ERA ኢትዮጵያ መንገዶች አስተዳደር

የወልዲያ ከተማ መንገድ ፕሮጀክት አፈጻጸም 75 ነጥብ 09 በመቶ ደረሰ አዲስ አበባ፣ ሰኔ 24፣ 2017 (ኢ መ አ):- በ1 ነጥብ 2 ቢሊዮን ብር ወጪ የሚገነባው የወልዲያ ከተማ መንገድ ፕሮጀክት አፈጻጸም 75 ነጥብ 09 በመቶ ደርሷል። የመንገድ ፕሮጀክቱ 7 ነጥብ 52 ኪሎሜትር የሚሸፍን ሲኾን፥ የከተማውን መሀል በማቋረጥ እስከ ወልዲያ ስታዲየም ባለው ዋና መሥመር እየተከናወነ ይገኛል። ነባሩ መንገድ ስፋቱ ከ7 ሜትር ያልበለጠ፣ በአገልግሎት የተጎዳ እና ለትራፊክ እንቅስቃሴ ምቹ ያልነበረ ሲኾን፣ አሁን ላይ የእግረኛ እና የብስክሌት መንገድ ጨምሮ አጠቃላይ ስፋቱ 30 ሜትር እንዲሁም ወደ ስታዲየም የሚወስደው አቅጣጫ ደግሞ 12 ሜትር የጎን ስፋት እንዲኖረው ተደርጎ እየተገነባ ይገኛል። ይህም ምቹ እና ቀልጣፋ የትራንስፖርት እንቅስቃሴ እንዲኖር ከማስቻሉም ባለፈ የከተማውን ሁለንተናዊ ዕድገት እንደሚያፋጥን ይጠበቃል። በመንገድ ፕሮጀክቱ አሁን ላይ  የማፋሰሻ ቱቦ፣ የከርብ እንዲሁም የእግረኛ መንገድ ግንባታ እየተከናወነ ይገኛል። የነባር እና አዳዲስ ድልድዮች ግንባታም በፕሮጀክቱ ተካትቷል። ፕሮጀክቱ ባጠረ ጊዜ ውስጥ ተጠናቅቆ ደረጃውን የጠበቀ አገልግሎት መስጠት እንዲችል፣ ግንባታውን የሚያከናውነው በኢትዮጵያ መንገዶች አስተዳደር የኮምቦልቻ መንገድ ጥገና ዲስትሪክት በትኩረት እየሠራ ይገኛል።  ሀገር በቀሎቹ ልደት ኮንሰልቲንግ እና ስማርት ኮንሰልቲንግ ግንባታው በቀመጠለት ጊዜ እና የጥራት ስታንዳርድ እንዲከናወን፣ የቁጥጥር እና የማማከር ሥራውን በጥምረት ያከናውናሉ። ለመንገድ ፕሮጀክቱ የተያዘው 1 ነጥብ 2 ቢሊዮን ብር ወጪ በፌደራል መንግስት በጀት ይሸፈናል። ** ዜናው ለመጨረሻ ጊዜ የተሠራው ኅዳር 2016 ነው። ያኔ አፈጻጸሙ 58 በመቶ ነበር አሁን ላይ 79 በመቶ ደርሷል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የእንጦጦ ማርያም - ጉለሌ ዕጽዋት ማዕከል እና የእንጦጦ ማርያም - ጠፈር ምርምር ማዕከል - ኮተቤ መገንጠያ ፕሮጀክቶች እየተፋጠኑ ነው አዲስ አበባ፣ ሰኔ 21 2017 (ኢ መ አ):- ከእንጦጦ ማርያም - ጉለሌ ዕጽዋት ማዕከል እንዲሁም ከእንጦጦ ማርያም - ጠፈር ምርምር ማዕከል - ኮተቤ መገንጠያ ድረስ እየተገነቡ የሚገኙት የመንገድ ፕሮጀክቶች እየተፋጠኑ ነው። የመንገድ ግንባታዎቹ አዲስ አበባን ከዋና ዋና የክልል ከተሞች ጋር ከሚያስተሳስሩ እንዲሁም ከፍተኛ የኢኮኖሚ እንቅስቃሴ የሚከናወንባቸው የከተማ መውጫ የሆኑ ፕሮጀክቶች አካል ናቸው። የመንገድ ፕሮጀክቶቹ በዋናነት ከደብረብርሃን መሥመር መጥተው ወደ ጎጃም መስመር የሚጓዙ ተሽከርካሪዎች አዲስ አበባን ሳይነኩ ማለፍ የሚያስችሉ ናቸው። ፕሮጀክቶቹ በሁለት ምዕራፍ ተከፋፍለው በመገንባት ላይ የሚገኙ ሲኾን፥ በመጀመሪያው ምዕራፍ ከእንጦጦ ማርያም - ጠፈር ምርምር ማዕከል - ኮተቤ መገንጠያ ድረስ በመገንባት ላይ የሚገኘው የመንገድ ፕሮጀክት 18 ነጥብ 58 ኪሎሜትር ይሸፍናል። የመንገድ ግንባታውን ሀገር በቀሉ አሰር ኮንስትራክሽን በ5 ነጥብ 4 ቢሊዮን ብር ወጪ እያከናወነ ሲኾን፥ ስታዲያ የምሕንድስና ሥራዎች አማካሪ የማማከር እና የቁጥጥሩን ሥራ በመሥራት ላይ ይገኛል። አሁን ላይ የመጀመሪያው 10 ሴንቲሜትር የአስፋልት ንጣፍ (Bitumenous Road Base) ተጠናቅቆ መንገዱ ለተሽከርካሪዎች ክፍት የተደረገ ሲኾን፥ ቀጣይ ደረጃ የአስፋልት ንጣፎች የትራፊክ እንቅስቃሴውን በማያስተጓጉል መልኩ በመከናወን ላይ ይገኛሉ:: ጎን ለጎንም የእግረኛ መንገድ ግንባታ ሥራ በመከናወን ላይ ይገኛል። የመንገድ ፕሮጀክቱ አሁን ላይ አጠቃላይ አፈጻጸሙ 67 ነጥብ 55 በመቶ ደርሷል። የተመዘገበውን አበረታች አፈጻጸም አጠናክሮ በማስቀጠል እስከ ኅዳር 2018 ድረስ ሙሉ በሙሉ ለማጠናቀቅ በትኩረት እየተሠራ ይገኛል። መንገዱ የእግረኛ እና የመንገድ አካፋይን ጨምሮ አጠቃላይ 31 ሜትር የጎን ስፋት አለው። በተመሳሳይ በምዕራፍ ሁለት ከእንጦጦ ማሪያም - ጉለሌ እጽዋት ማዕከል ድረስ የሚዘልቀው የመንገድ ፕሮጀክት አሁን ላይ ከአጠቃላይ የመንገድ ሥራው 55 በመቶው ተጠናቅቋል። የመንገድ ግንባታውን በኢትዮጵያ መንገዶች አስተዳደር የዓለምገና መንገድ ጥገና ዲስትሪክት የሚያከናውን ሲኾን፣ 4 ነጥብ 37 ኪሎሜትር ይሸፍናል። ለፕሮጀክቱ 1 ነጥብ 8 ቢሊዮን ብር በፌደራል መንግስት በጀት ተይዞለታል። ኢትዮጵያ ኢንጂነሪግ ኮርፖሬሽን፣ ትራንስፖርት ዘርፍ የማማከር እና የቁጥጥር ሥራውን በማከናወን ላይ ይገኛል። አሁን ላይ የአስፋልት ንጣፍ፣ የአፈር ቆረጣ እና ሙሌት፣ የድጋፍ ግንብ እንዲሁም ፍሳሽ ማስወገጃ እና ቱቦ ቀበራ ሥራዎች በመከናወን ላይ ናቸው። ግንባታውን በአጠረ ጊዜ ለማጠናቀቅ በትኩረት እየተሠራ ይገኛል። የመንገድ ፕሮጀክቶቹ ሲጠናቀቁ ከተማዋ ላይ የሚስተዋለውን የትራፊክ ጭንቅንቅ በእጅጉ የሚያቀሉ ናቸው። በተጨማሪም የእንጦጦ ፓርክ እንዲሁም የጠፈር ምርምር ማዕከል መዳረሻውን ምቹ በማድረግ በኩል ሚናቸው የጎላ ነው። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

በቡሬ - ጎመር መንገድ ፕሮጀክት አስፋልት የማንጠፍ ሥራ ተጀመረ አዲስ አበባ፣ ሰኔ 20፣ 2017 (ኢ መ አ):- በአማራ ክልል ምዕራብ ጎጃም ዞን በቡሬ - ጎመር መንገድ ፕሮጀክት አስፋልት የማንጠፍ ሥራ ተጀመረ። 43 ነጥብ 60 ኪሎሜትር የሚሸፍነው የመንገድ ፕሮጀክቱ፥ በአስፋልት ኮንክሪት ደረጃ በመገንባት ላይ ይገኛል። አሁን ላይ የአስፋልት ንጣፍ ሥራ እየተከናወነ የሚገኝ ሲኾን፥ ጎን ለጎንም የውኃ መፋሰሻ፣ የአፈር ሥራ፣ የሰብቤዝ እና ቤዝኮርስ ሥራዎች በመከናወን ላይ ናቸው። የ3 ድልድዮች፣ የ6 ስላቭ ከልቭርቶች እና የ52 ፓይፕ ከልቨርቶች ግንባታም የፕሮጀክቱ አካል ነው። ግንባታውን ሀገር በቀሉ ሚድሮክ ኮንስትራክሽን ኢትዮጵያ በ1 ነጥብ 3 ቢሊዮን ብር ወጪ እያከናወነ ይገኛል። ወጪው ሙሉ በሙሉ በፌደራል መንግስት በጀት ነው የተሸፈነው። የግንባታውን ጥራት ቁጥጥር እና የማማከር ሥራ አይ ኤም ኤስ ኢንጅነርስ ከፕሮፌሽናል ኢንጅነርስ ኮንሰልቲንግ ጋር በጥምረት ያከናውናሉ። የመንገድ ግንባታው ዕውን ሲኾን ቀድሞ ከቡሬ ከተማ ተነስቶ ጎመር ለመድረስ የሚወስደውን የሁለት ሰዓት የጉዞ ጊዜ ወደ 45 ደቂቃ ዝቅ በማድረግ የማኅበረሰቡን ድካም እና እንግልት ያስቀራል። በምዕራብ ጎጃም እና ወለጋ ዞን መካከል ያለውን ማኅበራዊ እና ምጣኔ ሀብታዊ ትስስር ያጠናክራል። አርሶ አደሩ ምርቱን በቀላሉ ወደ ማዕከላዊ ገበያ በማቅረብ የተሻለ ተጠቃሚ እንዲሆን ያስችለዋል። በሥፍራው ለሚገኘው የቡሬ ኢንዱስትሪ ፓርክ ምቹ መዳረሻ በመኾን ከፍተኛ መነቃቃትን ይፈጥራል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የቱሉቦሎ - ኬላ አስፋልት መንገድ ፕሮጀክት ተጠናቀቀ አዲስ አበባ፣ ሰኔ 14፣ 2017 (ኢ መ አ):- የኦሮሚያ እና የማዕከላዊ ኢትዮጵያ ክልሎችን የሚያገናኘው የቱሉቦሎ - ኬላ አስፋልት መንገድ ፕሮጀክት ግንባታው ሙሉ በሙሉ መጠናቀቁን ተከትሎ ደረጃውን የጠበቀ አገልግሎት በመስጠት ላይ ይገኛል። የመንገድ ፕሮጀክቱ 80 ኪሎሜትር የሸፈነ ሲኾን፥ በአስፋልት ኮንክሪት ደረጃ ነው የተገነባው። የመንገድ ግንባታውን የቻይናው ዓለም-አቀፍ የሥራ ተቋራጭ ሁናን ሁንዳ ሮድ ኤንድ ብሪጅ ኮርፖሬሽን አከናውኖታል። ሀገር በቀሉ የተባበሩት የምህንድስና አማካሪዎች የግንባታውን ጥራት በመቆጣጠር እና በማማከር በኩል ተሳትፏል። ለፕሮጀክቱ የዋለው 1 ነጥብ 3 ቢሊዮን ብር ወጪ ሙሉ በሙሉ በፌደራል መንግስት ተሸፍኗል። በመንገድ ፕሮጀክቱ ሦስት ድልድዮችን ጨምሮ አነስተኛ፣ ከፍተኛ ፍሳሽ ማስተላለፊያዎች፣ ቱቦዎች እና ከልቨርቶች ግንባታም ተካትቷል። መንገዱ በገጠር የመንገድ ትከሻን ጨምሮ 10 ሜትር፣ በወረዳ 20 ሜትር እንዲሁም በቀበሌ 15 ሜትር የጎን ስፋት አለው። የመንገዱ መጠናቀቅ የማኅበረሰቡን የዘመናት የመሠረተ ልማት ጥያቄ ምላሽ የሰጠ ከመኾኑም ባለፈ የአዲስ አበባ-ቡታጅራ -ሆሳዕና እና የአዲስ አበባ - ወልቂጤ - ጅማ መስመር  ያሉትን አውራ መንገዶች ያገናኛል፡፡ ይህም ከዚህ ቀደም ይደረግ የነበረውን ዙሪያ ጥምጥም ጉዞ በማስቀረት የጉዞ ጊዜን ያሳጥራል። የተቀላጠፈ የትራንስፖርት እንቅስቃሴ እንዲኖር በማስቻል፣ የማኅበራዊ ተቋማት ተደራሽነትን በማስፋት እንዲሁም የገበያ ትስስሩን በማጠናከር የመንገዱ መገንባት ከፍተኛ አስተዋጽዖ ያበረክታል። የቱሉቦሎ፣ ሀርቡጩሉሌ፣ ኮምበል፣ አጨበር፣ ቀሽት እና ኬላን ጨምሮ ሌሎች በርካታ አካባቢዎችን በቅርበት ያገናኛል። መንገዶች በከፍተኛ የሀገር ሀብት የሚገነቡ በመኾኑ ኅብረተሰቡ በኃላፊነት እንዲገለገል ኢመአ ያሳስባል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የቴፒ-ሚዛን የመንገድ ግንባታ ፕሮጀክትን በሚቀጥለው በጀት ዓመት ለማጠናቀቅ በትኩረት እየተሰራ ነው አዲስ አበባ፣ ሰኔ 12፣ 2017 (ኢ መ አ) ፡- በደቡብ ምዕራብ ኢትዮጵያ ህዝቦች ክልል ግንባታው በመካሄድ ላይ የሚገኘው እና የቤንች ሸኮን እና የሸካ ዞኖችን የሚያገናኝ የቴፒ-ሚዛን 47.87 ኪሎ ሜትር አስፋልት ኮንክሪት የመንገድ ግንባታ ፕሮጀክትን በቀጣዩ በጀት ዓመት ለማጠናቀቅ በትኩረት እየተሰራ ነው፡፡ በእስካሁኑ የፕሮጀክቱ አፈጻጸም የአፈር ቆረጣ እና ሙሌት ፣ የማፋሰሻ ፣ የስትራክቸር ፣ የሰብ ቤዝ እና የቤዝ ኮርስ ንጣፍ እንዲሁም 25 ኪሎ ሜትር የአስፋልት ንጣፍ ስራዎች ተከናውነዋል፡፡ የመንገድ ግንባታ ፕሮጀክቱን እያከናወነ የሚገኘው ቻይና ግዞባ ግሩፕ ኃ/የተ/የግ/ማህበር (CGGC) የተባለ የቻይና የስራ ተቋራጭ ሲሆን የማማከርና የቁጥጥር ስራው ደግሞ ፕሮሚነንት ኢንጂነሪንግ ሶሉሽንስ ኃ/የተ/የግ/ማህበር በሚባል አማካሪ ድርጅት አማካኝነት በመካሄድ ላይ ይገኛል። ለግንባታው ማስፈጸሚያ የሚውለውን 1,276,922,787 (አንድ ቢሊዮን ሁለት መቶ ሰባ ስድስት ሚሊዮን ዘጠኝ መቶ ሃያ ሁለት ሺህ ሰባት መቶ ሰማንያ ሰባት) ብር በኢትዮጵያ መንግስት የተሸፈነ ነው ። አሁን ላይ የስራ ተቋራጩ ከአጠቃላይ ስራው 31.6 ኪሎ ሜትር ወይም 66 በመቶውን ያጠናቀቀ ሲሆን የፕሮጀክቱን ቀሪ ስራዎችም በሚቀጥለው በጀት አመት (2018 ዓ.ም) ለማጠናቀቅ እየሰራ ይገኛል፡፡ እቅዱን ከግብ ለማድረስም የኢትዮጵያ መንገዶች አስተዳደር ከሚመለከታቸው ባለድረሻ አካላት ጋር በተዋረድ ተቀናጅቶ እየሰራ ነው፡፡ ፕሮጀክቱ የቤንች ሸኮን እና የሸካ ዞኖችን የሚያገናኝ እንደመሆኑ መጠን በአካባቢው እንደ ቡና ፣ ሙዝ ፣ አቮካዶ ፣ ማር ፣ የተለያዩ ቅመማ ቅመሞች ፣ ቁንዶ በርበሬ እና ኮረሪማ እንዲሁም ፍራፍሬዎች በከፍተኛ ሁኔታ የሚመረቱ በመሆኑ እነዚህ ምርቶች በቀላሉ ወደ ማዕከላዊ ገበያ እንዲደረሱ በማስቻል ከፍተኛ ማህበራዊ እና አኮኖሚያዊ አስተዋጽኦን ያበረክታል፡፡ በተጨማሪም መንገዱ ሁለቱን ዞኖችን የሚያገናኝ ከመሆኑም ባሻገር በወረዳና በከተማ አስተዳደር ደረጃም የቴፒ ከተማ አስተዳደርን ፣ የኪ ወረዳን ፣ ሸኮ ከተማ አስተዳደርን ፣ ሸኮ ወረዳ እና ሚዛን አማን ከተማ አስተዳደርን በቅርበት በማገናኘት ማህበራዊና ኢኮኖሚያዊ መስተጋብራቸውን ይበልጥ ያጠናክራል ተብሎ ይታመናል፡፡ በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የደምበጫ - ሰቀላ እና ቢቡኝ አገናኝ የአስፋልት ኮንክሪት መንገድ የግንባታ ሂደቱን ለማፋጠን እየተሰራ ነው አዲስ አበባ፣ ሰኔ 5 ቀን 2017 ዓ.ም (ኢ መ አ)፦ በአማራ ክልል ውስጥ የሚገኘውን 69.8 ኪሎ ሜትር ደምበጫ-ፈረስ ቤት-አዴት ኮንትራት1፡ ደምበጫ-ሰቀላ (59 ኪሎ ሜትር) እና ቢቡኝ አገናኝ መንገድ (10.8 ኪሎ ሜትር) የአስፋልት ኮንክሪት መንገድ የግንባታ ሂደቱን ለማፋጠን እየተሰራ ነው፡፡ 59 ኪሎ ሜትር ርዝመትን የሚሸፍነው የደምበጫ-ሰቀላ የመንገድ ግንባታ ፕሮጀክቱ ደምበጫ ከተማን መነሻ በማድረግ ፈረስ ቤት ከተማን አቋርጦ ሰቀላ ቀበሌን የሚያገናኝ ሲሆን በተጨማሪም ከፕሮጀክቱ 37 ኪሎ ሜትር ላይ በመገንጠል ከቢቡኝ ወረዳ ጋር የሚያገናኝ 10.8 ኪሎ ሜትር መንገድ በመገንባት ላይ ይገኛል፡፡ በእስካሁኑ የመንገድ ግንባታ ስራ የአፈር ጠረጋ ፤ የቆረጣ እና የቁፋሮ ፤ የሰብ ቤዝ ፤ የስትራክቸር ፤ የማፋሰሻና ሌሎች ስራዎች በመካሄድ ላይ ይገኛሉ፡፡ እንዲሁም በአሁኑ ጊዜ የቤዝ ኮርስ እና የአስፋልት ንጣፍ ስራ ተጀምሯል፡፡ ለግንባታ ማስፈጸሚያ የሚውለውን ገንዘብ 1,790,005,720 (አንድ ቢሊዮን ሰባት መቶ ዘጠና ሚሊዮን አምስት ሺህ ሰባት መቶ ሃያ ብር የሚሸፈነው በኢትዮጵያ መንግሰት ነው ። የግንባታ ፕሮጀክቱን እያካሄደ የሚገኘው ህብር ኮንስትራክሽን ኮርፖሬሽን የተባለ መንግስታዊ የልማት ድርጅት ሲሆን የማማከር እና የቁጥጥር ስራውን ደግሞ K & J ፕሮጀክትስ ኃ/የተ/የግ/ማ እና ክሎቨር ኮንሰልቲንግ ኢንጅነርስ ኃ/የተ/የግ/ማ በጣምራ በመሆን እያከናወኑት ይገኛሉ። በአካባቢው የተስተዋለው የፀጥታ ችግር ፣ የግንባታ ግብዓት እጥረት ፤ የወሰን ማስከበር ችግሮች ፤ የስራ ተቋራጭ የአቅም ውስንነት እና ያልተጠበቀ የአየር ንብረት በግንባታ ሂደቱ ላይ ተፅዕኖ ቢያሳድርም ከባለድርሻ አካላት ጋር በቅንጅት በመስራት የመንገድ ግንባታ ሂደቱን ለማፋጠን እየተሰራ ነው፡፡ ፕሮጀክቱ ለአካባቢው ሕብረተሰብ ሰፊ የሥራ ዕድል የፈጠረ ከመሆኑም ባሻገር ከዚህ ቀደም ከደምበጫ እስከ ሰቀላ በተሽከርካሪ ለመጓዝ ይወስድ የነበረውን ከ3 ሰዓት በላይ የጉዞ ጊዜ ግንባታው ሲጠናቀቅ ከ 1: 30 ባልበለጠ ጊዜ ለመድረስ ያስችላል። ከዚህም በተጨማሪ በአካባቢው የነበረውን የትራንስፖርት ችግር በመቅረፍ ህብረተሰቡ ተሽከርካሪዎችን ተጠቅሞ በተመጣጣኝ ዋጋ ወደ ፈለገው ቦታ የሚንቀሳቀስበትንም ሁኔታ ይፈጥራል፡፡ ከዚህም ባሻገር አርሶ አደሮች በአካባቢው በስፋት የሚገኙ የግብርና ምርቶች እና የቁም እንስሳትን ትራንስፖርትን ተጠቅሞ በፍጥነት ወደ ማዕከላዊ ገበያ በማድረስ ከምርታቸው ተጠቃሚ እንዲሆኑ ያደርጋቸዋል፡፡ በመስመሩ ተራርቀው ለነበሩ የአካባቢው ህብረተሰቦች በቅርበት የመገናኘት እድልንም የሚፈጥር ሲሆን በመስመሩ ያሉ ትንንሽ መንደሮች ወደ ከተማ እንዲያድጉ ይበልጥ የኢኮኖሚ መነቃቃትን ይፈጥርላቸዋል ተብሎ ይታመናል፡፡ በተጨማሪም የጤና ፣ የትራንስፖርት እና የሌሎች ማህበራዊ አገልግሎት ሰጪ ድርጅቶች ተደራሽነትን ያስፋፋል፡፡ በአጠቃላይ የትራንስፖርት ጊዜን በማሳጠር የህዝቡን ማህበራዊና ኢኮኖሚያዊ ተጠቃሚነት በይበልጥ እንደሚያረጋግጥ ይጠበቃል፡፡ በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የአጋርፋ - አጋርፋ   ኮሌጅ  - አምቤንቱ  አስፋልት ኮንክሪት መንገድ  የግንባታ ፕሮጀክት ሙሉ በሙሉ ተጠናቆ ለትራፊክ ክፍት ተደረገ አዲስ አበባ፣ ሰኔ 3፣ 2017 (ኢ መ አ) ፡- በኦሮሚያ   ክልል  ባሌ   ዞን  የአጋርፋ  ወረዳ  እና   አምቤንቱ  ቀበሌ    የሚያገናኘው   እና 15  ኪሎ  ሜትር  ርዝማኔ  ያለው  የአጋርፋ  - አጋርፋ  ኮሌጅ -አምቤንቱ   የአስፋልት   ኮንክሪት   የመንገድ  ሥራ  ፕሮጀክት  ሙሉ በሙሉ ተጠናቀቀ። ለመንገዱ  ግንባታ 1,052,976,513 (አንድ  ቢሊዮን  ሃምሳ ሁለት ሚሊዮን  ዘጠኝ  መቶ  ሰባ ስድስት  ሺህ  አምስት  መቶ  አስራ  ሶሰት  ብር) በኢትዮጵያ መንግስት ፈሰስ ተደርጎበታል።  ግንባታውን   ያካሄደው   የስራ  ተቋራጭ  ቻይና  ኮሙኒኬሽን  ኮንስትራክሽን  ካምፓኒ  ሲሆን ፣ የማማከርና የቁጥጥር  ስራውን   ደግሞ   ሆንግ   ኣይኬ  ከልደት  አማካሪ  ጋር   በጣምራ  በመሆን  አከናውነውታል። የመንገዱ  መገንባት   አጋርፋ   ከተማን ፣ አጋርፋ  ኮሌጅን  እና  አምቤንቱ  ከተማን  በቅርበት በአስፋልት ኮንክሪት መንገድ ያገናኛል። ከዚህም   ባሻገር   በአካባቢው   የሚገኙ  እንደ በርበሬ   እና  ገብስ  ያሉ  የግብርና  ውጤቶችን ወደ ማዕከላዊ  ገበያ  አንዲቀርቡ በማድረግ አምራችና ሸማቾችን ያገናኛል፡፡ የመንገድ ግንባታ ፕሮጀክቱ  የጎን ስፋት ትከሻን ጨምሮ  በከተማ   21.50  ሜትር ፣በቀበሌ  12  ሜትር  እንዲሁም በገጠር 10  ሜትር  የሚሆን  ስፋት  አለዉ። መንገዱ ከፍተኛ መዋለ-ንዋይ የፈሰሰበት የሀገር ሀብት በመሆኑ ኅብረተሰቡ ተገቢውን ጥበቃና እንክብካቤ እንዲያደርግ ኢመአ ያሳስባል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads