" سُبل الـ𓂆ـراشــدين| قرآن | Quran

قالولك إن النبي كان فقير؟! وانت صدَّقتهم؟! تعرف إنك لو قدّرت قيمة بعض ثروة وممتلكات سيدنا محمد ﷺ الثابتة في الأحاديث الصحيحة لو قدّرتها بالجنيه المصري النهارده هنتكلم في ملايين! ومع ذلك أحاديث إنه جاع صحيحة برضه! إزاي الاتنين يجتمعوا؟ وإيه اللي ناقص في الصورة اللي اتقدمت لك؟ في حجة الوداع سيدنا النبي ﷺ ذبح ١٠٠ من الإبل وأمر بتوزيع لحومها وجلودها وأغطيتها والحديث في صحيح البخاري لو حسبنا كل ناقة بـ١٠٠ ألف جنيه إحنا بنتكلم في حوالي (١٠ مليون جنيه) ده في الحج بس! والنبي ﷺ كان عنده أراضي كمان الإمام العيني في شرحه للبخاري ذكر ضمن ملك النبي الخاص نصف أرض فدك وثلث أرض وادي القرى وحصنين من حصون خيبر والنبي ﷺ كان بيخزن لأهل بيته أكل سنة كاملة من إيراد نخل بني النضير والحديث في صحيح البخاري اقف عند دي شوية إنت ممكن تبقى قلقان على مصاريف الشهر الجاي فتلاقي اللي يحسسك إنك قليل التوكل عشان بتحاول يبقى عندك ما يكفي بيتك وقت الشدة مع إن النبي ﷺ كان بيؤمّن لأهله قوت سنة كاملة! ومش الأكل بس السيدة عائشة لما اتسألت عن مهر أمهات المؤمنين قالت ٥٠٠ درهم يعني حوالي كيلو ونص فضة إلا شوية وقيمتهم حوالي ١٥٦ ألف جنيه لكل زوجة والحديث في صحيح مسلم. لكن الرقم اللي ممكن يوقفك أكتر كان سعر حلة من الثياب حكيم بن حزام اشتراها بخمسين دينار ذهب فالنبي عرض إنه ياخدها بثمنها وخمسين دينار ذهب يعني حوالي ٢١٢ جرام ونص تساوي النهارده تقريبًا (مليون وخمسمائة ألف جنيه) وثبت كمان في صحيح مسلم إن النبي ﷺ كان بيلبس جبة من الطراز الفارسي فيها زينة من الديباج عند فتحة الرقبة وعلى حواف شقيها والديباج نسيج من الحرير... نرجع بقى للسؤال إزاي مع كل ده كان بيجوع ﷺ ؟ المفروض لما تلاقي رواية من دول تسأل هل ده كان الطبيعي؟ ولا كان وقت حصار مثلاً؟ أو أيام كان فيها قلة مؤن في المدينة وجفاف من المطر؟ طب بعد إنفاق على تجهيز جيش؟ أو يمكن بعد إيثار للفقراء على نفسه؟ عايز مثال؟ رواية ربط الحجر على بطنه الشريفة وردت في البخاري عن أيام حفر الخندق وعن ثلاثة أيام ما ذاقوش فيها طعام ماينفعش بقى تنقل المشهد وتشيل منه الخندق وتقدمه كأنه كل حياته! والإمام النووي في شرحه لصحيح مسلم قال إن سيدنا النبي ﷺ كان يتقلب بين اليسار والقلة حتى انتقل إلى الرفيق الأعلى وكان المال يزيد ثم ينفد بسبب إنفاقه في الخير وتقديم المحتاجين على نفسه وإطعام ضيوفه وتجهيز السرايا... يعني كان يحصل إنه يبقى عنده مال فيعطي منه لحد ما يحتاج هو! إنت بتحكي للناس اللحظة اللي المال خلص فيها وسايب حكاية المال راح فين! وبعدين هو إنت مش حافظ من السيرة غير اللي يسكّت الغلبان؟! يعني حافظ إن النبي ﷺ صبر على الجوع… طب وعطاءه للمحتاجين؟ ليه دي بتقولها للفقير والتانية مش بتقولها للغني؟ أغلب اللي عاملين فيها متدينين ومحدش متدين غيرهم بقوا يلوموا الفقير لما يشتكي ويقولوا قلة رضا وضعف إيمان وانعدام توكل! ليه فوق ما هو شايل همّ اللقمة… تشيله كمان ذنب إنه موجوع من غيابها؟! المفروض قبل ما تسأل العامل إنت مش صابر ليه؟ تسأل صاحب المصنع هي مرتبات العمال دي ترضي ربنا؟! مش كفاية ضحك على الفقير باسم الدين وسيدنا النبي؟ كفاية بقى الدين وسيدنا النبي بريء منكم.