YURISTKADR

САВОЛ. Янги ишга бошлаган кадрман. Бир ходимни 3 ойлик синов муддати билан ишга қабул қилдик, ходим синовдан яхши ўтди, энди уни яна бошқа буйруқ билан синов муддатидан ўтди ва ишини давом эттиради - деган мазмунда буйруқ расмийлаштириб қўяманми? Қисқача тушунча берсангиз. ЖАВОБ.

Аслида Меҳнат кодексининг 129-моддасида меҳнат шартномаси дастлабки синов шарти билан тузилиши учун иккита мақсад бор: -ходимнинг топширилаётган ишга мувофиқлигини текшириш; -меҳнат шартномасида шарт қилиб кўрсатилган ишни давом эттириш мақсадга мувофиқлиги ҳақида ходим томонидан қарор қабул қилиш.

❗️МК 130-моддасига риоя этган ҳолда ходимга 3 ой муддатга дастлабки синов белгиланган. Мана шу муддат ичида ходим ўзига топширилган ишга мувофиқ эмаслиги маълум бўлса, синов муддати тугагунига қадар иш берувчи ходимни камида 3 кун олдин ёзма шаклда огоҳлантирган ҳолда меҳнат шартномасини бекор қилишга ҳақли. ✔️Сизнинг ходимингиз синов даврида ўз вазифаларини лозим даражада уддалаганлиги сабабли синовдан муваффақиятли ўтган ҳисобланади ҳамда унинг меҳнат муносабатлари одатий давом этаверади. Бунга иш берувчининг алоҳида буйруғи расмийлаштирилмайди. Экспертимиз Эъзозабону Мамаризаева Telegram I Instagram I Youtube

Тошкент шаҳар судлари қачондан бошлаб Адвокатларга “эслатишни” бошлади? 2026 йил 8 сентябрь куни “Тошкент шахар судлари” расмий телеграм канали маъмури муносабат мазмунидаги ўз постини жойлади. Муносабат “Abdumalikovich” телеграм каналидаги 2026 йил 7 сентябрь куни жойланган постга нисбатан эди. Муносабат - бу яхши тенденция ва мени уни қўллаб-қувватлайман. Телеграм каналдаги постларимизга Тошкент шахар судлари томонидан муносабат билдириб борилиши шахсан мен учун ижобий амалиёт аммо муносабат билан асоссиз танқидни бир-биридан ажратишимиз керак назаримда. Жорий йил давомида Тошкент шахар судларининг “Abdumalikovich” телеграм канали кесимида танқидий рухдаги ҳисоб бўйича иккинчи пости ижтимоий тармоққа жойланди. Тошкент шахар судлари ёки муносабат эгаси (канал маъмури) “Abdumalikovich” телеграм канали ва унинг муаллифини у қадар хушламаслиги ҳар икки “муносабат” постидан назаримда аён бўлиб улгурди. Тошкент шаҳар судлари ҳар иккала постида ҳам адвокатни одамларни чалғитмасликка чақирган. Яъни адвокатнинг суд қарорлари юзасидан профессионал фикр-мулоҳазалари ҳамда таҳлилий-хуқуқий бахоси одамларни чалғитиш сифатида баҳоланган. Тошкент шахар судларига ҳурмат сақлаган ҳолда айрим саволларимга жавоб олишни истадим. Биринчидан, қачондан бошлаб адвокат у ёки бу суднинг якуний қарори юзасидан фикр-мулоҳаза билдира олмайдиган ёки унга тахлилий-хуқуқий баҳо бера олмайдиган бўлиб қолди? Бу қайси қонунчилик нормаси билан қатъий мутаҳкамлаб қўйилди. Иккинчидан , адвокатнинг суд қарорларига нисбатан фикри ёки хуқуқий баҳоси одамларни чалғитиш ҳисобланса, унда судларга айнан адвокатлар томонидан киритилаётган апелляция, кассация ва тафтиш тартибидаги шикоят аризалари ва ундаги важлар чўпчак ва сафсата эканда, шундайми? Ахир адвокат ўз шикоят аризаларида айнан қуйи судларнинг қонун қўллашдаги хатолари ва қарордаги камчиликларини танқидий тахлил қилиб, юқори суддан уларни бекор қилишни сўрайди. Аммо шу кунга қадар биронта суд адвокатни суд иштирокчиларини чалғитишда айбламаган. Мазкур шикоят аризаларидаги адвокатнинг умумий ҳимоя позицияси ва важлари аслида қуйи суд қарорларига берилган хуқуқий бахо эмасми?   Шахсан бирон-бир қонунчилик нормасида “судларнинг қарорларига юқори судлардан бошқа ҳеч ким баҳо беришга ҳақли эмас” деган талабни топа олмадим. Қолаверса, суд қарорларига нисбатан жамоатчилик баҳоси ва процессуал баҳо бир-биридан фарқли тушунчалар. Боз устига, Ўзбекистон Республикаси Конституциясининг 33-моддасини ҳеч ким ҳали бекор қилмади. Учинчидан, адвокат томонидан фуқаролик ишлари бўйича Миробод туманлараро судидаги мулк дахлсизлиги бўйича суд ишлари юзасидан пост жойланганда ҳам Тошкент шахар судлари муносабат билдириб, адвокатни одамларни чағитишда айблаган эди. Аммо бироз кейин ўша ноқонуний суд қарори Тошкент шахар судининг ўзида бекор бўлиб даъвогарнинг даъвоси тўлиқ рад этилди. Қизиқ, бу ҳолатда адвокат Тошкент шахар судини чалғитганмиди?    Тўртинчдан, мобил комплекслар бўйича 500 дан ортиқ ҳолатларда жарима қарорлари айнан суд томонидан бекор қилинди. Олий суд томонидан судларга бу борада мухим тушунтиришлар берилди. Олий суд рахбарияти ва адвокатлар иштирокидаги очиқ мулоқотда ҳам бу масалага алохида тўхталиб ўтилиб, мобил комплекс жарималари бўйича республикада ЯГОНА суд амалиёти ўрнатилишига ваъда берилган эди.      Бешинчидан, Тошкент шаҳар судлари адвокатни деярли адвокатлик ваколати доирасидан четга чиқишда ҳам айблаган. Бироқ ваколат доирасидан четга чиқиш айнан нималарда намоён бўлганлигини кўрсатиб ўтмаган. Бу ҳолат юзасидан алоҳида тартибда расмий ёзма изоҳ талаб қиламиз албатта. “Abdumalikovich” телеграм каналида одил судловни мадҳ этувчи постлар хам мунтазам юклаб борилади. Аммо таажжубки, уларнинг биронтасига суд томонидан расман РАДДИЯ берилмаган. Гарчи у ерда ҳам биз суд қарорига у ёки бу даражада хуқуқий бахо бериб ўтганмиз. Тошкент шахар судлари айрим ижобий постларни ҳатто ўз каналига жойлашни ҳам лозим деб топмайди. Майли шарт ҳам эмас. Аммо бирон суд қарори профессионал таҳлил қилинганда ёки унга хуқуқий бахо берилганда Тошкент шаҳар судининг адвокатга қарши ўз қиличини дарҳол ялонғочлаши очиғи бироз дилни хира қилади. Ха айтганча, бу бутун бошли Тошкент шахар судларининг позициясими ёки фақат телеграм канални юритишга масъул бўлган маъмурнинг? Бу муносабат пости телеграм каналга  юкланишидан олдин бирон тасдиқдан ўтганмикан? Камолиддин Абдумаликович 👉@yuristkadr

Суд қарори танқиддан дахлсиз эмас Тошкент шаҳар судларининг расмий канали адвокат ва блогер 𝐀𝐛𝐝𝐮𝐦𝐚𝐥𝐢𝐤𝐨𝐯𝐢𝐜𝐡нинг ҳуқуқий фикрига муносабат билдириб, адвокат суд ҳужжатига “ҳуқуқий баҳо” беришга ҳақли эмаслигини таъкидлабди. Ҳурмат билан айтганда, бу ерда икки тушунча аралаштирилган. Суд қарорини бекор қилиш, ўзгартириш ёки кучида қолдириш, албатта юқори суднинг ваколати. Аммо уни ўқиш, таҳлил қилиш ва қонун нуқтаи назаридан баҳолаш ҳар бир ҳуқуқшуноснинг, айниқса адвокатнинг касбий ҳуқуқи. Адвокат суд қарорини таҳлил қилса, судья бўлиб қолмайди. Худди шифокорнинг ташхисини бошқа шифокор муҳокама қилса, бош шифокорнинг лавозимини эгаллаб олмаганидек. БМТнинг “Адвокатлар ролига оид асосий принциплари” 23-бандида адвокатларнинг қонунчилик, одил судлов ва инсон ҳуқуқларига оид масалаларнинг жамоатчилик муҳокамасида иштирок этиш ҳуқуқи очиқ эътироф этилган. Қонуний фикри учун адвокат касбий чекловларга дучор этилмаслиги лозим. Абдумаликович судьянинг шахсига эмас, суд қарорининг ҳуқуқий асосларига муносабат билдирган. Ҳақорат қилмаган, махфий маълумот тарқатмаган, одамларни судга қарши чақирмаган. Ҳуқуқшунос сифатида қонунни ўқиган, савол берган ва ўз позициясини айтган. Бу адвокатлик ваколатидан четга чиқиш эмас. Бу адвокатнинг ўз вазифасини бажаришидир. Адвокатнинг позициясига қўшилмаслик мумкин. Уни бошқа ҳуқуқий далиллар билан рад этиш ҳам мумкин. Аммо ҳуқуқий саволга жавоб бериш ўрнига, “бу саволни беришга ҳаққинг йўқ”, деган мазмунда муносабат билдириш баҳсни ҳал қилмайди. Аксинча, яна бир оғир саволни туғдиради. Адвокат суд қарорини ҳам очиқ таҳлил қила олмаса, у кимнинг қарорини таҳлил қилиши керак? Судга ҳурмат ҳар бир қарор қаршисида сукут сақлаш дегани эмас. Ҳақиқий ҳурмат қарорни жиддий ўқиш, асосли савол бериш ва унга ҳуқуқий жавоб кутишдир. Суд қарорини юқори суд ўзгартиради. Лекин суд қарорини жамоатчилик ҳам ўқийди, олим ҳам ўрганади, журналист ҳам муҳокама қилади, адвокат ҳам ҳуқуқий баҳолайди. Чунки одил судлов ёпиқ хонада эмас, жамият ишончи олдида яшайди. Ҳурматли суд матбуот хизмати, адвокатнинг сўзидан ваколат бузилишини излашга шошилмаслик керак. Унинг далилига далил, қонунига қонун билан жавоб берилса, суднинг обрўси ҳам, ҳуқуқий мунозаранинг савияси ҳам ошади. Адвокатни сукут сақлашга ўргатиш осон. Аммо сукут сақлайдиган адвокатура бор жойда, бир куни ҳақиқатни айтадиган одам топилмай қолиши мумкин. Абдумалик Абдуллаев 👉@yuristkadr

Фозилжон Отахонов. Фаҳрий судья, шу билан бирга жуда кўпчилик юристларнинг устози. Хўжалик судида мактаб ярата олган инсонлардан. Акани Тошкент шаҳар хўжалик суди раиси бўлиб ишлаган даврини эслаганлар билади, ўша пайтдаёқ ахборотлаштириш ишларини бошлаб юборган. Ўшандаёқ судга келадиган аризаларни қабул қилиш, судьяларга йўналтириш, ишни кўриш муддатларини белгилаш ва назорат қилиш, суд ажримларини чиқариш каби ишларни электрон тарзда юритадиган база қилинган эди эслайсизларми? Бошқа судлар қоғозга кўмилиб ўтирган вақтда, хўжалик судларидаги ишларнинг ярми электрон тарзда юритишга ўтиб бўлган эди. Нечинчи йиллар эди бу? 2003-2004 йиллар эдими? Юрист сифатидаги фаолиятимни юридик хизмат ходими сифатида бошлаган вақтимда йўл кўрсатадиган устозлар жуда кам бўлган. Фозилжон Отахонов ёзган китобларни ўқиб юридик хизматнинг моҳиятини англаганман ва шу асосида фаолиятимни йўлга қўйганман. Мана бу интервьюни албатта кўриш керак. Фозилжон ака шаҳар хўжалик суди раиси бўлиб ишлаган вақтда Бош вазир ўринбосари бўлиб ишлаган амалдор юритувидаги суд ишига аралашиб, у кишига топшириқ берганини эсламоқда. Ўшанда ака амалдорга суд ишига аралашишга ҳақи йўқлигини яхшилаб тушунтириб қўйган экан. Хатто, таъсирли бир мансабдорлардан бири суд ишини ҳал қилиш талабини бажармаганлиги учун, у кишига нисбатан автоавария ташкил қилганини ҳам эслабдилар. Қандай даврлар эди-а? Бугун судлар мустақиллигининг аҳамиятини яхши англаган инсонлар ўша пайтларда мавжуд бўлган ва ҳозирда ҳам ўзини сақлаб қолишга ҳаракат қилаётган расвогарчиликларга қарши курашмоқда. Осон бўлмаётганини ҳам кўриб турибмиз. 👉@yuristkadr

Судьяларнинг интизомий фаолиятини оддий суд маъмурчилиги орқали назорат қилиш мақсадга мувофиқ эмас. Зеро, суд маъмуриятининг асосий вазифаси суд фаолиятини ташкилий ва техник жиҳатдан таъминлашдан иборат бўлиб, унга судьяларнинг интизомини назорат қилиш ваколатининг берилиши судьянинг фаолиятига нисбатан асоссиз таъсир эҳтимолини юзага келтириши мумкин. Айниқса, ҳудудий судларда кадрлар хизмати ёки бошқа тузилмалар масъулларининг мазкур ҳудуддаги судьяларга интизомий талаблар қўйиш имконияти маъмурий бўйсунув ва судьялик мақоми ўртасидаги мувозанатнинг бузилишига олиб келиши мумкин. 👉@yuristkadr

Пойтахт суди қаттиқ адашмоқда Тошкент шаҳар судлари ҳуқуқшунос – блогер Камолиддин Абдумаликовичнинг суд қарори юзасидан билдирган муносабатига раддия билан чиқибди. Яна ўша “услуб”да. Камолиддин Тошкент шахар суди жиноят ишлари бўйича судлов ҳайъатининг қарори юзасидан ВМнинг 975-сон қароридан келиб чиқиб, танқидий фикр билдирган. У мобил комплекслар жаримаси бўйича Ўзбекистонда ягона суд амалиёти ўрнатилгани ва бу бўйича Олий суд томонидан ҳам алоҳида тушунтиришлар берилганини жон куйдириб гапирган. Камолиддин фақатгина бир нарсани, у ҳам бўлса, мобил комплекслар жаримаси бўйича бутун Республика ҳудудида бир хил суд амалиёти ишлаши кераклигини айтмоқда. Билдирилган фикрларда ҳеч қандай ғараз йўқлиги, аксинча, кўпчиликнинг қонуний манфаатларини кўзлаб ҳаракат қилингани шундоқ кўриниб турибди. Тошкент шаҳар судлари эса Камолиддиннинг фикрларини инкор қилиб, яна унинг ўзини маломат қилиш йўлига ўтиб олибди. Эътиборлиси, шаҳар судларининг инкори бирор-бир қонунчилик нормаси билан асосланмаган. Жумладан, “қонунга кўра, қуйи суд қарорларига фақат юқори суд инстанцияси ҳуқуқий баҳо бериш ваколатига эга” деган фикр бирор-бир ҳуқуқий асосга эга эмас. Чунки, бирор-бир қонунчилик нормасида судларнинг қарорларига юқори судлардан бошқа ҳеч ким баҳо беришга ҳақли эмас деган талаб мавжуд эмас. Шу ўринда, Тошкент шаҳар судларига яна бир бор эслатиб ўтиладики, суд қарорларига нисбатан жамоатчилик баҳоси ва процессуал баҳо бошқа-бошқа нарсалар. Исталган фуқаро қўлига тушиб қолган исталган суд қарори юзасидан ижтимоий тармоқда ёки бошқа ахборот майдонида ўз фикрини, таъбир жоиз бўлса, ўз баҳосини бериши мумкин. Мисол учун, оддий ўқитувчи суд қароридаги орфографик ёки ҳисоб-китоблардаги хатолик ҳақида танқидий фикр билдириш ҳуқуқига эга. Худди, шунингдек, исталган ҳуқуқшунос суд қароридаги қонунни хато қўллаш ҳолати юзасидан ўз муносабатини очиқ айта олиши мумкин. Масалан, суднинг қарорида “Меҳнат кодексининг 725-моддасига асосан ходимдан тушунтириш олинмаган” деб ёзилган бўлса, ижтимоий тармоқда “ие, Меҳнат кодексида 581-модда бор холоску, қандай қилиб, унда 725-модда бўлиши мумкин” дейиш нормал ҳолат. Шунингдек, аксинча, қайсидир жамоатчилик фаоли интернетда суд қарорини олиб “адолатли судга қойил қолиш керак, фалончини оқлаб, жуда зўр қарор чиқарибди, мана бу нормани жуда тўғри қўллабди” деб судни мақташи мумкин. Юқоридаги ҳар икки ҳолатда ҳам фикр билдирувчилар қонун талабини бузмаган бўлади, чунки, улар бу вазиятда Конституциянинг 33-моддасидаги фикрлаш эркинлигидан фойдаланаётган бўлади. Айнан мана шуни бир вақтнинг ўзида суд қарорига нисбатан жамоатчилик баҳоси дейиш мумкин. Энди, ИПК, ФПК, ЖПК, МСИЮтК каби кодексларга мувофиқ қуйи судларнинг қарорлари устидан апелляция, кассация ва тафтиш тартибида шикоят келтириш ва ана шу шикоятлар асосида қуйи суд қарорига баҳо бериш – бу суд қарорига процессул баҳо бериш ҳисобланади. Бунда тарафлар томонидан қуйи судларнинг қарорлари устидан юқори судларга шикоят бериш уларнинг ҳуқуқидир. Агар шикоят бермаса, суд қарори юқори судлар томонидан баҳоланмайди. Тўғрироғи, процессуал тартибда баҳолаш амалиёти юзага келмайди бу ерда. Лекин бу суд қарори ёки судьянинг хатти-ҳаракатларини жамоатчилик томонидан мавжуд чегара (туҳмат ёки ҳақорат)дан чиқмаган ҳолда муҳокама қилинишига, салбий ёки ижобий баҳоланишига ҳеч қандай тўсқинлик қилмайди. Пойтахт судининг баёнотидаги нохолисликни яна нимада кўриш мумкин? Жуда оддий мисол билан тушунтираман. Жамоатчилик фаоллари интернетда қайсидир суд қарорларини мақтаса ва кўкларга кўтарса, шаҳар суди “йўқ, ундай деманглар, суд қарорига фақат юқори суд баҳо беради” деб тўполон қиляптими? Албатта йўқ. Бундай иддаолар суд қарори фақат салбий баҳоланганда, танқид қилинганда янграяпти холос. Аслида иккаласи ҳам бир нарсаку, ҳар иккиси ҳам суд қарорига баҳо беришку, шундай эмасми? 👉@yuristkadr

Бу ҳафтадан Ижтимоий ҳимоя тизими ходимларининг малакасини ошириш марказида юрист ва кадр мутахассислари учун белгиланган 2 - гурух ўқув курсига старт берилди. Дарслар қизғин, устозимиз Мухаммадамин тингловчиларга саволларига эринмасдан жавоб беришмоқда. 📞 Сиз ҳам рўйхатдан ўтинг ёки телеграмга ёзинг: 👩‍💻 @yuristkadr_menejer 📱 +99890-010-86-15 📲 Бизни кузатинг: Telegram I Instagram I Youtube

Магистратурада ўқишда хотин-қизларга бериладиган имтиёзлар Ўзбекистон Республикаси қонунчилигида хотин-қизлар, хусусан, турмушга чиққан ва фарзандли аёлларнинг олий таълим (магистратура) олишини қўллаб-қувватлаш учун бир қатор муҳим имтиёзлар белгиланган. Қуйида ушбу имтиёзлар ва уларнинг ҳуқуқий асослари келтирилган: 1. Магистратура контракт пулларини давлат томонидан тўлаб берилиши Бу энг катта имтиёз бўлиб, давлат олий таълим муассасаларининг магистратура босқичида тўлов-контракт асосида ўқиётган барча хотин-қизларнинг контракт суммалари давлат бюджети ҳисобидан қоплаб берилади. Ҳуқуқий асоси: Ўзбекитон Республикаси Президентининг 2022 йил 7 мартдаги ПФ-87-сонли Фармони ҳамда Вазирлар Маҳкамасининг 2022 йил 15 августдаги 447-сонли қарори. Шартлари: - Фақат давлат ОТМлари учун амал қилади (нодавлат ва хорижий ОТМлар бундан мустасно). - Контракт суммаси қайтариб бермаслик шарти билан (грант каби) тўланади. - Талабгор ҳар йили 15-сентабргача ўзи ўқиётган ОТМ ректори номига ариза бериши шарт. - Магистратурага кириш учун хорижий тилни билиш даражаси ҳақидаги миллий ёки халқаро сертификат (IELTS, CEFR ва ҳ.к.) талаб этилади. 2. Оналар учун академик таътил ва ўқиш шаклини ўзгартириш Фарзандли бўлган ёки ҳомиладор талаба аёллар учун ўқиш жараёнида танаффус олиш ёки қулайроқ тартибга ўтиш ҳуқуқи берилган. - Академик таътил: Талаба аёллар ҳомиладорлик ва туғиш, шунингдек, болаларни парвариш қилиш учун академик таътил олишлари мумкин. Бу даврда талаба сафидан чиқарилмайди. - Таълим шаклини ўзгартириш: Академик таътилдан қайтгач ёки ўқиш давомида эҳтиёж туғилганда, талаба аёл ўз аризасига кўра ўқишни масофавий шаклига ўтказиши мумкин (агар мазкур йўналишда шундай шакл мавжуд бўлса). Ҳуқуқий асоси: Вазирлар Маҳкамасининг 2021 йил 3 июндаги 344-сонли қарори билан тасдиқланган "Олий таълим муассасалари талабаларига академик таътил бериш тўғрисидаги Низом". 3. Фоизсиз таълим кредитлари Агар аёл магистратурада нодавлат ОТМда ўқиса ёки бошқа сабаб билан давлат грантини ололмаса, имтиёзли кредитдан фойдаланиши мумкин. Шарти: Хотин-қизлар учун таълим кредити 7 йил муддатга фоизсиз (аслида фоизларни давлат тўлаб беради) берилади. Ҳуқуқий асоси: Президентнинг 2022 йил 7 мартдаги ПФ-87-сонли Фармони. манба: Lex.uz 👉@yuristkadr

Ишга тиклаш ишининг асоссиз чўзилишига ким айбдор? Ишга тиклаш судларида ишни кўрувчи судьялар нима учун қийналади? Асосан, иш берувчининг вакиллари қийинчилик туғдиради судларга. Мисол учун, интизомий жазо сифатида ишдан бўшатиш ҳақида буйруқ чиқарилган бўлса, иш берувчининг вакили дастлабки суддаёқ барча ҳужжатларни ўзи билиб судга тақдим этса бўлади. Шунда бутун бошли суд ишини бор-йўғи иккита суд мажлисидаёқ тугатишга эришиш мумкин. Ахир, бундан ҳар икки томон ҳам, ходим ҳам, иш берувчи томони ҳам бирдек манфаатдорку, шундай эмасми? Бизда нима бўлади? Аслида қандай иш кетаётганини билиб борган иш берувчининг вакили одатда биринчи судга қуп-қуруқ боради. Суд сўраган ҳужжатларни кейинги судда тўлиқ тақдим этмайди, кейингисида ҳам бир-иккитаси қолиб кетади. Ва шу тарзда 20 кунда ҳал бўлиши керак бўлган иш 2 ойга чўзилиб кетади. МК 174-моддаси бўйича исботлаш мажбурияти иш берувчидами, лекин ҳужжатларни вақтида тақдим этмадими, демак, ишга тиклаш ишининг чўзилишига асосан иш берувчи томони айбдор. 👉@yuristkadr

#таклиф "Вазифасини бажарувчи" мақоми бўйича Давлат давлат фуқаролик хизматчилари фаолиятида "в.б" амалиётидан кенг фойдаланмоқчими, демак, бу мақомнинг ҳуқуқий тавфсифи қонунчилик билан белгиланиши керак. 👉@yuristkadr

АЛИМЕНТ ТЎЛАМАСАМ ҲАМ ОТАЛИК ҲУҚУҚИДАН МАҲРУМ ЭТИЛАМАНМИ? САВОЛ: Оилам била алохида яшайман. 2 та вояга етмаган фарзандим аёлимда. Болаларимни ҳабар олиб тураман, лекин алимент тўлашни истамайман. (Пулни болаларимга ишлатадими йўқми) Аёлим мени оталикдан маҳрум қиламан деб қўрқитиб, судга ариза берибди. Алимент тўламасам ҳам оталикдан маҳрум этиламанми? ЖАВОБ: Аёлингиз сизни қўрқитгани йўқ, аксинча тўғри айтган.

Оила Кодексининг 79-моддасида ота она ота-оналик мажбуриятларини бажаришдан бош тортса, шу жумладан алимент тўлашдан бўйин товласа, узрсиз сабабларга кўра ўз боласини туғуруқхона ёки бошқа даволаш муассасасидан, тарбия, аҳолини ижтимоий ҳимоялаш муассасаси ва шунга ўхшаш бошқа муассасалардан олишдан бош тортса, ота-оналик ҳуқуқини суиистеъмол қилса, болаларга нисбатан шафқатсиз муомалада бўлса, жумладан жисмоний куч ишлатса ёки руҳий таъсир кўрсатса, муттасил ичкиликбозлик ёки гиёҳвандликка мубтало бўлган бўлса,ўз болаларининг ҳаёти ёки соғлиғига ёхуд эри (хотини)нинг ҳаёти ёки соғлиғига қарши қасддан жиноят содир қилган бўлса, ота-оналик ҳуқуқидан маҳрум қилиниши мумкинлиги белгиланган. Ҳозирда сиз ҳам алимент тўлашдан бош тортаётган бўлсангиз, сиз ҳам юқоридагиларга асосан оталик ҳуқуқидан маҳрум этилишингиз мумкин.

Бундан ташқари ушбу кодекснинг 116-моддасида вояга етмаган ёки вояга етган меҳнатга лаёқатсиз, ёрдамга муҳтож болаларига алимент тўлаш ҳақидаги суднинг ҳал қилув қарорини бажаришдан бўйин товлаган шахслар ота-оналик ҳуқуқидан маҳрум қилиниши ёки жиноий жавобгарликка тортилиши мумкинлиги яна ҳам аниқ кўрсатилган. Шу сабабли масъулиятсизлик қилмасдан мажбуриятингизни ўз вақтида бажаришингизни маслаҳат берамиз, акс холда муқаддас бўлган оталик ҳуқуқингиздан маҳрум бўлиб қолишингиз ҳеч гап эмас. Экспертимиз: Эъзозабону Мамаризаева Telegram🚀I Instagram 📷 I Youtube 🎬

Сергили туманидаги “Яккасарой”судидаман. Нега, ахир Яккасарой деган алоҳида туман борку деган савол туғилиши мумкин, шундай эмасми? 👉@yuristkadt

Судлардаги электрон табло ҳақида тасаввур   Биз айтаётган электрон таблони оддий телевизор эмас, Digital Signage тизими сифатида йўлга қўйган маъқул. Digital Signage тизими деганда, дисплей (монитор)лар, бошқарув компьютери, локал тармоқ/интернет, махсус дастурий таъминот тизими, овозли эълон қилиш тизими ва маълумотлар базаси билан интеграция қилинган системани тушунишимиз керак.   Битта суд биноси учун камида 2 та алоҳида-алоҳида мониторлар керак. Бунда 1-монитор — суд биносининг кириш қисмига жойлаштирилса, 2-монитор бинонинг суд заллари жойлашган қаватига жойлаштирилади.   Бинонинг 1-қавати кириш қисмига ўрнатилган 1-мониторда тахминан шундай ёзувлар бўлади:

Вақти: 15.20 Фуқаролик иши рақами №2-1002 - Судья Р.Бобожонова Даъвогар Д.Эшпўлатов, Жавобгар Б.Эшпўлатова 5-суд зали Кутилмоқда.

  Бинонинг суд заллари жойлашган қаватидаги 2 ва асосий мониторда эса мана бундай ёзувлар бўлади:

БУГУНГИ СУД МАЖЛИСЛАРИ № 1002-сонли иш – 1-зал – Давом этмоқда № 1305-сонли иш – 2-зал – Бошланмоқда № 2403-сонли иш – 3-зал – Кутилмоқда № 5231-сонли иш – 5-зал – Кечикмоқда

  Шунингдек, электрон таблога уланган овозли эълон ускунаси кетма-кетликда мана бундай хабарни эълон қилиб туради:  

“Диққат, 1305-сонли фуқаролик иши иштирокчиларини 2-суд залига таклиф қиламиз”.

  Менимча, бу нарсалар учун қиммат ускуналар, серверлар ёки қандайдир мураккаб техник жиҳозлар бўлиши шарт эмас. Битта суд биносидаги электрон табло учун бир дона марказий компьютер, 2 та дисплей (монитор), дастур ва локал тармоқ бўлса етарли. Ва албатта, “Digital Signage”га ўхшаган тизим.   Суриштирдим, битта суд биноси учун 2 та электрон таблолик пилот тизимини йўлга қўйиш учун ўртача 60 млн. сўм атрофида маблағ керак бўлар экан. 200 та суд биноси учун 12 млрд. сўм атрофидаги маблағ дегани бу.   Балким, жуда оддий вариантлар ҳақида айтаётгандирман, судлар учун мосланган алоҳида вариантлар ҳақида ўйлаш керакдир. Лекин муҳими, судларда электрон табло тизимини жорий қилиш у қадар мураккаб амалиёт ва етиб бўлмайдиган орзу эмас. 👉@yuristkadr

Тошкент шаҳар судлари нима демоқчи ўзи? Тошкент шаҳар судларининг навбатдаги баёнотидан ҳам кўриниб турибдики, улар кўтарилган муаммони ҳал қилиш ва берилган таклифларни тўғри қабул қилиш ўрнига яна ўша “усул”дан, шаҳсиятга тегиш ҳамда ҳаёлий иддаолар йўлидан кетибди. Уларнинг ўрнида бўлганимда, масалан, суд мажлисига чақириш амалиётини электрон табло тизимига ўтказиш ҳақидаги таклифни дарров қабул қилган бўлардим. Шундай қилардимда, энг биринчи навбатда, Тошкент шаҳар судлари учун қурилаётган янги бинодаги жиҳозлаш сметасига ўзгартириш киритиш ва биринчи бўлиб, шу бинода электрон таблоларни намуна сифатида ишга тушириш ҳақида ўйлар эдим. Ачинарли жойи шундаки, билдирилган раддияда табло деган оддий технологияни ишга тушириш учун давлат хизматлари марказлари, банклар ва лавашхона кабиларда хизматлар пуллик эканлиги сабаб қилиб кўрсатилмоқда. Кулгили томони, судларда бу нарсани жорий этиш таклифини билдириб ва давлат бюджетидан таъминланадиган судларни ўша тадбиркорлар билан таққослаб, гўёки “масаланинг ижтимоий-сиёсий томонларига” аҳамият бермабмиз. Бу билан судларда суд ходимларига ва судга ташриф буюрувчи фуқароларга қулайлик яратадиган тизимни йўлга қўйиш учун пул йўқ деяптими булар? Судларда бунинг иложи йўқ демоқчими? Ундай эмас шекилли? Тарафлар судларга, хусусан, иқтисодий, фуқаролик ва маъмурий судларга ўз-ўзидан чиқолмаса керак? Миллионлаб, миллиардлаб сўмлик давлат божлари, суд ҳаражатлари тўланяпти шекилли? Мисол учун, 5 млрд. сўмлик қарзни ундириш учун иқтисодий судга даъво киритадиган тадбиркор судга 100 млн. сўм давлат божи тўлайди. Биргина ишда шунча давлат божи. Энди, ўнлаб, юзлаб, минглаб ва ўн минглаб даъволар учун қанча давлат божи тўланишини тасаввур қилаверинг. Судлар ҳам қайсидир маънода фуқароларга ва тадбиркорларга хизмат кўрсатмоқда ва текинга эмас, албатта. Тўланган суммаларнинг бир қисми Суд ҳокимияти органларини ривожлантириш жамғармасига тушиши ҳаммага маълум нарса. Судларнинг моддий-техник таъминоти, хусусан, аҳоли учун қулай бўлган замонавий технологияларни жорий этиш ҳам айнан мана шу жамғармадаги маблағлар ҳисобидан амалга оширилади. Мени ҳайрон қолдираётган нарса шуки, шаҳар суди мана шу электрон табло деган қулай технологияларни жорий этиш ҳақида бир оғиз таклиф киритса, ҳеч ким йўқ демайди, қайтанга қўллаб-қувватлайди. Буни аниқ биламан. Ҳар ҳолда, “Одил судлов – 2030” стратегиясининг моҳиятини яхши англаган исталган одамда шундай фикр бўлиши аниқ. Лекин нега Тошкент шаҳар судларида бундай позиция? Шу ажаблантиряпти мени. P/S: Майли, масалага чуқурроқ кирамиз, муаммони кўтардикми, берилган таклиф ярим йўлда қолиб кетмаслиги керак. Керак бўлса, мутахассисларини топиб, ҳисоб-китобларини ишлаб чиқамиз ва бу масалани расмий таклиф билан раҳбарият даражасигача олиб чиқамиз. Фикри ожизимча, узоғи билан 2 ичида Тошкент шаҳар ва Тошкент вилоятидаги судларни ҳамда 5 йил ичида бошқа ҳудудлардаги судларни электрон табло тизимига ўтказиш мумкин. Бунинг иложи бор деб ўйлайман. Ҳозир унақа эски даврда эмасмиз. 👉@yuristkadr

НАВБАТДАГИ КУРСЛАРГА РЎЙҲАТГА ОЛИШ БОШЛАНДИ: 3 хил имконият бор: 🔹 1. ОНЛАЙН КУРС (Ишдан ажралмаган ҳолда) * Бошланиш вақти: 5 октябрдан * ⏰ Давомийлиги: 18 кун давомида (кунига 2 соат) * 🕒 Вақти: 15:00 дан 17:00 гача (ўзгарувчан вақт) * 🎓 Умумий соат: 36 соат 2. ОФЛАЙН КУРС (9 кун кетма кет) * Бошланиш вақти: 21 сентябрдан * ⏰ Давомийлиги: 9 кун давомида (кунига 4 соат) * 🕒 Вақти: 9:00 дан 13:00 гача * 🎓 Умумий соат: 36 соат 🔹 3. ОФЛАЙН КУРС (Дам олиш кунлари) Жонли ва чуқурлаштирилган билим истаганлар учун! * Бошланиш вақти: 10 октябрдан * 🗓 Кунлари: Фақат шанба ва якшанба (5 ҳафта) * 🎓 Умумий соат: 40 соат 📞 Рўйхатдан ўтиш учун ҳозироқ қўнғироқ қилинг ёки телеграмга ёзинг: 👩‍💻 @yuristkadr_menejer 📱 +99890-010-86-15 📱 +99893-444-48-71 📱 +99833-993-18-80 📍 Манзил: Тошкент ш., Чилонзор тумани, Чўпонота кўчаси, Ц-мавзе, 4-Б уй. 🚇 Мўлжал: М.Улуғбек метроси. 📲 Бизни кузатинг: Telegram I Instagram I Youtube

Одамларнинг хаёти учун хавфли бўлган мана шунақа қуриган дарахтларга эътибор бермаймизда, яшнаб ўсиб турган дарахтларни кесишга ишқибозмиз. Битта шамол келса ағнайман деб турибди, бу дарахт. Худо кўрсатмасмн, ўша вақтда тагидан одам ўтиб кетаётган бўлса нима бўлади? 👉@yuristkadt