" سُبل الـ𓂆ـراشــدين| قرآن | Quran

أم موسى رمته في النيل عشان تنقذه من فرعون فالنيل أخده لبيت فرعون نفسه! فرعون وقتها كان بيقتل أبناء بني إسرائيل عشان (النبوءة) قالت مولود منهم هيكون قائد عظيم ويتسبب في موتك ويخرج مع قومه... أم موسى خافت عليه فأوحى الله إليها ﴿أَنْ أَرْضِعِيهِ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ﴾ عرفت حاجة واحدة (إن ابنها هيرجع) لكنها ماعرفتش هيروح فين ولا عند مين قبل ما يرجع حطته في التابوت ورمته في النيل الغريب إن أول ناس وصل الطفل عندهم كانوا الناس اللي أمه رمته في النيل عشان تهربه منهم! ﴿فَالْتَقَطَهُ آلُ فِرْعَوْنَ﴾ موسى دخل بيت عدوه لكن دخل ومعاه ﴿وَأَلْقَيْتُ عَلَيْكَ مَحَبَّةً مِنِّي﴾ امرأة فرعون شافته وقالت ﴿قُرَّتُ عَيْنٍ لِي وَلَكَ لَا تَقْتُلُوهُ عَسَى أَنْ يَنْفَعَنَا أَوْ نَتَّخِذَهُ وَلَدًا﴾ فرعون نفسه مقدرش يقاوم أنوار ﴿وَأَلْقَيْتُ عَلَيْكَ مَحَبَّةً مِنِّي} واستثنوا موسى من القتل ﴿وَهُمْ لَا يَشْعُرُونَ﴾ موسى بقى حي جوه بيت فرعون لكن أمه ماكانتش تعرف عنه حاجة ﴿وَأَصْبَحَ فُؤَادُ أُمِّ مُوسَى فَارِغًا﴾ ما بقتش قادرة تفكر غير في ابنها ووصل بيها الخوف إنها كادت تكشف السر كله ﴿إِنْ كَادَتْ لَتُبْدِي بِهِ لَوْلَا أَنْ رَبَطْنَا عَلَى قَلْبِهَا﴾ تماسكت وقالت لأخته ﴿قُصِّيهِ﴾ يعني امشي وراه واعرفي وصل لفين أخته فضلت تتابعه من بعيد لحد ما عرفت مكانه ﴿فَبَصُرَتْ بِهِ عَنْ جُنُبٍ وَهُمْ لَا يَشْعُرُونَ﴾ آل فرعون ماكانوش عارفين إن البنت اللي بتراقب الطفل هي أخته وقبل ما يعرفوا ظهرت مشكلة جوه البيت موسى رفض يرضع ! جابوا له مرضعة فرفضها وجابوا غيرها فرفضها البيت اللي وقع في حب الطفل ما بقاش عارف يرضّعه! ﴿وَحَرَّمْنَا عَلَيْهِ الْمَرَاضِعَ مِنْ قَبْلُ﴾ أخته قالت ﴿هَلْ أَدُلُّكُمْ عَلَى أَهْلِ بَيْتٍ يَكْفُلُونَهُ لَكُمْ وَهُمْ لَهُ نَاصِحُونَ﴾ ماقالتش أنا أعرف أمه قالت أهل بيت وماقالتش ياخدوه منكم قالت ﴿يَكْفُلُونَهُ لَكُمْ﴾ أم موسى وصلت وقربوا منها الطفل اللي رفض كل المرضعات فرضع منها آل فرعون افتكروا إنهم أخيرًا لقوا مرضعة لكن أخته كانت واقفة وعارفة إن أخوها رجع ﴿فَرَدَدْنَاهُ إِلَى أُمِّهِ كَيْ تَقَرَّ عَيْنُهَا وَلَا تَحْزَنَ وَلِتَعْلَمَ أَنَّ وَعْدَ اللَّهِ حَقٌّ﴾ وفرعون اللي كان بيدور على أبناء بني إسرائيل عشان يقتلهم هو نفسه اللي بقى بيدور على أم موسى عشان يرجعه لحضنها ﴿إِنَّا رَادُّوهُ إِلَيْكِ﴾.