Muhrim / Муҳрим

Ma’lumotlarga ko‘ra, O‘zbekiston so‘nggi besh yilda 123 milliard dollar sarmoya jalb etibdi. Zo‘r ko‘rsatkich va bunda xalqaro investitsiya forumlari, xususan, Toshkent investitsiya forumining ham o‘rni bor. Bu yilgi Toshkent investitsiya forumi dunyoning 100 ta mamlakatidan 4000 dan ziyod ishtirokchini o‘zida jamlabdi. Saida Mirziyoyevaning yozishicha, “forum doirasida prezidentimiz O‘zbekiston iqtisodiyoti o‘sishini ta’minlaydigan oltita ustuvor yo‘nalishni belgilab berdilar. Bular qatorida kapital bozorini rivojlantirish, “yashil” iqtisodiyot, sun’iy intellekt texnologiyalarini joriy etish hamda investorlarning huquqiy himoyasini yanada kuchaytirish masalalari bor”. “Endigi asosiy vazifa — erishilgan barcha kelishuvlarni iqtisodiyot, biznes va jamiyat farovonligiga xizmat qiladigan real loyihalarga aylantirishdan iborat”, — deydi Saida Mirziyoyeva.

Агробанк спорт ҳақида эмас, инсонлар ҳақида фильм қилди Агробанкнинг “Қаҳрамонлар” лойиҳаси доирасида тайёрланган янги ҳужжатли фильм эълон қилинибди. Лойиҳанинг эътиборли жиҳати, у машҳур инсонларнинг муваффақиятини эмас, балки уларни шу даражага олиб келган ҳаёт йўлини кўрсатган. Бу сафар фильм миллий терма жамоа футболчиси Отабек Шукуров ҳақида экан. Лекин, Ўзбекистон терма жамоасининг эртанги тарихий ўйини арафасида яхши лойиҳа бўлибди. Жаҳон чемпионати трансляциясининг бош ҳомийси сифатида Агробанк футбол мавзусига фақат реклама нуқтаи назаридан эмас, балки ижтимоий ва мотивацион ёндашув билан ҳам қараётгани сезилиб турибди. Фильмни томоша қилиб, катта спорт ортида қандай ҳаёт мактаби турганини билиб олиш мумкин. Видеога ҳавола

Uzum Market логистика тармоғини кенгайтириб, ҳудудлардаги тадбиркорларни қўллаб-қувватламоқда Миллий маркетплейс Ўзбекистонда электрон тижорат инфратузилмасини ривожлантиришда давом этмоқда. Бугунги кунда бутун мамлакат бўйлаб компаниянинг ўзида ҳам, кичик ва ўрта бизнесда ҳам юз минглаб иш ўринлари яратилган, тадбиркорлар эса мамлакат бўйлаб 9 та шаҳарда ўз товарларини маркетплейсда сотиш учун топширишлари мумкин. Uzum Market минтақадаги энг йирик логистика инфратузилмаларидан бирини қурди: энг замонавий омбор мажмуаларидан тортиб, 1800 дан ортиқ буюртмаларни топшириш пунктлари, ҳамда ўзининг курерлик хизматигача. Буларнинг барчаси тадбиркорларга ўз бизнесини ривожлантиришга ёрдам бериш ва ҳатто энг чекка аҳоли пунктлари аҳолисига 100 миллиондан ортиқ ноёб товар номларидан фойдаланиш имкониятини таъминлаш учун мўлжалланган.

"Кучли логистикасиз электрон тижоратни ривожлантириб бўлмайди. Биз иш ўринлари яратиш, тадбиркорларни қўллаб-қувватлаш ва замонавий хизматларни Ўзбекистоннинг барча ҳудудлари аҳолиси учун қулай қилиш мақсадида бутун мамлакат бўйлаб инфратузилмага сармоя киритишда давом этамиз", — деди Uzum Market операцион директори Данил Лебедев.

Батафсил | Реклама

Prezident Shavkat Mirziyoyev O‘zbekistonda giyohvandlik vositalari savdosiga qarshi murosasiz kurashish va jamiyatni ushbu tahdiddan himoya qilishga qaratilgan qonunni imzoladi. Yangi qonunda narkotiklarni tarqatishning zamonaviy usullarini jilovlash ko‘zda tutilgan, bunday jinoyatlar uchun jazo choralari kuchaytirilgan va voyaga yetmaganlarni himoya qilishga alohida e’tibor qaratilgan. Prezident Administratsiyasi rahbari Saida Mirziyoyevaning ta’kidlashicha, “bu kurashda chetda tomoshabin bo‘lib turishga hech kimning haqqi yo‘q. Zero, juda ko‘p narsa o‘zimizga — ota-onalarga, maktab va mahallaga hamda yon-atrofidagi hodisalarga befarq bo‘lmagan har bir insonga bog‘liq”. Ushbu masalani shaxsan Saida Mirziyoyevaning o‘z nazorati ostida ekan. O‘zi bu masala avvaldan uning nazoratida edi, deyish mumkin — o‘tgan yili shu masalada katta yig‘ilish o‘tkazgandi, bu yil esa shu yo‘nalishdagi deyarli barcha katta tashkilotlarning rahbarlari bilan uchrashib chiqdi.

“Dacha” filmini ko‘rgan Jamshidxon Ziyoxonov Instagramda: “Vaqtimga achindim”, deb yozibdi. Oxirgi bir haftada ijtimoiy tarmoqlarda bu film haqida shu kabi past baholarni ko‘p ko‘rdim. E’tiborlisi, bu baholarning bir qismi ssenariy, tasvirga olish va kinematografiyani yaxshi tushunadigan, sohadan uncha-muncha xabardor odamlar tomonidan yozilgan. Ular buyurtmaga maqtov yoki tanqid yozadiganlar emas. Va menimcha, eng to‘g‘ri baho ham shu. Aslida, har qanday san’at asariga (yoki o‘zini shunday da’vo qiladigan mahsulotga) qandaydir vazirliklar, qo‘mitalar yoki badiiy kengashlar emas, balki jamoatchilik — xoh u soha eksperti bo‘lsin, xoh oddiy tomoshabin va iste’molchi — baho berishi kerak. Ana shu baho eng ishonchli, xolis va samimiydir. Turli dunyoqarashdagi beshta tanishing bir film haqida bir-biridan bexabar holda deyarli bir xil fikr bildirayotgan bo‘lsa — eng yaxshi filtr shu emasmi? Shunday ekan, “jamoatchilik asosidagi kengash” bo‘ladimi yoki vazirlik darajasidagi ishchi guruhmi, farqi yo‘q — har qanday rasmiy senzura tuzilmasi aksilsamaralidir. Masalan, men o‘zim shu “Dacha”ni “Lolazor” podkastida, o‘zim ko‘rmagan bo‘lsam-da, xuddi maqtagandek gapirdim. Chunki o‘sha vaqtda u qaysidir badiiy kengash qarori bilan taqiqqa tushgandi. Bizda davlat tashkilotlari huzuridagi bunday tuzilmalarning o‘ziga, ayniqsa kompetensiyasiga ishonch juda past. Shuning uchun biror nima taqiqlansa, birinchi gumon “Demak, qandaydir yaxshi va haqqoniy narsani taqiqlashibdi” degan ruhda bo‘ladi. Mening ko‘plab tanishlarim ham aynan shunday umid bilan “Dacha”ni ko‘rgan bo‘lsa kerak va deyarli barining hafsalasi pir bo‘lgan. Ya’ni, badiiy kengashning “Dacha”ni omma ko‘rmasin” degan qarori filmga bo‘lgan qiziqishni sun’iy ravishda kuchaytirib yuborgan. Bu tabiiy holat: O‘zbekistonda ham, umuman dunyoda ham rasman yoki norasman nima “zapret”ga tushsa, o‘shani ko‘rishga, eshitishga hamma talpinadi. Shunday ekan, har qanday taqiqlovchi organlarni tugatish kerak. Nimani ko‘rish, eshitish yoki o‘qishni esa jamoatchilikning o‘ziga qo‘yib beraylik. Odamlar nima yaxshi-yu, nima yomonligini o‘zi oson ajratib ololadi. PS. “Yoqmadi”, “vaqtimga achindim”, “badiiy kengashlar aksilsamarali” kabi postlar orqali ham film targ‘iboti davom etyapti. Menimcha, hammasiga bogidagi bitta taqiq sababchi :)

Kartoshka qimmatlashsa, odamlar odatda dehqonni ayblaydi. Dehqon esa ob-havoni. Aslida kartoshka narxining bir uchi traktorga, traktorning bir uchi zavodga, zavodning bir uchi esa davlat siyosatiga borib taqaladi. Masalan, bugun davlat fermerning traktor xaridiga millionlab so‘m subsidiya berishga tayyor. Lekin gap traktorda emas, hosil tannarxida: Agar dehqon qimmat texnikada ishlasa, qimmat kredit olsa yoki eskirgan texnika sabab ko‘proq yoqilg‘i sarflasa, bu xarajatlar oxir-oqibat bozordagi kartoshka, piyoz va sabzi narxiga qo‘shilib boradi. Rastadagi narx aslida dalada boshlangan xarajatlarning davomidir. Shuning uchun ham ko‘plab mamlakatlar hosilning o‘zini emas, uni yetishtirish xarajatlarini arzonlashtirishga harakat qilyapti. O‘zbekiston ham aynan shu yo‘ldan bormoqda. Bu siyosatning izlarini esa ko‘pchilik allaqachon tarixga aylangan deb o‘ylaydigan TTZda ham ko‘rish mumkin. Tarixi Ikkinchi jahon urushi yillariga borib taqaladigan Toshkent traktor zavodi bugun AgroTech Klaster nomi ostida Chirchiqda faoliyat yuritadi. Fermerlar uchun eng muhim jihati esa shundaki, mahalliy ishlab chiqarilgan ayrim texnikalarni xarid qilganlarga 15 foizgacha subsidiya beriladi. QQS qaytarilishi bilan birga hisoblaganda, imtiyozlar miqdori qariyb 27 foizga yetadi. Imtiyoz bilan, masalan, 300 million so‘mlik texnika ayrim hollarda 219 million so‘mgacha tushishi mumkin. Texnikani birdaniga sotib olish imkoniyati bo‘lmasa, Agrozamin.uz platformasi orqali uni uzoq muddatli imtiyozli kredit asosida xarid qilish ham mumkin.

Bir zamonlar qrimliklar Moskvaga borib, uni bemalol talab kelavergan: https://www.instagram.com/reel/DZVQGKKNhH6/?igsh=NW1jMjBwYzRtdGEw

Ba’zida “nega yozmay qo‘ydingiz?”, deb so‘rab qolishadi. Xuddi qachonlardir men ko‘p va qoyillatib yozgandek. Nafaqat o‘zim, balki boshqalar haqida ham so‘rashadi. “Avvallari yaxshi-yaxshi, o‘tkir-o‘tkir yozardi, hozir xabar lentasi bo‘lib qoldi”, deyishadi. Chunki yozganga emas, gapirganga ko‘proq qulay bo‘lib qoldi. Shuning uchun men ham oxirgi vaqtlarda ko‘proq gapiryapman. Bu sahifaga o‘tib ko‘raverasizlar qanday gapirayotganimni: https://www.instagram.com/muhrim/reels/ Lekin bir “lekini” bor – qoyillatib gapirayotganim ham yo‘q. Men bor-yo‘g‘i boshqalar yozgan gaplarni o‘qib beryapman, xolos. Chunki shunisi hammasidan ham qulayroq bo‘lib qoldi. Aftidan, avvalgi “yaxshi yozuvchilar”ning mutlaq ko‘pchiligi shunaqa “qulay hududi”ni topib olib, endi damini olyapti. Shuning uchun ham atrofda birxillikdek, hamma birxillashib qolgandek. Kimdir o‘zining “qulay hududi”dan sal mo‘ralasa ham, darrov sezilib qolyapti, “uh, Falonchi yomon qilibdi”, deyishyapti. “O, bu yangi jadid!", devorishyapti hatto. O‘sha Falonchi bundan besh-o‘n yil avval hozirgi “yomon qilgani”dan besh barobar, o‘n barobar “yomonroq qilgani”ni, “yomonroq qila olgani”ni ko‘pchilikning yarmi eslolmaydi, qolgan yarmi bilmaydi ham. Chunki ular internetga kirganiga o‘zi ikki-uch yil bo‘ldi. Ishqilib, yozgandan gapirgan, gapirgandan birovning yozganini o‘qib bergan, undan ham ko‘ra ovoz chiqarmay o‘qigan qulay bo‘lib qoldi. Stalinning “Hayot quvnoq bo‘lib qoldi”, degani shudir, ehtimol. Darvoqe, nega yozmay qo‘ydingiz? PS. Oxirgi savol Otabek akadan boshqa hammaga taalluqli. Otabek yozib ham, gapirib ham yotibdi-ku. “Menga ham o‘rgating”, dermidi Sevara Nazarxon.

Gazeta’da 275-maktabdagi janjal ishi bo‘yicha yaxshi maqola chiqibdi. Albatta o‘qituvchi yo o‘quvchidan birini aybdor qilish, u tomon yo bu tomon bo‘lish shart emas; bu voqea hozir tizimdagi o‘qituvchilar ham, o‘quvchilar ham jabrdiyda ekanini ko‘rsatib bergan bir signal, degan o‘rinli va kerakli nuqtayi nazar ilgari surilgan, nazarimda: https://www.gazeta.uz/uz/2026/06/08/opinion/ Bunda gap, masalan, o‘quvchilarning oiladagi tarbiyasigacha (yoki uni umuman istisno qilganda) ham qancha ish qilish mumkinligi haqida. Men maktabda o‘qigan vaqtim (atigi 21 yil avval) ota-onasini ham, o‘qituvchilarini ham bir tiyinga olmaydigan o‘quvchilar eng kamida militsiyadan, uning hisobiga tushishdan hayiqardi; davlatning kuch monopoliyasi ham to‘g‘riroq, adolatliroq ishlardi, shekilli. Shuningdek, maktablarga ham har turli noto‘g‘ri, teskari rag‘batlar berilmasdi-yov, maktab reytingi pasayadi, degan xavotir ham bo‘lmagan, adashmasam. Hozir esa, aytishlaricha, davlat maktablarida o‘quvchilarga ikki baho qo‘yish mumkin emas ekan (buning maktab reytingiga qandaydir ta’siri bor, tushunishimcha). Dars qilmaydigan o‘quvchiga qoniqarsiz baho qo‘yib bo‘lmasligi -- muammo va bu muammoning oiladagi tarbiyaga aloqasi yo‘q. Bu muammo -- boshqa jabhalardagi oliy ma’lumotli odamlar tomonidan qabul qilingan betarbiya qarorlar oqibati. Menimcha.

Ajoyib :) (#)

Adashmasam, oxirgi marta Jahongir Ortiqxo‘jayev va “KunUz” mojarosida shunaqaroq manipulyatsiyaga duch kelgandik. Jahongir Ortiqxo‘jayevning ovozidan dastlab bir necha soniya tarqatilib, butun internet “portlatilgan”, jamoatchilik unga qarshi qilingandi; keyin olov ustiga sepilgan kerosindek bu audioning sal uzunroq versiyasi chiqqan. Oxirida to‘liqroq, kontekstni tushunarli qiladigan audio tarqatilgan — buni eshitgan odam Jahongir Ortiqxo‘jayevning gaplarini birinchi qisqa audioni eshitgan odamchalik og‘ir qabul qilmasdi. Lekin o‘sha birinchi tarqatilgan qisqa audio o‘ziga yuklatilgan asosiy vazifani bajarib bo‘lgandi va, vaqti-vaqti bilan, hozir ham bajaryapti. Shunga qaramay, ko‘pchilikning nazarida, aynan oxirgi, to‘liqroq audio o‘shanda Jahongir Ortiqxo‘jayevning joniga oro kirgan: yo‘qsa, birinchi ikkita qisqa audio bilan uning tagiga suv quymoqchi bo‘lganlar o‘z niyatiga yetish arafasida turgan edi, deyishadi biladiganlar (men esa hech narsani bilmaydiganlar partiyasidanman, anaqqisa). Maktabdagi mojaroda ham taxminan shunday bo‘ldi, nazarimda — avval faqat o‘qituvchi bir o‘quvchini urayotgani aks etgan video tarqaldi va mutlaq ko‘pchilik o‘qituvchining jazolanishini talab qildi. Darrov jinoyat ishi ochildi. Keyin shu videoning to‘liqrog‘i chiqdi — unda endi o‘quvchilar darsni buzayotgani ko‘ringandek bo‘ldi. Ketidan darrov jinoyat ishi ham yopildi, o‘qituvchilarning orqasida esa “pogon”lilar paydo bo‘ldi. Endi, ayb o‘zi kimda, kim asosiy aybdor ekanini anglash, bilish, bildirish uchun hammasini oydinlashtiradigan to‘liq videolar e’lon qilinishi kerak, shekilli. Organlarimiz bu ishni keragidan ortiq darajada zo‘r eplay oladi — yil boshida qator saytlar va blogerlarni “tor-mor qilish” vaqtida ham, YPX xodimini bosib ketgan BMW haydovchisi ishida ham ko‘rgandik buni. Ochig‘i, hammasiga oydinlik kiritadigan, kim aslida kimligini ko‘rsatadigan videolar bo‘lsa, ularni yashirishdan nima naf, hech tushunmadim. Haqiqat yashirish, uni bo‘yab-bejab ko‘rsatishga urinish eng kamida tuppa-tuzuk nomlarning bulg‘anishiga sabab bo‘ladi, xolos, “vazirlik tepasida o‘tirib, hech narsani bilmas ekan-da”, degandek. Shartmi shu?

Ikki hafta avval “o‘qituvchiga nisbatan qo‘zg‘atilgan jinoyat ishi bekor qilingani yaxshi bo‘ldi”, deb o‘zim, o‘z qo‘lim bilan yozgandim, chunki menda ham o‘quvchilar o‘zining xulqi bilan o‘qituvchini shu holatga yetkazgan, degan yuzaki bir o‘y bor edi — chala-chulpa ko‘rgan, o‘qiganlarimdan, shuningdek, o‘zim 9-sinf vaqtim (ha, 21 yil avval) guvohi bo‘lgan voqealardan kelib chiqib. Bolaga kuch ishlatgan odamni oqlashdek ko‘ringan o‘sha yozuvim aslida noto‘g‘ri bo‘lgan. Hasan Gafurovning onasi to‘g‘ri aytyapti — o‘qituvchi o‘zini, hissiyotlarini, kuchini jilovlashi, o‘quvchilarni insofga keltirishning boshqa muqobil yo‘llarini topsa, yaxshiroq bo‘lardi. Ha, bu qiyin, uzoq, asabbuzar yo‘l. Lekin to‘g‘risi shu. Har qanday holatda ham kuch ishlatmagan ma’qul. Ayni vaqtda, o‘quvchi tomonidan bo‘ladimi, o‘qituvchi tomonidan bo‘ladimi, farqi yo‘q — tartib buzildimi, kuch ishlatdildimi, javobgarlik ham muqarrar bo‘lishi kerak. Yoshu qari uchun. Shu o‘rinda eski bir savol yana dolzarblashadi: orqasida “pogon”lilar turgan 24 yoshli o‘qituvchiga nisbatan bekor qilingan jinoyat ishi o‘zi nega, qanday asoslar bilan qo‘zg‘atilgandi? Biror asos bo‘lgandir axir? Keyin nega bekor qilindi? Va, endi, yangi savollar qo‘shilyapti: ichki ishlar vazirining o‘rinbosari o‘qituvchilarning orqasida “pogon”lilar turishini e’lon qilgan vaqti bu ishning butun tafsilotlarini, xususan, shifoxonada shu, orqasida “pogon”lilar turgan 24 yoshli o‘qituvchidan kaltak yegani aytilayotgan o‘quvchi kasalxonaga hushsiz holda olib borilgani, hali ham gapira olmayotganini bilganmi? Bilmagan bo‘lsa, demak, vakolatli organlar bu ishning hamma tafsilotlarini to‘liq o‘rganmagan, u holda, xususan, ularning o‘z lavozimlariga loyiqligini ham o‘ylab ko‘rish zarar qilmasa kerak. Hozir esa juda xunuk holatga guvoh bo‘lib turibmiz. Shu jarayonga aralashgan tizimlarning birortasi bo‘lsa ham o‘z ishini sidqidildan, kitobida yozilganidek to‘laqonli qilganida ham hozir bir bolasi kasalxonada yotgan jabrdiyda ona dardini OAV orqali doston qilmagan bo‘lardi, bunga zarurat ham bo‘lmasdi, “orqanglarda “pogon”lilar turibdi”, degan tomoshalarga ham, ehtimol, hojat qolmasdi. https://www.gazeta.uz/oz/2026/06/07/details/

Shu kunlarda Samarqandda dunyoning 180 mamlakatidan (!) kelgan 8,5 mingdan ortiq (!) odam ikkita xalqaro tadbirda qatnashayotgan ekan. Birinchisi —Global ekologik jamg‘armaning 8-Assambleyasi. Uning ochilishida Saida Mirziyoyeva tadbir ishtirokchilariga O‘zbekiston prezidentining tabrik so‘zlarini o‘qib eshittiribdi. “Forum Markaziy Osiyo va butun dunyo uchun hozirgi kunda eng dolzarb bo‘lgan masala — iqlim muammolarini muhokama qilish imkonini berdi. Shuningdek, O‘zbekistonning global ekologik kun tartibidagi nufuzi oshib borayotganini yana bir bor namoyon etdi”, — deyiladi Saida Mirziyoyeva ijtimoiy tarmoqlardagi sahifalarida qoldirilgan xabarda. Assambleya doirasida “Eco Expo Central Asia-2026” ko‘rgazmasi tashkil etilib, uning maydonida “yashil” loyihalar uchun 80 mln dollar miqdoridagi grantlar hamda 520 mln dollardan ziyod investitsiyalarni jalb etish bo‘yicha kelishuvlar imzolanibdi. Ajoyib!

Videoning davomi: https://www.instagram.com/reel/DZNQOkstwON/?igsh=bDU2cm5ld3VkM3N1

Saida Mirziyoyeva Avstriya safari davomida ushbu mamlakat hukumati rahbari – Avstriya federal kansleri Kristian Shtoker bilan uchrashibdi. O‘zaro suhbatda O‘zbekiston–Avstriya munosabatlarini rivojlantirish, siyosiy muloqotni mustahkamlash, savdo-iqtisodiy va madaniy hamkorlikni kengaytirish yuzasidan fikr almashilibdi. “O‘zbekistonning Yevropa Ittifoqi bilan o‘zaro aloqalari va qo‘shma loyihalarni amalga oshirishning yangi imkoniyatlarini alohida muhokama qildik. O‘zaro ishonch va hurmat ruhidagi sheriklikni yanada kengaytirishdan har ikki tomon ham manfaatdor ekani ta’kidlandi”, – deyiladi Saida Mirziyoyevaning ijtimoiy tarmoqlarida qoldirilgan xabarlarda. U avvalroq Avstriya parlamentining yetakchilari bilan uchrashgan edi.

Saida Mirziyoyeva yil boshidan beri BAAga, AQShga, Italiyaga, Buyuk Britaniyaga, Hindistonga borib kelgandi. Kuni kecha Avstriyaga boribdi. U yerda BMT Jinoyatchilikning oldini olish va jinoiy odil sudlov komissiyasining 35-sessiyasida qatnashib (O‘zbekiston bu tuzilmaga 2026 yilda a’zo bo‘ldi), O‘zbekistonda odil sudlov, ayollar va bolalar huquqlarini himoya qilish, jinoyatchilik profilaktikasi hamda yoshlarni qo‘llab-quvvatlash borasida amalga oshirilayotgan ishlar yuzasidan milliy ma’ruza qilibdi. Shu tadbir doirasida BMT bosh kotibi o‘rinbosari, tashkilotning Giyohvand moddalar va jinoyatchilik bo‘yicha boshqarmasi (BMT GJB) ijrochi direktori etib tayinlangan Monika Juma bilan uchrashibdi. Bundan tashqari, Avstriya parlamenti palatalari rahbarlari bilan ham uchrashibdi. Federal kengash raisi Markus Shtotter va Milliy kengash raisi Valter Rozenkrans bilan uchrashuvlarda ikki tomonlama munosabatlarning bugungi holati va istiqbollari, shuningdek, o‘zaro manfaatli yo‘nalishlarda hamkorlikni kengaytirish masalalari bo‘yicha fikr almashilibdi. Safarning yakuniy qismida Saida Mirziyoyeva Venadagi xalqaro tashkilotlarda ishlayotgan o‘zbekistonliklar bilan uchrashibdi. “Vatandan uzoqda bo‘lishlariga qaramay, O‘zbekiston bilan mustahkam aloqani saqlab qolayotganlari ayniqsa tahsinga loyiq. Bu kabi uchrashuvlar har safar o‘zgacha faxr tuyg‘usini uyg‘otadi. Yurtdoshlarimiz yuqori kasbiy mahorati bilan xalqaro maydonda o‘z so‘zi va o‘rniga ega bo‘layotgani hamda global vazifalar yechimida faol ishtirok etayotganini ko‘rish kishini ruhlantiradi, quvontiradi”, – deb yozibdi u ijtimoy tarmoqlardagi sahifalarida.

Ҳайит муборак бўлсин! Уйдаги “кичкина соҳибқиронлар” эсон-омон таътилга чиқиб олишдими? Болалар контентини ривожлантириш марказидан бир эълонни олиб келдим. Марказ буюртмаси билан Амир Темур болалиги ҳақидаги тарихий-бадиий филм учун 4—7 июн кунлари кастинг ўтказилади. Кастинг 7—10 яшар болалар ва 15—20 ёшдаги ёшлар ўртасида бўлади. Филм ижодий жамоаси кучли мутахассислардан шаклланган: сценарий муаллифлари — Юсуф Розиқов ва Қобилжон Шерматов, постановкачи режиссёр Акбар Бектурдиев. Ижодкорларнинг бир-икки муҳокамаларида чой-пой ташиган киши бўлиб қулоқ ташлаб ўтирдим — пухта меҳнат қилинмоқда. Эринманг, ижодкорлар билан боғланиб, рўйхатдан ўтинг: +998881206677 +998901151505 Ажаб эмас, Амир Темурнинг болалиги сизнинг уйингизда яшаётган бўлса… @dilroz_abrayeva

Ayyom muborak!

Videoning to‘lig‘ini ham ko‘ring albatta: https://www.instagram.com/reel/DYzUAHlNvTb/?igsh=eGVxd2plcDI2dWVs

“Lolazor”chilar bilan birga Germaniyaga borgandik, shuni birinchi videosi nihoyat tayyor bo‘libdi, mana: https://www.youtube.com/watch?v=x12yTHKcG6Y Shu safarda bir kichik ichki musobaqa qilganmiz – har bir rezident Germaniyadan Germaniya haqida mualliflik hikoyalari tayyorlagan. Sizga qaysi rezidentning hikoyasi ko‘proq yoqsa, izohlarda o‘sha muallif ismini yozib ketsangiz, yakunda hisoblab, unga iPhone Air degan yangi matoh chiqibdi, shundan sovg‘a qilisharmish. Bu gaplardan muddao, tushunib turganingizdek, “mening qo‘shig‘imga ovoz bering!”... Hazil. Avvalo, videoni to‘liq ko‘ring – sizdan bizga, xususan, menga eng yaxshi sovg‘a shu. Keyin, qaysi hikoya ko‘proq yoqsa, o‘shaning muallifiga ovoz bering. Qo‘shimcha sifatida shuni aytishim mumkinki, boyagi iPhone uchun kurash – xuddi prezident saylovi kabi: g‘olib baribir oldindan ma’lum. Odamlar hali videoni ko‘rmay turib, “Hech kimga bermaymiz sizni, Otabek aka!”, deb izohlar yozib yotishibdi. Lekin, mabodo, vaziyatni boshqa o‘zanga bura olamiz, tarixni o‘zgartiramiz, desanglar – marhamat. Hammasi siz “saylovchilar”ning qo‘lida ;) Ishqilib, nima bo‘lsa ham, videoni ko‘ringlar: https://www.youtube.com/watch?v=x12yTHKcG6Y