" سُبل الـ𓂆ـراشــدين| قرآن | Quran

تقف تصلي تلاقي دماغك بتشتم في الذات الإلهية تفتح المصحف تلاقي صوت جواك بيشكك في كل حاجة تبدأ تحس إنك منافق وبتاع وشين وتستاهل الحرق وتترعب تحكي لأقرب الناس ليك ليفتكروك كفرت ولما الضغط بيزيد عليك بتبدأ تسيب الصلاة وتبعد عن الدين كله مش عشان كارهه بس عشان بتهرب من ساحة المعركة اللي جوه دماغك وتفضل عايش في رعب صامت لوحدك! اللي بيحصلك ده مش قلة إيمان زي ما انت متخيل ولو رجعت للأحاديث هتلاقي إن نفس الرعب ده حصل لأعظم جيل مشي على الأرض بعض الصحابة راحوا للنبي ﷺ مرعوبين وقالوله "إن أحدنا يجد في نفسه ما يتعاظم أن يتكلم به" يعني بييجي في دماغنا كلام نتحرق ومستحيل ننطقه من بشاعته سيدنا النبي مقالهمش انتوا كفرتوا ومحتاجين تجددوا إسلامكم النبي طمنهم بكلمة واحدة وقال "وقد وجدتموه؟ ذاك صريح الإيمان" يعني طالما الفكرة دي بتوجعك ومضايقاك ومش قابلها يبقى قلبك سليم وبيرفضها. الحرامي مابيدخلش يسرق بيت خربان هو بيستقصد البيت العمار والشيطان مابيرميش وساوس في قلب ميت هو بيضرب القلب اللي فيه إيمان عشان يطفيه. الشريعة عالجت الخلل النفسي ده وفرقت بعبقرية بين الفكرة اللي بتهاجمك غصب عنك وبين اختيارك سيدنا النبي ﷺ حسم الموضوع ده فقال "إن الله تجاوز لأمتي ما حدثت به أنفسها ما لم تعمل أو تتكلم" طول ما الكلام جوه الجمجمة وماتحولش لرد فعل أو كلام على لسانك انت سليم ومفيش عليك ذنب واليقين مابيزولش بالشك. بس هنا لازم نفرق بين حاجتين مهمين جدا عشان مانظلمش نفسنا في فرق بين السؤال (العلمي) والسؤال (الوسواسي) السؤال العلمي ده علامة عقل شغال عندك شبهة أو مش فاهم حكمة ربنا في قضية معينة ده حقك وعلاجه إنك تبحث وتقرأ وتسأل أهل العلم المتخصصين لحد ما تقتنع وتوصل لإجابة تريح قلبك وعقلك. لكن الفخ الحقيقي في النوع التاني (الوسواس) ده مش سؤال بيدور على حقيقة ولا عايز إجابة ده مرض وشيطان شغال معاك بنظام الدوامة كل ما ترد عليه وتجيبله إجابة منطقية تسكته يفتحلك باب تاني وتالت في حتة ألعن ده مش عقلك اللي بيفكر.. ده شيطان بيستنزف طاقتك عشان يكرهك في العبادة نفسها ويقنعك إنك منافق وتستاهل الحرق. وفي الطب النفسي ده ساعات بيكون OCD (وسواس قهري). لو سؤالك علمي ابحث واتعلم لحد ما ترتاح لكن لو سؤال وسواسي علاجه مش إنك تقف تتخانق معاه وتدور على أدلة كل ما تناقشه وتديله انتباه هيكبر العلاج الشرعي والنفسي بيتلخص في توجيه سيدنا النبي ﷺ : "فليستعذ بالله ولينته" يعني افصل الفيشة وتجاهل الفكرة تماما عاملها كأنها كلب بيهوهو ورا سور عالي لو وقفت ترد عليه هيزيد فيها ولو كملت مشي في طريقك هيسكت.