EEP Communication

ባለፉት 21 ቀናት ብቻ በሦስት የማስተላለፊያ መስመሮች ላይ ስርቆት ተፈጽሟል ........///........ በኢትዮጵያ ኤሌክትሪክ ኃይል የማዕከላዊ ሪጅን አንድ የማስተላለፊያ መስመርና ማከፋፈያ ጣቢያዎች ኦፕሬሽንና ጥገና መምሪያ በሚያስተዳድራቸው የማስተላለፊያ መስመር ተሸካሚ ምሶሶዎች ላይ በተፈጸመ ስርቆት አራት ሚሊዮን ብር የሚጠጋ ኪሳራ መድረሱን መምሪያው አስታወቀ፡፡ በመምሪያው የማስተላለፊያ መስመርና ኦፕቲካል ፋይበር ኦፕሬሽን ቢሮ ሥራ አስኪያጅ አቶ በፍቃዱ በቀለ እንደተናገሩት ባለፉት ሦስት ሳምንታት በሱሉልታ-ገርበጉራቻ- ደብረ ማርቆስ ባለ 400 ኪሎ ቮልት፣ በጌዶ-ገፈርሳ ባለ 230 ኪሎ ቮልት እና በቃሊቲ-ኮተቤ ባለ 132 ኪሎ ቮልት የማስተላለፊያ መስመሮች ላይ ስርቆት ተፈጽሟል፡፡ በሱሉልታ-ገርበጉራቻ- ደብረ ማርቆስ ባለ 400 ኪ.ቮ እና በጊዶ-ገፈርሳ ባለ 230 ኪ.ቮ መስመሮች ላይ በተፈጸመው ስርቆት 338 የታወር ብረቶች፣ 678 ብሎኖች እና 1 ሺህ 290 የብሎን ማሰሪያዎች በዘራፊዎች መወሰዱን ሥራ አስኪያጁ ተናግረዋል፡፡ ከቃሊቲ - ኮተቤ በተዘረጋው ባለ 132 ኪሎ ቮልት ከፍተኛ የማስተላለፊያ መስመር ላይ አንድ የመስመሩ ተሸካሚ ምሶሶ መውደቁንም አመልክተዋል፡፡ ባለፉት ሁለት ሳምንታት በተፈጸሙ ስርቆቶች በአስር የማስተላለፊያ መስመር ተሸካሚ ምሶሶችች ላይ ጉዳት እንደደረሰ ያነሱት ሥራ አስኪያጁ ጉዳት የደረሰባቸውን የምሰሶ አካላት መልሶ ለመተካት ከ3 ነጥብ 5 ሚሊዮን ብር በላይ ያስፈልጋል ብለዋል፡፡ የምሶሶዎችን የጥገና ሥራ ለማከናወን የሚያፈልጉ የኤሌክትሮድ፣ የጉልበት ሠራተኛ፣ የነዳጅ እና ሌሎች ግብዓቶችን ለማሟላት የሚወጣውን ወጪ ጨምሮ በአጠቃላይ ከ4 ሚሊዮን ብር በላይ እንደሚያፈልግ አቶ በፍቃዱ ተናግረዋል። በመስመሮቹ ላይ በተፈጸመው ስርቆት ምክንያት ኃይል የተቋረጠባቸው አካባቢዎች ባይኖሩም ችግሩ አስተማማኝ የኤሌክትሪክ ኃይል ለማቅረብ በሚሰራው ሥራ ላይ እንቅፋት እየሆነ ይገኛል ብለዋል። እንደ ሥራ አስኪያጁ ገለፃ ለችግሩ አፋጣኝ መፍትሔ ካልተሰጠው በቀጣይ ጊዜያት ስርቆት በሚስተዋልባቸው አካባቢዎች የኃይል መቋረጥ ሊያጋጥም ይችላል፡፡ በተለያዩ አካባቢዎች የሚገኙ የብረት ማቅለጫ ፋብሪካዎች የተሰረቁ እና ቁርጥራጭ ብረታብረቶችን በግብዓትነት መጠቀማቸው በኃይል መሰረተ ልማቶች ላይ በተደጋጋሚ ለሚፈጸመው ስርቆት ምክንያት ሊሆን እንደሚችል ግምታቸውን አስቀምጠዋል፡፡ በስርቆቱ ላይ የተሳተፉ አምስት ተጠርጣሪዎች በህብረተሰቡ ጥቆማና ትብብር በጸጥታ አካላት በቁጥጥር ስር እንደዋሉና እና ቀሪ ተጠርጣሪዎችን በቁጥጥር ስር ለማዋል በአካባቢው የሚገኙ የጸጥታ አካላት ጥረት እያደረጉ እንደሚገኙ ኃላፊው ጠቁመዋል፡፡ የጸጥታ አካላት ያደረጉትን ጥረት አመስግነው በኤሌክትሪክ መሰረተ ልማቶች ላይ የሚፈጸሙ ስርቆቶችን ለመከላከል ሁሉም የመስተዳድርና የፀጥታ አካላት ንብረቶችን በኃላፊነት መጠበቅ እንዳለበትም አሳስበዋል፡፡ የማዕከላዊ ሪጅን አንድ የኦፕሬሽንና ጥገና መምሪያ የተለያየ የኪሎ ቮልት መጠን ያላቸው 1 ሺህ 404 ነጥብ 39 ኪሎ ሜትር የማስተላለፊያ መስመር እና 22 ማከፋፈያ ጣቢያዎችን እያስተዳደረ ይገኛል፡፡ ሪጅኑ በሚያስተዳድራቸው የኃይል ማስተላለፊያ መስመር ተሸካሚ ምሶሶዎች ላይ በመጀመሪያው ሩብ ዓመት በተፈጸመ ስርቆት በተቋሙ ላይ ከ9 ሚሊዮን ብር በላይ የሚገመት ኪሳራ መድረሱን ከዚህ በፊት መዘገባችን ይታወሳል፡፡ "ንፁህ ኢነርጂ ለተሻለ ህይወት!” የኢትዮጵያ ኤሌክትሪክ ኃይል ይፋዊ የማኅበራዊ ትስስር ገጾችን በመቀላቀል ትኩስ መረጃዎችን በፍጥነት ያግኙ ፌስቡክ↠ https://www.facebook.com/Ethioelectric ቴሌግራም↠ https://t.me/EEPCommuication ትዊተር ↠ https://twitter.com/EEPethiopia ዩትዩብ ቻናል↠ https://www.youtube.com/@Ethiopianelectricpower ድረ - ገፃችንንም ይጎብኙ www.eep.com.et ጥቅምት 22 ቀን 2016 ዓ.ም

ማስታወቂያ የኢትዮጵያ ኤሌክትሪክ ኃይል በሾፌር 4ኛ የሥራ መደብ ሠራተኞችን አወዳድሮ ለመቅጠር ጳጉሜ 01 ቀን 2015 ዓ.ም የውጪ ማስታወቂያ ማውጣቱ ይታወቃል፡፡ ስለሆነም መስፈርቱን አሟልታችሁ ከተመዘገባችሁት ተወዳዳሪዎች መካከል የስም ዝርዝራችሁ ከዚህ በታች የተገለጸው በተሰጠው የጽሁፍ እና የተግባር ፈተና ብልጫ ያመጣችሁ ስለሆነ ከጥቅምት 21 ቀን 2016 ዓ.ም ጀምሮ ባሉት ተከታታይ 5 (አምስት) የስራ ቀናት ውስጥ ኮተቤ በሚገኘው በዋናው መ/ቤት በሚገኘው የሰው ኃይል ምደባ ቢሮ በመገኘት የትምህርት ማስረጃችሁን ዋናውን በመያዝ እየቀረባችሁ የቅጥር ሂደት እንድትፈጽሙ እናሳውቃለን፡፡

የሆለታ ማከፋፈያ ጣቢያ ግሪዱን በማረጋጋት ረገድ ትልቅ አስተዋጽኦ እያበረከተ ነው .........///.......... የሆለታ ባለ 500 ኪሎ ቮልት የኤሌክትሪክ ማከፋፈያ ጣቢያ የሀገሪቱ የኃይል ቋት እንዲረጋጋ በማድረግ የላቀ አስተዋጽኦ እያበረከተ መሆኑን የጣቢያው ሥራ አስኪያጅ አስታወቁ። ሥራ አስኪያጁ አቶ ጥላሁን አዘዘው እንደገለፁት በሀገሪቱ የተለያዩ አካባቢዎች ከተገነቡት ጣቢያዎች መካከል ትልቁና የኤሌክትሪክ መዋዠቅ እንዳይከሰት የሚደርግ ስታቲክ ቫር ኮምፐንሴተር የተባለ ቴክኖሎጂ የተገጠመለት የማከፋፈያ ጣቢያ ነው። የተገጠመለት ቴክኖሎጂ ኃይል በሚዋዥቅበት ጊዜ ቮልቴጁን በማረጋጋት የጣቢያውን ደህንነት ከማስጠበቁ በተጨማሪ ብሔራዊ የኃይል ቋት ወይም ግሪዱ እንዳይረበሽ በማድረግ በሀገሪቱ ጤናማ የኤሌክትሪክ ፍሰት እንዲኖር እንደሚያግዝ ሥራ አስኪያጁ ገልጸዋል። እንደ ሥራ አስኪያጁ ገለጻ ማከፋፈያ ጣቢያው ከህዳሴ ግድብ በደዴሳ አድርጎ የሚመጣውን 500 ኪሎ ቮልት ኃይል ተቀብሎ ወደ 400 ኪሎ ቮልት በመቀየር ለሱልልታ፣ ሰበታ እና ገላን ማከፋፈያ ጣቢያዎች ኃይል የሚልክ ነው። ማከፋፈያ ጣቢያው በአካባቢው መገንባቱ ከግሪዱ ኃይል ለመስጠትና ለመቀበል አማራጮችን እንደሚያሰፋ ሥራ አስኪያጁ ጠቁመዋል። ጣቢያው ለሆለታ ከተማና አካባቢው ማህበረሰብ እንዲሁም በዙሪያው እየተገነቡ ላሉት ኢንዱስትሪዎች ያልቆራረጠ ኃይል የሚያቀርቡ ከ6 በላይ ወጪ መስመሮች እንዲኖሩት የማስፋፊያ ሥራዎች መከናወናቸውን ሥራ አስኪያጁ አስታውሰዋል። "ንፁህ ኢነርጂ ለተሻለ ህይወት!” የኢትዮጵያ ኤሌክትሪክ ኃይል ይፋዊ የማኅበራዊ ትስስር ገጾችን በመቀላቀል ትኩስ መረጃዎችን በፍጥነት ያግኙ ፌስቡክ↠ https://www.facebook.com/Ethioelectric ቴሌግራም↠ https://t.me/EEPCommuication ትዊተር ↠ https://twitter.com/EEPethiopia ዩትዩብ ቻናል↠ https://www.youtube.com/@Ethiopianelectricpower ድረ - ገፃችንንም ይጎብኙ www.eep.com.et ጥቅምት 21 ቀን 2016 ዓ.ም

የመቱ - ማሻ የኃይል ማስተላለፊያ መስመር ፕሮጀክት ግንባታ በቅርቡ ዳግም ይጀመራል ...///… በተለያዩ ምክንያቶች ግንባታው ተቋርጦ የቆየው የሙቱ - ማሻ ባለ 230 ኪሎ ቮልት ከፍተኛ የኃይል ማስተላለፊያ መስመር ፕሮጀክት በቅርቡ እንደሚጀመር በኢትዮጵያ ኤሌክትሪክ ኃይል የማስተላለፊያ መስመርና ማከፋፈያ ጣቢያዎች ግንባታ ዘርፍ አስታወቀ፡፡ በዘርፉ የፕሮግራም 1 ፕሮጀክት አስተዳደር 1 ቢሮ ሥራ አስኪያጅ አቶ አሸናፊ ሙሉብርሃን እንዳስታወቁት የኃይል ማስተላለፊያ መስመር ፕሮጀክቱ በሚያልፍባቸው ቦታዎች ላይ የአካባቢያዊና ማህበራዊ ጉዳዮች ጥናት ተካሂዶ ሥራው ሲሰራ ነበር፡፡ ይሁን እንጂ በአካባቢው በተባበሩት መንግስታት የትምህርት፣ ሳይንስ እና ባህል ድርጅት (ዩኔስኮ) የተመዘገበ ደን በመኖሩ ምክንያት ፕሮጀክቱን ፋይናንስ የሚያደርገው የዓለም ባንክ ተጨማሪ ጥናት መደረግ አለበት የሚል ምክረ ሀሳብ በማቅረቡ የግንባታ ሥራው መቋረጡን ተናግረዋል፡፡ ይኼን ተከትሎ በውጭ አማካሪ ድርጅት ተጨማሪ የአካባቢያዊ ተጽዕኖ ጥናት ተካሂዶ የኃይል ማስተላለፊያ መስመሩ የሚዘረጋበትን አቅጣጫ በመቀየር ለችግሩ መፍትሔ መስጠቱን ገልፀዋል፡፡ ከአካባቢያዊ ተፅዕኖ ጥናት ጋር በተያያዘ ባንኩ ያነሳው ጥያቄ መፍትሄ እስኪያገኝ ድረስ ፕሮጀክቱ ከሁለት ዓመት በላይ ተቋርጦ መቆየቱንም ነው ሥራ አስኪያጁ የጠቆሙት፡፡ እንደ ሥራ አስኪያጁ ገለፃ የመስመር ዝርጋታው 68 ነጥብ 5 ኪሎ ሜትር ርዝመት የነበረው ቢሆንም የዲዛይን ለውጥ በመደረጉ ምክንያት 3 ኪሎ ሜትር ጨምሯል፡፡ የፕሮጀክቱ የግንባታ ሥራ ተቋርጦ እንዲቆይ በመደረጉ ምክንያት ሥራ ተቋራጩ የተጨማሪ በጀት ጥያቄ አቅርቦ እንደነበር የገለፁት ሥራ አስኪያጁ ችግሩ መፍትሔ እስኪያገኝ ድረስ ወደ ግንባታ ቦታው ለመግባት ፈቃደኛ ሳይሆን መቆየቱን አስታውሰዋል፡፡ በዋጋ ጭማሪው ዙሪያ ከግንባታ ተቋራጩ ጋር መግባባት ላይ በመደረሱ ግንባታው በሁለት ሳምንት ጊዜ ውስጥ እንደሚጀምር ሥራ አስኪያጁ አረጋግጠዋል፡፡ የማስተላለፊያ መስመሩ ከሚኖሩት 174 የኃይል ማስተላለፊያ መስመር ተሸካሚ ምሶሶዎች መካከል የ50 ምሶሶዎች መትከያ የመሰረት ሥራ መከናወኑንና የማከፋፈያ ጣቢያው ግንባታ 75 በመቶ መድረሱን ተናግረዋል፡፡ የፕሮጀክቱ የግንባታ ሥራ ሲኖ ሀይድሮ በተባለ የቻይና ኩባንያ በመከናወን ላይ የሚገኝ ሲሆን በማማከር ሥራው ላይ ደግሞ ኢ ኤል ሲ የተሰኘ የጣሊያን ኩባንያ እየተሳተፈ ይገኛል፡፡ "ንፁህ ኢነርጂ ለተሻለ ህይወት!” የኢትዮጵያ ኤሌክትሪክ ኃይል ይፋዊ የማኅበራዊ ትስስር ገጾችን በመቀላቀል ትኩስ መረጃዎችን በፍጥነት ያግኙ ፌስቡክ↠ https://www.facebook.com/Ethioelectric ቴሌግራም↠ https://t.me/EEPCommuication ትዊተር ↠ https://twitter.com/EEPethiopia ዩትዩብ ቻናል↠ https://www.youtube.com/@Ethiopianelectricpower ድረ - ገፃችንንም ይጎብኙ www.eep.com.et ጥቅምት 20 ቀን 2016 ዓ.ም