The Standard Time Digital

◾️အယ်လ်နီညိုရာသီဥတု စတင်ပြီဟု အမေရိကန်အမျိုးသား ရာသီဥတုအဖွဲ့ သတိပေး အယ်လ်နီညိုရာသီဥတုဖြစ်စဉ် စတင်နေပြီဖြစ်ကြောင်း အမေရိကန်၏ ရာသီဥတု စောင့်ကြည့်ရေးအဖွဲ့ကြီး အမျိုးသားသမုဒ္ဒရာနှင့်လေထုဌာန(NOAA) က ပြောကြားပြီး ယင်းဖြစ်စဉ်သည် နှစ်ကုန်ပိုင်းအထိ ဆက်လက်ပြင်းထန်ကာ သမိုင်းဝင် အတိုင်းအတာများအထိ ပြင်းထန်နိုင်ကြောင်း သိပ္ပံပညာရှင်များက ခန့်မှန်းထားသည်။ အယ်လ်နီညိုဆိုသည်မှာ အီကွေတာနှင့်နီးသော ပစိဖိတ်သမုဒ္ဒရာ အလယ်ပိုင်းနှင့် အရှေ့ပိုင်းတွင် ရေမျက်နှာပြင်များ ပူးနွေးလာသည့် သဘာဝရာသီဥတုဖြစ်စဉ် ဖြစ်ကာ ကမ္ဘာတစ်ဝန်းလေစီးကြောင်းများ၊ မိုးရွာသွန်းမှုအပေါ် အပြောင်းအလဲများ ဖြစ်စေသလို မူမမှန်သောရာသီဥတု အခြေအနေများကို ဖြစ်ပေါ်စေကြောင်း သိရသည်။ ၎င်းရာသီဥတုဖြစ်စဉ်ကြောင့် အစွန်းရောက်ရာသီဥတုများ ဖြစ်စေနိုင်သလို ရုပ်ကြွင်းလောင်စာများကြောင့် ပူနွေးနေပြီးဖြစ်သော ကမ္ဘာကြီး၏ အပူချိန်ကို ပိုမိုမြင့်တက်လာစေနိုင်သည်ဟု သိပ္ပံပညာရှင်များက စိုးရိမ်နေကြသည်။ ပစိဖိတ်ရေမျက်နှာပြင်မှ ပျှမ်းမျှထက်များပြားသော ပူနွေးလာမှုများက ပြသခဲ့သလို အယ်လ်နီညိုရာသီဥတုသည် ပြီးခဲ့သည့်လအတွင်း ဖြစ်ပေါ်တိုးတက်လာခဲ့သည်ဟု NOAA မှ သိပ္ပံပညာရှင်များက နောက်ဆုံးထုတ်ပြန်ချက်တွင် ပြောကြားသည်။ နိုဝင်ဘာလနှင့် ဇန်နဝါရီလကြားတွင် အင်အားအလွန်ပြင်းထန်သော အယ်လ်နီညိုဖြစ်နိုင်ခြေ ၆၃ ရာခိုင်နှုန်းခန့်ရှိပြီး ၁၉၅၀ ပြည့်နှစ်နောက်ပိုင်း အကြီးမားဆုံး အယ်လ်နီညိုဖြစ်နိုင်ကြောင်း NOAA ထုတ်ပြန်ချက်က ဆက်လက်ပြောကြားသည်။ အယ်နီညိုရာသီဥတုဖြစ်စဉ်တိုင်းမှာ ကွဲပြားခြားနားကြသည်။ သို့သော် တူညီသောပုံစံများကို မြင်တွေ့ရပြီးနောက် ကြီးမားသောဖြစ်စဉ်များ လိုက်ပါလာလေ့ရှိသည်။ ယင်းပုံစံများတွင် အမေဇုန်နှင့် အင်ဒိုနီးရှား၊ ဩစ‌တြေးလျ၏ဒေသအချို့တွင် မိုးခေါင်ရေရှားခြင်း၊ အိန္ဒိယတွင် မုတ်သုံကမောက်ကမဖြစ်ခြင်း၊ အပူပိုင်းဇုန်များတွင် မိုးရွာသွန်းမှုပုံစံပြောင်းခြင်း တို့ ပါဝင်သည်။ အယ်လ်နီညိုဖြစ်စဉ်သည် ၂ နှစ် နှင့် ၇ နှစ်ကြားတစ်ကြိမ် ဖြစ်ပေါ်ကာ ၉ လမှ ၁၂ လ ကြား ကြာမြင့်လေ့ရှိသည်။ ယခုနှစ်နှောင်းပိုင်း၌ အားကောင်းသော အယ်လ်နီညို ရာသီဥတုဖြစ်စဉ် ဖြစ်ပေါ်လာမည်ဟု ကမ္ဘာလုံးဆိုင်ရာ ရာသီဥတုပညာရှင်များက တိုး၍ ယုံကြည်လာကြကြောင်း ဥရောပ၏ ကိုပါနီးကပ်စ်ရာသီဥတုပြောင်းလဲမှုဌာနကလည်း ဗုဒ္ဓဟူးနေ့က ထုတ်ပြန်ပြောကြားခဲ့ကာ အလယ်အလတ်မှ အားကောင်းသောအဆင့် သို့မဟုတ် အားကောင်းသောအဆင့်မှစံချိန်တင်အဆင့် အထိ ပြင်းထန်နိုင်ကြောင်းလည်း ၎င်းတို့က ခန့်မှန်းသည်။ အယ်လ်နီညိုရာသီဥတုကြောင့် မိုးရွာသွန်းမှုနည်းခြင်း၊ မူမမှန်ခြင်း၊ သီးနှံများပျက်စီးခြင်း၊ စားနပ်ရိက္ခာများ ဈေးကြီးခြင်းများ ဖြစ်ပေါ်နိုင်၍ မိသားစုများ အခက်တွေ့နိုင်ကြောင်း နှင့် သန်းပေါင်းများစွာသော လူထုအတွက် ကြောက်စရာ အချက်ပေးခေါင်းလောင်းသံဖြစ်ကြောင်း အာဖရိကရာသီဥတုနှင့် စွမ်းအင်ပညာရှင်အဖွဲ့မှ မိုဟာမက် အက်ဒိုးက ပြောကြားသည်။ သတင်း-ရဲမင်း ကိုးကား-AFP

#ယနေ့ထုတ်သတင်းစာ_ကာတွန်း

◾️လာမည့်ရက်အတွင်း ထူးကဲဒီရေတက်နိုင် ‎ ‎ယခုဇွန်လ ၁၆ ရက်မှ ၁၇ ရက်အထိရန်ကုန်မြစ်အတွင်း ထူးကဲဒီရေတက်နိုင်ကြောင်း မြန်မာ့ဆိပ်ကမ်းအာဏာပိုင်က အသိပေးထုတ်ပြန်ထားသည်။ ‎ ‎အဆိုပါရက်များအတွင်း အခြေခံရေစစ်မျဉ်းအထက် အမြင့်ပေ ၂၀ ဒသမ ၀၁ ပေခန့်မှ ၂၀ ဒသမ ၀၄ ပေ ခန့်အထိ သာမန်ထက်ထူးကဲဒီရေတက်ဖွယ်ရှိသဖြင့် မြစ်ကမ်းနားဒေသများအနီးနေထိုင်ကြသူများအနေဖြင့် ကြိုတင်ပြင်ဆင်မှုများဆောင်ရွက်ထားရန် ထုတ်ပြန်ချက်တွင်အသိပေးထားသည်။ ‎ ‎“ရန်ကုန်မြစ်က ဒီရေအတက်အကျရှိတဲ့အချိန် သတိထားပြီးစောင့်ကြည့်ဖို့လိုတယ်။ ဒီရေတက်နေလို့ရှိရင် မိုးသည်းထန်တဲ့အချိန်နဲ့လည်း ကြုံတယ်ဆိုလို့ရှိရင် ရေက‌ရန်ကုန်မြစ်ထဲကို လွယ်လွယ်နဲ့ဆင်းမသွားဘူး။ မြို့ထဲမှာ အနိမ့်ပိုင်းတွေမှာရေတင်ပြီးတော့ကြာတတ်တယ်" ဟု ဦးဝင်းနိုင်က စံတော်ချိန်ဒစ်ဂျစ်တယ်သို့ပြောသည်။ ‎ ‎ပြီးခဲ့သည့် ၂၀၁၄ ခုနှစ်နှင့် ၂ဝ၁၅ ခုနှစ်တွင်လည်းရန်ကုန်မြစ်အတွင်း အခြေခံရေစစ်မျဉ်းအထက် အမြင့်ပေ ၂၂ ပေခန့်ထိတက်ခဲ့ဖူးသဖြင့် စိုးရိမ်ဖွယ်မရှိကြောင်း မြန်မာ့ဆိပ်ကမ်းအာဏာပိုင်က အသိပေးထားသည်။ ‎ ‎သတင်း - အင်ကြင်း ‎ဓာတ်ပုံ-MRTV(ပုံဟောင်း)

◾️အမေရိကန်ကို ခြိမ်းခြောက်မှုအဖြစ်နယူးဇီလန်နိုင်ငံသားများ ပိုမိုရှုမြင်လာ ၁၀ နှစ်တာကာလအတွင်း ပထမဆုံးအကြိမ်အဖြစ် တရုတ်နိုင်ငံထက် အမေရိကန်ပြည်ထောင်စုကို ခြိမ်းခြောက်မှုအဖြစ် နယူးဇီလန်နိုင်ငံသားများက ပိုမိုရှုမြင်လာကြကြောင်း ဇွန် ၁၀ ရက်တွင် ပေါ်ထွက်လာသည့် လူထုသဘောထားစစ်တမ်းအရ သိရသည်။ အေးရှား နယူးဇီလန်ဖောင်ဒေးရှင်းက ပြုလုပ်ခဲ့သော အထက်ပါစစ်တမ်းကောက်ခံချက်အရ စစ်တမ်း ကောက်ခံရာတွင် ပါဝင်သူ ၃၉ရာခိုင်နှုန်းက အမေရိကန်ပြည်ထောင်စုကို နယူးဇီလန်၏ မိတ်ဆွေအဖြစ် သဘောထားပေးခဲ့ကြပြီး ၃၅ ရာခိုင်နှုန်းကမူ ခြိမ်းခြောက်မှုအဖြစ် သဘောထားပေးခဲ့ကြသည်။ သို့ရာတွင် စစ်တမ်းကောက်ခံချက်၌ ပါဝင်သူ ၄၃ ရာခိုင်နှုန်းကမူတရုတ်နိုင်ငံကို နယူးဇီလန်၏ မိတ်ဆွေ အဖြစ် မှတ်ယူထားပြီး ၂၃ ရာခိုင်နှုန်းက နယူးဇီလန်အတွက် ခြိမ်းခြောက်မှုအဖြစ် မှတ်ယူထားသည်ကို တွေ့ရကြောင်း အေးရှားနယူးဇီလန်ဖောင်ဒေးရှင်း စစ်တမ်းကောက်ခံချက် အရ သိရသည်။ အလားတူ စစ်တမ်းကောက်ခံချက်၌ ပါဝင်သူ ၈၁ ရာခိုင်နှုန်းကနယူးဇီလန်နှင့် အာရှအကြား ဆက်ဆံရေးမှာ နယူးဇီလန်အတွက်အရေးပါကြောင်း ဆန္ဒသဘောထားပေးခဲ့ကြသည်။ အမေရိကန်ပြည်ထောင်စု၏ ကုန်သွယ်ရေးမူဝါဒများနှင့် ပြည်ပရေးရာ မူဝါဒများကြောင့် ကုန်သွယ်ရေး လုပ်ငန်းများ ကမောက်ကမဖြစ်နေချိန်တွင် အမေရိကန် ပြည်ထောင်စုအား နယူးဇီလန်အတွက်ခြိမ်းခြောက်မှုအဖြစ် ယူဆလာသူ ပိုများလာခြင်း ဖြစ်သည်။ နယူးဇီလန်နိုင်ငံသည် အမေရိကန်ပြည်ထောင်စုနှင့် ကာကွယ်ရေး၊ လုံခြုံရေးနှင့် နည်းပညာကဏ္ဍတို့၌ ပူးပေါင်းဆောင်ရွက်မှု ခိုင်မာအားကောင်းခဲ့သော နိုင်ငံဖြစ်သည်။ ကိုးကား-ရိုက်တာ

◾️ကွန်ဂို အီဘိုလာဓာတ်ခွဲခန်းများ၌ ဓာတ်ခွဲပစ္စည်းများ ပြတ်လပ်နေ ကွန်ဂို ဒီမိုကရက်တစ်သမ္မတနိုင်ငံရှိ ဓာတ်ခွဲခန်း သုံးခုတို့၌ အီဘိုလာဗိုင်းရပ်စ် ရောဂါ စစ်ဆေးစမ်းသပ်ရေးပစ္စည်းများ ပြတ်လပ်နေကြောင်းကမ္ဘာ့ကျန်းမာရေးအဖွဲ့ (ဒဗလျူအိတ်ခ်ျအို) က ဇွန် ၁၀ ရက်တွင်သတင်းထုတ်ပြန်ထားသည်။ ကွန်ဂိုအရှေ့ပိုင်း ပြည်နယ်သုံးခုတို့၌ အီဘိုလာဗိုင်းရပ်စ် ကူးစက်မှုနှုန်း ဆက်လက်မြင့်တက်နေချိန်တွင်ဓာတ်ခွဲခန်းများ၌ ရောဂါစစ်ဆေးဖော်ထုတ်ရေးလုပ်ငန်းဆိုင်ရာ ဓာတ်ခွဲပစ္စည်းများ ပြတ်လပ်လာခြင်းဖြစ်သည်။ လက်ရှိအချိန်တွင် ကွန်ဂိုနိုင်ငံအတွင်းရှိ အထက်ပါဓာတ်ခွဲခန်း သုံးခုတို့မှာ အီဘိုလာဗိုင်းရပ်စ် စစ်ဆေးမှုလုပ်ငန်းများကို ယာယီရပ်ထားရပြီးရောဂါစစ်ဆေးဖော်ထုတ်မှုများ ပြန်လည်စတင်ပြုလုပ်နိုင်ရေးအတွက်လိုအပ်သည့် ဓာတ်ခွဲပစ္စည်းများကိုစောင့်ဆိုင်းနေကြကြောင်း ဒဗလျူအိတ်ခ်ျအို သတင်းထုတ်ပြန်ချက်၌ဖော်ပြထားသည်။ လက်ရှိအချိန်တွင် ကွန်ဂို နိုင်ငံတစ်ဝန်းလုံး၌ အီဘိုလာဗိုင်းရပ်စ်ကူးစက်ခံထားရသူအရေအတွက်မှာ ၆၀၀ နီးပါးအထိ ရှိလာပြီးယင်းဗိုင်းရပ်စ်ရောဂါကြောင့် သေဆုံးသူအရေအတွက်မှာလည်း ၁၁၅ ဦး အထိ ရှိလာခဲ့ပြီဖြစ်သည်။ ကွန်ဂို အီဘိုလာဗိုင်းရပ်စ်ကူးစက်မှုကပ်ဘေးကို နိုင်ငံတကာပြည်သူ့ကျန်းမာရေး အရေးပေါ် အခြေအနေအဖြစ် ဒဗလျူအိတ်ခ်ျအိုက ပြီးခဲ့သည့်မေလအတွင်း ကြေညာထားပြီးဖြစ်သည်။ ကွန်ဂိုနိုင်ငံ၌ လက်ရှိကူးစက်နေသော အီဘိုလာဗိုင်းရပ်စ်မှာ Bundibugyo အီဘိုလာဗိုင်းရပ်စ် မျိုးကွဲဖြစ်ပြီး အီဘိုလာဗိုင်းရပ်စ်စမ်းသပ်ဖော်ထုတ်မှု နည်းလမ်းအတော်များများဖြင့် ဖော်ထုတ်၍ မရနိုင်သော အီဘိုလာဗိုင်းရပ်စ် ဖြစ်သည်။ ယင်းအပြင် Bundibugyo အီဘိုလာဗိုင်းရပ်စ် ကူးစက်ရောဂါအတွက် ကာကွယ်ဆေးနှင့် သီးခြား ကုထုံးများလည်း မရှိသေးကြောင်းဒဗလျူအိတ်ခ်ျအို တာဝန်ရှိသူများကပြောကြားထားသည်။ ကိုးကား-ရိုက်တာ

၂၀၂၅ ခုနှစ်တွင် တစ်ကမာလုံးအတိုင်းအတာအရ နေရပ်ရွှေ့ပြောင်းဒုက္ခသည်ဦးရေကျဆင်း ပြီးခဲ့သည့်နှစ်အတွင်း တစ်ကမ္ဘာလုံးအတိုင်းအတာအရ ဇာတိရပ်ရွာများမှ ထွက်ခွာရွှေ့ပြောင်းပေးခဲ့ရသူ အရေအတွက်မှာ ၁၀ နှစ်တာကာလအတွင်း ပထမဆုံးအကြိမ်အဖြစ် ကျဆင်းခဲ့ကြောင်းကုလသမဂ္ဂက ဇွန် ၁၁ ရက်တွင် သတင်းထုတ်ပြန်ထားသည်။ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (ယူအင်န်အိတ်ခ်ျစီအာရ်) က ထုတ်ပြန်ထားသော အစီရင်ခံစာအရ ၂၀၂၅ ခုနှစ်ကုန်ပိုင်းတွင်၎င်းတို့၏ နေအိမ်များကို စွန့်ခွာရွှေ့ပြောင်းခဲ့ရသူအရေအတွက်မှာ တစ်ကမ္ဘာလုံးအတိုင်းအတာအရ၁၁၇ ဒသမ ၈ သန်းအထိ ရှိခဲ့ကြောင်း သိရသည်။ ၂၀၂၅ ခုနှစ်အတွင်း တစ်ကမ္ဘာလုံးအတိုင်းအတာအရ ရှိခဲ့သည့် အထက်ပါ နေရပ်ရွှေ့ပြောင်း ဒုက္ခသည်အရေအတွက်မှာ ၂၀၂၄ ခုနှစ်နှင့် နှိုင်းယှဉ်ပါက ၅ ဒသမ ၄ သန်း ပို၍ လျော့ပါးသွားကြောင်း ကုလသမဂ္ဂအစီရင်ခံစာတွင် ဖော်ပြထားသည်။ ဘေးကင်းလုံခြုံမှုနှင့် တည်ငြိမ်မှုများ မရှိသေးသည့်တိုင် နေရပ်ပြန်ရန် ရွေးချယ်လာကြသောနေရပ် ရွှေ့ပြောင်း ဒုက္ခသည်များကြောင့် ၂၀၂၅ခုနှစ်၏ နေရပ်ရွှေ့ပြောင်းဒုက္ခသည်ဦးရေမှာ ၁၀ နှစ်အတွင်း ပထမဆုံးအကြိမ်အဖြစ် ကျဆင်းခဲ့ရခြင်းဖြစ်သည်။ ၂၀၂၅ ခုနှစ်တွင် မိမိတို့၏ သက်ဆိုင်ရာနေရပ်ဇာတိများသို့ ပြန်သူအရေအတွက်မှာ ၁၄ဒသမ ၇ သန်းအထိ ရှိခဲ့ကြောင်း ကုလသမဂ္ဂအစီရင်ခံစာ၌ ဖော်ပြထားသည်။ အထက်ပါ နေရပ်ပြန်ဒုက္ခသည်များထဲတွင်ပြည်ပမှ အမိနိုင်ငံများသို့ ပြန်လည်ဝင်ရောက်ခဲ့သူ၄ ဒသမ ၄ သန်းအထိ ပါဝင်ခဲ့သည်။ ကိုးကား-ရိုက်တာ #ယနေ့ထုတ်သတင်းစာ_နိုင်ငံတကာသတင်း

ဧရာ၀တီနှင့် ချင်းတွင်းမြစ်တို့တွင် ရေမှတ်များသိသိသာသာမြင့်တက်လာနိုင်ကြောင်း မိုးဇလသတိပေး မိုးလေ၀သနှင့် ဇလဗေဒ ညွှန်ကြားမှုဦးစီးဌာန၏ဇွန်ဒုတိယ(၁၀) ရက်ပတ်အတွက် မြစ်ရေအခြေအနေခန့်မှန်းချက်များအရ မြန်မာနိုင်ငံရှိ အဓိကမြစ်ကြီးများနှင့်၎င်းတို့၏ မြစ်လက်တက်များတွင် မြစ်ရေများ သိသိသာသာမြင့်တက်လာနိုင်ကြောင်း မိုးလေ၀သနှင့်ဇလဗေဒညွှန်ကြားမှုဦးစီးဌာက ဇွန် ၁၁ ရက်တွင် ထုတ်ပြန်ထားသည်။ မြစ်ရေခန့်မှန်းချက်အရ ဧရာ၀တီမြစ်ရေသည်မြစ်ကြီးနား၊ ဗန်းမော်၊ ရွှေကူ၊ ကသာ၊ သပိတ်ကျင်း၊ မန္တလေး၊စစ်ကိုင်း၊ မြင်းမူ၊ ပခုက္ကူ၊ ညောင်ဦးနှင့် ချောက်မြို့တို့တွင် ၆ပေမှ ၁၂ ပေခန့်အထိ မြင့်တက်နိုင်ပြီး မင်းဘူး၊ မကွေး၊အောင်လံ၊ ပြည်၊ ဆိပ်သာ၊ ဟင်္သာတနှင့် ဇလွန်မြို့တို့တွင်၂ ပေမှ ၄ ပေခန့် မြင့်တက်နိုင်ကြောင်း သိရသည်။ ချင်းတွင်းမြစ်ရေသည်လည်း ခန္တီး၊ ဟုမ္မလင်း၊ဖောင်းပြင်၊ မော်လိုက်၊ ကလေး၀၊ မင်းကင်း၊ ကနီနှင့် မုံရွာမြို့တို့တွင် ၈ ပေမှ ၁၁ ပေခန့်အထိ လက်ရှိရေမှတ်အထက်မြင့်တက်လာနိုင်ကြောင်း မိုးဇလက ထုတ်ပြန်ထားသည်။ သတင်း-ဇော်ကိုထက် ဓာတ်ပုံ-MOI(ပုံဟောင်း) #ယနေ့ထုတ်သတင်းစာ_ပြည်တွင်းသတင်း

အမေရိကန်နှင့် အီရန် ဒုတိယမြောက်နေ့ တိုက်ခိုက်ဟော်မုဇ်ရေလက်ကြားကို အီရန်က ပြန်လည်ပိတ်ဆို့ အီရန်အစိုးရ၏ ရန်လိုမှုများကိုတုံ့ပြန်သည့်အနေဖြင့် ဇွန် ၁၁ ရက်တွင် အီရန်စစ်ဘက်၏ ရေဒါစခန်းများ၊ ဆက်သွယ်ရေးစနစ်များနှင့်လေကြောင်းရန် ကာကွယ်ရေးစနစ်များကို တိုက်ခိုက်ခဲ့ကြောင်း အမေရိကန်စစ်ဘက်က သတင်းထုတ်ပြန်ထားသည်။ တစ်ချိန်တည်းမှာပင် အီရန်ခေါင်းဆောင်များအနေဖြင့် အမေရိကန်ပြည်ထောင်စုနှင့် ငြိမ်းချမ်းရေးသဘောတူညီချက်တစ်ရပ် ရယူမည့်လက္ခဏာမရှိခဲ့ပါက ဗုံးကြဲတိုက်ခိုက်မှုများ ဆက်လက်ပြုလုပ်ရ လိမ့်မည်ဖြစ်ကြောင်း အမေရိကန်သမ္မတဒေါ်နယ်ထရန့်က သတိပေးထားသည်။ အမေရိကန်စစ်ဘက်၏ တိုက်ခိုက်မှုကို တုံ့ပြန်သည့်အနေဖြင့်ကူဝိတ်နှင့် ဘာရိန်းနိုင်ငံတို့ရှိ အမေရိ ကန်စစ်ရေးပစ်မှတ် ၁၈ ခုကို ဒုံးကျည်များဖြင့် ပစ်ခတ်တိုက်ခိုက်ခဲ့သလိုဂျော်ဒန်နိုင်ငံတွင်းရှိအယ်လ်-အက်ဇ်ရက်လေတပ်စခန်းကိုလည်း ဒုတိယမြောက်နေ့အဖြစ် ဒုံးကျည်များဖြင့်တိုက်ခိုက်ခဲ့ကြောင်း အီရန်စစ်ဘက်က သတင်းထုတ်ပြန်ထားသည်။ ယင်းအပြင် မဟာဗျူဟာမြောက် ဟော်မုဇ်ရေလက်ကြားကို ဇွန်၁၁ ရက်မှစ၍ စတင်ပိတ်ဆို့လိုက်ပြဖြစ်ရာ ယင်းရေလက်ကြားအား ဖြတ်သန်းရန်ကြိုးပမ်းမည့် ရေယာဉ်မှန်သမျှကို တိုက်ခိုက်မည်ဖြစ်ကြောင်းအီရန်စစ်ဘက်က ကြေညာထားခဲ့သည်။ ဟော်မုဇ်ရေလက်ကြားအနီးကင်းလှည့်ပျံသန်းနေသော အမေရိကန်ကြည်းတပ် အပါချီရဟတ်ယာဉ် တစ်စင်း ဇွန် ၈ ရက်တွင် ပျက်ကျခဲ့ပြီးနောက် အမေရိကန်စစ်ဘက်ကအီရန် စစ်ရေးပစ်မှတ်များကို ဇွန် ၁၀ရက်တွင် စတင်တိုက်ခိုက်ခဲ့သည်။ အမေရိကန်ပြည်ထောင်စုနှင့်အီရန်တို့အကြား လေကြောင်းတိုက်ခိုက်မှုများ ဆက်လက်ဖြစ်ပွားနေမှုကြောင့် ယခုနှစ်ဧပြီ ၈ ရက်တွင် ရယူထားသော အပစ်အခတ်ရပ်စဲရေးသဘောတူညီချက် ထိခိုက်ပျက်စီးမည့်အရေး ကို ကမ္ဘာ့နိုင်ငံများက စိုးရိမ်လျက်ရှိသည်။ တစ်ချိန်တည်းမှာပင် ဟော်မုဇ်ရေလက်ကြား၌ စစ်ရေးအခြေအနေပိုမိုတင်းမာလာမှုကြောင့် ဇွန် ၁၁ ရက်တွင် ကမ္ဘာ့ရေနံဈေးကွက်များ၌ ရေနံဈေးနှုန်းများ အမေရိကန်ဒေါ်လာသုံးဒေါ်လာနီးပါးအထိ ထပ်မံမြင့်တက်ခဲ့သည်။ လက်ရှိအချိန်တွင်သုံးလကျော်ကြာမြင့်နေပြီဖြစ်သော အီရန်စစ်ပွဲကိုအဆုံးသတ်ရေးအတွက် ငြိမ်းချမ်းရေး သဘောတူညီချက်တစ်ရပ် ရယူရန်အမေရိကန်နှင့်အီရန် နှစ်ဖက်စလုံးကကြိုးပမ်းနေဆဲဖြစ်သည်။ သတင်း-ဗျည်းနွဲ့ ကိုးကား-ရိုက်တာ #ယနေ့ထုတ်သတင်းစာ_နိုင်ငံတကာသတင်း

◾️စုံ/မ စနစ် ပယ်ဖျက်သင့်ဟု ပြည်ခိုင်ဖြိုးအမတ်ပြော စက်သုံးဆီသုံးစွဲမှုထိန်းချုပ်ရန်ရည်ရွယ်၍ မော်တော်ယာဉ်များအား စုံ/မ စနစ်ဖြင့် အသုံးပြုစေခြင်းသည် အခက်အခဲများစွာရှိနေသောကြောင့် ယင်းစနစ်အားပယ်ဖျက်သင့်ကြောင်း ကျောက်တံတားမြို့နယ်မှ ရန်ကုန်တိုင်းလွှတ်တော်ကိုယ်စားလှယ်ဦးသိန်းနိုင်က တိုင်းလွှတ်တော်အစည်းအဝေးတွင်ပြောသည်။ “စုံမစနစ်ကန့်သတ်မှုများကို ပယ်ဖျက်လိုက်ခြင်းဖြင့် ကုန်စည်များလျင်မြန်စွာစီးဆင်းစေမည့်အပြင် ကုန်စျေးနှုန်းတည်ငြိမ်ရေးကိုပါ များစွာအထောက်အကူဖြစ်စေမှာဖြစ်ပါတယ်” ဟု ယခုဇွန်လ ၉ ရက်ကကျင်းပသည့် လွှတ်တော်အစည်းအဝေးတွင် စုံ/မစနစ်ပယ်ဖျက်ရန် ရှိ/မရှိ ၎င်းက မေးမြန်းခဲ့ခြင်းဖြစ်သည်။ လက်ရှိတွင် မော်တော်ယာဉ်များအား QR ကုတ်ဖြင့် စက်သုံးဆီ ရောင်းချပေးသည့်စနစ်၊ မောင်းနှင်းခဲ့သည့်ခရီးအကွားအဝေးအလိုက် ရောင်းချသည့် စနစ်၊ အင်ဂျင်ပါဝါအလိုက် ခွဲတမ်းသတ်မှတ်ရောင်းချပေးသည့် စနစ်များကျင့်သုံးနေခြင်းကြောင့် စက်သုံးဆီလိုအပ်ချက်တည်ငြိမ်မှုရှိလာပြီး တန်းစီဝယ်ယူမှုများ လျော့နည်းသွားကြောင်း ၎င်းကထောက်ပြသည်။ “စက်သုံးဆီခြိုးချံချွေတာမှုအတွက် ထိန်းချုပ်မှုစနစ်နှစ်ထပ်ဖြစ်နေရပါတယ်။ စုံမစနစ်ကိုသုံးသပ်ရာတွင် စက်သုံးဆီဘယ်လောက်သက်သာသွားသလဲဆိုသောအချက်တစ်ခုတည်းကိုသာကြည့်၍ထုတ်လုပ်နိုင်စွမ်းနှင့် စီးပွားရေးထိရောက်မှုဘယ်လောက်ထိခိုက်သွားသလဲ ဆိုသည့်အချက်ကိုပါတွဲဖက်ကြည့်ရှုရန်လိုအပ် ပါတယ်” ဟု ဦးသိန်းနိုင်က ဆက်ပြောသည်။ စုံ/မစနစ်ကို ပယ်ဖျက်ခြင်းဖြင့် လက်ရှိ ပြည်သူများကြုံတွေ့နေရသည့် အခက်အခဲများ ပြေလည်သွားနိုင်သကဲ့သို့ ကုန်စည်များလျင်မြန်စွာစီးဆင်းစေမည့်အပြင် ကုန်စျေးနှုန်းတည်ငြိမ်ရေးကိုပါ အထောက်အကူပြုနိုင်မည်ဟုလည်းဆိုသည်။ အရှေ့အလယ်ပိုင်းဒေသ ပဋိပက္ခများကြောင့် ကမ္ဘာတစ်ဝန်း စက်သုံးဆီလိုအပ်ချက်မြင့်တက်ခဲ့ပြီးနောက် ပြီးခဲ့သည့်မတ်လမှစတင်ကာ နိုင်ငံတဝန်းမော်တော်ယာဉ်များကို နံပါတ်အလိုက် စုံ/မစနစ်ဖြင့် မောင်းနှင်သုံးစွဲမှုကိုကျင့်သုံးခဲ့ပြီး ယင်းစနစ်ကြောင့် လူနေမှုဘဝနှင့်ကုန်စည်ကူးသန်းမှုများအပေါ် ထိခိုက်မှုများရှိနေကြောင်း ထောက်ပြချက်များရှိနေသည်။ သို့သော် လျှပ်စစ်နှင့်စွမ်းအင်ဝန်ကြီးဌာန၊ အမျိုးသားကာကွယ်ရေးနှင့်လုံခြုံရေးကောင်စီသတင်းထုတ်ပြန်ရေးအဖွဲ့တို့၏ထုတ်ပြန်ချက်များအရ လက်ရှိတွင် စုံ/မ စနစ် အသက်ဝင်နေဆဲဖြစ်ကြောင်း ရန်ကုန်တိုင်းလျှပ်စစ်၊ စွမ်းအင်၊ စက်မှုနှင့်လမ်းပန်းဆက်သွယ်ရေးဝန်ကြီး ‌ဒေါက်တာမျိုးသော်က လွှတ်တော်တွင်ပြန်လည်ဖြေကြားသည်။ ပြီးခဲ့သည့် ဇွန် ၂ ရက်ကကျင်းပခဲ့သည့် ပြည်သူ့လွှတ်တော် အစည်းအဝေးတွင်လည်း လင်းခေးမြို့နယ်ကိုယ်စားလှယ် ဦးစိုင်းထွန်းစံ(ခ)စိုင်းဆေဟန်က စုံ/မစနစ်ကြောင့် ပြဿနာများကြုံတွေ့နေရကြောင်း ပြောဆိုမေးမြန်းခဲ့ရာ လျှပ်စစ်နှင့်စွမ်းအင်ဒုဝန်ကြီးက အဆိုပါစနစ်ကျင့်သုံးမှုသည် နိုင်ငံတော်မူဝါဒဖြစ်ကြောင်း တုံ့ပြန်ခဲ့သည်။ သတင်း - စံတော်ချိန်ဒစ်ဂျစ်တယ်

◾️ကွန်ဂို၌ အီဘိုလာဗိုင်းရပ်စ် ကူးစက်ခံထားရသူ အရေအတွက် ၆၀၀ နီးပါးရှိလာ ကွန်ဂိုဒီမိုကရက်တစ်သမ္မတနိုင်ငံ၌ အီဘိုလာဗိုင်းရပ်စ် ကူးစက်မှု အရေအတွက်မှာ ၆၀၀ နီးပါးအထိ မြင့်တက်လာပြီဖြစ်ကြောင်း ကွန်ဂိုအစိုးရ ကျန်းမာရေးဝန်ကြီးဌာနက ဇွန် ၉ ရက်တွင် သတင်းထုတ်ပြန် ထားသည်။ ကွန်ဂိုအစိုးရ ကျန်းမာရေးဝန်ကြီးဌာန၏ အထက်ပါသတင်းထုတ်ပြန်ချက်အရ ဇွန် ၉ ရက်တွင် အီဘိုလာ ဗိုင်းရပ်စ်ကူးစက်ခံထားရသူအရေအတွက်မှာ၅၉၈ ဦးအထိ မြင့်တက်လာခဲ့ပြီး ယင်းရောဂါကြောင့် သေဆုံးသူအရေအတွက်မှာ ၁၁၅ ဦးအထိ ရှိလာကြောင်း သိရသည်။ သို့ရာတွင် အီဘိုလာဗိုင်းရပ်စ်ရောဂါ ကူးစက်မှုဖြစ်ပွားခဲ့သော်လည်းပြန်လည်နာလန်ထူ ကျန်းမာလာသူ အရေအတွက်မှာလည်း ၂၂ ဦးအထိရှိကြောင်း ကွန်ဂိုတာဝန်ရှိသူများက ပြောကြားထားသည်။ ကွန်ဂိုအရှေ့ပိုင်း အိုင်တူရီပြည်နယ်အပါအဝင် ပြည်နယ်သုံးခုတို့၌ အီဘိုလာဗိုင်းရပ်စ်ရောဂါ ကူးစက်နေပြီ ဖြစ်ကြောင်း ကွန်ဂိုအစိုးရက မေ ၁၅ ရက်တွင် ကြေညာထားသည်။ အလားတူ ကမ္ဘာ့ကျန်းမာရေးအဖွဲ့ (ဒဗလျူအိတ်ခ်ျအို)ကလည်း အထက်ပါ ကွန်ဂို အီဘိုလာဗိုင်းရပ်စ် ကူးစက်မှု အတွက် နိုင်ငံတကာ ကျန်းမာရေး အရေးပေါ်အခြေအနေ ကြေညာချက်ကို မေလထဲမှာပင် ထုတ်ပြန်ထားသည်။ ကွန်ဂိုနိုင်ငံ၌ လက်ရှိကူးစက်နေသော အီဘိုလာဗိုင်းရပ်စ်မှာ Bundibugyo ခေါ် ဗိုင်းရပ်စ်မျိုးကွဲဖြစ်ပြီး ယင်းဗိုင်းရပ်စ်အတွက် သီးသန့်ကာကွယ်ဆေးလည်းမရှိသလို ကုထုံးလည်း မရှိသေးပေ။ ကိုးကား-ရိုက်တာ

◾️ရန်ကုန်၌ငလျင်လှုပ်၊ ဒေသခံများသိသာစွာခံစားရ ယနေ့(ဇွန် ၁၁ ရက်) မွန်းတည့် ၁၂ နာရီ ၁၅ မိနစ်တွင် ရန်ကုန်တိုင်းအတွင်း ငလျင်လှုပ်ခတ်မှုကို မြို့နယ်အချို့သိသာစွာခံစားခဲ့ရကြောင်း ဒေသခံများထံမှသိရသည်။ "အရင်ကလှုပ်တာဆို ခါပဲခါတာ။ အခုက ဒုန်းဆိုပြီးအောက်ကို‌ဆောင့်ချလိုက်သလိုပဲ တော်တော်သိသာ တယ်" ဟု မင်္ဂလာတောင်ညွန့်မြို့နယ်တွင်နေထိုင်သူတစ်ဦးက စံတော်ချိန်ဒစ်ဂျစ်တယ်သို့ပြောသည်။ အဆိုပါ ငလျင်လှုပ်ခတ်မှုအား မင်္ဂလာတောင်ညွန့်မြို့နယ်အပြင် ပုဇွန်တောင်၊ သမိုင်း၊ ဒလ၊ မရမ်းကုန်း၊ ဗိုလ်တထောင်၊ သာကေတ၊ ဒေါပုံ၊ အလုံ၊ လှိုင်၊ မြောက်ဥက္ကလာပ၊ အင်းစိန်၊ ဗဟန်း အစရှိသည့်မြို့နယ်များတွင်နေထိုင်သူအများအပြား သိသာစွာခံစားခဲ့ရကြောင်းသိရသည်။ သတင်း - အင်ကြင်း