيلها بعد شوية يبدأ الطفل يصرخ فيدوروا على أي مرضعة ليه مايرضاش أبدااااا فتيجي أخت سيدنا موسى اللي كانت مراقبة الموقف من بعيد وتدلهم على اللي هيرضى يرضع منها اللي هي أمه الحقيقية أصله كان رضع منها قبل مايترمي وهم طبعا مايعرفوش وفعلا رضع منها فتشترط بقى في اللحظة دي إنه يفضل معاها لو عاوزين هترضعه وإنها مش هتقدر تروح قصر الملك والكل يوافق عشان مصلحة الطفل وترجع أم موسى بيتها ومعاها ابنها عايشين من غير خوف ولا قلق زي ماربنا وعدها لا وكمان يتدفع لها مرتب ع خدمتها دي ايه اللي هيحصل بعد كده ...؟؟!!! يتبع ...،،،،، #قصة_موسى #كليم_الله

#ورد_القرآن #أذكار_الصباح #أذكارك_حصنك_الحصين لاتنسوا الدعاء لـ إخواننا في أهل غزه والسودان

أول خطوة عشان تبني دولة صح ويبقى عندك مجتمع متماسك.. ضروري تركز اوووي ع معاملات الناس فيه وهو ده بالظبط اللي حصل أول ماالنبي وصل المدينة كان هناك المجتمع لسه فيه رواسب من الجاهلية واكتر حاجة كانت ظاهرة إنهم كانوا مش بيظبطوا ميزانهم وعشان كده نزلت أول سورة في المدينة تقولهم اظبطوا ميزانكم .. حقوق الناس مافيش حاجة هتعوضها "عبدالله بن عباس بيقول لما قدمَ النَّبيُّ المدينةَ كانوا من أخبَثِ النَّاسِ كيلًا، فأنزلَ اللَّهُ سبحانَهُ وَيْلٌ لِلْمُطَفِّفِينَ فأحسَنوا الكيلَ بعدَ ذلِكَ" وهو ده اللي لازم احنا كمان نتعلمه ونطبقه اوعى تاكل فلوس حرام سواء بالغش في الميزان وزيه بقى المراهنات والقمار والربا والسرقة ...كل دوول حرام وأكل لفلوس الناس اوعى تستسهل المكسب الحرام من أرباح تيك توك ولا يوتيوب اللي بتيجي من اعلانات انت عارف شكلها ايه خليك دايما فاكر... "أَلَا يَظُنُّ أُولَئِكَ أَنَّهُمْ مَبْعُوثُونَ لِيَوْمٍ عَظِيمٍ" فاشتغل كويس لليوم ده واتغير دلوقتي حالا زي ماأهل المدينة كلهم اتغيروا وبقوا صحابة وأفضل جيل #رسايل_الهجرة1446هـ

#قصة_الهجرة [ 3 ] وبدأت رحلة الهجرة .... فخرج النبيﷺ وأبوبكر الصديق بالليل وراحوا لفتحة في جبل اسمه غار ثور وهناك كانت تضحيات أبي بكر الصديق لاتنتهي ، ضحى الأول بماله كله فخرج بيه وساب أبنائه في وسط مجرمي مكة من غير ولا حماية ولا مال، ثم خرج مع النبيﷺ في أخطر رحلة فكانت حياته كلها مهددة ، وحتى في الغار كان بيسد أي فتحة فيه مخافة أن يُلدغ رسول اللهﷺ لكن مافيش مشكلة إن هو يلدغ ...هو ده كان حبه لدينه وللنبيﷺ طبعا الكفار اتجننوا لما عرفوا اللي حصل ...أعلنوا استنفار عام حالة طوارئ للبحث عن النبيﷺ وحانت لحظة الصفر.... وصل الكفار بالظبط قدام باب الغار ، بدأ أبو بكر يحس بالخطر ويقول للنبيﷺ لو بس واحد منهم بص تحت رجله هيشوفنا فكان رد النبيﷺ :ما ظنك باثنين الله ثالثهما؟! أخد بكل الاسباب وبعدها اطمن إن ربنا مش هيضيعهم فجه التثبيت والطمأنينة لقلوبهم وكمان.... ربنا صرف الكفار عنهم بتدبيره لأن الأمر كله بيده سبحانه وهو لا يضيع أوليائه ...صحيح يبتليهم ويمروا بابتلاءات صعبه لكنه سبحانه لا يضيعهم رجع الكفار من عند الغار بعدما صرفهم الله عنه وكملوا بعدها بحثهم في كل مكان مع الإعلان عن مكافأة قيمة لكل اللي يوصل للنبي محمدﷺ سواء حيا أو ميتا وفعلا فيه حد هيوصله 😥 مين هو... ؟؟!! وهيحصل إيه ...؟؟!! يتبع ...، #رسايل_الهجرة1446هـ